Search form

1 Corintios 16

Ri rumolik ri ofrenda ri ndibꞌan chin ngetoꞌox ri hermanos ekꞌo pa tinamit Jerusalén

1Kami, pa ruwiꞌ ri rumolik ri ofrenda ri ndibꞌan chin ngetoꞌox+ ri loqꞌolej teq ralkꞌuaꞌl ri Dios, nibꞌij chiwa achel nubꞌiꞌin kan chake ri ralkꞌuaꞌl ri Dios ri ndikimal kiꞌ pa rubꞌiꞌ pa teq tinamit chin ri rochꞌulew Galacia. 2Ri nabꞌey qꞌij chin nojel semanas,+ chiꞌijununal tikꞌamaꞌ kan jubꞌaꞌ rikꞌin ri méra ndichꞌek+ y tiyakaꞌ, chin keriꞌ imolon chik nojel ri ofrenda ndiyaꞌ atoq ngibꞌeqaqa iwikꞌin. 3Y atoq ngibꞌeqaqa iwikꞌin, ngenteq e ri hermanos eꞌichaꞌon+ rix chin ndekijachaꞌ ri ofrenda ri imolon. Rejeꞌ ndikikꞌuaj e wuj pa kiqꞌaꞌ ri achoq chupan ndubꞌij chi utz tikꞌan apu kiwech pa tinamit Jerusalén. 4Y si ndikꞌatzin chi riyin ngibꞌa chujachik ri ofrenda riꞌ, rejeꞌ ngebꞌa chuwij.

Ri Pablo ndubꞌij chi ndirajoꞌ ndibꞌa chikitzꞌetik ri aj Corinto

5Atoq ngibꞌa chiꞌitzꞌetik pa tinamit Corinto, nabꞌey ngineqꞌax pa teq tinamit chin ri rochꞌulew Macedonia,+ porque ndikꞌatzin ngineqꞌax kikꞌin ri hermanos chiriꞌ, y kꞌajariꞌ ngibꞌeqaqa iwikꞌin. 6Nuyoꞌon pa wánima chi niwojoꞌ ngibꞌekꞌojeꞌ jun jarupeꞌ qꞌij iwikꞌin o xtinqꞌasaj ri tiempo chin tew chiriꞌ. Y keriꞌ, atoq nuqꞌasan chik ri tiempo chiriꞌ chiꞌikajal, rix nginitoꞌ e rikꞌin ri ndikꞌatzin chuwa atoq xtintzꞌen chi e nubꞌey+ apeꞌ na xkibꞌa. 7Ma niwojoꞌ ta ngixbꞌentzꞌetaꞌ yan wokami xe chin kaꞌi-oxiꞌ qꞌij. Porque nuyoꞌon pa wánima chi niwojoꞌ ngikꞌojeꞌ chiꞌikajal kꞌiy qꞌij, si ri Ajaw nduyaꞌ qꞌij chuwa. 8Pero kꞌa ngikꞌojeꞌ waweꞌ pa tinamit Éfeso, kꞌa teqꞌax na ri nimaqꞌij Pentecostés. 9Porque ri Ajaw ruyoꞌon qꞌij chuwa chi nibꞌen jabꞌel y nimalej samaj pa rubꞌiꞌ, maske santienta wineq yakatajneq koyowal+ roma ri samaj nibꞌen.

10Atoq ndeqaqa ri hermano Timoteo, tibꞌanaꞌ chi rijaꞌ utz ndunaꞌ chare atoq kꞌo chiꞌikajal, porque rijaꞌ ndubꞌen chuqaꞌ rusamaj ri Ajaw, achel riyin.+ 11Romariꞌ, ma jun chiwech rix tubꞌen chare chi maneq reqalen.+ Tiyaꞌ pe ri ndikꞌatzin chare atoq ndutzꞌen chi pe bꞌey, y tibꞌanaꞌ chi ndikikot nditzolij pe chireꞌ apeꞌ yinkꞌo, porque riyin woyobꞌen junan kikꞌin ri chꞌaqa chik hermanos.

