Search form

Levítico 13

Chivancafaycutesh pa lhjunashch'e lhpa vatashtôtaj

1Pa Lhcaanvacle yiyôjiesha pa Moisês shi' pa Aarón pa yit'esha:

2“Meelh ca nicaajtaj papu ti t'ucajiysha'ne ti tavo'matacheysha'ne ja't'ajesha pava yamqu'e pa lhavu'vat, ja't'ajesha lhayashacheyesh ti nôclesh lhpa lhashtôtaj, pa isjop jayu ca chinchajey ja vatcasinô Aarón ja't'ajesha pa ve'lha japi lhcles ti vatcasinôclesh. 3Vooy pa vatcasinô isjop jayu ca niclôvalhesh pava yamqu'e pa t'ôj, vooy ca niclimayantaj pa t'ôj shi' pa lhsaash, vooy ca nivantajesh pava yamqu'e ti yamjam pa t'ôj, pa yijô'a ti lhech ti lhashtôtajesh. Vooy ti yivaclhitesh pa vatcasinô ti yiclôvalhesh pa lhech pa yit'esha ti yisasiyan.

4“Vooy pava yamqu'e ca climtajeeshch'e pa t'ôj, taj ti tanca nivanesh ca namtasham, pa nilhecha pa lhsaash ca climach'e, pa lhechesh pa vatcasinô ca nip'o'eyshi jayu pan tayashay pa nôqueshch'e pava napu'yama nalhus. 5Vooy ca nôjtajeshch'e pava napu'yama nalhus pa napecleyjop ca chinclôvalhesh, vooy pava yamqu'e ca lhetlhataja pa lhjunashch'e pa tanca natc'uych'e pa t'ôj, pa nachajeyjop shta ca ve'lheesh nip'o'eyshi pava napu'yama nalhus. 6ca nit'ôntajshi shta pava napu'yama nalhus pa chiyclôvalhesh shta, pa vooy pava yamqu'e ti vômeshch'e ti ninatc'uych'e pa t'ôj, pa lhechesh pa vatcasinô pa nifaclem ti is pan tayashaytaj, tsi'sha ti lhavo'matacheyesh pa t'ôj. Pa lhechesh pan tayashay pa yicleesh jayu pava yuych'e pa isa' jayu pa lhjunash.

7“Taj ti ca lhetipataja pava lhavo'matachey ti tac'uych'e pa t'ôj ti apis ti chiyclôvalhtajesh pan tayashay ti nifaclem pa vatcasinô ti is pa lhjunash, pa tajulhey ca nôquey shta pa vatcasinô ca niclôvalhesh.

8Vooy ca niclôvalhtajesh pa vatcasinô pan lhayasheesh, pa nivan pava lhavo'matachey ti apis ti yamqu'e lhacôm'a pa t'ôj, pa lhechesh pa nifaclem ti yisasiyan, lhayaash ti lhayasheesh lhpa vatashtôtaj.

9“Meelh papu ca namtajch'e lhpa vatashtôtaj, pa isjop jayu ca chinchajey pa vatcasinô. 10Vooy pa vatcasinô pa yiclôvalhesh jayu, ca nucanatajsham pa t'ôj ti climeshch'e ti tôlh'ejop ti yiclimiyanch'e pa lhsaash, pa chinvantaj pa t'asjaan ti yameyshi pa t'ucaaj, 11pa chiytôyesha ti lhashtôtajesh yiesh pa t'ôj. Vooy pa vatcasinô nifaclem jayu papi lhech ti yisasiyan, pa tan jayu ca suyeeshi ca chinp'oeyshi, lhayaash ti apis ti chiysasiyan.

12“Lhpa vatashtôtaj ti nishi ti tac'uyeshlhavc'oya, ti tôlheshey pava lhafoc pa yamja pa lhshatech pan lhayasheesh yiey pan isem'ejop ti yivanesh pa vatcasinô, 13vooy pa vatcasinô pa niclôvalhesh jayu; ca nitiftajch'een lhacôm'a pa t'ôj vooy pa lhech vatcasinô pa nanfacleem ti is pa lhjunashesh, lhayaash pa lhashtôtaj ti apis ti climeshch'e vooy pa lhech pa is pa lhjunash. 14Taj ti pa nalhu ca ninôôctajesh pa lhech ti yi'shi' pa t'asjaan ti tôlheshi, pa yisasiyan jayu. 15Pa lhechesh pa vatcasinô pa yiclôvalhesh pa t'asjaan ti tôlheshi, pa nanfacleem jayu ti yisasiyan, lhayaash pa t'asjaan ti tôlheyshi ti yisasiyan: ti lhech pa vatashtôtaj.

