Search form

Génesis 37

1Pa Jacob mônlhee ti yie' pa cotsjaat Canaán, yiey pan yie' lhapesh pa lhtata. 2Nôque chichayeshch'e pa t'ajôj'esha'ne pa Jacob;

Pa Josê shi' papi lhcheclavot

Pa Josê ti palha nich'ayech'esh ti diecisiete pava lhnincôpes, yiclôvalhelh pava tashinshtas papi lhcheclavot, papi lhcles lhpa Bilha shi' lhpa Zilpa, papi yictsôyansha'ne atesha pa lhtata. Pa Josê ve'lhach'e ti nifaclem pa lhtata pa niysa' lhjunash papi lhcheclavot.

3Pa Israel ya'shesh ti yen pa Josê a'lheesh pap'elh lhcles, lhayaash ti nivat'aj ti palha c'utsaaj. Lhe'naa ti yisnatshem lhpa is t'uyjatshi. 4C'oya ti yitôôysha papi lhcheclavot pa lhtata ti ya'shesh ti yen, lhechesh pa yicônitshi pa ninteesh ca nacju' shta.

5Ve'lheesh ti caaj pa lhtsamaat pa Josê pa nifaclem papi lhcheclavot; taj ti pa lhetipa ti yicônitshi, 6lhayaash ti yit'esha:

—Ach'anelhyi, janfaclelh'am jayu ja yitsamaat. 7Janjujôm ti shnôvelhshi lhôn pa vatcac'ovat. Ti sht'ôcfashaamsha'ne lhôn pa trigo. Pa yalhatajesh lhôn ti vantsemaaj pava tsitsôt'ajesh, lhan'e lhôn pava natsôt'ajeshelh pa t'afaych'e lhavôôj lhôn pa tsitsôt'ajesh pa tanjuyshichamch'e lhôn.

8Lhechesh pa yicuulh papi lhcheclavot:

—¿Yich'e' côque ti c'anvacleeshelh jayu, pa lhascumjatelh jayu?

Pa uj ti yicônitshi tôlh'ejop pa lhtsamaat pa lhjunash ti nifaclem.

9Pa caaj peelh lhtsamaat pa Josê pa nifaclem shta papi lhcheclavot. Pa yit'esha:

—A'va, caaj jaelh yitsamaat, ti ja'van na jumcuclaay shi' na jive'cla pa once shta pava catiis pa tanavuyyi.

10Ti nifaclem pa Josê pa lhtsamaat pa lhtata shi' papi lhcheclavot, pa yifactsenesha pa lhtata ti yit'esh:

—¿Ta yich'e' côque atsamaat? ¿Yich'e' t'e lhca amimi, napi acheclavot ya chi' shta ti jaya'vuyelh'a jayu?

11Papi lhcheclavot uj ti yijuctsenesh,*xr* lhech côque yaychavalhey shta pa lhtata.

Pa Josê ti tcashayesh papi lhcheclavot

12Ve'lha pa nalhu, papi lhcheclavot pa Josê ti yichey pa Siquem, pa yisa'sey pan yie' pa yitjataj pava lhclôy pa lhtata. 13Lhechesh pa yit'esha pa Israel pa Josê:

—A'va, japi acheclavot yie' ja Siquem yiclôvalh java tashishinshtas. Jayeetajesh ca ajôchich'e:

—Uj ti jayeesh ca jôquey —yit'esh pa Josê.

14—Tajulhey —yit'esh pa Israel—, ajôchich'e ca avan pa lhjunash japi acheclavot shi' java tashinshtas, pa atpec pa anfacyam pa lhjunash.

Pa Israel yiey pa Jebron ti yichen pa Josê. C'oya ti yamey pa Josê pa Siquem, 15pa vacuclônshiin pa joot. Lhechesh pa yi'van pa ve'lha nivacle pa niy'ôs:

—¿She pa lhavooysha'ne?

16—Javo'tajeysha'ne japi checlavot —yit'esh pa Josê—. ¿Natô'yish ca anfacyam pa yiesh'e java yiclôvalh tashinshtas?

17—Apis ti tay'e nôque —yit'esh pa nivacle—. Jaypeeycheyesh ca nôquey pa Dotán.

