Search form

1 Juan 2

1Rix ri kin achel rix walkꞌuaꞌl keriꞌ, nitzꞌibꞌaj e nojel reꞌ chiwa, chin ma ngixtzaq pa mak, pero si kꞌo jun ndubꞌen mak, kꞌo jun ndichꞌaꞌa pa qakꞌexel chare ri Tataꞌaj Dios, y riꞌ ja ri Jesucristo ri kin chojmilej rukꞌaslen.+ 2Rijaꞌ xujech rukꞌaslen pa kamik pa qakꞌexel chin xkꞌis royowal ri Dios pa qawiꞌ roma ri qamak, y ma xe ta roma ri qamak roj, xa kin roma chuqaꞌ kimak konojel wineq chochꞌulew.+

Ri Dios ndubꞌij chi tiqajoꞌ qiꞌ

3Si roj ndiqabꞌen ri ndubꞌij ri ru-mandamientos ri Dios, jariꞌ ndikꞌutu chi qetzij qetaman runoꞌoj rijaꞌ.+ 4Pero si kꞌo jun ndubꞌij chi retaman runoꞌoj ri Dios, y ma ndubꞌen ta ri ndubꞌij ri ru-mandamientos, xa ndireqꞌon y maneq ri qetzij pa ránima.+ 5Pero ri ndiniman rutzij ri Dios, pa rukꞌaslen ri jun riꞌ, ndiqꞌalajin chi kin qetzij ndojowan achel ndojowan ri Dios. Y jareꞌ ri ndikꞌutu chi xe jun qabꞌanun rikꞌin ri Dios:+ 6Ri ndibꞌiꞌin chi jumul xe jun rubꞌanun rikꞌin ri Dios, ndikꞌatzin chi ri rukꞌaslen achel ri kꞌaslen xukꞌuaj ri Jesucristo+ chochꞌulew.

7Hermanos ri tzꞌan ngixinwojoꞌ, re mandamiento re nitzꞌibꞌaj e wokami chiwa ma kꞌakꞌakꞌ ta,+ xa kin ja ri mandamiento xyoꞌox chiwa atoq xitaqij ri Cristo. Re ojer mandamiento reꞌ ja ri iwakꞌaxan pe. 8Pero kꞌo chuqaꞌ cheꞌel ndiqabꞌij chi ri nitzꞌibꞌaj e chiwa jun kꞌakꞌakꞌ mandamiento,+ porque ri rubꞌeyal ri kꞌaslen xukꞌuaj ri Cristo, y ri rubꞌeyal ikꞌaslen chuqaꞌ rix, ndukꞌut chi kꞌakꞌakꞌ. Porque ri qꞌequꞌ ja ndikꞌis e pa ikꞌaslen, y wokami ndiyikꞌan chik pa ikꞌaslen ri qetzij luz pataneq rikꞌin ri Dios.+

9Si jun ndubꞌij chi rukꞌuan rukꞌaslen chupan ri luz riꞌ, pero xa itzel ndutzꞌet ruwech jun ru-hermano, xa kꞌa pa qꞌequꞌ kꞌo ri rukꞌaslen.+ 10Jakꞌa ri kin jabꞌel ndirajoꞌ ri ru-hermano, kin qetzij chi rukꞌuan rukꞌaslen chupan ri luz, y ma jun achike xtibꞌanun chare chi nduyaꞌ kan ri Dios.+ 11Pero ri itzel ndutzꞌet ruwech jun hermano, pa qꞌequꞌ kꞌo wi y ja ri qꞌequꞌ ri ukꞌuayon ri rukꞌaslen. Ma retaman ta apeꞌ bꞌaneq ri rukꞌaslen, roma ri qꞌequꞌ achel soqꞌ rubꞌanun chare.+

Ri qetzij kuqul kikꞌuꞌx rikꞌin ri Cristo

12Rix ri kin achel rix walkꞌuaꞌl keriꞌ, nitzꞌibꞌaj e reꞌ chiwa, porque ri imak xekuyutej yan roma ri xuqꞌasaj ri Jesucristo iwoma.+ 13Nitzꞌibꞌaj e reꞌ chiwa rix ri achel tataꞌatz chikikajal ri kitaqin ri Cristo, porque iwetaman runoꞌoj ri Cristo+ ri kin xixkꞌo wi atoq kꞌajani tibꞌan ri kaj y ri rochꞌulew. Nitzꞌibꞌaj e chuqaꞌ chiwa rix ri achel akꞌolaꞌ chikikajal ri kitaqin ri Cristo, porque xixtiker yan pa ruqꞌaꞌ ri itzel. 14Nitzꞌibꞌaj e reꞌ chiwa rix, ri kin achel chꞌuteq wíta akꞌolaꞌ, porque iwetaman runoꞌoj ri Tataꞌaj Dios. Nitzꞌibꞌaj e reꞌ chiwa rix ri achel tataꞌatz chikikajal ri kitaqin ri Cristo, porque iwetaman runoꞌoj ri Cristo ri kin xixkꞌo wi atoq kꞌajani tibꞌan ri kaj y ri rochꞌulew. Nitzꞌibꞌaj e chuqaꞌ chiwa rix ri achel akꞌolaꞌ chikikajal ri kitaqin ri Cristo, porque santienta iwuchuqꞌaꞌ,+ y ri rutzij ri Dios kin kꞌo pa iwánima y xixtiker yan pa ruqꞌaꞌ ri itzel.+

