Search form

Levítico 26

1“Ya aj ca asnatshelh pava chiydiosiyan pa tanca lhecha pava chiyjôney; pa ya aj ca atsemajelhshi na acootsjat'elh pava utes chiyvenchatesh pava lhech pa tanca lhecha shta pava utes chiyiissha'ne; pa ya aj ca a'vuyelh'e t'ajuyish pava lhech, lhayaash yivaatsha ya Lhcaanvacle ti a'Diosshelh.*xl* 2Ach'anelhey nava yinalhusesh ti chit'ichay, pa asclaneshelhshi na tsitsôt'ajesh is'ôcji lhtôvash: Ya lhech yivaatsha ya Lhcaanvacle.*xm*

3“Ca avo'tajelhch'e na yifanish yivach shi' ca ôfisjatajelhch'e nava yiyôjijates ca asnatajeshelh, 4pa janchenelh'ay jayu pa tsha'nu pa ca t'aplhutajaa, pa vooy na cotsjaat shi' nava aacjuy shi' na joot acac'ovat pa nicaaj jayu pava lhay. 5Pa nicaajelh'am jayu pa trigo pa namja ja nivacalhtaj pava ôtjayetas, pa vooy pava ôtjayetas pa nama pa t'aplhu' ti chivancu'; pa lhtujelh jayu lhpa yucuve pa nape'shelhsha'ne, pa c'useelh'am'in jayu pa vi'tajelh'e na cotsjaat.*xn* 6Pa jajutelh'ay jayu pa is ca vi'tajelh'e na cotsjaat, pa tanca chinatôyiyjatelh jayu ca amôtajelhch'esha'ne, pa javômjatelhshiam jayu pava yaquisetes suy shi' pa vatvatclônjayash. 7Pa vooy avaatsheelh pa lhclôtsjatelh'in jayu papi niac'utsfasaelh, papi lhech t'aashelh'apee jayu pava aclesataselh ca naôvtajelh'e' ajuyishelh. 8Papi ve'lhanôjesh avaatsheelh yiclôtsjat'in jayu papi cien, pa vooy papi cien avaatsheelh yiclôtsjat'in jayu papi diez mil; papi niac'utsfasaelh t'aashelh'apee jayu pava aclesataselh ca naôvtajelh'e' ajuyishelh. 9Pa c'ovalheshelh'ay jayu avaatsheelh pava isis, pa c'aclontelh jayu avaatsheelh pa ajô'jelh, pa janelh'atshi avaatsheelh na chivatpeya'esh. 10Pa lhtujelh jayu pa trigo jan lhasclaneelhsha'ne pava vatjutsa' yincôpes amjelha jayu ca nicaajtajelh'am pa nich'a lhasclaneelh pa trigo.

11“Jôvelh'atshi avaatsheelh pa tanca jayu ca c'avô'melh; 12Yajatesh ti javoelh'atch'esha'ne jayu avaatsheelh ti ya lhech a'Diosyishelh, pa vooy avaatsheelh c'achifaseshelh jayu.*xñ* 13Ya lhech ya Lhcaanvacle ti a'Diosshelh nan nayjatelh'e ja Egipto ca jaspa navômjateshelh ti lhcumteselh'ash japi lhech; pa japôcjetshic'oya pa lhavo'nuqu'esh jan chinelh'atapee avaatsheelh, pa c'atojoneshelh ti c'apôyjatelhchisham.

Pava chiyivclanjatem papi ninanc'ashamsha'ne

(Dt 28.15-68)

14“Taj ti avaatsheelh ca nianc'ashamtajeeshelh ca niasnatajeeshelh lhacôm'a navôque vatyôjijates, 15ca avôômtajelh'in shi' ca apuntajelh nava yifanishyivach shi' nava yiyôjijates, ca niôfisjatajeelhch'e pa ca ve'lhaa nava yiyôjijates, ca amtajac'oya na chivatpeya'esh, 16pa yachi' shta nôque yifanisheeshelh'am jayu avaatsheelh: pa janchenelh'ay jayu pa vatjovayi shi' pa uj vatfamaat, pa vatclôjuut, pava lhayashac nava atôsjeyelh shi' pa yinucjôt nava avuuvteselh; pa tanca acumelh'e jayu pava lhcôvjiyanelh, lhayaash papi niac'utsfasaelh ti tuj jayu pa acavcalhech'elh. 17Vooy yivaatsha jayjuyelh'ajulh jayu, pa ya'shelh'atapee jayu papi niac'utsfasaelh. Pa ya'shelh'ac'oya jayu papi lhech ti nacônitshielh, pa yalhatajesh ti lhclôtelh jayu lha'ma ampaputaj ca nanachanelh.

