Search form

1 Timoteo 3

Ri kꞌaslen ndikꞌatzin ndikikꞌuaj ri ndikajoꞌ ngeꞌok ukꞌuey bꞌey chikiwech ri hermanos

1Re nibꞌij chawa kin qetzij wi y utz chin nditaqix: Si jun hermano ndurayij ndok ukꞌuey bꞌey+ chikiwech ri ndikimal kiꞌ pa rubꞌiꞌ ri Dios, kin utz samaj ri ndurayij. 2Pero ri ukꞌuey bꞌey, ndikꞌatzin chi kereꞌ ndiqꞌalajin pa rukꞌaslen: Man ta jun itzel ndibꞌix chirij ri kꞌaslen rukꞌuan, xaxe jun rixjayil kꞌo, retaman nduqꞌet riꞌ rikꞌin ri ngerubꞌanalaꞌ, kin ndikaney runoꞌoj, kin utz nditzꞌetetej rukꞌaslen koma chꞌaqa chik, jabꞌel ndukꞌen apu kiwech pa rachoch ri epataneq jukꞌan chik apeꞌ, jabꞌel nditiker nduyaꞌ tijonik pa ruwiꞌ ri rutzij ri Dios, 3nditiker nduqꞌet riꞌ chuwech rutijik yaꞌ, ma chꞌeyonel ta, kin utz runoꞌoj, maneq oyowal ndirajoꞌ y ma ndijamem ta chirij méra. 4Ndikꞌatzin chuqaꞌ chi utzulej ukꞌuey bꞌey chikiwech ri aj pa rachoch, y chi ri eralkꞌuaꞌl ndikinimaj rutzij+ y kikꞌuan jun chojmilej kꞌaslen. 5Porque si jun hermano ma retaman ta ndukꞌuaj utz kibꞌey ri aj pa rachoch, ¿nditiker kami ngeruchajij ri eralkꞌuaꞌl ri Dios? Maneq. 6Ma rukꞌulun ta chi ri ukꞌuey bꞌey, jun hermano ri kꞌa jubꞌaꞌ ok tiempo tutaqij ri Jesucristo, ma kꞌateꞌ tunimrisaj riꞌ y keriꞌ ndukꞌulwachij ri castigo xukꞌulwachij ri itzel roma xunimrisaj riꞌ. 7Ri ukꞌuey bꞌey, ndikꞌatzin chi utz rukꞌaslen chikiwech ri wineq+ ma kitaqin ta ri Cristo, ma kꞌateꞌ tibꞌanatej chi ndilitej jun itzel pa rukꞌaslen y nditzaq pa ruqꞌaꞌ ri itzel.

Ri achike chi kꞌaslen ndikꞌatzin ndikikꞌuaj ri diáconos

8Y keriꞌ chuqaꞌ ri diáconos, jareꞌ rubꞌeyal kikꞌaslen ndikꞌatzin ndikikꞌuaj: Ndikꞌatzin chi chojmilej kikꞌaslen, ma kaꞌiꞌ ta ruwech kitzij ndikiyaꞌ, ndikiqꞌet kiꞌ chuwech rutijik yaꞌ, y ma bꞌaneq ta kánima chirij rubꞌanik itzel teq achike chuchꞌakik méra. 9Ndikꞌatzin chuqaꞌ chi rikꞌin chꞌajchꞌaj kánima+ ndikikuqubꞌaꞌ kikꞌuꞌx rikꞌin ri utzulej teq tijonik ri ndichꞌaꞌa pa ruwiꞌ ri Cristo, tijonik ri ruqꞌalajrisan ri Dios chiqawech chupan re tiempo reꞌ. 10Ri ngeꞌok diáconos, nabꞌey ndikꞌatzin chi tzꞌeton pe achike chi kꞌaslen+ kikꞌuan, y si ma jun achike ndilitej chikij, utz ndikitzꞌen ri samaj. 11Keriꞌ chuqaꞌ ri ixoqiꞌ* ndikꞌatzin chi kereꞌ ndiqꞌalajin pa kikꞌaslen: Kikꞌuan jun chojmilej kꞌaslen chikiwech ri wineq, man ta chuqaꞌ eꞌixokiꞌ ri ma ndikiqꞌet ta kiꞌ rikꞌin ri kaqꞌ chikij wineq,+ ketaman ndikiqꞌet kiꞌ rikꞌin ri ngekibꞌanalaꞌ, y kuqul kikꞌuꞌx ri hermanos kikꞌin chi pa ruchojmil ndikibꞌen ri samaj. 12Ri diácono, ndikꞌatzin chi xaxe jun rixjayil kꞌo, y ndikꞌatzin chi utzulej ukꞌuey bꞌey chikiwech ri aj pa rachoch. 13Porque ri diáconos ri utz kibꞌanun pe chare ri samaj, kin kꞌo keqalen chikiwech ri eralkꞌuaꞌl ri Dios, y más kuqul kikꞌuꞌx chin ndikitzijoj chake ri wineq chi tikitaqij ri Cristo Jesús.

Ri reqalen ri qataqin

14Timoteo, riyin kin nuyoꞌon pa wánima chi ngatentzꞌetaꞌ yan. Pero nitzꞌibꞌaj e re wuj reꞌ chawa, 15chin keriꞌ si ma xkibꞌeqaqa yan ta, awetaman ri achike chi kꞌaslen ndikꞌatzin ndakꞌuaj chikiwech ri eralkꞌuaꞌl ri Dios. Porque ja rejeꞌ ri rutinamit ri Kꞌaslik Dios, y ja rejeꞌ ri etemeyon richin ri qetzij, kin achel jun ruxeꞌ+ jay nditemen richin ri jay. 16Y kin qetzij chi santienta reqalen ri qataqin, ri ewan pe rubꞌeyal ojer kan, pero wokami qꞌalajrisan chiqawech roma ri Dios pa ruwiꞌ ri Cristo. Y jareꞌ ri rukꞌuꞌx:

Ri Cristo xqꞌalajrisex chiqawech rikꞌin jun cuerpo achel qa-cuerpo roj wineq.

Xqꞌalajrisex chiqawech roma ri Espíritu Santo chi kin chojmilej ri rukꞌaslen.

Xtzꞌetetej koma ángeles.

Xyoꞌox utzulej rutzijol chake ri ma israelitas ta,

Xtaqix koma wineq chochꞌulew,

Xukꞌuꞌex e+ y xkꞌan ruwech chikaj rikꞌin nimalej ruqꞌij.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index