Search form

1 Juan 5

Ri ataqin ri Dios ndubꞌen chawa chi ngatojowan

1Konojel ri ndikitaqij chi ri Jesús jariꞌ ri Jun taqon pe roma ri Dios chukolik ri rutinamit,+ kikꞌuan chik ri kꞌakꞌakꞌ alaxik nduyaꞌ ri Dios. Y konojel ri ndikajoꞌ jun tataꞌatz, ndikajoꞌ chuqaꞌ ri ralkꞌuaꞌl ri tataꞌatz riꞌ. 2Y atoq ndiqajoꞌ ri Dios y ndiqabꞌen ri ndubꞌij ri ru-mandamientos, nditzꞌetetej chi ngeqajoꞌ ri eralkꞌuaꞌl ri Dios chuqaꞌ. 3Keriꞌ nibꞌij chiwa, porque atoq ndiqabꞌen ri ndubꞌij ri ru-mandamientos ri Dios, ndiqꞌalajin chi ndiqajoꞌ rijaꞌ,+ y ri mandamientos riꞌ ma cuesta ta chin ngeqanimaj.+ 4Porque qonojel ri qakꞌuan chik ri kꞌaslen nduyaꞌ ri Dios, ngojtiker pa ruqꞌaꞌ ri itzel teq rayinik chin ri rochꞌulew, y roj ngojtiker pa ruqꞌaꞌ ri itzel teq rayinik, roma qataqin ri Ajaw.+ 5Y ri ngetiker pa ruqꞌaꞌ ri itzel teq rayinik, ja ri ngetaqin chi ri Jesús kin Rukꞌajol wi ri Dios.+

6Ri Jesucristo xuqaqa chochꞌulew, xbꞌan bautizar rikꞌin yaꞌ y xbꞌiyin rukikꞌel atoq xbꞌajix cho cruz.+ Ma xe ta xbꞌan bautizar rikꞌin yaꞌ, xa kin xbꞌiyin chuqaꞌ rukikꞌel. Y ja ri Espíritu Santo ndiqꞌalajrisan nojel reꞌ chiqawech, porque ja rijaꞌ ri qetzij.+ 7Eꞌoxiꞌ ri ngeqꞌalajrisan chikaj chi ja ri Jesús ri rukꞌajol ri Dios: Ri Tataꞌaj Dios, ri Jun ri ndiqꞌalajrisan runoꞌoj ri Dios y ri Espíritu Santo. Y re eꞌoxiꞌ reꞌ xe jun ruwech kitzij kibꞌanun.* 8Y eꞌoxiꞌ chuqaꞌ ri ngeqꞌalajrisan chochꞌulew: Ri Espíritu Santo, ri chꞌabꞌel xakꞌaxex chikaj atoq xbꞌan bautizar ri Jesús, y ri rukikꞌel ri Jesús ri xbꞌiyin cho cruz. Y chi eꞌoxiꞌ ndikiqꞌalajrisaj chi keriꞌ wi.+ 9Si roj ndiqayaꞌ pa cuenta ri ndikibꞌij ri wineq, ri ruqꞌalajrisan ri Dios pa ruwiꞌ ri Rukꞌajol kin más kꞌo reqalen chin ndiqayaꞌ pa cuenta. Porque ri qꞌalajrisan pa ruwiꞌ ri Rukꞌajol, kin ja ri Dios qꞌalajrisayon.+ 10Ri kitaqin ri Rukꞌajol ri Dios, ndikinaꞌ chi ri ruqꞌalajrisan ri Dios pa ruwiꞌ ri Rukꞌajol kin qetzij wi.+ Pero ri ma kitaqin ta ri Dios ndikibꞌen chare achel xa jun reqꞌóta keriꞌ, porque ma ndikitaqij ta ri ruqꞌalajrisan pa ruwiꞌ ri Rukꞌajol. 11Y jareꞌ ri ruqꞌalajrisan ri Dios chiqawech: Ruyoꞌon ri kꞌaslen ma ndikꞌis ta chaqe, y ri kꞌaslen riꞌ yoꞌon chaqe roma xe jun qabꞌanun rikꞌin ri Rukꞌajol.+ 12Ri xe jun rubꞌanun rikꞌin ri Rukꞌajol ri Dios, kꞌo ri kꞌaslen ma ndikꞌis ta rikꞌin,+ pero ri ma rutaqin ta ri Rukꞌajol ri Dios, maneq ri kꞌaslen ma ndikꞌis ta rikꞌin.

Ri rukꞌisibꞌel teq achike nduchilabꞌej e ri Juan

13Nojel reꞌ nitzꞌibꞌaj e chiwa rix ri itaqin chi ja ri Jesús ri Rukꞌajol ri Dios, chin kuqul ikꞌuꞌx chi kꞌo ri kꞌaslen ma ndikꞌis ta iwikꞌin.+

14Y roj kuqul qakꞌuꞌx chi atoq ndiqakꞌutuj jun achike chare ri Dios, si ri ndiqakꞌutuj kꞌo pa rurayibꞌel rijaꞌ, kin ngojrakꞌaxaj wi.+ 15Y roma qetaman chi rijaꞌ ndirakꞌaxaj ri achike ndiqakꞌutuj, qetaman chuqaꞌ chi nduyaꞌ chaqe ri ndiqakꞌutuj chare.

16Si jun ndutzꞌet jun ru-hermano ndajin rikꞌin mak, pero ri mak riꞌ ma ndukꞌuan ta pa kamik, tukꞌutuj chare ri Dios roma, y ri Dios nduchojmirisaj rukꞌaslen ri jun ri ndajin rikꞌin mak. Pero kꞌo mak ri ndukꞌuan pa kamik,+ y pa kiwiꞌ ri ngetajin rikꞌin ri mak riꞌ, ma nibꞌij ta chiwa chi tikꞌutuj koma. 17Nojel ri itzel teq achike ngebꞌanaloꞌox, kin mak wi,+ pero kꞌo mak ri ma ndukꞌuan ta pa kamik.

18Qetaman chi konojel ri kikꞌuan chik ri kꞌaslen nduyaꞌ ri Dios, ma ndikibꞌen chi ta mak,+ porque ri Rukꞌajol ri Dios ndichajin kichin, y ri itzel maneq ruqꞌaꞌ chake.

19Roj qetaman chi roj richin ri Dios, y qetaman chuqaꞌ chi konojel wineq ri ma kitaqin ta ri Cristo, ekꞌo chuxeꞌ ruchuqꞌaꞌ ri itzel. 20Qetaman chuqaꞌ chi ri Rukꞌajol ri Dios xuqaqa chochꞌulew, y xuyaꞌ etamabꞌel chaqe chin ndiqetamaj runoꞌoj ri qetzij Dios.+ Y roj xe jun qabꞌanun rikꞌin ri qetzij Dios, porque xe jun qabꞌanun rikꞌin ri Jesucristo ri Rukꞌajol.+ Ja rijaꞌ ri qetzij Dios, y ja rijaꞌ ri ndiyoꞌon ri kꞌaslen ma ndikꞌis ta. 21Romariꞌ rix ri kin achel rix walkꞌuaꞌl keriꞌ, tibꞌanaꞌ cuenta iwiꞌ, ma tiyaꞌ kiqꞌij tiox.+

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index