Search form

1 Tesalonicenses 5

1Hermanos, pa ruwiꞌ ri tiempo y ri qꞌij atoq ndibꞌanatej nojel re qabꞌiꞌin pe, ma ndikꞌatzin ta chi kꞌo nditzꞌibꞌex e chiwa. 2Porque rix iwetaman utz-utz chi ri tiempo atoq ndibꞌanatej nojel ri rubꞌiꞌin kan ri Ajaw, nduqaqa atoq nixta jun ndinabꞌen richin, achel jun eleqꞌon+ ri ma ndinabꞌex ta atoq ndok pa jun achoch chaqꞌaꞌ chin ndeꞌeleqꞌan pe. 3Atoq ri wineq ndikibꞌilaꞌ chi nojel utz rubꞌanun y maneq oyowal ndajin, ja atoq riꞌ kꞌateꞌ ruwech nduqaqa castigo pa kiwiꞌ chin ndikꞌis kiqꞌij. Ndebꞌanatej achel ndibꞌanatej rikꞌin jun ixaq royobꞌen akꞌual, kꞌateꞌ ruwech nditzꞌukutej pe ruqꞌaxon. Ri tiempo riꞌ nixta jun wineq xtitiker xtukal riꞌ chuwech ri castigo riꞌ. 4Pero rix hermanos, ma rixkꞌo ta pa qꞌequꞌ+ pa ruwiꞌ ri ndebꞌanatej, y romariꞌ maneq roma man ta inabꞌen atoq nduqaqa ri tiempo riꞌ, achel ma ndinabꞌex ta atoq jun eleqꞌon kꞌateꞌ ruwech ndok pa jun achoch chin ndeꞌeleqꞌan pe. 5Porque rix iwonojel ri itaqin ri Cristo, rix richin ri luz+ y rix richin ri qꞌij ri ndiseqresan, y junan iwikꞌin ma roj richin ta ri qꞌequꞌ y ri chaqꞌaꞌ. 6Romariꞌ ma tiqabꞌen achel ndikibꞌen ri wineq ri kꞌo kikꞌaslen pa qꞌequꞌ ri xa achel ngewer keriꞌ. Qojkꞌaseꞌ+ pa ruwiꞌ ri qakꞌaslen y tiqabꞌanaꞌ nojel pa quxnaqil. 7Porque ri ngewer, chaqꞌaꞌ ngewer, y ri ndikiqꞌabꞌarisaj kiꞌ, chaqꞌaꞌ ndikiqꞌabꞌarisaj kiꞌ.+ 8Pero roj ri roj richin ri qꞌij ri ndiseqresan, tiqabꞌanaꞌ nojel pa quxnaqil, tiqakuqubꞌaꞌ qakꞌuꞌx rikꞌin ri Cristo y tiqajoꞌ qiꞌ chiqawech, porque riꞌ ngojrutoꞌ chin ndiqabꞌen cuenta ri qánima, achel ndubꞌen jun perepik chꞌichꞌ chorukꞌuꞌx jun soldado.+ Y jumul chuqaꞌ tiqoyobꞌej ri qꞌij atoq ngojkolotej e chin jumul, porque riꞌ ngojrutoꞌ achel jun casco ndutoꞌ rujolon jun soldado. 9Porque ri Dios ma roj ruchaꞌon ta chin ndiqaqa royowal pa qawiꞌ, roj ruchaꞌon+ chin ndiqil ri kolotajik ri nduyaꞌ chaqe roma ri xubꞌen ri Qajaw Jesucristo, 10ri xken qoma, chin keriꞌ, si kꞌa roj kꞌes o roj kamineq chi e, kin kꞌo qakꞌaslen rikꞌin rijaꞌ. 11Roma kꞌa riꞌ, tibꞌochilaꞌ iwiꞌ y tiyaꞌ ruchuqꞌaꞌ iwánima chiwech, achel ibꞌanun pe.

Ri rubꞌeyal kikꞌaslen ri kitaqin ri Cristo

12Hermanos, ndiqakꞌutuj chiwa chi kin kꞌo keqalen tibꞌanaꞌ chake ri eꞌukꞌuey bꞌey chiwech, ri eyoꞌon roma ri Ajaw chin ngesamej chiꞌikajal chin ngixkibꞌen cuenta y ngixkipixabꞌaj. 13Tikꞌutuꞌ chi nim keqalen pa iwech rikꞌin ri ngeꞌiwojoꞌ, porque rejeꞌ rusamaj ri Ajaw ngetajin rikꞌin. Rix iwonojel tikꞌuaj utz-utz iwiꞌ chiwech y ma jun oyowal tikꞌojeꞌ chiꞌikajal.+

14Hermanos, ndiqachilabꞌej chiwa chi keꞌipixabꞌaj ri eqꞌoroy chi kesamej. Keꞌibꞌochiꞌij ri poyineq kikꞌuꞌx, tiyaꞌ ruchuqꞌaꞌ kánima+ ri maneq ok ruchuqꞌaꞌ kánima rikꞌin ri Ajaw, y keꞌikochꞌolaꞌ konojel.+

15Titzꞌetaꞌ chi man ta jun ndutzolij rukꞌexel+ chare jun ri rubꞌanun itzel chare. Pa rukꞌexel riꞌ, titijaꞌ iqꞌij chi jumul ndibꞌen utz chake konojel,+ chake ri kitaqin ri Cristo y chake ri ma kitaqin ta.

16Jumul kixkikot.+ 17Jumul tibꞌanaꞌ orar.+ 18Chupan nojel ri ndiqꞌasaj pa ikꞌaslen, kixmatioxin+ chare ri Dios, porque jariꞌ ri ndirajoꞌ ri Dios chiwa rix ri xe jun ibꞌanun rikꞌin ri Cristo Jesús.

19Ma tiqꞌet ruwech ri samaj ndubꞌen ri Espíritu Santo pa iwánima.+ 20Ma tiqasaj reqalen ri tzij nduqꞌalajrisaj ri Espíritu Santo pa kánima ri hermanos chin ndikibꞌij. 21Xa kin tichayuj rupan nojel ri ndikibꞌij,+ y nojel ri utz, tiyakaꞌ pa iwánima. 22Tiqꞌataꞌ iwiꞌ chuwech nojel itzel teq achike.

23Y ri Dios ri ndiyoꞌon uxlanen pa iwánima, kin ta xtuchꞌajchꞌojrisaj chi nojel ri ikꞌaslen. Y kin ta jumul xtuchajij ri i-espíritu, ri iwánima y ri i-cuerpo, chin nixta jun itzel ndilitej pa ikꞌaslen chupan ri qꞌij atoq nduqaqa chik jumbꞌey ri Qajaw Jesucristo.+ 24Y ri Dios ri xoyon iwichin kin xtubꞌen ri samaj riꞌ pa ikꞌaslen, porque rijaꞌ kin ndubꞌen wi ri ndubꞌij.

Ri rukꞌisibꞌel teq achike nduchilabꞌej e ri Pablo

25Hermanos, tibꞌanaꞌ orar+ qoma roj.

26Tiyalaꞌ ruxunaqil kiwech konojel ri hermanos rikꞌin jun loqꞌolej tzꞌubꞌanik chikiqꞌoꞌtz.

27Y nibꞌen e mandar chiwa pa rubꞌiꞌ ri Ajaw, chi tibꞌan leer re wuj reꞌ chikiwech konojel ri hermanos ekꞌo chiriꞌ.

28Ri favor ri nduyaꞌ ri Qajaw Jesucristo kin ta xtikꞌojeꞌ pa iwiꞌ.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index