Search form

1 Corintios 3

Ri aj Corinto ma junan ta keqalen ndikibꞌen chake ri rusamajelaꞌ ri Dios

1Riyin hermanos, atoq xikꞌojeꞌ iwikꞌin, ma xitiker ta xichꞌaꞌa chiwa achel ngichꞌaꞌa chake wineq ri ukꞌuan kikꞌaslen roma ri Espíritu Santo, xa xkꞌatzin chi xichꞌaꞌa chiwa achel ngichꞌaꞌa chake wineq ri ma ukꞌuan ta kikꞌaslen roma ri Espíritu, xa achel ta ngichꞌaꞌa chake wineq ri kꞌaja ok xkitaqij+ ri Cristo. 2Ri tijonik xinkꞌut kan chiwech ja ri más ma cuesta ta ndikꞌoxomex.+ Ma xixintijoj ta rikꞌin tijonik ri más cuesta chi ndikꞌoxomex porque ri tiempo riꞌ, kꞌa ma ndikꞌoxomaj ta, y kꞌa keriꞌ na wokami ma ndikꞌoxomaj ta, porque xa rix achel chꞌuteq akꞌolaꞌ ri kꞌa ngetzꞌuman. 3Keriꞌ nibꞌij chiwa, porque rix kꞌa rix ukꞌuan roma ri achike ndirayij, roma xe jun samajel chin ri Dios ndiqaꞌ chiwech y ma ndiqaꞌ ta chiwech jun chik, y hasta ndibꞌen oyowal chiwech romariꞌ. Riꞌ ndubꞌij tzij chi ri ikꞌaslen ukꞌuan roma ri irayinik, y ri ngixnojin xa achel ngenojin ri wineq ri ma ekꞌo ta pa rubꞌey ri Dios. 4Porque atoq jun chiꞌikajal ndubꞌij: Riyin woqan ri Pablo, y jun chik ndubꞌij: Riyin woqan ri Apolos, rikꞌin riꞌ ndiqꞌalajin chi kꞌajani tikꞌoxomaj rutzij ri Dios y kꞌa rix achel ri wineq ri ma ekꞌo ta pa rubꞌey ri Dios.

5¿Achike kꞌa más ri Apolos, y achike kꞌa más riyin Pablo ndibꞌij rix? Roj, xa roj ok rusamajelaꞌ ri Dios, ri xojrukusaj chin xitaqij ri Ajaw. Y chiqajununal xyoꞌox chaqe achike chi samaj xqabꞌen+ chiꞌikajal y jariꞌ ri xqabꞌen. 6Riyin Pablo, xitiko ri rutzij ri Dios pa iwánima,+ ri Apolos xuyiꞌaj ri xintik kan riyin, pero ja ri Dios xbꞌanun chi xkꞌiy pe ri tzij tikil pa iwánima. 7Y reꞌ ndubꞌij tzij chi nixta ri xtikon y nixta ri xyiꞌan, nim ta reqalen, xa kin xe wi ri xkꞌiytisan ri tzij pa iwánima ri kin nim reqalen, y riꞌ, ja ri Dios. 8Ri xtikon y ri xyiꞌan ri tikoꞌ, xa junan erusamajelaꞌ ri Dios, pero chikijununal ndiyoꞌox rajel-rukꞌexel chake roma ri samaj xkibꞌen.+ 9Porque chi roj kaꞌiꞌ roj rusamajelaꞌ ri Dios, y rix, rix achel jun ulew tikon ruwech roma rijaꞌ, y rix achel chuqaꞌ jun jay+ richin rijaꞌ. 10Yin roma ri favor ruyoꞌon ri Dios chuwa, xinok jun ri retaman nduyaꞌ ruxeꞌ ri jay riꞌ. Yin xintik qa ri ruxeꞌ+ y chꞌaqa chik samajelaꞌ ngetajin rikꞌin ri samaj pariꞌ ruxeꞌ ri jay riꞌ, pero chikijununal ndikꞌatzin ndikitzꞌet utz-utz achike rubꞌanik ndikibꞌen chare ri jay. 11Kꞌo chik ruxeꞌ ri jay riꞌ, y riꞌ ja ri Jesucristo.+ Y nixta jun nditiker ndujel ri ruxeꞌ ri jay chin ta xtuyaꞌ chi qa jun. 12Pariꞌ ruxeꞌ ri jay riꞌ, ekꞌo ndikikusaj qꞌanapueq, saqipueq o jabꞌel chi abꞌej chin ndikipabꞌaꞌ ri jay. Y chꞌaqa chik ndikikusaj cheꞌ, patzꞌen o kꞌin. 13Pero ri samaj xtikibꞌen chikijununal, nditzꞌetetej chupan ri qꞌij atoq ri Cristo ndunikꞌoj ri samaj kibꞌanun ri rusamajelaꞌ, porque ri qꞌij riꞌ ndipuꞌun rikꞌin qꞌaqꞌ, y chupan ri qꞌaqꞌ riꞌ nditzꞌetetej ri achike xkikusaj ri samajelaꞌ chikijununal chin xkipabꞌaꞌ ri jay. 14Si ri samaj xubꞌen jun samajel pariꞌ ruxeꞌ ri jay ma ndikꞌis ta pa qꞌaqꞌ, kin ndiyoꞌox rajel-rukꞌexel chare. 15Pero si xtikꞌat pa qꞌaqꞌ ri rusamaj, xa chiriꞌ ndikꞌis nojel ri samaj xubꞌen. Ri samajel riꞌ ndikolotej, pero xa achel animajneq pe pa qꞌaqꞌ keriꞌ.