16“Nan lhjunash pa t'asjaan tôlheshi ti climeshch'e, vooy pan lhayasheesh isjop jayu ca nôquey pa vatcasinô, 17pa jaspa niclôvalhesh, vooy pa vatcasinô ca yivantaj pava yamqu'e ti apis ti climeshch'e, pa nanfalceem jayu ti is pa lhjunash pan lhayasheesh, lhayaash ti apis ti is pa lhjunash.

18“Meelh papu ca namtajch'e pa t'ôj ca nivatsjantajesh, 19ca mônlhatajeesh ti climeshch'e pa t'uca'jesh, ja't'ajesha pava yamqu'e ti yucleshch'esha'ne, pa isjop jayu ca nôveshjop pa vatcasinô. 20Vooy ca nivantajesh pa vatcasinô pan yiesh'e ti lhayasheesh ti yamja peelh t'ôj shi' ti yiclimiyanch'e pa lhsaash, pa lhechesh pa nanfacleem jayu ti yisasiyan papi lhech, lhayaash papin caajem ti lhech pa vatashtôtaj. 21Ca nivantaj pan yie' ti lhayasheesh ti ninclimiyanch'e pa lhsaash shi' ti ninamjam pan mônlhee t'ôj, vooy ti vômeshch'e, pa lhecheesh pa chinp'oeyshi papi lhech nôqueshch'e pava napu'yama nalhus. 22Vooy ca lhetipatajeesh ti niysa' ti tac'uych'e pa t'ôj, pa lhecheesh pa vatcasinô ca nanfacleem jayu papi lhech ti yisasiyan, lhayaash ti lhayasheesh pa vatashtôtas. 23Taj ti pan yiesh'esham ti ninatc'uych'e, pa lhechesh pa tsi'sha pa yisasinat'esham pava yamqu'e, vooy pa vatcasinô pa nifaclem ti is pa lhjunash.

24“Meelh papu ca niclot'ataj pa t'ôj shi' pa t'asjaan ti tôlheshi pa lhclot'aj caaj pava yucleshch'e ja't'ajesha pava climeshch'e ti yamqu'e, 25vooy pa vatcasinô pa yiclôvalhesh jayu. Vooy pa lhsaash pan yamqu'e ti yiclimiyanch'e, vooy pava yamqu'e pa nôclesh ti yamtasham yiey pa t'ôj, pa lhech lhashtôtajesh ti tôlhshaamjop pa lhclot'aj; pa lhechesh pa vatcasinô nifaclem jayu ti yisasiyan ti lhayasheesh lhpa vatashtôtaj. 26Ca niclôvalhtajesh pa vatcasinô pava yamqu'e ca ninvantajeshi pa lhsaash ti ninclimiyanch'e pa nilhecha ca namtasham yiey pa t'ôj, ti vômeshch'e jayu, pa lhecheesh pa yip'oeyshi papi lhech pa nôqueshch'e pava napu'yama nalhus. 27Vooy pava napu'yama nalhus ca nit'ôntajshi pa yiclôvalhesh jayu pa vatcasinô, vooy pava yamqu'e ca apistaja ti tac'uych'e pa t'ôj, pa lhechesh pa chinfacleem jayu papi lhech ti yisiyan, lhayaash ti lhayasheesh lhpa vatashtôtaj. 28Taj ti pava yamqu'e ti ninac'uych'e pa t'ôj ti vômeshch'e jayu, pa lhechesh tsi'sha ti t'uca'sham pa lhclot'aj, pa lhecheesh pa vatcasinô pa nanfacleem jayu ti is jayu pa lhjunash pan lhayasheesh, lhayaash ti tsi'sha pa yisasinat'esham pa lhclot'aj.

