Search form

Génesis 19

Pa Dios yivômjat pa Sodoma shi' pa Gomorra

1Nich'a tulh'in yamey papi napu' ángeles pa Sodoma. Pa Lot yi'shi' pa chiyuy'een pa yitsaat, yiey pan tc'aevane papi nivacle. C'oya ti yi'van pa nitshaam pa yichjuulh pa tanjuychisham yamja cotsjaat 2pa yit'esha:

—Lhcaanvacles, jatants'aclanelh'a ca anu'jelhyi ca amelhey ca tulhtaja ja lhajpôyich na acavoelh. Lhechee ca acleshelhsha'ne nava afoclelh, pa vooy lhum'ashi pa achiyôfelh ca meeelh.

Taj papi lhech yit'esh:

—Am, tajulhey. Jôveelhshi jayu na lhcaavju ca tulhtaja.

3Taj pa Lot uj ti nachan'e, jaalhpa yuesha ti yiche'lhey pa lhajpôyich. C'oya ti yamey, pa Lot ti yisnatshem pa is lhôc. Yisnatesh pava yucuvec ameyshi pava t'ajuya, pa tuj papi nam'in.

4Jôjjeclay ninjoqu'esha'ne, ti yamjop lhacôm'a papi nivacle pa yitsaat Sodoma pa t'afayjop pa lhajpôyich. Caaj papi nich'acsha'ne shi' papi c'utsjas. 5Lhechesh pa t'oyesha pa Lot:

—¿Ta yie' papi nivacle papi namey na ajpôyich nôque tulh? ¡Anchenfach'ee! ¡Secl'esh ca jajoelhsha'ne!

6Lhechesh pa yicheyfach'ee pa Lot ti tasinôyelh, pa yijôtjatey jum pa lhashi, 7pa yit'esha:

—Jatants'aclanelh'a napi yic'utsfas, ya aj ca asnatshelh pa uj sasch'e. 8Caajyam napi napu' yicles lhutsjayech ti jôjjeclay amem pa nivacle; jajutelh'ay jayu avaatsheelh pa asnatshelh pa lhjunash ti lhenelh. Pa ya aj na pa ca afanisheeshelh napuque nivacle, lhayaash ti jaya'lha yivaatsha.

9Taj papi lhech ti yicuulh:

—¡Ay'e na lhech! Tsi'sha papi vena tôlhshi' yiey na ajunash yen ca niniyôjeelhyi. ¡Taj nôqueesh c'ashjateshelh c'oya jayu ca c'aclôquielh!

Pa tatsha ti ninasclansha'ne ts'ivee pa Lot, pa tac'uya pa lhashi ca nua cotsjaat. 10Taj papi tanôtayey pa Lot pa t'acum'e t'ituuc ti yan'ôcji pa jpôyich; lhechesh pa yip'oey pa lhashi. 11Pa yivintacluquiyansha'ne papi nivacle papi yi'fach'ee. Lhacôm'a ti tôlhesh'e papi tiqu'icsha'ne shi' papi pitesch'e shta taclujuyesh. Pa nôque lhjunash pa yulhôs ti vo'tajeysha'ne pa lhashi. 12Lhechesh pa yit'esha papi tanôtayey pa Lot:

—¿Caaj pap'elh na ajôj'esham nôque? Acum'e napi acles shi' napi atômtes shi' lhacôm'a papi caaj'am yiey nôque yitsaat. Ayjat'e pa aôychiey pa nayeemey nôque, 13lhayaash ti javômjatelh jayu yiey nôquee. Pa lha acloj pava ninajulhjatey ja Lhcaanvacle t'ajuyeshjulh yi'shi' napi nivacle nôque yitsaat, lhe'naa ti tsichenelhey ca javômjatelh.

14Lhechesh pa Lot pa yichey papi lhtômtes, papin nôôclheelhvane papi lhcles pa yit'esha:

—¡Aneelhchisham pa ayelh'e nôque, lhayaash pa Lhcaanvacle ti yivômjat jayu na yitsaat!

Taj papi lhtômtes yilheclôjtajesh ca niclôquiesh pa Lot pa yit'esha. 15C'oya ti lhavôôjjulh nalhu papi ángeles yit'esha pa Lot:

—¡Afanisheesh'in! Aneetsham pa aôychi lha ach'acfa shi' napi napu' acles lhutsjayech, ca nieetajeesh ca avaftaj ca javômjatajelh na yitsaat.

16Taj pa Lot nilhfanishalhavach'in. Papi ángeles lhechesh pa t'acum'e t'ituuc, lhayaash pa Lhcaanvacle ti tcavts'aclayesh pa lhech. T'acum'e shta lhpa lhch'acfa shi' papi lhcles pa yayjatshi pa yitsaat ca jaspa chinalhjen.*xc* 17Ti t'onshi' ts'ivee pa yitsaat pa yit'esha pa ve'lha ángel:

—¡Acumaaj ca anilhjen! Ya aj ca anovalhey'ach'e, ya aj shta ca avatsavat yiey na tavashay. Meey java uticuy, ca eetajesh ca nicaajtaj'am pa amônlhajayash.

