Search form

Levítico 15

Pava chivancafaycutesh t'ajuya pan yie' ti yisasiyan pa nivacle

1Pa Lhcaanvacle yiyôjiesha pa Moisês shi' pa Aarón pa yit'esha:

2“Anfacle'lhem napi Israel lhavos navôque: Meelh pa nivacle ca niclôquitajesh pa lhaso' pava lhcles ti nitonjatsha'ne, pa lhech ti nitonjatsha'ne pa vatsasiyanesh. 3Pa lhsasiyashesh pa nivacle ti nitonjatsha'ne pa lhaso' ti yin'atesha'ne pava lhcles nan lhjunash ti ninantonjatsha'ne. Pa lhacôm'a ti lhjunashch'e vatjulh ti yisasiyan.

4“Pan yie' ti yijo'e pa lhech nivacle ti nitonjatsha'ne pa chiytôyesha ti yisasiyan.

“Pan yie' ti yi'sha'ne pa chiytôyesha ti yisasiyan.

5“Pan yie' papi t'ajaya pan yie' ti yijo'e pa lhech nivacle, pa isjop jayu ca nicleesh pava yuych'e shi' ca nivaatcleshesh lhavaatsha pa yinôôt, pa chintôyesha ti yisasiyan pa namja pa tulh.

6“Papu ca naôvtaj'esha'ne yiey pan yie'sha'ne pa lhech nivacle, pa isjop jayu ca nicleesh pava yuych'e shi' ca nivaatcleshesh lhavaatsha pa yinôôt, pa chintôyesha ti yisasiyan pa namja pa tulh.

7“Papu ca naôvtaj'e ti t'ajaya pan nitonsha'ne pava lhcles, pa isjop ca nicleesh pava yuych'e shi' ca nivaatcleshesh lhavaatsha pa yinôôt, pa chintôyesha ti yisasiyan pa namja pa tulh.

8“Pan nitonjatsha'ne pava lhcles ti t'ach'iya papi is pa lhjunash, vooy pa lhech isjop jayu ca nicleesh pava yuych'e shi' ca nivaatcleshesh lhavaatsha pa yinôôt, pa chintôyesha ti yisasiyan pa namja pa tulh.

9“Pan yie' lhpa vatcaclôyte ti yiesh'esha'ne pan nitonjatsha'ne pava lhcles pa chintôyesha jayu ti yisasiyan.

10“Papu ca nit'ajaytaja pava yie'sha'ne pan nitonjatsha'ne pava lhcles, pa chintôyesha jayu ti yisasiyan pa namja pa tulh.

“Pan yie' papu ti yichaaj cavôque pa isjop jayu ca nicleesh pava yuych'e shi' ca nivaatcleshesh lhavaatsha pa yinôôt, pa chintôyesha jayu ti yisasiyan pa namja pa tulh.

11“Pa ca naôvtaj'e ti t'ajayesha pan nitonjatsha'ne pava lhcles, ti ninvôômcôôj, pa isjop jayu ca nicleesh pava yuych'e shi' ca nivaatcleshesh lhavaatsha pa yinôôt, pa chintôyesha ti yisasiyan pa namja pa tulh.

12“Pa tô'lhôs ti t'ajayesha pan nitonjatsha'ne pava lhcles, pa isjop jayu ca chinoflhit; vooy pava chiyisnatesh pa yeclô' pa isjop jayu ca chincleshesh.

13“Pa lhech nivacle ca nivatsjantajesh ti nitonjatsha'ne, pa isjop jayu ca natsjulhesh pava napu'yama nalhus t'ajuya ti vat'isiyan; pa yicleesh jayu pava yuych'e pa vatcleshesh jayu lhavaatsha pa yinôôt yalhatôlhch'een, pa lhecheesh pa vat'isiyan jayu. 14Pa pu'janayama nalhu pa natcum'e jayu pava napu' oftaas ja't'ajesha pava napu' ofo lhcles, pa yichey jayu pan chiyuy'een pa Tsha'nuvo'esh ti Chivatvan'e ca jaspa nijutey pa vatcasinô ca nôvesh'e t'ajuyish na Lhcaanvacle. 15Vooy pa vatcasinô pa tcufayeshem jayu pa ve'lha t'ajuya pa sasch'e, vooy peelh pa chiylhônsham, pa nôque lhjunash ti yisnatshem jayu yie' t'ajuyish na Lhcaanvacle pa vat'isinatesh pa nivacle ti nitonsha'ne pava lhcles.

16“Meelh pa nivacle ti nitonsha'ne pava lhcles, pa nicle'shesh jayu lhacôm'a pa lhavu'vat pa yinôôt, pa chintôyesha jayu ti yisasiyan pa namja pa tulh.

17“Pa ca naôvtaj'e pava chiyuych'e ja't'ajesha pa tinôj pavan nat'apee pava vatacles, pa tajulhey jayu ca chincleshesh pa yinôôt pa chintôyesha jayu ti yisasiyan pa namja pa tulh.

