Search form

Génesis 48

Pa Jacob yit'eshem pa is pa Efraín shi' pa Manasês

1Nicletach'e ti chinfacleem pa Josê ti aôytej'in pa lhtata. Lhechesh pa yichey pa Josê, pa yôôychi papi napu' lhcles, pa Manasês shi' pa Efraín. 2C'oya ti chinfacleem pa Jacob ti nachey pa lhaôs Josê, pa vaniyitchisham ti yi'sha'ne yiey pa lhmojôvat. 3Pa yit'esha pa Josê:

—Pa Dios ampa ca nintô'yeesh tanôclityam lhapesh ti yiey ja yitsaat Luz, yiey ja cotsjaat Canaán, pa yit'eshyam pa is. 4Cavôque yit'eshyi: ‘A'va, jasnatesh'am jayu papi acloj acles, vooy papi tôlh'a jayu pa yamey jayu ti aclojjam ti lhtachifasesh. Pa jajutey jayu shta papi acles nôque cotsjaat.*xi* Lhavaatsha yitsôt'ajesh jayu pava nalhus.’ 5Vooy nôqueesh napi napu' acles na Efraín shi' na Manasês, napi nivat'as'e na Egipto ti jôjjeclay ninamelhey yiey nôque cotsjaat, napi lhech tsitsôt'ajesh. Lhavaatsha ya'shesh ti tsitsôt'ajesh nan lhjunash na Rubên shi' na Simeón. 6Vooy nap'elh nijooylhach'e napi lhech natsôt'ajesh. Taj ti yiey jayu shta pava chincayôj'ash, lhayaash ti lhtatvelheyech. 7Jan t'aplhuqu'e' ti jayay'e ja Padan-aram, lhechesh ti vaf lhca amimi Raquel yiey ja cotsjaat Canaán, ti c'ujeelhey ja Efrata. Pa jatish'ec'oya yiey ja nôyish ja Efrata, ja nôqueesh lhey Belên.*xj*

8Pa yalhatajesh pa Israel ti yovalhsha'ne papi lhcles pa Josê, pa niyôsesh:

Napuque, ¿she papi yitsôt'ajesh?

9—Napi yicles, napi nijutyi pa Dios yiey na Egipto —yit'esh pa Josê.

Lhechesh pa yit'esha pa lhtata:

—Istaa ca anc'uyeelhnee, jaspa jayeetshelh'am jayu pa is.

10Pa Israel palha c'utsaaj pa nitojach'e pa lhtô'vat. Pa ninama lhtô'vat pa yic'uyjata pa Josê papi lhcles pa lhtata. Lhavaatsha yechepjalh ti yifin. 11Lhechesh pa yit'esha pa Josê:

—Niyilheclôjesh ca nic'avana. Vooy pa Dios yit'eshyam shta ca niyvana napi acles.

12Pa Josê yayjat'e t'acjatsuy papi taôvclas pa lhtata, lhechesh pa t'avuyshichamch'e yamja cotsjaat. 13Lhechesh pa t'acum'e papi napu', pa Efraín yiey lhfayish vooy pa Manasês yiey lhch'amiyish. 14Taj ti vooy ti t'ajayjulh pa Israel pa yuyjatvanôcji pava t'itjuy. Pa lhfayish lhpôcôt t'ajayesh'apee lhshatech pa Efraín, lhavaatsha taôvclajesh. Vooy pa lhch'amiyish lhpôcôt t'ajayesh'apee pa lhshatech pa Manasês, lhavaatsha c'utsa'jesh. 15Lhechesh pa yit'eshem pa is pa Josê côque lhfanishesh:

“Vooy pa Dios pan niqu'ishamem

ca Abraham shi' ca Isaac, yinavot,

pa Dios pan vanujumatsenyish

ja nalhu ti tsivat'aj,

16pa ángel pa tsilhjenesh

lhacôm'a pa niysa',

yit'eshem pa is napuque taôvclas.

Ca chintôlhesha ca ninantôvacluach'e

ca yey shi' cava lheyis capi yinavot

ca Abraham shi' ca Isaac.

Pa acloj jayu papi lhcles

pa acloj jayu ca nôv'e' yiey na cotsjaat.”

17Taj ti pa Josê niyijôa ca nitajulhe'mey pa lhtata ti t'ajayesha pa lhfayish lhpôcôt pa lhshatech pa Efraín. Lhe'naa ti t'acum'e lhpôcôt pa lhtata pa yayjat'apee pa lhshatech pa Efraín pa yan'apee pa Manasês, 18lhechesh pa yit'esha:

—¡Am, tata nilhechashi! Nôque c'utsa'jesh. An'apee na afayish atuuc na lhshatech.

19Taj ninteesh pa lhtata pa yit'esh:

—¡Tsitô'ya yaôs, tsitôôytaja! Lhavaatsha shta tô'lha jayu papi acloj lhtachifas. Taj ti vooy pa lhch'inish ya'sheshc'oya jayu, pa acloj jayu papi tôlha lhtachifas.

20Tatshaesh pa lhech nalhu pa Jacob ti yit'eshem pa is,*xk* cavôque yit'esh:

—Napi israelitas yichenesh jayu cava eyiselh pa is ca niteetajesh, niteesh jayu: ‘Pa Dios yisnatesh'am jayu pan lhjunash ti yisnatshem pa Efraín shi' pa Manasês.’

Nôque lhjunash pa Israel yashjateshc'oya pa Efraín pa Manasês. 21Lhechesh pa yit'esha pa Josê:

—A'va javaf jayu; taj ti yielh'ajop jayu pa Dios pa nachajelhey jayu shta ja lhcootsjat capi catsinavot. 22Avaatsha c'ashjateshc'oya japi acheclavot: Jajut'ay ja Siquem, pa anjôclesh japi amoreos pa ajuyeshjulh papi lhech.