Search form

1 Pedro 5

Ri ndikꞌatzin ndikibꞌen ri ukꞌuey bꞌey chikiwech ri hermanos

1Y roma re qabꞌiꞌin pe, ngixinpixabꞌaj chuqaꞌ rix ri ukꞌuey bꞌey chikiwech ri hermanos. Riyin chuqaꞌ yin jun ukꞌuey bꞌey achel rix, y yin jun ri xintzꞌet ri kꞌayew xuqꞌasaj ri Cristo. Riyin chuqaꞌ jun ri ndikꞌojeꞌ nuqꞌij chikikajal ri ndikꞌojeꞌ kiqꞌij atoq ri Cristo xtuqꞌalajrisaj chik riꞌ chupan ri nimalej ruqꞌij.+ 2Keꞌichajij utz-utz ri hermanos+ achel ndubꞌen jun yuqꞌunel kikꞌin ri rukarneꞌl, porque ri hermanos riꞌ erichin ri Dios y ejachon pa iqꞌaꞌ rix chin ngeꞌichajij. Ma tinaꞌ chi jun eqaꞌ chiwij, xa kin nojel iwánima keꞌichajij achel ndirajoꞌ ri Dios chi ndibꞌen. Ma tibꞌen ri samaj roma ndiwojoꞌ ndiwelesaj méra chikiqꞌaꞌ,+ xa kin tibꞌa iwánima chikichajixik. 3Ma tibꞌen achel rix kajaw+ ri hermanos ri ejachon pa iqꞌaꞌ chin ngeꞌichajij. Pa rukꞌexel riꞌ, titijaꞌ iqꞌij tikꞌuaj jun chojmilej kꞌaslen chikiwech, chin keriꞌ ndikoqaj ri ikꞌaslen. 4Y keriꞌ, atoq nduruqꞌalajrisaj chik riꞌ jumbꞌey ri Cristo ri nimalej Yuqꞌunel+ kichin ri yuqꞌunelaꞌ, kin xtiyoꞌox chiwa jun nimalej rajel-rukꞌexel, y riꞌ, ja ri xtikꞌojeꞌ iqꞌij chin jumul.

Ri ndikꞌatzin ndikibꞌen ri hermanos

5Y achel qabꞌiꞌin pe chi ndikꞌatzin ndiqanimaj qiꞌ chiqawech, keriꞌ chuqaꞌ rix qꞌopojiꞌ y kꞌajolaꞌ, tinimaj kitzij ri eꞌukꞌuey bꞌey chikiwech ri hermanos. Rix iwonojel tiqasaj iwiꞌ chin ndinimaj iwiꞌ chiwech.+ Porque ri rutzij ri Dios tzꞌibꞌan kan kereꞌ ndubꞌij:

Ri Dios ma ndukꞌen ta apu kiwech ri ndikinimrisalaꞌ kiꞌ,

Pero nduyaꞌ ri ru-favor pa kiwiꞌ ri ndikiqasaj kiꞌ chuwech.+

Keriꞌ tzꞌibꞌan kan.

6Romariꞌ, tiqasaj iwiꞌ chuwech ri Dios ri kin nimalej ruchuqꞌaꞌ, y rijaꞌ kin xtunimrisaj iqꞌij chupan ri qꞌij ri runojin rijaꞌ pa iwiꞌ.+ 7Tiyaꞌ pa ruqꞌaꞌ ri Dios nojel ri kꞌayew ndinaꞌ pa iwánima,+ porque rijaꞌ kin ngixrubꞌen cuenta.

8Pa iwuxnaqil tibꞌanaꞌ nojel y tichajij utz-utz ri ikꞌaslen, porque ri itzel+ royowal chiwa, y achel jun koj ndisikꞌin ndukanoj achike ta jun nduqetzelaꞌ chi eyaj. 9Tipabꞌaꞌ iwiꞌ chuwech ri itzel, rikꞌin jabꞌel kuqul ikꞌuꞌx+ rikꞌin ri Dios, porque iwetaman chi nojel apeꞌ pariꞌ ri rochꞌulew, ri qa-hermanos ndikiqꞌasaj kꞌayew achel ri ndiqꞌasaj rix wokami. 10Y ri Dios ri ndiyoꞌon nojel ruwech favor, ri xoyon iwichin chin ndikꞌojeꞌ iqꞌij chupan ri nimalej ruqꞌij ri Cristo,+ roma xe jun ibꞌanun rikꞌin, rijaꞌ atoq iqꞌasan chik jubꞌaꞌ tiempo+ chupan ri kꞌayew, ndubꞌen chiwa chi ngixok nojel ri ndirajoꞌ rijaꞌ chi ngixok, ndubꞌen chiwa chi ma jumbꞌey xtiyaꞌ kan, chi kꞌo ruchuqꞌaꞌ ri iwánima, y chi nixta jun ndelesan e iwichin pa ruqꞌaꞌ rijaꞌ. 11Kin richin wi rijaꞌ ri uchuqꞌaꞌ pa ruwiꞌ nojel chin jumul.+ Amén.

Ma kixel e chupan ri favor nduyaꞌ ri Dios

12Ri Silvano+ xirutoꞌ chin xintzꞌibꞌaj e re wuj reꞌ chiwa. Rijaꞌ jun hermano ri kin kuqul nukꞌuꞌx rikꞌin. Chupan re wuj reꞌ ma kꞌiy ta ok achike nutzꞌibꞌan e chiwa,+ pero ri achike nutzꞌibꞌan e, kin chin ngixinpixabꞌaj y chin chuqaꞌ nibꞌij chiwa chi ri favor iwilon ndikꞌutu chi qetzij ri Dios ngixrajoꞌ. Roma kꞌa riꞌ, ma jumbꞌey kixel e chuxeꞌ ri favor riꞌ.

13Ri hermanos ekꞌo pa Babilonia, ri echaꞌon roma ri Dios, achel rubꞌanun chiwa rix, ndikiteq e ruxunaqil iwech. Keriꞌ chuqaꞌ ri Marcos+ ri kin achel nukꞌajol pa rubꞌiꞌ ri Ajaw, nduteq e ruxunaqil iwech. 14Keriꞌ chuqaꞌ rix, tiyaꞌ ruxunaqil iwech chiwech rikꞌin jun loqꞌolej tzꞌubꞌanik+ chiꞌiqꞌoꞌtz.

Rix iwonojel ri xe jun ibꞌanun rikꞌin ri Cristo, tikꞌojeꞌ uxlanen pa iwánima.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index