Search form

Números 6

Nava chiyôji'sha papi chiyvenchatem pa Lhcaanvacle lhanquey nazareos

1Pa Lhcaanvacle yiyôjiesha pa Moisês pa yit'esha:

2“Anfacleem napi Israel lhavos navôque: Ca nicaajtaj pa ve'lha nivacle ja't'ajesha lhpa ve'lha ôcjeclô ti nifacle'mey pa yivenchatesh na Lhcaanvacle lhanqueyesh nazareo, 3pa tan jayu ca niyô'ji pa ôtjayetaj t'i', pa tanca ve'lhaa ca niyô'ji pava tanqu'etsjey, pa tanca lhecha pa nivayshi tô'lha pava ôtjayetas t'i'; pa tanca nituj shta pava ôtjayetas pava nich'ac shi' pava clajôja'ne.*xf* 4Ti jôjjeclay ninameyjop pa t'aplhu' ti chinfacleem pa ya aj cum ca nituj pa ca na'a pava tô'lha pava ôtjayetacuy. 5Pa sasjop jayu shta ca nivoc'ô, pa istaa jayu ca nan'ate ca pitesach'e pa namjey pa chiyetôn'ejop pa chinfacleem, pa nimônlhanit'ec'oya ca niisinatem na Lhcaanvacle. 6Pa nôqueshch'e pava lhech nalhus pa sasjop jayu ca nit'ajaya pa lhavu'vat papu ti vaf. 7Nilhecha shta ca lhetaja ca nivaftaj pa lhtata, lhpa lhamimi, pa ca naôvtaj'e pa lhchecla', ja't'ajesha lhpa lhch'injô, pa jaspa tanca nivat'sasinatesh, lhayaash côque ti tayôjijanesh ca chinvat'isinatem na Lhcaanvacle. 8Lhacôm'a pava nalhus pan yôj'e' pava chinfacleem ti chi'isinatem jayu na Lhcaanvacle.

9“Ca nicaajtaj pa yalha ti vaf ti yie' lhavôôj pa lhech pa vapecleyjop jayu ti yisasiyanesh pava lhayees, pan chiyvenchatem na Lhcaanvacle, pa isjop jayu ca nivoc'ôjatch'e pa lhshatech napu'yama pat'ajôôj pava nalhus, pa lhech nalhu chinôôclhanitsha ti chiy'isiyan. 10Vooy pa pu'janayama nalhu pa yicha'jey jayu pa vatcasinô pava napu' oftaas ja't'ajesha napu' pava ofo lhcles, yiey na chiyuy'e na Tsha'nuvo'esh ti Chivatvan'e. 11Vooy pa vatcasinô pa ve'lha jayu pa tcufayesh pava lhech t'ajuya pa sasch'e vooy peelh chiylhônsham, pa yisnateshjop jayu pa t'ajuya ti chit'acu'meshjulh ti chiyvômjatch'e pa sasch'e ti t'ajaya papu ti vaf. Pa lhech nalhu vapecleyjop jayu ti yivenchatem pava lhayees na Lhcaanvacle, 12pa lhech tôlhesh'e jayu ti ve'lheesh pa lhnalhu'esh ti chiyvenchatem na Lhcaanvacle. Vooy pava vatjutsa' nalhus tan jayu ca chinaychavalhch'e, lhayaash pava lhayees ti chiyvenchataj ti sas. Isjop jayu shta ca nanchajey na Lhcaanvacle pa tashinshtaj ve'lha lhnincôp ti lhcufayjat'eshjop pa tamenesh lhavach.