29“Meelh pa nivacle ja't'ajesha lhpa ôcjeclô ca namtajch'e pa lhshatech ja't'ajesha pava lhpôsey, 30vooy pa vatcasinô yiclôvalhesh jayu pava yamqu'e. Pava yamqu'e ca ninôôctaj ti yamtasham pa t'ôj ca tôjiyajtajeemch'e pava lhayees ti niusach'e, pa lhecheesh pa vatcasinô pa nanfacleem jayu papi lhech ti yisasiyan, lhayaash ti caaj pa lhacle ti tashtôtaysham pa lhshatech shi' pava lhpôsey. 31Ca niclôvalhtajesh pa vatcasinô pava yamqu'e ti tacleyshi ti ninvan ca namtasham pa t'ôj ti tanca yacutach'e pava lhayees, pa lhecheesh pa chinp'oeyshi jayu papi lhech pa nôqueshch'e pava napu'yama nalhus. 32Vooy pa napu'yama nalhu pa yiclôvalhesh jayu pa vatcasinô pava yamqu'e, ca nitacleytajshi ti ninatc'uych'e, ti ninô'clesh ca namtasham pa t'ôj, ti nitôjiyajtajch'e pava lhayees, 33pa lhechesh pa yiyôjiesha jayu pa vatcasinô pan tayashayesh ca nit'ovôsch'e pava lhpôsey, pa ya aj na pan yie' pava yamqu'e ti tacleyshi, pa nip'oeyshi jayu shta pa nôqueshch'e pava napu'yama nalhus. 34Ca nit'ôntajshi pava napu'yama nalhus pa vatcasinô pa niclôvalhesh jayu pava yamqu'e, vooy pa lhacle ca ninatc'uytajch'e ti ninô'clesh t'ôyish'e ca nameshtasham pa t'ôj, lhechesh pa vatcasnô pa nifaclem jayu papi lhech ti is pa lhjunash ti lhayasheesh, papi lhech pa yicleshesh jayu pava yuych'e pa is jayu pa lhjunash. 35Taj ti nan lhjunash pa lhacle ca natc'yutajch'e pa t'ôj ti nijooylhach'e ti chinfacleem ti is pa lhjunash, 36vooy pa vatcasinô isjop jayu ca niclôvalhesh ve'lheeshcum papin lhayasheesh; ca natc'utytajch'e pa lhacle pa t'ôj, pa nisuyeeshi ca chinvoojey pava lhayees ti tôjiyajch'e: pa lhech pa yisasiyan. 37Taj ti ca ninôôctaj pa lhacle ti lhetlha mônlhee, ti tôôlh pava lhayees yacutch'e, pa lhech lhacle vatsjanesh vooy pa lhech pa chiy'isiyan. Pa lhechesh pa vatcasinô pa nifaclem jayu papu lhech ti is pa lhjunash.

38“Meelh pa nivacle ja't'ajesha lhpa ôcjeclô ti climeshch'e pava yamqu'e pa t'ôj, 39vooy pa vatcasinô pa yiclôvalhesh jayu pa t'ôj, ca nivantajesh pava yamqu'e ti climeshch'e shi' ti a'lheeshch'e, ti tôlha' pava lhavo'matacheyesh atesha pa t'ôj; côque a'na lhjunash pa chiy'isinatesh pa lhjunash papi lhech.

40“Vooy pa nivacle ca ninamtajshisha'ne pava lhayees yiey pa lhôtôj shi' ti clap'aaf, pa lhech chiy'isinat. 41Ca ninamtajshisha'ne pava lhayees yiey lhtaco shi' ti clap'af'e pa lhtaco, pa lhech chiy'isinat shta. 42Taj ti ca ninôôctajesh pava yamqu'e ti yucleshch'esha'ne yiey pavan clap'af'ech'e ca lhetaja pa t'ôyish'e ja't'ajesha pa lhtaco'e, pa lhech tôlh'esham pa lhashtôtaj. 43Pa lhecheesh pa vatcasinô pa niclôvalhesh jayu, vooy pava yucajatch'e pava lhavo'matachey yiey pava clap'af'e ti yucleshch'esha'ne jan lhjunash ti yi'van pa vatashtôtaj yiesh pa vat'ôj, 44pa lhech nivacle lhayasha'esh pa vatashtôtaj, lhayaash ti yamqu'e pa lhshatech. Pa lhech nivacle yisasiyan, vooy pa vatcasinô pa nanfacleem jayu.

