Search form

Números 23

1Pa lhechesh pa yit'esha pa Balaam:

—Asnatesh'eyam nôque pava napu'yama itôvtes, pa asclansha'ne pava napu'yama vôcô lhcles shi' pava napu'yama tashinshtas lhcles.

2Pa Balac yisnatesh pan t'ônashem pa Balaam, pa napu'vane ts'ivee pava itôvtes yan'apee pa ve'lha vôcô lhaôs, ve'lha shta pa tashinshtaj lhaôs yive'lhan'e ts'ivee pava itôvtes.

3Pa nijooylha pa Balaam pa yit'esha pa Balac:

—Amônlhaajop nava chiycufa'yesh, pa vooy yivaatsha jôquey jayu ca nastô'ya pa Lhcaanvacle ca nachtajyiy pa javatvanelh jayu. Pa nijooylha pa janfac'am jayu pava nijutyi jayu ca nastôyjata.

Pa Balaam yit'eshem pa is papi Israel lhavos

Vooy pa Balaam yich'apee lhpa utiyuc lhôse ampapu ca nôv'e', 4pan yiey pa vatvanjiyinesh'e pa Dios. Pa yit'esha pa Balaam:

—Apis ti jasclaneelhsha'ne'am nava napu'yama itôvtes, pa ve'lhee ts'ivee ti jan'e' na ve'lha vôcô lhaôs, ve'lha shta na tashinshtaj lhaôs.

5Pa lhechesh pa Lhcaanvacle yiney lhashi pa Balaam pava yenem ca niteesh, pa yit'esha:

—Mapecley jan yie' ja Balac pa anfacleem nava jayeesh'a.

6Pa Balaam vapecley pa yi'van pa Balac pan vatsavat'e yi'jop pava vatcufayjates, yielhjop pant'ajôôj papi lhanvacles moabitas. 7Pa lhechesh pa Balaam pa chayjulh pava lhech vaclan jayu:

“Tôlhesh'e java uticuy lhum'ôcjinucjulh,

nashesh'e ja Aram,

chinamjatyiy ja Balac

lhanvacleesh ja Moab.

‘Ata'lhun —pa yit'eshyi—,

apôfiyuyam napi Israel lhavos,

pa at'esha pa niysa'

napi lhchifas pa Jacob.’

8Taj ti, ¿ta t'e ca yifanisheesh ca japôfiyu

napi ninteesh ca nipôfiyu pa Dios?

¿Ta t'e ca yifanisheesh ca yenchiyinesh pa niysa',

ca ninentajem pa Lhcaanvacle?

9Yiey nan t'aplhuquisham nava utes

ti javan'apee,

yiey nan t'aplhuquisham nava uticuy lhcles

ti jovalhey:

napi lhech vatachifas chivenchat pa yie'

pa nilhjunashajulh pap'elh lhtachifas.

10Lhjunashjulh pa c'ocshi cotsaat;

¿she papi iseemjop ca natsjuulh?

¿She papi iseemjop ca nitô'ya pa t'ajôôj?

¡Majaa'ayaam ca vaf yivaatsha

nan lhjunash napuque nivacle yivo'yeshch'e,

pa isyaam cô lhech c'ôj'e'

nan lhjunash napi lhech!”

11Pa lhechesh pa Balac pa yitsôyiey pa Balaam:

—¿She pa lhasnatesh? Yivaatsha janchaj'ay ca apôfiyu napi niyic'utsfasa, vooy avaatsha lht'a'lhemey pa is.

12Pa yicuulh pa Balaam:

—Apis ti janfac'am yivaatsha ti tsi'sha pava yiney yashi pa Lhcaanvacle pa lhech yônasheem napi lhech.

13Taj ti pa Balac pa vaniyitesh shta:

—Atatvoyich'e ca shtac'uyshey peelh, pa tsi'sha ti chiyvan pa lhavôjqu'e na vat'ichavat, taj ti tanca lhacôm'aa na vat'ichavat. Pa apôfiyuyam napi lhech'e.