13“Meelh ca namtajey lhac'o' pa yôj'e' ti chiyvenchat, pa lhech nazareo pa isjop ca nôquey ja chiyuy'een ja Tsha'nuvo'esh ti Chivatvan'e, 14pa nijutem na Lhcaanvacle pa ve'lha tashinshtaj ve'lha lhnincôp amem pa lhayasha t'ajuya ti chiylhônsham, ve'lha lhpa tashinshtaj ve'lha lhnincôp amem pa lhayasha ti lhcufayjat'eshjop pa sasch'e, vooy pa ve'lha tashinshtaj jayanaj amem pa lhayasha lhcufayjat'eshjop ti chivaniisclanch'e. 15Isjop shta ca natcufa'yesh lhpa ve'lha sisenilh yich'e' pava yucuvec pa isshi' climshi ameyshi pava yiyalhiyan ti chiyot'ateshi pa lhape'; pava chiyclasayanch'esha'ne ameyshi pava yiyalhiyan chiysichatch'e pa lhape', pa nu'ja java chijuyjata vatcufayjatesesh java chiycôvjiyan shi' pa ôtjayetas t'i'. 16Vooy ja vatcasinô pa natcufa'yesh jayu yiey t'ajuyish na Lhcaanvacle pa vatcufayjatjop pa sasch'e shi' pava chiylhônsham, 17pa natcufa'yesh jayu pa tashinshtaj jayanaj t'ajuya ti chivaniisclanch'e, ca nu'ja lhpa sisenilh ti yich'e' pava yucuvec ameyshi pa yiyalhiyan, pa tcufayesh jayu pava chiycôvjiyan shi' pa ôtjayetas t'i'. 18Vooy pa nazareo pa yivoc'ajatch'e jayu pa lhshatech yiey ja chiyuy'een ja Tsha'nuvo'esh ti Chivatvan'e, pa t'acum'e jayu pava lhayees ti yivenchat pa yu'jam jayu pa itôj ca nôquesh ti lhcufayjat'eshjop ti chivaniisclanch'e. 19Vooy ja vatcasinô pa t'acum'e jayu lhpa lhfapôque pa tashinshtaj apis ti yoji', ve'lha lhpa yucuve ameyshi pa yiyalhiyan yich'e' lhpa sisenilh shi' lhpa chiclasayanch'e ameyshi pa yiyalhiyan, pa nicumjat'e jayu lhacôm'a pa nazareo, ca ninôjtajeshch'e ti yivoc'ajatch'e pa lhshatech. 20Pa lhechesh ja vatcasinô pa yisnateshjop jayu pa ca nôveshjop na Lhcaanvacle. Vooy pa t'oot pa yaquiset pan yisnateshjop ti yieshjop shi'lhpa lht'oycha ti yine'mey na Lhcaanvacle, nava lhech lhasnôyjes chiyiisclaneemsha'ne ja vatcasinô. Ca ninôjtajeshch'e cavôque vooy pa nazareo isjop jayu ca niyôji pa ôtjayetas t'i'.

21“Nôque vatyôjijatjop t'ajuya pa ti chinfacvatam ti chiyvenchatesh na Lhcaanvacle nan lhjunash pa nazareo, cavôque vatcufayjates isjop ti chiyieshnee pa tanca chinatsjulhesh pav'elhcha côque ti vatcufayjat'esh. Isjop jayu ca chinôfisjatch'e pa ti chivatpeya'esh, yiey pan t'ônashesh ti chiyisnateshjop cavôque lhanfanash.”*xg*

Isis pava yit'esh pa vatcasinô'esh

22Pa Lhcaanvacle yiyôjia pa Moisês pa yit'esha:

23“Anfacleem ja Aarón shi' japi lhcles meelh ca niteetajeshem pa is japi Israel lhavos pa nôque lhfanisheesh:

24‘Vooy na Lhcaanvacle yit'esh'am pa is

shi' ca ninujumatsen'ash;

25vooy na Lhcaanvacle novalhesha'ne jayu

na lhshamitjayash, shi' ca ninôclit'am

na lhcavts'aclayjayash;

26vooy na Lhcaanvacle ca novalhesha'ne

na lhencheyash, shi' ca nijut'am na vatpiiyash.’

27“Lhechesh japi lhech pa nanfacleem jayu na yey napi Israel lhavos, pa vooy yivaatsha jayeetshem jayu pa is.”