Search form

1 Timoteo 2

Ndikꞌatzin ndibꞌan orar koma konojel wineq

1Ngatinpixabꞌaj chi pa ruwiꞌ nojel, takꞌutuꞌ chikiwech ri hermanos chi ndikꞌatzin ndikibꞌen orar koma konojel wineq,+ chi tikꞌutux chare ri Dios pa ruwiꞌ ri ndikꞌatzin chake, chi tikꞌutux ri ru-favor ri Dios pa kiwiꞌ y timatioxix nojel chare ri Dios, 2y tibꞌan chuqaꞌ orar koma ri reyes y koma konojel ri kꞌo uchuqꞌaꞌ pa kiqꞌaꞌ, chin keriꞌ ndikꞌojeꞌ uxlanen chiqakajal roj wineq y ma jun oyowal xtibꞌanatej, chin ma cuesta ta ndiqakꞌuaj jun loqꞌolej kꞌaslen chuwech ri Dios y chikiwech ri wineq. 3Riꞌ kin utz wi y ndiqaꞌ chuwech ri Dios+ ri Qakolonel. 4Porque rijaꞌ ndirajoꞌ chi konojel wineq ngekolotej+ y ndiketamaj utz-utz ri qetzij. 5Porque xaxe jun Dios kꞌo.+ Y xaxe Jun ri ndibꞌanun chaqe roj wineq chi ma jun qamak ndiqeqalej chuwech ri Dios y keriꞌ kꞌo cheꞌel ngojbꞌeqaqa chuwech. Y ri Jun ri ndibꞌanun riꞌ, ja ri Cristo Jesús, ri aj chikaj ri xuꞌok wineq chiqakajal. 6Rijaꞌ xuyaꞌ ri rukꞌaslen pa kamik chin xutaj+ ri qamak roj qonojel wineq, y ri kamik riꞌ ndukꞌut chi xuqaqa ri tiempo+ ri rubꞌanun pe ruwech ri Dios chin xuqꞌalajrisaj chi ri rurayibꞌel ja ri ngekolotej ri wineq. 7Y ri Dios xiruchaꞌ chin niyaꞌ utzulej rutzijol chi rijaꞌ ndirajoꞌ chi ri wineq ngekolotej, y xiruchaꞌ chuqaꞌ chin xinok apóstol. Kin qetzij ri nibꞌij, y ma ngireqꞌon ta. Xiruchaꞌ chin ngentijoj ri wineq ma israelitas ta+ chin ndikitaqij ri Cristo Jesús y ndikinimaj ri qetzij.

Ri ndikꞌatzin ndikibꞌen ri achiꞌaꞌ y ri ixoqiꞌ atoq ndikimal kiꞌ pa rubꞌiꞌ ri Dios

8Niwojoꞌ chi ri achiꞌaꞌ tikibꞌanaꞌ orar xa achike na chi lugar.+ Rikꞌin chꞌajchꞌaj kánima tikijotobꞌaꞌ kiqꞌaꞌ chikaj atoq ndikibꞌen orar, y ma jun oyowal kiyakon pa kánima chikij chꞌaqa chik. 9Y keriꞌ chuqaꞌ ri ixoqiꞌ, atoq ndikiweq kiꞌ, kekikusaj tzieq ri ndutzꞌapij ri ki-cuerpo.+ Tikinojij utz-utz achike chi tzieq rukꞌulun ndikikusaj, y ja ta ri más rukꞌulun ri ndikikusaj. Y ma ndikibꞌen rukꞌojlen kiwiꞌ xe chin ndikibꞌananelaꞌ, y atoq ndikiweq kiꞌ, ma tibꞌa kánima chirij rukusaxik achikejeꞌ ebꞌanun chare qꞌanapueq o perla, nixta kekikusalaꞌ tzieq santienta kajel. 10Pa rukꞌexel riꞌ, tikiweqaꞌ ri kikꞌaslen rikꞌin ndikibꞌen ri utz+ chake chꞌaqa chik, achel rukꞌulun chi ndikibꞌen ri ixoqiꞌ ri kꞌo ruqꞌij ri Dios pa kiwech. 11Y nibꞌij chuqaꞌ chake chi atoq ndikimal kiꞌ kikꞌin ri eralkꞌuaꞌl ri Dios chin ngetijox, ma jun kechꞌaꞌa apu+ y keniman. 12Porque ma niyaꞌ ta qꞌij chi ri ixoqiꞌ ngekitijoj o ndiqꞌax kitzij pa kiwiꞌ ri achiꞌaꞌ. Ma jun achike tikibꞌij apu atoq ekꞌo chikikajal ri ndikimal kiꞌ pa rubꞌiꞌ ri Dios. 13Porque ri Dios nabꞌey xubꞌen ri Adán, y kꞌajariꞌ xubꞌen ri Eva. 14Y chuqaꞌ ma ja ta ri Adán ri xchꞌakatix, xa ja ri ixaq+ ri xchꞌakatix, y keriꞌ xuqꞌej ri mandamiento xuyaꞌ ri Dios. 15Pero ri ixoqiꞌ kin ngekolotej wi, roma ngeꞌalan, si jumul kuqul kikꞌuꞌx rikꞌin ri Dios, si ngeꞌojowan, si ndikikꞌuaj jun loqꞌolej kꞌaslen, y si ndikibꞌen ri rukꞌulun chi ndikibꞌen.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index