Search form

Éxodo 12

Pa chinaashjop atesha (La Pascua)

1Pa Lhcaanvacle tasinôyem ti yiey pa Egipto pa Moisês shi' pa Aarón pa yit'esha:

2“Nôque jive'cla lhjunashelhjulh'am jayu avaatsheelh pa vatjutsa' lhjive'cla pa nincôôp. 3Anfacle'lhem lhacôm'a nant'ajôôj napi israelitas navôque: ‘Ca napu' nôjtajesha nôque jive'cla pa ave'lheelh'e ts'ivee jayu avaatsheelh ca acumelh'e pa ve'lha tashinshtaj lhaôs cat'ajesha pa tashinshtayche lhaôs na ajô'jelhsham. 4Pa vooy ca nicaajtaj papi napu'e pat'ajô'jam ca jaspa nituj lhacôm'a pa t'asjaan pan yiclôn, pa lhecheesh pan vooy pa yitsôt'ajesh pa jpôyich pa lhavelh shalheema ca nitujelh. Pa nita'natsjulhesh yiey pa t'ajô'jam ca jaspa ve'lheae ts'ivee pa ca nituj. 5Pa lhech vatôclô tajulhey ca ve'lha lhnincôp'a pa yitsu'ja shi' ca isa'. Isjop ca lhecha pa tashinshtaj lhaôs ja't'ajesha pa tashinshtayche lhaôs. 6Amjelhey ca asclaneelhsha'ne ca catorcetaja nôque jive'cla. Pa lhech nalhu alhacôm'aelh jayu ca ave'lhaaelh'e ts'ivee ca aclônelh ca nuutaja. 7Pa lhecheesh pa asclaneelhsha'ne pava lhavoyey pa vatôclô pa ap'aclaneshelh pa lhashivo shi' pa chishamnee yiey pava jpôyjey pan lhôveshelh'ôcji ti lhtujelh pa vatôclô. 8Pa lhech tulh atujelh pa t'asjaan chiyucluqui shi' pava t'aclooc t'apooysha'ne, shi' pava yucuvec ninôveyshi pa t'ajuya. 9Pa ya aj ca ve'lhaa ca atujelh pa t'asjaan ninôji' ja't'ajesha pa chiyneshi. Pa lhacôm'aa pa vatôclô ca chinyucluquiesh, pa lhshatech, pava lhafoc shi' shta pava lhavaclay. 10Pa ya ja ca ve'lhaa pa ca amônlhanit'elh ca nalhutaja. Ca nicaajtaj pa ca mônlhaa pa anapjunelh. 11Pa tatshaa ca uyjatshi'yelh pa acfiyi'yelh, pa acha'jelh na avcôjat'elh, pa afanisheshelh'in ca atujelh pa aclô'elh, lhayaash ti naashjajop atesha pa Lhcaanvacle.*xz* 12Pa lhech tulh yivaatsha jôquey jayu lhacôm'a na Egipto, pa jaclôn jayu pa vatjutsa' lhaôs napi ve'lha ts'ivee t'ajôj'esha'ne egipcios, pa chi' shta pava vatjutsa' lhcles pava lhclôy. Pa jaclôyitsha'ne jayu lhacôm'a pava lh'diosec papi egipcios. Yivaatsha ya Lhcaanvacle apis ti jayeetsha côque.

