Search form

Ebavevuvu 47

1-2E ada Yosefa tawaganavo adinimafafalina givenuwadadanedi ada giabidi ginauwedi Felo wagaine ke matane givemidididi aku givona, “Felo, kamaku ke akutubulugayavo bademowa ielai Kenani wagaine-deya. Ada yadi sifi, yadi goti ke yadi bulumakau ada yadi giba matatabuna nodi ialiyedi, ada tova taidei imiyamiya Goseni wagaine.”

3Ada Felo Yosefa tawaganavo gitolidadanedi, givona, “Gavana imi yami gugai?”

E ada ilufata, ivonenaga, “Kauveya, ime toitaveyabina sifi, anafaiweya tova tuwaina wagaine tamameyavo ivetoitaveyabina sifi.” 4Ada kaduwe ivone-vagilena, “Ime aelai idedeku anamiya tova maufona wagaine, faina loka lakaina fafali Kenani wagaine ada yama kevakeva keke adiga. Taidei faina meyameyaganina uda awaegema adavemelala Goseni wagaine.”

5Ada Felo Yosefa givonena, “Tama ke atubulugamomo bademowa ielai wagainiya, 6ada fafali Itipita matatabuna mataniya. Itipita anafafali iwakana wagaine tama ke atubulugamomo unasedi ina vemelala. Una awaegedi ke Goseni wagaine inamiya. Aku kai ualamanedi wagaidiya gavega kevakeva adiitaveyabina anaalamana lakaina wagaidiya aga unasedi yaku kevakevayavo ina itaveyabidi.”

7Muliya kaduwe Yosefa tamana Iyakobo giabi ginauwena Felo matane. Ada Iyakobo Felo givesiuleyena muline,8Felo gitolidadanena, givonaga, “Gavaiyei amalamala?”

9Ada Iyakobo gilufata, givonaga, “Bademowa gamiyamiya malamala 130, ada malamala-dina vitadi. Aku iya aimo keke gada vesilakai anafaiweya kamakuweyavo.” 10Ada Iyakobo Felo giawanuwakabubuyena ke magigine-deya giyegemo.

11Ada Yosefa ani tamana ke anatubulugayavo babi iwakana velemoena giveledi Itipita anafafali seyana wagaine ivewagana Lemusisi, anafaiweya Felo giveimeya. Wadedeku badi gisedi ina vemelala. 12E ada Yosefa tamana ke anatubulugayavo ada tamana yana yoo matatabuna, kaduwe biyabiyama adiyoo anafaiweya aa giveleveledi.

Yosefa ada loka-nai.

13Aku tova tayuwe wagaine aa keke-bamowa fafali matatabuna wagaidiya, faina loka dubudubula giyegemo. Ada Itipita ke kaduwe Kenani ikabekabebena lakaina faina loka. 14Ada Yosefa mani matatabuna givaidi witi adilaufata wagaidiya badi meItipita ke meKenani ikimokimone wagaine, ani mani-nai gialiyena Felo yana manuwa lakaina wagaine.

15E ada meItipita ke meKenani yadi mani giavaidi, au meItipita matatabudi ielai Yosefa wagaine ivona, “Aa uda velema, yama mani bademowa aluyabudi. Aku kai aa keke aga mataniya matatabuma anakwa.”

16Ada Yosefa givonediga, “Kai yami mani giavaidi, aga yami kevakevayavo wana aliyedi, e ada gana vedama aa gana velemi aku kevakeva ganavaidi aa fatana.” 17E ada yadi kevakevayavo ialiyedi Yosefa wagaine, anafaiweya yadi osiyavo, yadi sifiyavo, yadi gotiyavo, yadi bulumakauyavo ke yadi donikiyavo, e aku aa giveledi. Ada malamala-nai gialiyedi anafaiweya gidewedi givedama kevakeva givaivaidi aku fatadi aa giveleveledi.