15Ma tibꞌa iwánima chirij ndibꞌen ri ma utz ta ndikibꞌen ri wineq chochꞌulew, nixta chirij ri achike ekꞌo chochꞌulew, porque ri ndibꞌanun keriꞌ, ndiqꞌalajin chi ma ndirajoꞌ ta ri Tataꞌaj Dios pa ránima.+ 16Porque nojel ri itzel teq achike ekꞌo chochꞌulew, ma rikꞌin ta ri Tataꞌaj Dios pataneq, xa kin chin ri rochꞌulew, y ri itzel teq achike riꞌ, jareꞌ: Ri itzel teq rayinik chin ri qa-cuerpo,+ ri itzel teq rayinik chin ri qawech y ri nim ndiqanaꞌ chare roma ri kꞌo qikꞌin chochꞌulew. 17Y ri wineq ri ngebꞌanun ri ma utz ta chochꞌulew xa kin xkekꞌis, y ngekꞌis chuqaꞌ nojel ri itzel teq kirayinik, pero si jun ndubꞌen pa rukꞌaslen ri rurayibꞌel ri Dios, ndiril ri kꞌaslen ma ndikꞌis ta.+

18Rix ri kin achel chꞌuteq wíta akꞌolaꞌ keriꞌ, iwetaman chi rojkꞌo chik chupan ri rukꞌisibꞌel tiempo+ chin ri rochꞌulew. Y achel iwakꞌaxan chi nduqaqa ri jun ri ndiyakatej chirij ri Cristo,+ wokami ekꞌiy chik ri eyakatajneq chirij ri Cristo, romariꞌ qetaman chi xa rojkꞌo chik chupan ri rukꞌisibꞌel tiempo chin ri rochꞌulew. 19Rejeꞌ chiqakajal roj xeꞌel e, pero ma eqachibꞌil ta, porque xa ta eqachibꞌil, xekꞌojeꞌ ta jumul chiqakajal. Pero xeꞌel e chiqakajal, chin xqꞌalajin+ chi ma konojel ta eqachibꞌil.

20Pero rix, rix ukꞌuan roma ruchuqꞌaꞌ ri Espíritu ri yoꞌon chiwa+ roma ri Cristo ri kin loqꞌolej wi,+ y romariꞌ rix iwonojel iwetaman chik ri qetzij ruqꞌalajrisan ri Dios. 21Nitzꞌibꞌaj e reꞌ chiwa, ma roma ta chi man ta iwetaman ruchojmil ri qetzij, xa kin roma iwetaman+ ruchojmil, y roma chuqaꞌ iwetaman chi nixta jun aqꞌ nditzꞌukutej pe rikꞌin ri qetzij. 22¿Achike ri altíra tireqꞌon? Riꞌ ja ri ndibꞌiꞌin chi ri Jesús ma ja ta ri Jun taqon pe roma ri Dios chukolik ri rutinamit.+ Ri ndibꞌiꞌin keriꞌ ndiqꞌalajin chi yakatajneq chirij ri Cristo, porque ndubꞌij chi ri Dios ma Rutataꞌ ta ri Cristo, y ri Cristo ma Rukꞌajol ta ri Dios. 23Konojel ri ndikibꞌij chi ri Jesús ma Rukꞌajol ta ri Tataꞌaj Dios, maneq ri Tataꞌaj Dios pa kánima. Pero ri ndibꞌiꞌin chi ri Jesús kin Rukꞌajol ri Dios, kꞌo chuqaꞌ ri Tataꞌaj Dios+ pa ránima.

24Romariꞌ, jumul tikꞌojeꞌ pa iwánima ri utzulej teq tzij ri ndichꞌaꞌa pa ruwiꞌ ri Cristo, ri xiwakꞌaxaj xe jampeꞌ xitaqij pe. Si ri utzulej teq tzij riꞌ jumul ndikꞌojeꞌ pa iwánima, riꞌ ndubꞌen chi jumul xe jun ndibꞌen rikꞌin ri Rukꞌajol ri Dios y rikꞌin ri Tataꞌaj Dios.+ 25Y si jumul xe jun qabꞌanun rikꞌin, kin qichin wi ri kꞌaslen ma ndikꞌis ta ri rusujun kan rijaꞌ chaqe.+

26Riyin nitzꞌibꞌaj e reꞌ chiwa, chin ma ngixqaqa pa kiqꞌaꞌ ri wineq ri ndikajoꞌ ngixkichꞌakatij.+ 27Pero rix kꞌo ruchuqꞌaꞌ ri Espíritu Santo pa iwánima ri ruyoꞌon ri Jesucristo chiwa, y ma ndikꞌatzin ta chi ri wineq riꞌ ngixkitijoj, porque ja ri Espíritu Santo nditijon iwichin pa ruwiꞌ nojel ri ruqꞌalajrisan ri Dios, y nojel ri ndukꞌut rijaꞌ kin qetzij, ma aqꞌ ta.+ Romariꞌ jumul xe jun tibꞌanaꞌ rikꞌin ri Cristo, achel rukꞌutun ri Espíritu Santo chiwech.

28Wokami rix ri kin achel rix walkꞌuaꞌl keriꞌ, jumul xe jun tibꞌanaꞌ rikꞌin ri Cristo, chin keriꞌ atoq rijaꞌ nduruqꞌalajrisaj riꞌ, roj kin kuqul qakꞌuꞌx rikꞌin,+ y ma ngojkꞌixbꞌiyaj ta ngojel e chuwech atoq nduqaqa chik jumbꞌey.+

Ri rubꞌanik kikꞌaslen ri eralkꞌuaꞌl ri Dios

29Rix iwetaman chi ri Jesucristo pa ruchojmil ndubꞌen nojel, romariꞌ tiwetamaj chuqaꞌ, chi konojel ri ndikikꞌuaj jun chojmilej kꞌaslen, ndiqꞌalajin chi kikꞌuan ri kꞌakꞌakꞌ alaxik nduyaꞌ ri Dios.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index