18Taj pa Lot pa yit'esha:

—¡Am, napi yinvacles, jatants'aclanelh'a! 19Avaatsheelh apis ti cajuqu'e ti lhatcavts'aclayelhyish, pa is ca afanishelhyish ti lhtsilhjeneshelh na yimônlhajayash. Taj ti yivaatsha sasjop ca yichey nava uticuy, lhayaash ti ts'ofiisshi jayu na nôyish pa vatclôyitsjayash pa lhecheesh pa javaf jayu. 20A'va, na'um javaney na yitsaat lhaôs shalheey pa jaclôtey jayu na lhech. ¡Avashanelhyam ca jôquey na'um ca janilhjenesh na yimônlhajayash, yijô' ti tiqu'in lhavaatsha!

21Lhechesh pa ve'lha papi lhech pa yit'esh:

—Apis ti c'ape'ya pa jasnatesh'am jayu ca lht'a'lha. Tanca yivômjat jayu na lhech yitsaat na lhteetsha, 22taj ti ¡mô'!, meey na'um, lhayaash ti sasjop pa ca yisnatesh ti jôjjeclay niamey na lhech yitsaat.

Lhe'naa pa lhech yitsaat lhey Zoar. Ca hebreo yich'e' côque lhey “tiqu'in”.

23C'oya ti palha nalhu pa yamey pa Lot pa Zoar, 24pa Lhcaanvacle yisntesh ti tsha'nu'esh pa itôj pa nat'apee pa Sodoma shi' pa Gomorra. 25Pa yivômjat*xd* lhacôm'a pant'ajôôj papi lhech yie', shi' lhacôm'a pava tôlh'e' pa lhech'e tavashay. 26Taj lhpa lhch'acfa pa Lot*xe* pa yijoqu'esha'ne yovalheylhach'e lhpa lhech pa mônlhashic'oya ti utejesh ti tsifoniesh.

27Ti yama peelh nalhu ti nich'a nalhu pa Abraham yichey pan yiesh'e ti tasinôyelh'in pa Lhcaanvacle. 28Pa yovalhey pa tajulh'e pa Sodoma shi' pa Gomorra shi' lhacôm'a pa tavashay, pa yi'van ti lhacôm'a pa lhech cotsjaat ti yichishaam pa lhajut lhjunashjulh pa uj itôj. 29Nôque lhjunash pa Dios ti yivômjat pa yitsaat yiey pa tavashay pan yie' pa Lot. Taj ti yaychavalhey pa Abraham pa yayjatshi pa Lot yiey pan chiyvômjat.

Pa tôlh'e'shicham papi moabitas shi' papi amonitas

30T'ajôjqu'e pa Lot pa nijovay'in ca mônlhaae pa Zoar, pa yichey pava uticuy pa lhech mônlhee. Pa yaôychi papi napu' lhcles lhutsjayech. Lhech yie' papi pu'jana yich'e' lhpa camamqu'e. 31Ve'lha pa nalhu, lhpa c'utsja'esh lhôse yit'esha lhpa lhch'injô:

—Na catsitata palha c'utsaaj, ampapu ca nôv'e' nôque cotsjaat ca catsijayaseesh, nan lhjunash cava chiyfayjanesh. 32Pa istaa ca sht'etsjet na catsitata pa shtajo'jop jayu ca nicaaj papi lhcles ca nitsôt'ajesh.

33Tatshaesh pa lhech tulh ti yijutshey pa lhtata pa cumjôtaj, pa lhechesh lhpa c'utsjaesh pa yijo'jop pa lhech. Taj pa lhtata nintôych'e ti yijo'jop shi' ti nitshaam. 34Vooy peelh nalhu lhpa c'utsjaesh yit'esha lhpa lhch'injô:

—A'va, ca nôj tulh jajo'jop na catsitata. Pa nôque lhjunash nôque tulh sht'etsjet jayu shta secl'esh ca ajo'jop yitsha. Pa nôque lhjunash caspu' pa caaj jayu papi catsicles.

35Pa lhech tulh yijutshey shta pa lhtata pa cumjotaj. Lhechesh pa yôjquenelhch'e lhpa taôvclajesh. Taj pa Lot nintôych'e shta ti yijo'jop shi' ti nitshaam. 36Pa nôque lhjunash papi napu' lhcles pa Lot pa yitumjatsha'ne pa lhtata. 37Lhpa c'utsjaesh caaj pa lhaôs pan lhey Moab. Pa lhech lhtataesh papi moabitas nôqueesh. 38Lhpa taôvclajesh caaj shta pa lhaôs pan lhey Ben-ami. Pa lhech lhtataesh papi amonitas nôqueesh.