18“Ca nicaajtaj pa nivacle shi' lhpa ôcjeclô ti yamelhvane ts'ivee, papi lhech napu' isjop jayu ca nivaatcleshesh pa yinôôt pa chintôyesha jayu ti yisasiyan pa namja pa tulh.

Pava chivancafaycutesh t'ajuya pava yisasiyan lhpa ôcjeclô

19“Meelh lhpa ôcjeclô ti yameyjop ti vacla', pa chintôyesha jayu ti yisasiyan nôqueshch'e pava napu'yama nalhus.

“Pa ca naôtaj'e ti t'ajaya, pa chintôyesha jayu ti yisasiyan pa namja pa tulh.

20“Pa ca naôvtaj'e ti yijo'e lhpa lhech ti mônlheesh ti vacla', pa chintôyesha ti yisasiyan.

“Pa ca naôvtaj'e ti yie'sha'ne lhpa lhech, pa chintôyesha ti yisasiyan.

21“Papu ca naôvtaj'e ca nit'ajaytaja pan yie' ti yijo'e lhpa lhech, pa isjop ca nicleesh pava yuych'e shi' ca nivaatcleshesh lhavaatsha pa yinôôt, pa chintôyesha jayu ti vatsasiyan pa namja pa tulh.

22“Papu ca naôvtaj'e ca nit'ajaytaja pan yie'sha'ne lhpa lhech, pa isjop jayu ca nicleesh pava yuych'e shi' ca nivaatcleshesh lhavaatsha pa yinôôt, pa chintôyesha jayu ti vatsasiyan pa namja pa tulh. 23Ca lhetajee ti t'ajaya pan yie'sha'ne lhpa lhech ja't'ajesha pan yijo'e, pa chintôyesha ti vat'sasiyanesh jayu pa namja pa tulh.

24“Ca nicaajtaj pa nivacle ti yôjqu'enelhch'e lhpa lhech, pa yichesha ti vat'sasiyanesh, pa chintôyesha jayu ti vat'sasiyan pa nôqueshch'e pava napu'yam nalhus, yiey pan yijo'e lhech lhjunash shta ti yisasiyan.

25Nan lhjunash lhpa ôcjeclô ti yalhalha ti vacla' ti ninameyjop pa t'aplhu' ti vacla'in, ti vacla' ti yicheshch'e pava acloj nalhus, ja't'ajesha ti vacla' ti yicheshch'e pava acloj lhnalhusesh ti yaash, pa chintôyesha jayu ti yisasiyan ti mônlheesh ti vacla', jan lhjunashesh ti yameyjop pa t'aplhu' ti vacla'.

26“Yiey pa ca naôvtaj'e pan yijo'e lhpa lhech, shi' pa ca naôvtaj'e ti yie'sha'ne lhpa lhech, ti mônlheesh ti vacla', pa chintôyesha ti yisasiyan, jan lhjunash ti yameyjop pa t'aplu' ti vacla'.

27“Papu ca nit'ajaytaja pavôque, pa chintôyesha jayu ti yisasiyan. Pa isjop jayu ca yicleesh pava yuych'e shi' ca nivaatcleshesh lhavaatsha pa yinôôt, pa chintôyesha ti yisasiyan pa namja pa tulh.

28“Meelh ti vacla' ti vô'meshjop, pa isjop ca natsjuulh pava napu'yama nalhus, pa nanjooylhach'e ca nivat'isinatesh. 29Vooy pa pu'janayama nalhu pa t'acum'e jayu pava napu' oftaas ja't'ajesha pava napu' ofo lhcles, pa yicha'jey jayu pa vatcasinô yiey pa chiyuy'een ja Tsha'nuvo'esh ti Chivatvan'e. 30Vooy pa vatcasinô pa natcufaayshem pa ve'lha ti lhcufayjat'eshjop pa sasch'e, vooy peelh pa chiylhôneemsham. Nôque lhjunash pa t'acu'mem'e jayu pa vatcasinô yiey t'ajuyish na Lhcaanacle ca nivat'isiyanesh lhpa ôcjeclô ti vacla', 31pa nôque lhjunasha jayu ti lhavatonatelhac'oya jayu napi Iarael lhavos pava vat'sasiyanesh, ca jaspa tanca navômjatelh ca namjatelh'ach'e pava lhech yiey nan jôv'eshi napi lhech.”

32Navôque chivancafaycuteshjop papi vacla' shi' papi nitonjatsha'ne pava lhcles, ti vat'sasinatesha'ne cavôque; 33papi ôcjeclôy ti vacla'sha'ne, ve'lha pa lhnônashesh, lhacôm'a papi yitonjatsha'ne java lhcles ca lhetaja pa nivacle ja't'ajesha lhpa ôcjeclô, shi' papi nivacle ti yôjqu'enelhch'e lhpa ôcjeclô ti mônlheesh ti vacla'.