Search form

1 Timoteo 4

Ri Pablo ndupixabꞌaj ri Timoteo chi tukꞌuaj jun chojmilej kꞌaslen

1Pero kin qꞌalej ri rubꞌiꞌin pe ri Espíritu Santo chi chupan re rukꞌisibꞌel tiempo rojkꞌo, ekꞌo ri ndikiyaꞌ kan rokacheq chuwech ri qetzij tijonik ri xkuqeꞌ kikꞌuꞌx rikꞌin. Xa ngekinimaj tzij epataneq kikꞌin espíritu ri ngechꞌakatin kichin y tijonik+ epataneq kikꞌin itzel teq espíritu. 2Ri wineq ri ndikiyaꞌ ri tijonik riꞌ xa kaꞌiꞌ kipalej, xa echꞌakatinelaꞌ y kikowirisan ri kánima, romariꞌ ma jun achike ndikinaꞌ chare ri itzel teq achike ngetajiyaj+ rikꞌin. 3Ndikibꞌij chi xajan ngekꞌuleꞌ ri wineq, ndikibꞌij chuqaꞌ chi xajan ngekꞌuxeꞌ jujun achike ri ebꞌanun roma ri Dios chin rikꞌin matioxinik ngekꞌux+ koma ri ketaman utz-utz ri qetzij y kitaqin ri Ajaw. 4Porque nojel ri ebꞌanun roma ri Dios chin ngekꞌuxeꞌ kin utz wi, y maneq roma man ta ndikꞌuxeꞌ atoq ndimatioxix chare rijaꞌ. 5Porque ri tzꞌibꞌan chupan ri rutzij ri Dios y ri matioxinik ri ndiqayaꞌ chare pa ruwiꞌ ri achike ndiqakꞌux, jariꞌ ngebꞌanun chꞌajchꞌaj chare ri ndiqakꞌux.

6Y rat Timoteo, si ngaꞌatijoj ri hermanos rikꞌin ri tijonik nitzꞌibꞌaj e chawa, kin ndiqꞌalajin chi rat jun utzulej rusamajel ri Cristo Jesús, ri kin kꞌiyineq pa awánima ri utzulej teq tijonik awoqan pe pa akꞌaslen y kꞌiyineq chuqaꞌ pa awánima ri utzulej teq tzij ri rubꞌanun chawa chi akuqubꞌan akꞌuꞌx rikꞌin ri Cristo Jesús.

7Ma tayaꞌ axikin kikꞌin tzij+ eyoꞌon qa ruqꞌa-raqen ri ndikiqasaj ruqꞌij ri Dios, ri xa rijilej teq ixoqiꞌ etzijoyon pe. Xa kin tatijaꞌ aqꞌij chi qꞌij-qꞌij ndakꞌuaj jun utzulej kꞌaslen chuwech ri Dios. 8Porque ri ndabꞌen ejercicio qꞌij-qꞌij ndukꞌen pe jubꞌaꞌ utz chare ri a-cuerpo. Pero ri ndakꞌuaj jun utzulej kꞌaslen chuwech ri Dios kꞌo utz ndukꞌen pe chare nojel akꞌaslen, porque kꞌo utz ndukꞌen pe chare ri akꞌaslen chireꞌ wokami y chare ri akꞌaslen nduyaꞌ ri Dios más chiqawech apu. 9Re nibꞌij chawa kin qetzij wi, y kin utz wi chi nditaqix koma konojel wineq.+ 10Romariꞌ ndiqatij qaqꞌij y ndiqakosisaj qiꞌ chin ndiqabꞌen rusamaj ri Dios. Porque qakuqubꞌan qakꞌuꞌx+ rikꞌin ri Kꞌaslik Dios chi nduyaꞌ chaqe ri qoyobꞌen. Xe wi rijaꞌ ri ndikolo kichin konojel wineq, y ja ri ngetaqin richin ri ngerukal.

11Kaꞌatijoj ri hermanos rikꞌin nojel reꞌ, y tabꞌij chake chi tikibꞌanaꞌ. 12Man ta jun ri xtubꞌen chawa chi ma jun aweqalen+ roma kꞌa rat kꞌajol. Pero chin ma tibꞌanatej keriꞌ, katok ejemplo chikiwech ri hermanos rikꞌin ri tzij ngeꞌel pa achiꞌ, rikꞌin chuqaꞌ akꞌuan jun chojmilej kꞌaslen, rikꞌin ngatojowan, rikꞌin kuqul akꞌuꞌx rikꞌin ri Dios, y rikꞌin akꞌuan jun chꞌajchꞌaj kꞌaslen. 13Tatijaꞌ aqꞌij chi jumul ndabꞌen leer ri rutzij ri Dios chikiwech ri hermanos atoq ndikimal kiꞌ, kaꞌapixabꞌaj y kaꞌatijoj. Keriꞌ tabꞌanaꞌ jumul hasta kꞌa kibꞌeqaqa na awikꞌin. 14Tabꞌanaꞌ cuenta ri loqꞌolej sipanik ruyoꞌon ri Espíritu Santo chawa, sipanik ri xqꞌalajrisex pe roma ri Dios chin ndiyoꞌox chawa+ y kin xyoꞌox wi atoq ri eꞌukꞌuey bꞌey chikiwech ri rutinamit ri Dios xkiyaꞌ kiqꞌaꞌ pa awiꞌ.+

15Tatijaꞌ aqꞌij chi jumul ndabꞌen nojel reꞌ, chin ndiqꞌalajin chikiwech konojel chi kꞌiyineq ri akꞌaslen chiraqen ri Ajaw. 16Tachajij ri akꞌaslen y tachajij chuqaꞌ ri tijonik ndayaꞌ. Jumul keriꞌ tabꞌanaꞌ, porque si keriꞌ ndabꞌen, ma xe ta rat ngakolotej, xa kin ngekolotej chuqaꞌ ri ngeꞌakꞌaxan awichin.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index