Search form

Éxodo 19

Papi israelitas ti yamey lhpa Sinaí

1Papi israelitas yamey pa ampa ca nôv'e' yiey lhpa Sinaí, pu'janach'e pava jive'clas pa t'aplhuqu'e ti tay'e pa Egipto. 2Pa lhechesh pa tay'e pa Refedim pa yamey pa ampa ca nôv'e' yiey lhpa Sinaí. Pa lhech t'ichay'e ts'ivee tajulhshi lhpa utiyuc. 3Pa lhech yie' pa Moisês ti yich'apee lhpa utiyuc pa vatvaneelh pa Dios. Pa lhech Lhcaanvacle tôney ti yie' lhpa utiyuc, pa yit'esha:

—Anfacleem navôque yiclishay napi tôlhshaam ja Jacob, napi israelitas: 4Avaatsheelh lhavanelh java jasnatshem capi Egipto lhavos shi' cava lhjunash ti c'anchaje'lhey avaatsheelh nan jôv'e', ajunashelhjulh ti lhnachelh ca veelh'apee pava lhafas pa ve'lha vachvachitaj. 5Ca nôque lhjunashtaja ca anc'ashamtajeshelh lhacôm'a ca ôfisjatajelhch'e cava c'ape'jayinshelh, pa lhecheesh pa c'achifasaeshelh pa c'ashjatelh'apee lhacôm'a pap'elh lhtachifas,*xz* lhayaash ti tsitsôt'ajesh lhacôm'a na cotsjaat. 6Avaatsheelh c'anvacleyanelhshi jayu ti avatasinôc'avoselh,*xa* javoelh'ayshi'yitam ca jaspa aysisaelh. Anfacleem lhacôm'a cavôque napi israelitas.*xb*

7Pa Moisês tôney papi nitaôvclasaesh papi lhchifas pa nifaclem lhacôm'a pava t'ônashem pa Lhcaanvacle ti yisclaneemsha'ne. 8Pa lhechesh papi israelitas pa yicuulhjulh pa ve'lhasham pa t'ôjôj:

—Jasnatshelh jayu lhacôm'a pava yisclanvatich'ejoom pa Lhcaanvacle.*xc*

Pa lhechesh pa yicha'jey pa Moisês pa Lhcaanvacle pava yicu'lhesh papi lhchifas. 9Pa yit'esha pa lhech Lhcaanvacle:

—A'va, janachelh'ayshicham jayu pa jôv'apee jayu lhpa ve'lha vôse', ca jaspa naspeya' napi nivacle ca jayasinôytaj'am, ca jaspa yajateesh ca nacafiyan.

Pa Moisês pa yachajeshemch'e pa Lhcaanvacle pa t'ônash pava yicu'lhesh papi lhchifas. 10Pa yit'esha pa Lhcaanvacle:

—Meey ca nitaasclansha'ne napi achifas nôqueesh shi' shta lhum'ashi jaspa nivaclhitlhavach ca tc'aava'ne. Tajulhey ca nicleesha'ne pava t'uyjatshiyis 11pa nitaasclaneysha'ne shipalhum'ashi, lhayaash shipalhum'ashi janacheyshicham jayu, yivaatsha ya Lhcaanvacle, lha utiyuc Sinaí, pa yi'van jayu pa yinamjayasheyshicham lhacôm'a napi achifas. 12Asnatesh pa yôj'esha'ne pa nashch'e lhavôôj lha utiyuc ca jaspa ya aj ca namjam napi nivacle. Anfacleem ca ya aj ca nivôlh'apee lha utiyuc napi lhech, pa ya aj ca shalheeema shta na lhavôjqu'e. Lhayaash papu ca shalhatajeema pa nivaf jayu. 13Pa ya aj na shta papu ca nit'ajaya, lhayaash papu lhech ti chiyôôtjatesh jayu pava utes ja't'ajesha ca nichintiyôôja'ne. Pa ca lheytaja ca nivaclea ja't'ajesha pava lhclôy, pa tanca mônlhaa jayu. Vooy ca nipe'yataj papi nivacle ca chinfuyu'tajch'e pa tashinshtaj lhac'u' pa nitanc'uya lha utiyuc.*xd*

14Pa Moisês pa tay'apee lhpa utiyuc pa tapecley papi lhchifas pa jaspa nitaasclanesha'ne pa lhc'ayeshva'nec'oya pa Dios. Papi nivacle yicleesha'ne pava t'uyjatshiyis, 15pa yit'esha pa Moisês:

—Ataasclanelheysha'ne shipalhum'ashi, pa ya aj cum papu ca amelhvane.

16Ca nich'a nalhu'taja ca pu'janataja pava nalhus pa tachinshi jayu pa yicuuctenshi jayu shta,*xe* pa ve'lha vôse' tjonshajayshi tajulh'apee lha utiyuc. Pa uj jayu pa t'ôjôj lhpa vat'ônjanche, pa lhacôm'a jayu napi yie' na vat'ichevat ca nits'anaanjat pa t'ajovayi. 17Pa lhechesh pa Moisês pa yayjat'e pa t'ichavat papi lhchifas ca jaspa nôv'e' t'ajuyish pa Dios. Pa lhech vatsavat'ech'e yiey lhpa utiyuc. 18Pa lhacôm'a lhpa utiyuc Sinaí ti tajtiy'apee, lhayaash ti lhech nam'eshicham pa lhech Lhcaanvacle yi'shi' pa itôj.*xf* Pa lhajut pa yichishaam lhjunashjulh lhpa itôvte. Pa lhacôm'a lhpa utiyuc ti yinayuuyjatch'e.

19Pa t'ôjôj lhpa vat'ônjanche juuc ti tac'uychisham pa lhsitse. Pa Moisês pa yiyôjiey, pa vooy pa Dios pa yicuulh pa cuuctenesh pa t'ôjôj.

20Pa Lhcaanvacle pa nameyshicham pa yaash ti toj'echisham lhpa utiyuc Sinaí, pa t'a'lha pa Moisês ca nôquey'echisham pa lhech'e ca nôvelh'e. Pa lhechesh pa yicheychisham pa Moisês. 21Pa lhech Lhcaanvacle pa yit'esha:

—Ecletsha'ne pa anfacleem napi nivacle ca ya aj ca nit'ônshi na yôj'e', pa ya aj ca naychavalhey ca nasvan, jaspa ya aj ca acloja papu ca nivafsha'ne. 22Lhama'taj napi vatasinôc lhavôselh ca niteesh ca shalhaaayam, ca niteeshlhavne ca nivat'isinatsha'ne, jaspa tanca jaclônsha'ne papi lhech.

23Pa Moisês pa yicuulh pa Lhcaanvacle:

—Napi yichifas sasjop ca nôc'apee anôque utiyuc Sinaí, lhayaash ti apis ti lhteesh ti lhnôôclhanita pa yôj'e' pa lh'isiyan'e.

24Taj ti yit'esh pa Lhcaanvacle:

—Mapecla cotsjaat; pa nanjooylha ca atpecleelh ja Aarón. Taj ti vooy japi vatasinôc lhavosesh shi' papi lhchifas ya aj ca nit'ônshi ja yôj'esh'ne na vatashclôfech ca namey nan jôv'e', pa jaspa ya aj ca jaclônsha'ne japi lhech.

25Pa t'ecletsha'ne pa Moisês pa yachajeshemch'e pava chinfacleem papi israelitas

Nava napu'nôjesh vatyôjijates

(Dt 5.1-21)