Search form

Levítico 22

Chiyiesheyshi pava vatcufayjates pa Lhcaanvacle

1Pa Lhcaanvacle yiyôjiesha pa Moisês pa yit'esha:

2“Anfacleem ja Aarón shi' japi lhcles ti tajulhey ca ninujumatsenesh nava matas ti isis navan yivenchatyam japi Israel lhavos, jaspa ya aj ca niclôquiesh na is yey. Yivaatsha ya Lhcaanvacle.

3“Anfacleem nôqueesh shi' pa lhjunashch'e jayu, ca naôvtaj'e papi lhcles ca nivat'sasiyantajesh ca nasnatajesh ca nôveshjop nava lhasnôyjes ti yivenchatem napi Israel lhavos na Lhcaanvacle, pa chiyjutfach'ee jayu yiey na yijuyish'e. Ya lhech ya Lhcaanvacle.

4“Nive'lhaa jayu papi lhcles ja Aarón ti lhayasha'esh pa vatashtôtaj ja't'ajesha ti nitonjat pava lhcles, ca nituj jayu pava lhasnôyjes pa namjey ca nivat'isiyantajop.

“Papu ca nit'ajaytaja pa sas tôlh'ejop papu vaf, ja't'ajesha papi t'ajaya pan nitonjat pava lhcles, 5ja't'ajesha pan vat'sasiyan ti t'ajaya pa yaquiset t'ôta'yesh pa t'oot, ja't'ajesha pa nivacle ti vatsasiyan ti yisasiyanesh pan t'ajaya, 6pa chintôyesha jayu ti vat'sasiyan pa namja pa tulh, pa sasjop jayu ca nituj pava lhasnôyjes ti jôjjeclay ninvaatcleshesh pa yinôôt. 7Pa chin'isiyan jayu ca nuytaj na jumcuclaay, pa nanjooylha pa tuj jayu pava lhasnôyjes, lhayaash ti lhacôsesh lhavaatsha. 8Sasjop ca nituj pa t'asjaan pa yaquiset vaf ja't'ajesha pa lhayjô' pa yaquiset, pa jaspa ya aj ca nivat'sasiyanesh pa lhech. Yivaatsha ya Lhcaanvacle.

9“Anfacleem ca nôfisjatch'e nava jasclanemch'e jaspa ya aj ca nanlhavach pa ca ve'lhaa pa sasch'e, pa jaspa ya aj ca nivafsha'ne jayu. Yivaatsha ya Lhcaanvacle javatvenchatesh japi lhech.

10“Nive'lhaa pa vanôôlhjôn'e ti yi'jop pa vatcasinô'esh ca isa'jop ca nituj jayu pava lhasnôyjes.

“Pa nilhecha pan yijo'jop pa vatcasinô pa nilhecha pa t'acumem'in ca isa'jop ca nituj jayu pava lhasnôyjes.

11“Vooy pa vatcasinô ca natcashaaytaja pa vatcumet'esh, pa lhech isjop ca nituj jayu pava lhasnôyjes. Shi' shta papi nivat'as'e pa lhajpôyich pa vatcasinô isjop jayu ca nitujelh pava lhacôs.

12“Vooy lhpa lhôse pa vatcasinô ca lhjayatajeesh pa vanôôlhjôn'e ti nivatcasinô'a'esh, pa sasjop jayu ca nituj pava vatcufayjates chiyjuteem papi vatcasinôc. 13Taj ti ca ôsch'acchetajeesh ja't'ajesha tinvômqueesh, ti amem papi lhcles, pa napecley pa lhajpôyich pa lhtata ca lhjunashajulh ti ve'lhasha'ne, pa isjop jayu ca nitujelh pava lhacôs pa lhtata. Vooy pap'elh papi vanôôlhjônjop pan vatcasinô'esh pa sasjop ca nitujelh jayu.

14“Ca nicaajtaj papi tuj ti yicôjôsa pava lhasnôyjes, pa tajulhey ca nashjatem pa vatcasinô pan tuj pa nashjat'apee pa ve'lha nôjesh t'iya'esh; 15Taj ti papi vatcasinôc sasjop ca nivashanem japi Israel lhavos ca niclôquiesh pava lhasnôyjes ti yijutem na Lhcaanvacle, 16pa ya aj ca nanlhatshic'oya pa lhav'ojiyashesh pa sasch'e ti tuj pava lhasnôyjes. Yivaatsha ya Lhcaanvacle, nan yivenchatlhatam ts'ivee.”

