Search form

Levítico 12

Vat'isiyan lhpa ôcjeclô ti nôjeshch'e ti nicavat'aj

1Pa Lhcaanvacle yiyôjiesha pa Moisês pa yit'esha:

2“Anfacleem napi Israel lhavos navôque: Meelh lhpa ôcjeclô ca nitumataj ca nanvat'ajtaj pa lhaôs yitsuuj, pa nivatsasiyan jayu nôqueshch'e pava napu'yama nalhus, jan lhjunash ti yameyjop ti vacla'. 3Vooy pa taôvclaj pa chinseej clee ca pu'janatajayama pava lhnalhus ti nivat'aj.*xo* 4Vooy lhpa lhamimi pa lhetipaa jayu ca nivat'isinatesh pav lhavoyey pava treinta y tres pava lhnalhusesh. Pa sasjop jayu ca nit'ajaya pava chiyvenchat pa tanca nôc'ôcji pa is'ôcji lhtôvash, jôjjeclay ninameyjop pa t'aplhueshch'e ti vat'isinat. 5Ca nanvat'ajtaj lhpa taôvclaj ôcjeclô, pa nivat'sasinatesh napu' pava yameyc'oya, jan lhjunash ti yameyjop ti vacla', pa lhetipaa jayu ca nivat'isinatesh pava lhavoyey nôqueshch'e pava sesenta y seis lhnalhus.

6“Meelh ca nôfiistajch'e pa t'aplheeshch'e ti vat'isinat, ca lhetaja pa taôvclaj ja't'ajesha lhpa taôvclaj, vooy lhpa lhamimi pa nicha'jey pa chiyuy'een pa Tsha'nuvo'esh ti Chivatvan'e pa tashinshtaj ve'lha lhnincôp, shi' pa ofo lhaôs ja't'ajesha pa oftaa ti tcufayeshjop pa sasch'e. Pa nijutey jayu pa vatcasinô, 7vooy pa vatcasinô pa nan'e t'ajuyish jyu pa Lhcaanvacle pa nit'alha ca chinvômjatch'e pa lhsasch'e lhpa lhech; pa lhecheesh lhpa lhech pa chin'isinatesh ti natshane pava lhavoyey.”

Cavôque chivancufayjatesh t'ajuya ti nivat'as papi taôvclas yitsjôy ja't'ajesha ôcjeclôy. 8Lhpa vatamimi ca amtajeem ca nijuyjata tashinshtaj, pa isjop ca natcum'e pava napu' oftaas jat'ajesha pava napu' ofo lhcles,*xp* ve'lhaa pa nijuyjata ti chiylhônsham vooy peelh natcufa'yeshjop pa sasche; pa lhechesh pa vatcasinô pa nit'a'lhema ca chinvômjatemch'e lhpa lhech, vooy lhpa lhech pa chin'isinatem.*xp*