Search form

Génesis 32

Pa Jacob shi' pa Esaú ti vatvaneelh

1Pa Jacob yich'e' pa nôyish, pa caaj papi lh'ángeles pa Dios yichey ti vatvanjiyinesh. 2C'oya ti yi'van pa Jacob, pa yit'esh: “Napuque lhcafoquelhay pa Dios.” Lhe'naa ti lhqueyesh pa lhech'e Mahanaim. 3Pa Jacob yicheney papi t'ajôôj jô lhcavos pa cotsjaat Seir, yiey pa cotsjaat Edom, ca nanfacleem pa lhchecla' Esaú pa lhnamjayash. 4Pa yiyôjiesha côque: “At'eshelha ja checla' Esaú: ‘Ja ach'inish Jacob yisnatshelh'am cava yit'esh pa tsichenelh'ay ca janfaclelh'am: Javjop ja Labán cava nôj nalhus, 5pa caajyam nava vôcôc, nava cuvôyutas, nava tashinshtas, napi yicavos shi' napi yicavoquey. Côque nichen'ay ja yinvacle, pa tach'aneshyic'oya pa is ca jachajey.’ ”

6C'oya ti vapecl'in papi vatcavos, pa nifaclem pa Jacob:

—Jamelhey ja achecla' Esaú, palha nach'ajulh avaatsha cuatrocientos japi nivacle tanôôycheelh.

7Ti yipe'ya côque, pa uj ti nijovay'in pa Jacob pa uj ti yaychavalh'in. Lhechesh pa yicatsônjat papi nivacle tanôôycheelh pa napu'jam shi' shta pava tashinshtas, pava vôcôc shi' pava camellos, 8pa yaychavalh'in: “Ca namtaj ja Esaú pa nit'eclet'elhvane napi ve'lheesh, lhan'e nap'elh pa niclôt'in jayu.” 9Lhechesh pa t'aalh: “Pa Lhcaanvacle, lh'Dios ca yict'eech Abraham shi' ja tata Isaac, avaatsha lhteeshyi ca jatpecley na yicootsjat shi' japi yivelhavot, pa istaa ca aisinatyam ca jamjam: 10niyajulhtajsham pa is shi' pa encheyash ti lhech lhfanishyish. Lhapesh ti jôqueypacham nôque tovôc Jordán, ve'lhayama ja yivcôjat ti jachaj'in. Pa vooy nôqueesh caajyam napi napu'jam napi yicavos shi' nava yiclôy. 11¡Jatants'aclan'a ca atsilhjenesh pa lhfanishtajyish ja checla' Esaú! Ts'ijovayem ca namtaj ca nitaancletyi shi' ca niclônsha'ne napi ôcjeclôy shi' napi taôvclas. 12Apis ti lhanfacyam ca isa' ca janamnee, shi' papi yicles ca lhjunashajulh java t'iyas ja josôj yiey pa uj yinôôt. Ca acloja ca sasajop ca chinatsjuulh.”*xi*

13Pa lhech tulh lhech yijo'e pa Jacob. Pa nayjatvane pava tisesh jayu pa lhchecla' Esaú pava caajem: 14docientos pava tashinshtaychey pa veinte pava fusunjas, docientos pava tashinshtas pa veinte shta pava jayanjas, 15pa treinta pava camellos nich'a tactsooysha'ne shi' pava lhcles. Cuarenta pava vôcôc pa napunôjesh pava jayanjas lhcles. Veinte pava cuvôyutachey pa napunôjesh pava cuvôyutas. 16Pa lhechesh pa yijutem papi lhcavos ti nalhpôc'ôlesh'esham, pa yit'esha:

—Anôyineshelh, pa ya aj ca amjelhvatsham.

17Papi vatjutsa' ti yichenesh pa yiyôjiesha:

—Ca avantaj ja checla' Esaú, ca naniy'ôstajeshelh pan yie' ti anvacleeshelh, pan lhôqueelhshi, pan lhclôyesh nava lhcha'jelh, 18pa acu'lhelh: ‘Avaatsha chinatis'ash, yinvacle Esaú, tô'lha ja Jacob jan acavoesh. Lhavaatsha nijoelhyich'ehsa'ne.’

19Shi' shta papi nijooylha ti yichen, nôquee papi pu'janaeyshi shi' lhacôm'a papi yichaaj yiey pan t'ajôôjjamsha'ne pava lhclôy, ti yit'esha:

—Ca avantajelh ja Esaú pa lhech at'eshelha: 20Pa at'eshelha shta: ‘Ja Jacob, jan acavo, nijoelhyich'esha'ne.’ Lhayaash ti yaychavalhey ja Jacob: “Javômjateshemch'e jayu pa lhavôôc nava jatisesh ti janôyinjatyivc'oya. Pa janjooylha ca javatvanelh jô. Amataj ca jaspa isa' ca natcumyijulh.” 21Nôque lhjunash pa yinôyinjat pava lhcufayjates, lhan'e pa mônlhee ti tulh'in pa t'ichavat.

Pa Jacob yishanelh pa ángel

22Pa lhech tulh ti nitshaam pa Jacob pa yôôychi papi napu' lhjayas shi' papi napu' lhcavoquey shi' papi once lhcles ti yichelhey pacham pa clasimch'e tovôc lhaôs Jaboc, 23shi' lhacôm'a pava caajem. 24C'oya ti ve'lha ti mônlhee pa Jacob pa nama pa ve'lha nivacle pa yishanelh yamja ti lhavoojulh nalhu. 25Taj ti c'oya pa nivacle ti yitô'ya ti ninash'apee pa Jacob, pa yiclôn'e lhch'ito' pa yichjuuc pa lhch'ito' pa Jacob ti jôjjeclay yishanelh pa lhech. 26Lhechesh pa yit'esha pa nivacle:

—Avôômyish ti palha nalhu jayu.

—Ca nieetajeeshyam pa is pa tanca vôm'ash —yit'esh pa Jacob.

27—¿Ta ey? —niy'ôs pa lhech nivacle.

—Yey Jacob —yicuulh pa lhech.

28Lhechesh pa yit'esha pa nivacle:

—Tan jayu ca eya t'ôyish'e Jacob. Ca ey jayu Israel, lhayaash ti apis ti t'ishanelh pa Dios shi' papi nivacle, pa t'ash'apee.*xj*

29—Vooy nôqueesh anfacyam pa ey avaatsha —niy'ôs pa Jacob.

Taj ti yit'esh pa nivacle:

—¿Ta lhayaash ti lhtsiy'ôsesh na yey?

Lhechesh pa yit'eshem pa is pa lhech nivacle. 30Pa Jacob lhqueyesh pa lhech'e Peniel, lhayaash ti yit'esh: “Ja'van jô ja Dios yitacôclelhvatjulh, lhayaash ti jôjjeclay yanônlha.”

31Pa Jacob tay'e pa Peniel ti vacha' ja jumcuclaay, pa sayacleshi lhpa lhch'ito' teya ti lhech chiyclôn'esham pa Jacob.