18Ada malamala tayuwe giavaina aku malamala anavelu wagaine kaduwe iyewa-vagiledi Yosefa wagaine ada ivona, “Yama kauveya, keke amavita ana sewavuye wagainiya, au velemoena yama mani bademowa giavaina, anafaiweya yama kevakeva matatabuna oyeni gagana, ada keke tamo gavana gidatufo, tainei-mowa taumeyavo ke yama babi. 19Gavana anaiwakana mataniya, anakwa ada yama babi ina vegaitoma kavokavovo? Aku aiyada una kimonema kaduwe yama babi, aa anaivedavedama faina, e ada ime ana vetogugai yogoyogona o wagainiya aku yama babi ani o wagainiya. Waifei una velema ana bakula ada keke anakwa aku wayawaima ana miyamiya ada babi keke gina vemamava.”

20E ada babi matatabuna Itipita wagaine Yosefa gikimonena Felo faine. MeItipita matatabu-moedi yadi babi ivekimoneyedi, faina loka dubudubula giyegemona wagaidiya. Ada babi-dina Felo yana babi, 21ada Itipita anaetonaba tufone ke ginau tufone anakalivamomo ani Yosefa gigadi ivetogugai yogoyogona Felo wagaine. 22Aku tovebolavoiyavo gagana yadi babi ani keke Yosefa gida kimonedi, faina adivutuga aa Felo givele-vavagiledi wagaine adifaiweya. Taidei vuvuna keke yadi babi ida vekimoneyedi.

23Ada Yosefa kaliva givonediga, “Waitana, malinai bademowa imiyavo ke yami babi gakimonedi Felo faine, e ada waifei taidei wanavaidi ke babi-dina wagaidiya wana bakulidi. 24Aku bavagu wagaine bou anavenimafafalina Felo wana velena, e aku bou laufuli wana kiyabidi waifei bakula faidiya, anafaiweya aa taumiyavo ada yami manuwa anatomiyanavo ke natumiyavo nodi faimiya.”

25Ada kaliva ivona, “Ina iwakana! Yawaima ukibababaledi! Meyameyaganina yama kauveya mataniya nuwakalikali ananuwagana ke anuwaawaegau ana vetogugai yogoyogona Felo wagaine.”

26Ada tova tayuwe wagaine Yosefa veimeya gibubuna fafali Itipita faine ke gielai tova taidei wagaine, ina bavagu wagaine bou anavenimafafalina Felo faine, aku bou laufuli kaliva taudiyavo faidiya. Aku tovebolavoi gagana yadi babi Felo keke gidavai.

27E aku meIsileli imiyamiya Itipita yana ebaveimeya wagaine fafali Goseni-deya, ani wadedeku giba inuwagadi ke itubulalaga ada adiyoo giveinala-mowa. 28Ada Iyakobo Itipita gimiya malamala sevenitini, e ada anamalamala matatabuna 147. 29Ada yana tova alika bademowa givelilivane, au natuna Yosefa gidouwe gielai ada givonena, “Kai uvemwamwala wagaikuya aga nima unasena ubuku dibune ke una vonadabadaba vaita una vewaleku nuwakalikali ke dewa tunutunugina. Ani, tova-nai yawaiku gina avaina aga keke Itipita una tavuku. 30Keke idedeku-deya unatavuku, e aku unawaiku unayeweku Kenani, ada kamaku ke kubuku adididikuleya lilivadiya unaseku ke wadedeku ganadau.”

Ada Yosefa givonena, “Ganagugai uvona mamauwe.”

31Ada Iyakobo givona, “Una vonadabadaba wagaikuya vaita unagugai anafaiweya,” e ada Yosefa givonadabadaba wagaine. Ada Iyakobo kaduwe anayegana Isileli ani gitunuvala anaivi kuluwane ada giodu Yaubada wagaine.

Ebavevuvu, Mosese yana buki nagona

© Wycliffe Bible Translators, Inc. All rights reserved.

More Info | Version Index