Search form

Ebavevuvu 45

Yosefa tauna giawamogatalena.

1E ada Yuda yana ifufu giluyabuna, au Yosefa keke anafaiweya gina atuvefaili yana togugaiyavo matatabudi matadiya, ada givonediga, “Matatabumi wana yegemo!” Ada keke tamo togugai wadedeku Yosefa nodi tova-nai wagaine tauna giawamogatalena tubuiyanavo wagaidiya. 2Ada gitagiya bonana lakaina, e ada meItipita inogalina ke badiyavo valeyana inauwe Felo yana manuwa anatomiyayavo wagaidiya iifufuyena.

3Ada Yosefa yana tagiya muline tubuiyanavo givonediga, “Iya Yosefa. Velemoena, kamaku wayawaina?” Aku tubuiyanavo iveyamata, faina iitainanana banae tauna Yosefa gimidimididi matadiya, ada aseasedi giakolukoluna. 4E ada kaduwe Yosefa tubuiyanavo givonedi, “Maita wanaelai lilivakuya.” Ada inau wagaine, givonediga, “Iya amitubuluga Yosefa, iya tuwaina wavekimoneyeku ialiyeku Itipita wagaine. 5Aku keke wana asekolukolu, e ada keke wana ivenuwakoyomi taumiyavo wavekimoneyeku idedeku faina. Yaubada Banae giimiliku wai ganagona kaliva yawaidi gana kibababalena faina. 6Ada loka anamalamala bademowa anavelu fafali taidei wagaine aku malamala nimafafalina imiyamiya, keke bakula ada keke bavagu. 7Aku Yaubada giimiliku wai ganagona ke yawaimi gana kibababaledi ada taidei wagaine amiyoo gina veinala lakaina. 8Taidei faina keke imi wada imiliku idedeku, aku velemoena Yaubada giimiliku. Banae giseku Felo anatokivetunuga, ke yana kalivayavo matatabuna yadi kauveya, ada meItipita matatabuna aditoveimeya. 9E ada wana maduyewami kamaku wagaine ke wana vonena, ‘Taidei anafaiweya natu Yosefa givona, Yaubada giseku fafali Itipita matatabuna anatoveimeya. Ada keke una vedidiu, una maduobuelai wagaikuya. 10E ada una vemelala Goseni, tainei Itipita yana ebaveimeya negenine, ada lilivakuya unamiya, oyeni ke natumomo ada tubumomo, ke ya kevakevamomo ada ya giba matatabuna nodi. 11Ada wadedeku gana itaveyabini, faina loka anamalamala nimafafalina aimo gielaelai. Aenanai oyeni ke ya gabumomo ada ya kevakevayavo nodi wana vefanifani-mowa.’”

12Ada kaduwe Yosefa tubuiyanavo givonediga, “Bademowa taumiyavo matamiya waitana, ada oye akutubuluga Beniyamina, ani velemoena iya Yosefa gaifuifufu wagaimiya. 13Ada wananau kamaku wana vonena gavaiyamu meItipita yadi vemoimoina wagaikuya ke gaitoma matatabuna bademowa waitadi. Ada kamaku wana vagaule wanamadu obualiyena idedeku.” 14Ada Yosefa yana ifufu muline, ginau taina Beniyamina giatulauwina ke adiselu ivetagitagiya. 15Ada kaduwe tubuiyanavo matatabuna giveyaugidi ke gitagigidi. E ada muliya-yo tubuiyanavo iifufu wagaine.

16Ada valeya ginau Itipita anakini yana manuwa anatomiyayavo wagaidiya vaita Yosefa anatubulugayavo ielai, ada Felo ke yana togugai lakaidiyavo matatabudi ivemwamwala. 17Ada Felo Yosefa givonenaga, “Atubuluga-momo una vonedi taidei ina gugaiyena: Yadi giba ina abulakalakata yadi doniki wagaidiya ke inayewa Kenani wagaine, 18ada tama ke ya gabu ina abidi inayewe-aliyedi wagaikuya. Ada babi iwakana gana veledi Itipita anafafali wagaine, kaduwe aa iwakana aimo ina kanikani idedeku. 19Kaduwe, tubuiyamomo una vonedi tufona saliyoti lakaidi inavaidi Itipita wagaine-deya ke ina nauwedi vavinediyavo ke natudiyavo biyabiyamidi faidiya. Ada kaduwe tamami inaabi inaaliyena. 20E aku keke ina venuwana kai yadi giba tufona inamadu-yabuyabudi, faina fafali Itipita matatabuna yana iwakana ani badi faidiya.”

21E ada Isileli natunavo kaliva taidei anafaiweya igugai: tufona saliyoti Yosefa giveledi anafaiweya Felo giveimeya, ada kaduwe adiabwaka giveledi wai faina. 22Ada tawaganavo seyana seyana adinuya evagudi givelavelau, aku taina Beniyamina ani 300 siliva ke ananuya nimafafalina givelena. 23Aku taidei gaitoma-dina ani giimilidi tamana wagaine: doniki kaliva aditeni wagaidiya Itipita anagiba iwakadi gidododi, kaduwe doniki vevine aditeni wagaidiya witi ada beledi ke tufona anaabwaka wai faina. 24E ada tubuiyanavo giimilidi inanau, ada itauya ani givonediga, “Keke wana gavekwavekwageya waiya!”

25E ada Itipita-deya iyegemo ada ilaka inau fafali Kenani wagaine tamadi Iyakobo gimiyamiya-deya. 26Ada tamadi ivonenaga, “Yosefa aimo wayawaina! Ada malinai banae fafali Itipita matatabuna anatoveimeya!” Aku Iyakobo yana nuwanuwa gitufa. Yadi vona keke gida vetumagane. 27E aku iifufuyena gaitoma matatabuna Yosefa giifufuyedi mamauwe ada kaduwe saliyoti giitadi Yosefa giimilidi anavedodoga faina, au tamadi nuwana giveiwaka. 28Ada Isileli givonaga, “Ina iwakana. Taumada natuku Yosefa aimo wayawaina. Gananau ganaita-yo muliya ganaalika.”

Ebavevuvu, Mosese yana buki nagona

© Wycliffe Bible Translators, Inc. All rights reserved.

More Info | Version Index