Pa Josê vooysha'ne papi lhcheclavot pa yivan'e pa Dotán. 18Papi lhech jôjjeclay tojulh ti yivanjulh, pa jôjjeclay ninamey ti yasinôqui pa ca lhfanisheesh ca niclôn. 19Pa yit'eshvaneen:

—¡A'va, nam na jujômjanaj! 20Ata'lhunelh, istaa ca shtaclôn; pa shtuqu'e lha tinjôque pa shtat'esha ca nituj pava suy yaquisetes. ¡Naô pa lhjunasha lhech yiin pava lhtsamatas!

21C'oya ti yipe'ya pa Rubên côque, pa yentaj ti yishantesh papi lhcheclavot, pa yit'esh:

—Ya aj ca shtaclôn. 22Ya aj pa ca casfanisheesh. Istaa ca shtuqu'e lha tinjôque yiey nôque cotsjaat nintôlh'e pa, vooy ca chinclôn ya aj na.

Pa Rubên yit'esh côque, lhayaash ti yentaj ca nishantesh pa Josê shi' ca nachajey pa lhtata. 23C'oya ti yamey pa yie' pa Josê papi lhcheclavot papi lhech niclanshic'oya lhpa t'uyjatshi lhpa yuych'e, 24pa t'acum'e pa yuqu'e lhpa tinjôque lhpa camamqu'e clôjôjqu'e shta. 25Ti yivaclhitesh pa yich'esha'ne ti tsaccunch'e. Pa yalhatajesh ti yi'vanjulh papi t'ajôôj jô ismaelitas tôlhey pa Galaad. Yan'apee pava lhclôy camellos pava vatshachivos acôsshi shi' pav'elh lhey mirra ca nicha'jey pa Egipto. 26Lhechesh pa yit'esha pa Judá papi lhch'injavot:

—¿She pa shtatôôlhtajesha ca shtaclôn na catsich'inish, shi' ca shtafiich pa lhavafjayash? 27Tajulhey jô ca shtacashayesha napi ismaelitas pa ya aj ca shtaclôn; lhayaash ti casch'iniish jô.

Papi lhch'injavot pa yivo'yemjulh pa yit'esh. 28C'oya ti lhech yam'e papi lhavcashanjas madianitas, pa yayjach'e pa Josê lhpa tinjôque' pa tcashayesha papi ismaelitas pa veinte pava pesoc tashaay yuy'ôcji. Nôque lhjunash ti chiychajey pa Josê pa Egipto.*xs*

29C'oya ti vapecley pa Rubên lhpa tinjôque' pa ninvanch'e pa Josê pa lhech'e. Lhechesh pa yic'asteshlhtapee lhpa t'uyjatshi yich'e' ti aôytejem. 30Lhechesh pa vapecley pa yichey papi lhch'injavot, pa yit'esha:

—¡Ja nich'ayech palha ampa! ¿Nôqueesh she pa jasnatesh jayu?

31Lhechesh pa t'acum'e lhpa Josê t'uyjatshi pa yamjach'e pava tashinshtayche lhavoyey pan yiclôn. 32Lhechesh pa yicheney pa lhtata côque pa yit'esh: “Javanelh anôque. Ovalhsha'ne jum ca lhecha ja't'ajesha ca nilhechaa lhja t'uyjatshi ja aôs.”

33C'oya ti nitôfaclesh pa Jacob, pa yit'esh: “¡Jech, lhech lha t'uyjatshi ca yaôs! Caaj jayu pa suy yaquiset ti vanu'e pa tuj shta. 34Lhechesh pa yic'asteshlhtapee lhpa t'uyjatshi pa Jacob pa yuych'e lhpa lhtacshinjavoque. Pa acloj pava nalhus ti yitacshinch'e pa lhaôs. 35Lhacôm'a papi lhcles yitsjôy shi' papi ôcjeclôy ti yic'alhtantajesh ti yishanataj'in, taj ninteesh; tsi'sha ti yôyanch'e ca lhaôs, pa yit'esh: “Tanca vô'mesh ti jatacshinch'e ca yaôs, vooy ca javaftaj jayu yitsha pa jovjop jayu yiey capi vafsha'ne.”

36Yiey pa Egipto, papi madianitas pa tcashayesha pa Josê pa ve'lha nivacle lhey Potifar. Lhavaatsha lhcaanvacleesh papi lhc'afoquelhay pa faraón, pa lhcaanvacleesh'e pa Egipto.