18“Ca navclantajelh'am côque ca nianc'ashamtajeelhyam, pa jachajeshch'een jayu ca c'aclôyitelh jayu pa napu'yama pa jamjeyshi ti qu'ivalhelh'a avaatsheelh pa asasch'eelh. 19Japôcjetshisha'ne jayu pa nilhcajôyshaa lhnunitsjayash, jasnatesh'e jayu na vôôs ti tanca nanchenelh'ay pa tsha'nu, vooy nava yie' na cotsjaat pa tanca nitaay. 20Cha'lheesh jayu pa aniyitsjayashelh, lhayaash na cotsjaat ti tan jayu ca nitô'lha pa'na, pa nintaay jayu shta pava aacjuy yi'shi' pa acac'ovat.

21“Ca mônlhatajeesh ti lhatjuyeelhyijulh ti t'ôôlhjônelh'in ti lhanc'ashamelhyam, pa japeclelh'ay jayu shta ca c'aclôyitelh pa c'ashjat'apee pava napu'yama tôlh'ejop pava asasch'eclelh. 22Pa janchenelh'ay jayu pava yaquisetes suy ca nitifelh'ac'oya jayu papi acleselh, pa yivômjatelhsha'ne'ac'oya jayu pava aclôyelh, pa ampu'elh jayu pa ajô'jelh avaatsheelh pa amjelhey ti ampapu jayu ca chinvanshi pava anôyshayelh.

23“Ca navclantajelh'am lhacôm'a côque pa ampapu jayu ca nasclanelhch'e pa tanca avômjelh ti lhatjuyeelhyijulh, 24pa yivaatsha shta pa jayjuyelh'ajulh jayu, pa ve'lheeshcum c'aclôyitelh pa c'ashjat'apee pava napu'nôjesh c'aclôyiteshelh pava asasch'eclelh. 25Jachenelh'ay avaatsheelh pa clesataj ti chiycaatshaye'shelh'am na chivatpeya'esh; pa vooy avaatsheelh pa lhcumajelhey jayu ti lhclôtelhey pava avtsateselh, taj ti vooy yivaatsha jachenelh'atch'e jayu pava vatayashac, pa vooy avaatsheelh yaashelh'atapee jayu pa t'unaj papi niac'utsfasaelh.

26“Meelh ca javômjatajelhshi'ac'oya pava acôselh, pa vooy papi napu'nôjesh ôcjeclôy pa ve'lhaa lhpa yucuveshiy ca nineshch'evatam jayu lhpa yucuve t'ajuyelh'a avaatsheelh, taj ti tanca ajulhelhsham jayu avaatsheelh ca atujtajelh, pa tanca nape'shelhsha'ne jayu.

27“Ca navclantajelh'am côque ca nianc'ashamtajeelhyam ca niavôômtajeeshelh ti lhatjuyeelhyijulh, 28pa yivaatsha shta pa jayjuyelh'ajulh jayu pa yasuyelh'a jayu ca c'aclôyitelh pa c'ashjat'apee jayu shta pava napu'yama ca c'aclôyiteshelh pava asasch'eclelh. 29Pa lhecheesh pa lhtujelh jayu avaatsheelh papi natsôt'ajeshelh acleselh yitsjôy shi' papi ôcjeclôy. 30Pa javômjatsha'ne jayu pava asnatsjeselh is'ôcji lhtôvjas ampa ca nitô'lha, pa japôcjetshamsha'ne jayu pava avitôvteselhjop pa acôjqu'e pa lhniish, pa jan'apee jayu pava avuuvteselh amem pa lhamônlhajayash pava lhavuuvtes pava chidiosiyan amem pa lhamônlhajayash, pa janôcliteshelh'am jayu na yapuncheyashelh'a. 31Pa jaflitch'e jayu pava avtsateselh pa javômjatsha'ne jayu pava asnatsjeselh is'ôcji lhtôvash, pa tsicôtsitch'e jayu pa lhniish pava vatshatshivos.

