Search form

Éxodo 5

Pa Moisês shi' pa Aarón tasinôyelh pa faraón

1Vooy ti nôjeshch'e côque, pa Moisês shi' pa Aarón yichey pa faraón ca niteetshem:

—Nôque yit'esh pa Lhcaanvacle, pa lh'Dios ja Israel: “Avashan cum ca nôquey japi tsitsôt'ajesh ja ampa ca nôv'e' ca jaspa lhech nôvesh'e ca nasnatesh pa lhshamitjayash ca jaspa nitsôclôjesh.”

2Pa yicuulh pa faraón ti yit'esh:

—¿She t'e pa Lhcaanvacle, ca jaspa nascashamem yivaatsha, shi' ca jan'ate ca nôqu'in japi israelitas? Ninastôfaclesh pa Lhcaanvacle, pa niyit'esh shta ca yivashan japi israelitas ca nôqu'in.

3Pa lhechesh pa yit'esha ts'ivee papi lhech:

—Pa lh'Dios japi hebreos apis ti tsivatvanjayinshelh pa nôque lhjunash jayeetshelh ca jôquelhey ja ampa ca nôv'e'. Pava pu'jana nalhus ca jayôtayelhshi ca jaspa jasnatshelhem pa yicufayjat'elh pa Lhcaanvacle cas'Dios. Ca jaspa ya aj ca asvômjateshelhsha'ne pava vatayashac shi' pa vatvatclônjayash.

4Taj ti vooy pa lhcaanvacleesh pa Egipto yit'esha: —Moisês shi' na Aarón, ¿ta lhayaash t'em ti naacumjatelh'in japi achifas? ¡Mapeclelh ca acumelh'in shta!

5Pa yit'esha shta pa faraón:

—Nôqueesh ti caaj japi acloj israelitas yi'shi' na yitsaat, ¿lhenelh avaatsheelh ca avômjateshelh ca natcumvatsham'in?

6Lhech pa lhech nalhu pa faraón ti yiyôjiesha papi tanchanjaysha'ne ti yit'esha:

7—Ya aj ca ajutelhey t'ôyish'e japi israelitas cava yiteej t'ajuya cava yisnatesh'in cotsjatis, yiey can afanisheshelh'in cav'elh nalhus. ¡Ca nôquey ts'ivee lhavaatsha ca nivooy pava yiteej! 8Taj ti ayôjieshelha ca nôfisjach'e pat'ajôôj pava cotsjatis yisnatesh'in nôqueesh. ¡Pa ya aj ca amac'oya pa ve'lha cotsjaat! Lhayaash ti uj ti ninancumjayuvatsham'in, pa lhe'naa ti yit'eshvatsham'in: ¡“Jôquelhey jayu ca jasnatshelhem pa yicufayjat'elh pa yi'Dioselh!” 9Uja'esh ca acumjatelh napuque israelitas; pa apitoyanelhvatsham'in jumji, ca jaspa ya aj ca naychavalhey pava lhcuts'ajis

10Papi lhcaanvaclesesh shi' papi lhanvaclesesh pat'ajôôjamsha'ne yicheyvatich'e ti nifaclem papi israelitas:

—Ja faraón tayôjijanesh nôqueesh ca ya aj ca chinjutelh'ay cava yiteej. 11Vooy nôqueesh avaatsheelh jayu ca meelhey ca avoolheysha'ne yiey pa ca avantajelh'e. Taj ti tanca lhecheesh ca chinachajelhshicham'am ca t'ajôôj ca chiynelh'eam cava cotsjatis lhasnatshelh'in.

12Pa lhechesh pa yicheyvatich'e papi israelitas ti vacôtsônch'een lhacôm'a pa cotsjaat Egipto ti vooysha'ne pava yiteej. 13-14Lhacôm'a pava nalhus papi lhcavosesh pa faraón ti yiyôjieshaan pant'ajôj'in pava cotsjatis pavan yisnatesh'in chivoomey'in pava yiteej. Pa jô'tajesh ti yic'ônshaneen papi lhanvaclesesh papi israelitas, pa yiyôjieshaan:

—¿Naô t'e lhayaash ti niavaclhiteshelh can'ut shi' nôqueesh cat'ajôôj cava lhasnatshelh'in canum?

15Papi lhanvaclesesh papi israelitas yicheshey pava yiyôytanesh pa faraón pa yit'esha ts'ivee:

—¿Ta lhayaash t'em ti lhech afanishesh napi natsôt'ajesh acavos? 16Nôqueesh nit'ôyisheey ca chinanjutelhyi cava yiteej taj ti lhetipa ti chinyôjishelhyi ca jasnatshelh pava cotsjatis. Pa jô'tajesh ti chitsic'ônelhshaneen. ¡Teya ti tôlh'ejop napi achifas!

17Pa yicuulh pa faraón:

—¡Avaatsheelh yijô' ti niancumjayuelhvatsham'in. Pa lhe'naa ti yinjôt ti lhteetshelh'in: “Jôqueelh jayu ca jasnatshelhem pa yicufayjat'elh pa Lhcaanvacle.” 18¡Meelh'in shta ca acumelh'in! Lhamataj ti nichinjutelh'ay jayu pava yiteej, pa tan jayu ca nivô'mesh cat'ajôôj cava lhasnatshelh'in cava cotsjatis.

19Papi lhcaanvaclesesh papi israelitas uj ti aôtejem meelh ti chinfacleem ti tan jayu ca nachajshicham cava yisnatesh'in pava cotsjatis pava nalhus. 20Meelh ti tayjop papi lhech pa faraón pa vatvaneelhsha'ne pa Moisês shi' pa Aarón, papin tach'anc'oyaan, 21pa yit'esha ts'ivee:

—Ca vo'ya pa Lhcaanvacle ca novalhsha'ne avaatsheelh cava lhasnatshelh shi' ca nivalhelh'a. Lhayaash ti avaatsheelh tôlhelh'atsham ti nintsiisclaneshelhshi nôqueesh ja faraón shi' japi lhcavos. Avaatsheelh alhechelh shta ti lhamjatelhey ti lhchajchiyanshelh'in pa clesataj ca jaspa nasclôneshelhsha'ne.

Pa t'alhjayash pa Moisês

22Pa lhechesh pa t'a'lhey pa Lhcaanvacle pa Moisês pa yit'esh:

—Lhcaanvacle, ¿ta lhayaash t'em ti lhcamclôqui napuque yichifas? ¿Ta lhayaash t'em ti lhascheney? 23Jan t'aplhuqu'e ti janachey ti jasinôquiem ja faraón ca ey, jô lhech jô pa yijô' ti yicômclôquisha'ne napi natsôt'ajesh; pa vooy avaatsha ampa ca afanisheesh ca alhjenesh.