13“Pa vatvoyey yinôôclhanita jayu ca jaspa anôôclhanitshelha avaatsheelh pava jpôyjey yiey pavan lhôvelh'ôcji. Pa nôque lhjunash meelh yivaatsha ca jaclôntajsha'ne napi egipcios, pa tanca ve'lhaa avaatsheelh papu ca nivaf, lhayaash ca javantaj pava vatvoyey pa janaashjop jayu atesha. 14Côque nalhu tajulhey avaatsheelh ca aychavalhelhch'e shi' ca asnatshelh pa atc'ayasheshelhva'ne pa ôclôjeshelh na Lhcaanvacle. Pa aychavalhshelhch'een pa lhjunashjulh jayu ti ve'lha vatyôjijat'esh, ti yama jayu papi vatanavot shi' papi nijooylha vatacles. 15Lhtujelh jayu pava yucuvec ampava ca nôveyshi pava napu'yama nalhus. Pa lhe'naa pa vatjutsa' nalhu ca nitôôlhtajesh'e ya aj ca nôv'e' pava yicap'ofjatshi pa climshi yiey pava ajpôyjeyelh. Papu ca naôvtaj'e ca nitujtaj pava yucuvec yieyshi pava t'ajuya pava lhech napu'yama nalhus, pa chiyayjatshi jayu papi lhchifas israelitas pa chinclôn. 16Can lhjunash pa vatjutsa' nalhu tajulhey ca asnatshelh pa is ac'ayeshelhva'ne pa lhech lhjunasha jayu pa napu'yama nalhu. Pava lhech nalhus tan jayu ca chinatcumjiin, tsi'sha ca chinasnatesh pa lhôc papi ve'lhee ts'ivee nivacle. 17Ca chitc'aeeshva'ne pava yucuvec ampa ca nôveyshi cava t'ajuya,*xa* lhech côque nalhu ti tajulhey avaatsheelh ca aychavalhelhch'e, lhayaash ti lhech ja nalhu ti c'ayjatelh'e ja Egipto alhacôm'aelh avaatsheelh. Pa aychavalhelhch'e pa lhjunashjulh jayu ti ve'lha vatyôjijat'esh, ti yama jayu papi vatanavot shi' papi nijooylha vatacles. 18Pa atujelh jayu pava yucuvec ninôveyshi pava t'ajuya pa nuut pa lhech nalhu catorce pa vatjutsa' jive'cla pa yôj'esha'ne jayu pa nuut pa nalhu veintiuno pa lhech jive'cla. 19Pa ya aj ca nôv'e' jayu pava yicap'ofjatshi pa climshi yiey nava ajpôyjeyelh pava lhech napu'yama nalhus. Lhayaash papu ca naôvtaj'e ca nituj lhpa yucuve yieyshi pa t'ajuya chiyayjatshi jayu na yie' napi israelitas, lhama' jayu papi tosc'oya pa lhech lhjunash jayu shta napi tsitenas'e na yitsaat. 20Pa nôquen lhayaash ya aj ca atujelh pa ca naaan pan yieyshi pa t'ajuya. Yiey pa ca vi'tajelh'e avaatsheelh tsi'shaa ca atujelh lhpa yucuve ni'nôveyshi pa t'ajuya.’ ”

21Pa Moisês vancacheney lhacôm'a papi c'utsjasesh israelitas pa yit'esha: “Meelh'in pa acumelh'e pa ve'lha tashinshtaj ja't'ajesha pa tashinshtayche lhaôs t'ajuya na ajôôjam pa aclônelh ca jaspa asnatshelh pa lhjunash pa Chinaashjop atesha. 22Pava lhavoyey tajulhey ca nôvji' pa ve'lha titech. Pa nanjooylha ca acumelh'e ca ôcfeelhsham pava lhsashay pa hisopo, pa accheeshelheyshi pava vo'oy pa ap'aclaneshelh pava napu' vantsemajc'oya pa lhashi shi' pa chishamnee. Pa ya aj ca ve'lhaa papu avaatsheelh ca nôcfach'ee ca nitay'ôcji pava jpôyjey ti jôjjeclay ninalhua. 23Meelh pa Lhcaanvacle ca nôctajey ca niclônsha'ne papi egipcios pa yi'van jayu pava vo'oy ti yamqu'e pava lhashic pa naashjop atesha jayu pa jpôyich. Pa nôque lhjunash tanca nivashanem pa Lhcaanvacle ca nôc'ôcji nava ajpôyjeyelh avaatsheelh pa vancaclônjanaj.*xb* 24Côque vatyôjijat ach'anelhey jayu avaatsheelh shi' papi tôlhelh'atsham jayu lhjunashjulh jayu ti ôyjôlhôyech'esh vatyôjijat. 25Meelh avaatsheelh ca amjatelhsham ja cotsjaat jan yijutelh'ay jayu na Lhcaanvacle yiey pan t'ônashesh ti nifaclelh'am, pa tajulhey ca lhet lha môôjelhshi ca asnatshelh côque. 26Pa meelh ca naniy'ôstajeshelh'in papi acleselh: ‘¿Ta t'e yich'e' côque?’, 27vooy avaatsheelh at'eshelhem: ‘Côque vatôclô chiyclônem ti chiyisnatshem pa Chinaashjop atesha ti chiyôclôjesh pa Lhcaanvacle. Ti meelh pa lhech ti yiclônsha'ne capi egipcios, pa naashjop atesha cava lhajpôyjey papi israelitas papi yie'in pa Egipto. Pa nôque lhjunash pa yilhjensha'ne japi yijô'jelhshamsha'ne.’ ”