16¿Ma iwetaman ta kꞌa chi rix ri itaqin ri Cristo, rix rachoch ri Dios y ri Espíritu chin ri Dios kꞌo pa iwánima?+ 17Si kꞌo jun ndikꞌiso ruqꞌij ri jay riꞌ, ri Dios ndukꞌis ruqꞌij ri jun riꞌ, porque ri jay riꞌ loqꞌolej y kin chin wi ri Dios, y ri jay riꞌ ja rix.

18Nixta jun tuchꞌakatij qa riꞌ ruyon+ chuwech. Si kꞌo jun chiꞌikajal ndunaꞌ chi kꞌo aj rochꞌulew nojibꞌel ruchajin, más utz tubꞌanaꞌ chi maneq reqalen ri nojibꞌel riꞌ,+ chin keriꞌ ndiril ri qetzij nojibꞌel pataneq rikꞌin ri Dios. 19Porque chuwech ri Dios, ri aj rochꞌulew nojibꞌel, xa chꞌujulej teq nojibꞌel. Porque chupan ri rutzij ri Dios ri tzꞌibꞌan kan ndubꞌij: Ri kꞌo santienta aj rochꞌulew nojibꞌel kikꞌin, ri Dios ndubꞌen chi ja nojibꞌel riꞌ nditzaqa kichin.+ 20Y tzꞌibꞌan kan chuqaꞌ: Ri Ajaw retaman chi ri wineq ri kꞌo santienta aj rochꞌulew nojibꞌel kikꞌin, ri nojibꞌel riꞌ xa ma jun reqalen.+ Keriꞌ tzꞌibꞌan kan. 21Roma kꞌa riꞌ, nixta jun chiwech rix kin víva tunaꞌ chare roma roqan jun rusamajel ri Dios ri más ndiqaꞌ chuwech, porque konojel samajelaꞌ y nojel ri ruyoꞌon ri Dios chiwa, kin iwichin rix.+ 22Riyin Pablo, keriꞌ chuqaꞌ ri Apolos, ri Cefas, ri rochꞌulew, ri kamik, ri kꞌaslen, ri achike ndiqatzꞌet wokami y ri xtiqatzꞌet chuwaꞌq-kabꞌij, nojel iwichin rix, 23y rix, rix richin ri Cristo,+ y ri Cristo richin ri Dios.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index