14Pa Balac yichajey pa Balaam pa tavashay yi'shi' pa Zofim, yi'apee lhpa utiyuc lhey Pisga, yiey pa yisnatesh'e pava napu'yama itôvtes, pa ve'lha'e ts'ivee ti yan'apee pa ve'lha vôcô lhaôs shi' pa ve'lha tashinshtaj lhaôs. 15Pa lhech yie' pa Balaam ti yit'esha pa Balac:

—Amônlhaa'e cum nôque, vi'jop nava vatcufayjates, pa vooy yivaatsha jôquey jayu ca javatvanelh pa Dios.

16Pa Lhcaanvacle nachey ti vatvaneelh pa Balaam pa yiney lhashi pava ca niteesh. Pa yit'esha shita:

—Mapecley jan yie' ja Balac pa anfacleem nan lhjunash ti jayeesh'a.

17Pa vapecley pa Balaam pa yi'van pa Balac pan vatsavat'e yi'jop pava vatcufayjates, shi' papi tanôôycheelh papi lhcaanvacles moabitas. Pa niy'ôsesh pa Balac:

—¿Ta yit'esh'a pa Lhcaanvacle?

18Pa lhechesh pa yinôôclhanite'ma pa Balaam pa lhjunash pavan chayjulh:

“Na Balac, lhaôs pa Zipor,

acano'a cum ca ach'anyi.

19Pa Dios nilhjunashajulh papi vafsha'ne:

pa nicuts'aja pa ninanvaych'aclaj shta

pa lhaychavalhjayash.

Meelh ti yit'esha pa'na

pa lhech lhjunash ti vaclan.

Meelh pa ti nifac, pa yôfisjatch'e.

20Caajyam nava chitayôjijanesh

ca jaya'lhemey pa is.

Ca niisinataj pa Dios,

pa sasjopyam ca yijuyeshjulh.

21Ampapu ca nivanesh pa lhjôts'ôclônjayash,

shi' pa niysa' ca nôvji' napi Israel lhavos, napi

lhchifas pa Jacob.

Pa Lhcaanvacle lh'Dios mônlhajop japi lhech,

pa vooy japi lhech vatyôji'esh ti yinvacleyan.

22Pa Dios, pan yayjat'e ja Egipto,

pa lhech yitsôt'ajesh japi lhech

lhayyasha pava lhac'uc pa vôcôtaj.

23Sasjop ca chinatjuyeshjulh pa Jacob pava niysisa

pa sasjop ca chinatjuyeshjulh pa Israel pa vatvitôyjayash.

Nôqueesh cava tajulhey ca lhnônasha japi Israel lhavos:

‘¡Yaash pa t'ajôôj pava lhasnôyjes

ti yisnatesh'am pa Dios!’

24Napuque vatachifas netshamch'e

pa tafjunvatsham'in jan lhjunash ja jump'uvalhjetaj,

pa tanca nit'ichay pa yamjey ti yijuj'in

pa lhayjô'

pa yiyô'ji pava lhavoyey

pava vafsha'ne.”

25Pa Balac yit'esha pa Balaam:

—¡Ca sastajajop'am ti lhpôfiyu napuque lhtachifas, pa ya aj na ca a'lhema pa is!

26Pa yicuulh pa Balaam:

—¿Ni'apisa t'e ti jayeesh'a ti tsi'sha ti isjopyam ca jasnatesh pava niyôjeeshyi pa Lhcaanvacle?

27Pa lhechesh pa yit'esha shta pa Balac:

—Ata'lhun, c'achajey jayu peelh ca shnôvesh'e. Ameesh pa Dios ca nineneesh ca nipôfiyu napi Israel lhavos yiey na lhech'e.

28Pa nôque lhjunash pa Balac ti yichajey pa Balaam yiey pa lhôtôj'e lhpa utiyuc lhey Peor, pa lhech'e ti yivan'apee lhacôm'a pa am'e pa'na. 29Lhech yie' pa Balaam ti yit'esha pa Balac:

—Asnatesh'eyam nôque pava napu'yama itôvtes, pa asclansha'ne pava npu'yama vôcô lhcles shi' pava napu'yama tashinshtaj lhcles.

30Pa Balac yisnatesh pan t'ônash pa Balaam pa yive'lhan'e ts'ivee pava vatcufayjates ti yan'apee pava itôvtes pa ve'lha vôcô lhaôs shi' pa ve'lha tashinshtaj lhaôs.