Pa lhechesh pa vooy papi israelitas tanjuyshichamch'e ti yôclôj. 28Pa nijooylha ti yicheyvatich'e ti yisnatesh lhacôm'a yiey pan t'ônasheshem ti yiyôjiesha pa Lhcaanvacle pa Moisês shi' pa Aarón.

Pa lhavafi papi vatjutsa' vatacles

29Tijonshajesh pa Lhcaanvacle yiclônsha'ne papi vatjutsa' lhcles papi egipcios.*xc* Lhech lhjunash shta pa vatjutsa' lhaôs pa faraón, pan chiyinvacleyan, pa chi' shta pa vatjutsa' lhaôs pan chiyôcfa' yiey lhpa vatvanc'ôcfajayte. Pa nôquee shta pava vatjutsa' lhcles pava lhclôy. 30Pa faraón papi lhcavos shi' shta lhacôm'a papi lhchifas nitshamch'e pa lhech tulh pa caaj pa uj vat'ôjôjesh pa vatacshinjayash yie' pan tuc'a'e lhacôm'a pa Egipto. Ampa ca ve'lhaa ca jpôyich'a ca ninôva'e pa ve'lha vaf. 31Lhech pa lhech tulh pa faraón vancacheney pa Moisês shi' pa Aarón ca nachey pa yit'esha:

—Meelh'in, pa ayelhjop napi yichifas avaatsheelh shi' napi israelitas. Meelhey ca ôclôjelh pa Lhcaanvacle yiey pan lhteetshelh'in. 32Acha'jelh shta java aclôyelh tashinshtas shi' java vôcôc yiey jan ônasheshelh'in, pa meelh'in clap. Pa a'lhelheyam pa Dios yivaatsha.

33Papi egipcios yifanishjat'in papi israelitas ca nôqu'in tatsha ca nitay'e pa lhavtsaat, lhayaash ti yaychavalhey ts'ivee yitsha ca lhacôm'aa ca nivafsha'ne. 34Papi israelitas yayjatshi pa chiyisnatesh climshi jôjjeclay ameyshi pava t'ajuya, pa yiclôpjalheshch'e pava t'uyjatshiyis pa yineshlhatapee ti tilho'jesh. 35Pa jô'tajesh ti yôfisjach'e pava tayôjijanesh pa Moisês, pa t'aalhshaan papi egipcios pava matas cojiyas clesanlhiy shi' pava nôcshi' clesanlhiy, pa nôquee pava vat'uyjatshiyis. 36Pa Lhcaanvacle yanshi' papi egipcios ca isa' ca natcufay meelh ti t'a'lhaan papi israelitas. Pa nôque lhjunash papi israelitas yitsaclayan'in papi egipcios.*xd*