32“Javômjatshi jayu na cotsjaat, vooy papi niac'utsfasaelh nachelh'ay jayu ca nôv'e' na lhech, pa nitôyieshelh'a jayu avaatsheelh. 33Vooy avaatsheelh pa c'acatsônjatelhey jayu pap'elh lhtachifas ca veeelhshi, pa vooy pa clesataj ampa lhashiya pa c'aclônshelh jayu. Vooy na acootsjat'elh chiyjôney pa am'e pa'na, pa vooy nava avtsateselh pa yafalhch'e jayu lhacôm'a. 34Pa lhechesh pa cotsjaat chinichayan cum pant'ajôôj pava lhnalhusesh ya aj na pa ca chinan'e' vooy avaatsheelh pa veelh'e pa lhcootsjat papi niac'utsfasaelh; pa nôque lhjunash pa t'ichayanelh jayu ja niichayanelhjop lhapesh. 35Pant'ajô'jesh pava lhnalhusesh ca chin'amiyan'e pa'na pa nit'ichay jayu pa chinôfisjatch'e cava nalhus ti lhôvelh'e.

36“Vooy papi tôlhelh'atsham papin mônlha yi'shi' pa lhcootsjat papi niac'utsfasaelh, pa jasnatshelh'am jayu pa ajovayielhjulh pa lhclôtelh'in jayu ca ape'yatajelh pa t'ôjôj pa aacjiyuc lhsaash ca nancôôtajsha'ne; pa aclôtelh jayu lha'yasha papu ti chiyjôyjanesh pa clesataj, pa lhancôt'eelhsha'ne jayu avaatsheelh ja tin'e ti ampapu ca najôyjanelh; 37pa lhnatelh'apeeen jayu pap'elh nan lhjunash papi ti yiclôtc'oya pa vatvatclônjayash, lha'ma ampaputaj ca najôyjanelh; ¡nive'lhaa avaatsheelh ca isa'elhjop'am jayu ca ajuyelhjulh papi niac'utsfasaelh! 38Pa navômjatelhsha'ne jayu papi lhôveelhshi lhtachifas, pa vooy pa lhcootsjat papi niac'utsfasaelh pa natifelh'ec'oya jayu avaatsheelh. 39Pa vooy papi mônlhasha'ne papi yi'shi' pa lhcootsjat papi niac'utsfasaelh pa naclônelhsha'ne jayu tôlh'ejop ti lhatmeneshelh'avach pa niysa'; ¡chinaclônelhsha'ne vatjuulh jayu papi anavot'elh tôlh'ejop pava niysisa lhjunash papi lhech!

40“Lha'ma avaatsheelh natôôytajelha pa niysa' shi' pa niysa' lhfanishlhavach papi anavot'elh, lhech lhjunash shta pa nilhqu'ishamjayasha shi' pa lhjuyjayashyijulh ts'ivee. 41Yivaatsha shta jayjuyelh'ajulh jayu avaatsheelh, pa c'acha'jelhey jayu pa lhcootsjat papi niac'utsfasaelh; yiey pa lhech'e pa chinachajeshelhshicham jayu pa aychavalhjayashelh niysa', pa chishayaneshelh'am jayu pa asasch'eelh. 42Pa lhechesh pa jaychavalhch'e jayu pa chivatpeya'esh ti jasnatshem ja Jacob,*xo* ja Isaac*xp* shi' ja Abraham,*xq* pa jaychavalhey jayu shta ja cotsjaat, 43nan c'ayjatelh'e avaatsheelh, pa chiyichayan jayu pava nalhus ti chit'ichayshi ti nit'ôyi'sheey ca veelh'e; pa chishayaneshelhch'eam jayu pa niysa' lhasnatshelh, lhayaash ti lhapunelhyic'oya nava yiyôjijates pa lhatcavo'yelhjulh nava yifanishyivach.

44“Ca navclantajelh'am côque, lha'ma ca vi'tajelhshi pa lhcootsjat papi niac'utsfasaelh, pa tan jayu ca c'apunelh pa tanca shta ca yicavoyelh'ajulh; pa tan jayu ca c'avômjatelhshi pa tan jayu shta ca yiaminatelh'am na chivatpeya'esh ti jasnatshem japi acchevot'elh, lhayaash yivaatsha ya Lhcaanvacle ti a'Diosshelh. 45Vooy na janjuulh, jaychavalhey jayu na chivatpeya'esh ti jasnatshem lhapesh japi lhech ti jayjat'een ts'ivee ja Egipto ti javanjiyinesh papi lhtachifas ti ya lhech ti lh'Diosyish. Yivaatsha ya Lhcaanvacle.”

46Navôque chitayôjijanesh vatyôjijatesesh shi' na vatneyjatsjanjayash ti yinesh'e lhapesh pa Moisês pa Lhcaanvacle yiey lhpa utiyuc Sinaí ti lhech yieshelh'e papi Israel lhavos.