Search form

1 Tesalonicenses 3

Ri Pablo nduteq ri Timoteo chikitzꞌetik ri hermanos aj Tesalónica

1Roj roma ma xqakachꞌ chi ta chi ma qetaman ta achike ibꞌanun,+ xqayaꞌ pa qánima chi ngojkanej kan qayon pa tinamit Atenas, 2y xqateq ri Timoteo chiꞌitzꞌetik. Rijaꞌ jun qa-hermano y rusamajel ri Dios ri ngojrutoꞌ chutzijoxik ri utzulej teq tzij chin kolotajik ri ndichꞌaꞌa pa ruwiꞌ ri Cristo. Roj xqateq chin nderuyaꞌ ruchuqꞌaꞌ ri iwánima y chin chuqaꞌ ngixbꞌerupixabꞌaj chi más ndikuqubꞌaꞌ ikꞌuꞌx rikꞌin ri Cristo. 3Chin keriꞌ man ta jun chiꞌikajal ndipoꞌ rukꞌuꞌx roma ma ndiril ta achike ndubꞌen chupan ri kꞌayew nduqꞌasaj. Porque rix iwetaman chi chupan ri rubꞌanun ruwech ri Dios pa qawiꞌ, kin kꞌo wi kꞌayew ndiqaqꞌasaj.+ 4Porque atoq kꞌa rojkꞌo chiꞌikajal, xqaqꞌalajrisaj chiwech chi qonojel ri qataqin ri Cristo kin xkeqaqꞌasaj kꞌayew y rix iwetaman chi kin keriꞌ bꞌanatajneq pe.+ 5Romariꞌ, riyin ma xinkachꞌ chi ta chi xinwojoꞌ xinwetamaj achike ibꞌanun, y romariꞌ xinteq ri Timoteo chiꞌitzꞌetik, roma niwojoꞌ niwetamaj si kꞌa kuqul ikꞌuꞌx rikꞌin ri Cristo. Ma kꞌateꞌ ri itzel xixrutaqchiꞌij chi xiyaꞌ kan ri Cristo,+ y xa ta xiyaꞌ kan, riꞌ ndubꞌij tzij chi ma jun ta utz xukꞌen pe ri samaj+ xqabꞌen chiꞌikajal.

6Pero atoq xtzolij pe ri Timoteo, xukꞌen pe utzulej itzijol, porque xubꞌij chi rix kuqul ikꞌuꞌx rikꞌin ri Cristo y ngixojowan. Y xubꞌij chuqaꞌ chi ngixkikot ngojikꞌuxlaꞌaj y kin ndirayij ngojuꞌitzꞌetaꞌ, achel chuqaꞌ roj ndiqarayij ngixbꞌeqatzꞌetaꞌ. 7Y romariꞌ hermanos, chupan nojel ri achike ndiqaqꞌasaj y ri kꞌayew rojkꞌo wi, tzꞌan xkꞌojeꞌ pe ruchuqꞌaꞌ ri qánima atoq xqakꞌaxaj chi kuqul ikꞌuꞌx rikꞌin ri Cristo. 8Y wokami xqaqa qánima porque rix kin kuqul ikꞌuꞌx ibꞌanun chiraqen ri Ajaw. 9Y roj ma ndiqil ta tzij chin ngojmatioxin chare ri Dios iwoma, porque santienta ngojkikot chuwech ri qa-Dios roma nojel ri rubꞌanun pa ikꞌaslen. 10Chi chaqꞌaꞌ chi paqꞌij ndiqakꞌutuj chare chi tuyaꞌ qꞌij chaqe chi ngixbꞌeqatzꞌetaꞌ chik,+ chin ngixqatijoj kan rikꞌin ri kꞌa ma iwetaman ta pa ruwiꞌ ri tijonik chin ri Ajaw.

Ri utz ri ndurayij ri Pablo pa kiwiꞌ ri hermanos

11Ja ta kꞌa ri Qatataꞌ Dios y ri Qajaw Jesús ngeꞌukꞌuan qabꞌey chin ngixbꞌeqatzꞌetaꞌ chik jumbꞌey. 12Y ja ta kꞌa ri Ajaw ndikꞌiytisan ri ajowabꞌel pa iwánima chin más ndiwojoꞌ iwiꞌ chiwech y más ngeꞌiwojoꞌ konojel, achel rubꞌanun chaqe roj chi santienta ngixqajoꞌ, 13chin keriꞌ ndiwil ruchuqꞌaꞌ ri iwánima chin ndibꞌen nojel pa ruchojmil, y keriꞌ loqꞌolej+ nditzꞌetetej ri ikꞌaslen y nixta jun mak ndilitej chiwij chuwech ri Tataꞌaj Dios atoq nduqaqa chik jumbꞌey ri Ajaw Jesús, junan kikꞌin ri loqꞌolej teq oqey richin. Amén.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index