45“Pan caajem ti yamqu'e pa vatashtôtaj isjop jayu ca nichaaj pava yic'asch'esha'ne yuych'e shi' ca ya aj ca nip'o'e pa lhshatech, shi' pa lhtaco nip'o'e pa pacham ca nitôn'in: ‘¡Ya sas!, ¡Ya sas!’ 46Ti jôjjeclay caaj pava yamqu'e chiytôyesha ti chiysasiyan pa nivacle; pa ve'lhaasha'ne jayu yiey pa fach'ee pa vat'ichavat.

47“Meelh ca ninôôctajesh pava yamqu'e pava yuych'e vopovonilh ja't'ajesha pa clasim sivôclôclhayeech, 48ja't'ajesha pa tashinshtaj lhsashanilh shi' pa clasim ja't'ajesha pa tinôj, shi' pav'elh ti chiyisnatesh pa tinôj, 49vooy pava lhech yamqu'e ti tôlhesha pava matas ti tôjiyajeshi ja't'ajesha ti yucleshi, pa lhech yamqu'e lhech pa vatashtôtaj pa isjop ca ninôclitem pa vatcasinô. 50Vooy pa vatcasinô pa yiclôvalhesh jayu pan yamqu'e, pa yip'ojeyshi jayu ca nôqueshch'e pava napu'yama nalhus pavan yamqu'e. 51Vooy pa napu'yama nalhu pa niclôvalhesh jayu pava yamqu'e; ca apistaja ti tac'uych'e pavan yuych'e ja't'ajesh pa vopovo, ja't'ajesha pa tinôj shi' pav'elh ti chiyisnatesh pa tinôj, pava yamqu'e lhech pa vatashtôtaj ojey pa chiysasiyan pavan tôlhesha. 52Nôque lhjunash pan yie' pava tôlhesha pava yamqu'e pa isjop jayu ca chinapjunsham lhacôm'a, lhayaash ti tô'lha pa vatashtôtaj ojey; 53taj ti pa vatcasinô ti yiclôvalhesh ti yi'van pava yamqu'e ti ninatc'uych'e, 54pa yiyôjiesha jayu ca nicle'sheshi pava yamqu'e shi' ca nip'oeyshi pavan tôlhesha pa nôqueshch'e shta pava napu'yama nalhus.

55“Ca ninôjtajeshch'e ti chiyclesheshi pava yamqu'e, vooy pa vatcasinô pa yiclôvalhesh jayu. Ca nivantaj pava yamqu'e ti ninvô'mesh pa lhech yamqu'e ti yisasiyan vooy pava tôlhesha isjop ca chinapjunsham, lhama'taj pava yamqu'e ti ninatc'uych'e, lhayaash ti tifshaam ti yameshtasham lhjunashjulh ti yitôlhfach'ee. 56Vooy ca niclôvalhtajesh pa vatcasinô pava yamqu'e ti yi'van ti ampavacch'e ti chiyclesheshi, pa nantsoojic'oya jayu lhpa yuych'e pa tinôj ja't'ajesha pa vopovo. 57Taj ti ca napectajeyjop ti nôôc ti tac'uych'e pa lhech yuych'e, pa vopovo shi' pav'elh tôlhesha pa tinôj pa ninapjunesh jayu pava yamqu'e. 58Vooy lhpan yuych'e, pa vopovo shi' pava tôlhesha pa tinôj pava lhech yamqu'e ti ninnôôc ti chiycleshesh, pa ve'lheesh jayu ti chiycleshesh pa lhecheesh ti chiy'isiyan jayu.”

59Navôque chivancafaycuteshjop t'ajuya pava vatvo'matacheyesh pa vatashtôtaj yiesh pava chiyuych'e pa vopovonilh ja't'ajesha pa clasim, ja't'ajesha pav'elh chitôlhesha pa tinôj, jaspa isjop ti chinfac pa yie' ti is ja't'ajesha ti sas.