12Jakꞌa pa ruwiꞌ ri hermano Apolos,+ nibꞌij chiwa chi santienta kamelal xinkꞌutuj chare chi tibꞌa apu chiꞌitzꞌetik chikij ri hermanos aj Corinto ri xetuqaqa waweꞌ. Rijaꞌ ma ndirajoꞌ ta ndibꞌa yan, pero ndibꞌa apeꞌ rixkꞌo atoq jamel ruwech.

Ri rukꞌisibꞌel teq pixabꞌanik nduyaꞌ ri Pablo

13Tichajij ri ikꞌaslen,+ kaw tipabꞌaꞌ iwiꞌ+ chupan ri tijonik qayoꞌon kan chiwa. Ma kixtzolij chiwij roma ri kꞌayew ndiqꞌasaj pa ikꞌaslen y tikꞌojeꞌ más ruchuqꞌaꞌ ri iwánima rikꞌin ri Ajaw. 14Rikꞌin nojel ri ndibꞌen, tiqꞌalajin chi qetzij ngixojowan.+

15Hermanos, rix iwetaman chi ri Estéfanas+ y ri ekꞌo pa rachoch, ja rejeꞌ ri nabꞌey xetaqin ri Cristo chiꞌikajal rix aj rochꞌulew Acaya,+ y chuqaꞌ kitijon kiqꞌij chi jalajaj toꞌonik ndikiyaꞌ chake ri loqꞌolej ralkꞌuaꞌl ri Dios. 16Nichilabꞌej kꞌa chiwa hermanos, chi tinimaj kitzij ri eꞌachel rejeꞌ, y tinimaj chuqaꞌ kitzij konojel ri ngetoꞌon pa rusamaj ri Dios y kin ndikijech kiꞌ chupan+ chin ndikibꞌen.

17Riyin tzꞌan ngikikot chi xetuqaqa ri Estéfanas, ri Fortunato y ri Acaico, porque chiꞌikajal rix eꞌeleneq pe, chin xukibꞌanaꞌ ri ma ngixtiker ta ndibꞌen rix porque ma rixkꞌo ta pe chireꞌ. 18Porque rejeꞌ xukiyaꞌ uxlanen pa wánima,+ achel chuqaꞌ kiyoꞌon kan pa iwánima rix. Ri wineq eꞌachel rejeꞌ ndikꞌatzin ngeꞌiyaꞌ pa cuenta roma ri samaj ndikibꞌen pa rubꞌiꞌ ri Ajaw.

Ri Pablo ndukꞌis rutzꞌibꞌaxik re wuj reꞌ rikꞌin ruxunaqil teq kiwech ri hermanos

19Ri eralkꞌuaꞌl ri Dios ri ndikimal kiꞌ pa teq kitinamit waweꞌ pa rochꞌulew Asia,+ ndikiteq ruxunaqil iwech. Ri Aquila, ri Prisca y konojel ri ralkꞌuaꞌl ri Dios ri ndikimal kiꞌ pa kachoch+ rejeꞌ, ndikiteq santienta ruxunaqil iwech pa rubꞌiꞌ ri Ajaw. 20Konojel ri hermanos aj waweꞌ ndikiteq ruxunaqil iwech. Rix tiyaꞌ kꞌa ruxunaqil iwech chiwech rikꞌin jun loqꞌolej tzꞌubꞌanik+ chiꞌiqꞌoꞌtz.

21Riyin Pablo rikꞌin nuqꞌaꞌ+ nitzꞌibꞌaj e ruxunaqil iwech.

22Si kꞌo jun wineq chiꞌikajal ri ma ndirajoꞌ ta ri Ajaw Jesucristo, tiqaqa nojel ri castigo+ nduyaꞌ ri Dios pa ruwiꞌ. ¡Ajaw, katuqaqa paqiꞌ!

23Ri favor ri nduyaꞌ ri Ajaw Jesús kin ta xtikꞌojeꞌ pa iwiꞌ. 24Riyin tzꞌan ngixinwojoꞌ rix iwonojel ri jun qánima qabꞌanun iwikꞌin roma qataqin ri Cristo Jesús.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index