Papi israelitas tayshi' pa Egipto

37Papi israelitas tay'e pa yitsaat Ramsês pa yichey pa yitsaat Sucot. Nichinatsjuulh papi ôcjeclôy shi' papi taôvclas. Pa yameyshi seiscientos mil papi yitsjôy ti yich'in. 38Papi lhech voqu'e papi acloj nivacle natôlhshiin, pa yichaaj shta pava acloj lhclôy tashinshtas shi' pava vôcôc. 39Teya ti ninama ca nasnatesh ca nôyin pa lhôc, lhayaash ti chiyayjatshi pa yitsaat, pa yicôclôlhshane ts'ivee pa climshi ninôveyshi pava t'ajuya pan tôlhesh'e pa Egipto.

40Papi israelitas yie'in pa Egipto pava cuatrocientos treinta pava yincôpes.*xe* 41Pa lhech pa nalhu shta ti yameyshi pava cuatrocientos treinta pava yincôpes, pa lhacôm'a papi yitsôt'ajesh pa Lhcaanvacle ti tay'een pa lhech yitsaat. 42Pa lhech tulh pa Lhcaanvacle yiclôvalh ti yayjat'e papi lhech pa Egipto. Lhech pa lhtulh pa Lhcaanvacle, pan isjop ca nôveyshi pa lhôclôjqueyash pa chi' shta papi israelitas tajulhey ca ya aj ca nimôqu'esha'ne. Pa yamja jayu papi tôlhshaam jayu shi' papu ca nitôôlhtajsham.

Nava vatyôjijates t'ajuya jayu pa lhjunash papu ti chinaashjop atesha

43Pa Lhcaanvacle yit'esha pa Moisês shi' pa Aarón:

“Nôque vatyôjijat'esh jayu t'ajuya papu ti chinaashjop atesha: Tan jayu pa ca ve'lhaa pa tojc'oya ca isa'jop ca nituj pa vatôclô vatc'ufayjat'esh. 44Taj ti vooy pa lhancasha' chitcashayesha pava pesoc, isjop ca nituj pa lhech ti apis ti p'alha ti chiyiseej clee. 45Pa tan jayu ca ve'lhaa shta pa tojc'oya lhamataja pa lhech ca lhech nit'ôtay'e ja't'ajesha pa lhech yie' jô, sasjop ca nituj jayu pa vatôclô. 46Pa lhech vatôclô tajulhey ca ve'lhaa pa jpôyich ca chinôvesh'ôcji ca chintuj. Pa tan jayu ca chinayjat'ôcji pa jpôyich pa ca ve'lhaa pa t'iya pa t'asjaan pa vatôclô vatc'ufayjat'esh, pa tan jayu shta ca chinpôcjetshisha'ne pava lhavnus.*xf* 47Côque nasnatesh jayu lhacôm'a natc'a'e napi israelitas. 48Taj ti vooy ca nicaajtaj pa ve'lha tojc'oya yielh'atshi avaatsheelh, ca nentaj ca tcaeeshva'ne pa chinaashjop atesha ca nôclôjesh pa Lhcaanvacle, pa nivatjutsa' ca niseejsha'ne clee lhacôm'a papi yitsjôy pa t'ajô'jam. Pa lhecheesh pa isa'jop ca nasnatesh, lhayaash ti p'alha lhjunashjulh nôqueesh napi nivat'asshi na yitsaat. Taj ti tan jayu ca nituj pa vatôclô papi nichinseej clee. 49Pa lhech jayu shta côque vatyôjijatjop chit'ônasheshem napi nivat'asshi yiey na yitsaat shi' papi tosc'oya papin yielh'atshi avaatsheelh.*xg*

50Papi israelitas yisnatesh lhacôm'a cavôque yiey pan t'ônasheshem pa Lhcaanvacle ti nifaclem pa Moisês shi' pa Aarón.

51Pa lhech nalhu pa Lhcaanvacle yayjat'e pa Egipto papi yitsôt'ajesh israelitas.