Pava lhnônashjop pava yaquisetes chiycufa'yesh

17Pa Lhcaanvacle yiyôjiesha pa Moisês pa yit'esha:

18“Asinôquiem ja Aarón shi' japi lhcles shi' lhacôm'a japi Israel lhavos, pa anfacleem navôque: ca nicaajtaj napi Israel lhavos ja't'ajesha papi vena tôlhshi' ti yi'shi' ts'ivee ti yieshjop na Lhcaanvacle pa yaquiset chiylhônsham, ca lhetaja pa chiyôfisjatch'ejop pa ti chinfac ja't'ajesha pa chiytôlhjatlhavne ti chiycufa'yesh, 19pa isjop jayu ca nôveshjop pa ve'lha jayanaj amem pa lhayasha pa jaspa chincumeshjulh. Isjop ca lhecha jayu pa vôcô jayanaj, pa tashinshtaj ja't'ajesha pa fusuc, 20taj ti ya aj na pa yaquiset tayashay, lhayaash ti tan jayu ca chincumeshjulh.*xs*

21“Pa ca naôvtaj'e papi yieshjop na Lhcaanvacle pa lhcufayjatjop ti chivaniisclanch'e, ca lhetaja ca chiyôfisjatch'ejop pa ti chinfac ja't'ajesha pa chiytôlhjatlhavne ti chiycufa'yesh, pa isjop jayu ca natcufa'yesh pava vôcôc jayanjas ja't'ajesha pava tashinshtas amem pa lhayasha pa jaspa chincumeshjulh. 22Pa ya aj ca nôveshjop na Lhcaanvacle pava yaquisetes taclujuy, ja't'ajesha vo'matsha'ne, ja't'ajesha yipôctessha'ne, ja't'ajesha pava t'ucajiysha'ne, t'sôôôysha'ne ja't'ajesha pava tavomatacheysha'ne pa t'ôj pa ya aj ca ninapjun'esham pa lhcufayjat'eesh yiey na lhavitôvat'esh na Lhcaanvacle. 23Nan lhjunash ca nitôôlhtaj'a ti lhatcufa'yesh ti isjop'am jayu ca acu'fayesh pa vôcô jayanaj ja't'ajesha pa tashinshtaj ti nilhavjôyach'e vatjulh pava lhafoc, taj ti pan chiycufa'yesh ti chiyôfisjatch'e ti chinfac, pa tan jayu ca chincumesh'ajulh. 24Pa tanca lhecha ca isa'jop ca nôveshjop na Lhcaanvacle pava yaquisetes vo'matsham pava lhcônshiyis ja't'asha ti chinclanshi. Pa ya aj ca asnatshelh'in cavôque yiey na acootsjat'elh. 25Pa tanca lhecha ca natcuumjulh papi vena tôlhshi' navôque yaquisetes ca nitujjop na a'Dioselh avaatsheelh, lhayaash pava lhech yaquisetes ti tayashay pa tan jayu ca chincumeshjulh.”

Pava lhnônashjop ti chiyclôn pava yaquisetes vatcufayjates

26Pa Lhcaanvacle yiyôjiesha pa Moisês pa yit'esha:

27“Meelh ca nanvat'ajtaj pa vôcô lhaôs, pa tashinshtaj ja't'ajesha pa tashinshtayche lhaôs, pa mônlhaajop lhpa lhamimi pa nôqueshch'e pava napu'yama nalhus, taj ti vooy pa pu'janayama pa nalhu pa natcufa'yesh pa isjop jayu ti chit'acumesh'in ti yilhônsham ti lhcufayjat'em na Lhcaanvacle.

28“Pa ya aj ca ve'lhaa pa nalhu ca aclôn lhpa vôcô ja't'ajesha lhpa tashinshtaj ca chi'a pa lhaôs.

29“Meelh ca vi'tajeshjop ca acufayjat t'ajuya ti chinshamesha na Lhcaanvacle, pa asnatesh pa ca afanisheesh ca isa' ca chinatcuumjulh. 30Jô'tatesh ti atuj tatsha pa lhech nalhu, pa ya aj na pa ca amônlhanit'e ca natjuya pa nijooylha nalhu. Yivaatsha ya Lhcaanvacle.

31“Asnatshelhyam nava yiyôjijates; pa ôfisjatelhch'e. Yivaatsha ya Lhcaanvacle.

32“Ya aj ca aclôquielh na is yey, ti ja'isinatem jayu napi Israel lhavaos. Yivaatsha ya Lhcaanvacle, ti ja'isinatelh'am avaatsheelh 33ti c'ayjatelh'e ja Egipto ti a'Diosyishelh. Yivaatsha ya Lhcaanvacle.”

Pava nalhusesh ti vatôclôjquevosesh

(Nm 28.16-25)