Search form

1 Timoteo 5

Ri Pablo ndubꞌij chare ri Timoteo chi pa rubꞌeyal tipixabꞌan

1Si jun hermano rijilej chi ok y ma ja ta ndajin rikꞌin, ma tachꞌolij, xa relik tapixabꞌaj, achel kin ta chare atataꞌ ngachꞌaꞌa keriꞌ. Y keriꞌ chuqaꞌ ri kꞌajolaꞌ, kaꞌapixabꞌaj achel kin ta achaqꞌ-animal awiꞌ kikꞌin keriꞌ. 2Ri hermanas erijilej chi ok, kaꞌapixabꞌaj achel kin ta chare ateꞌ ngachꞌaꞌa keriꞌ. Y ri xtaniꞌ, rikꞌin chꞌajchꞌaj awánima kaꞌapixabꞌaj, achel ta chake eꞌawanaꞌ ngachꞌaꞌa keriꞌ.

3Takꞌutuꞌ chi ndikꞌatzin ngetoꞌox ri malkaꞌ teq ixoqiꞌ ri kin eꞌintéra chik y ma jun ndibꞌanun cuenta kichin. 4Pero si jun malkaꞌ ixaq ekꞌo ral o riy, ja rejeꞌ keꞌilin richin. Porque ja rejeꞌ ri nabꞌey ndikꞌatzin ndikibꞌen ri utz chake ri kite-kitataꞌ, chin ndikitzolij jubꞌaꞌ nojel ri utz bꞌanun pe chake+ koma ri kite-kitataꞌ. Keriꞌ ndikꞌatzin ndikibꞌen porque jariꞌ ri ndiqaꞌ chuwech ri Dios. 5Pero ri malkaꞌ ixaq ri ma jun roxpochel nditoꞌon richin, royobꞌen rutoꞌik rikꞌin ri Dios y chi chaqꞌaꞌ chi paqꞌij+ ndubꞌen orar y jumul ndukꞌutuj chare ri Dios ri ndikꞌatzin chare. 6Pero ri malkaꞌ ixaq ri ndujech riꞌ pa ruqꞌaꞌ ri rayinik chin ri ru-cuerpo, maske kꞌo rukꞌaslen, xa kamineq+ chuwech ri Dios. 7Rat tabꞌanaꞌ mandar chake konojel chi tikinimaj nojel reꞌ, chin keriꞌ nixta jun itzel achike xtilitej chirij ri kikꞌaslen. 8Ndikꞌatzin chi jun ngerutoꞌ ri roxpochel, pero más ndikꞌatzin chi ngerilij ri ekꞌo pa rachoch, porque si jun ma nduyaꞌ ta ri ndikꞌatzin chake, xa más itzel rukꞌaslen ke chuwech jun ri ma rutaqin ta ri Ajaw y xa ruyoꞌon kan roracheq chuwech ri Dios.

9Ri malkaꞌ teq ixoqiꞌ ri rukꞌulun chi nditzꞌibꞌex kibꞌiꞌ chupan ri lista+ chin ngeꞌilix koma ri hermanos, ja ri ixoqiꞌ ri más 60 kijunaꞌ y xe ok jun kachijil xkꞌojeꞌ, 10ri etaman chikij chi ekibꞌanun ri utz achel reꞌ: Ekikꞌiytisan jabꞌel ri kal, xkikꞌen apu kiwech pa kachoch+ ri epataneq jukꞌan chik apeꞌ, kichꞌajloꞌon pe kaqen+ ri loqꞌolej teq ralkꞌuaꞌl ri Dios, ekitoꞌon ri ndikiqꞌasaj kꞌayew, y nojel ruwachinel utz kibꞌanun pe.

11Pero ri malkaꞌ ri kꞌa ma eꞌintéra ta ixoqiꞌ, ma titzꞌibꞌex kibꞌiꞌ chupan ri lista, porque rejeꞌ maske ndikiyaꞌ kitzij chi ndikibꞌen rusamaj ri Cristo, pero xa kꞌateꞌ ruwech ndikitzolij kitzij, roma ndiyakatej pe kirayinik chin ngekꞌuleꞌ chik jumbꞌey. 12Y romariꞌ xtiqaqa castigo pa kiwiꞌ, roma ma xkibꞌen ta cumplir ri kitzij xkiyaꞌ pa nabꞌey.+ 13Y ri malkaꞌ teq ixoqiꞌ riꞌ, xa ngerutzꞌen chuqaꞌ qꞌoral, xe torowen ndikiyal chi teq jay. Y ma xe ta ngeqꞌorayaj, xa ja man jaꞌ teq tzij ngekibꞌij chikij wineq, ndikitzeq kiꞌ+ xa apejeꞌ na y ndikibꞌilaꞌ tzij ri ma rukꞌulun ta chi ndikibꞌij. 14Romariꞌ, ngenpixabꞌaj ri malkaꞌ ri kꞌa ma eꞌintéra ta ixoqiꞌ chi kekꞌuleꞌ+ chik jumbꞌey, kekikꞌiytisaj kal. Kin ta utz ndikibꞌen cuenta ri kachoch, chin keriꞌ ma ndikiyaꞌ jun roma chake ri itzel ngetzꞌeto kichin ri eralkꞌuaꞌl ri Dios, chi ngechꞌaꞌa itzel teq tzij chikij.+ 15Porque ekꞌo malkaꞌ teq ixoqiꞌ ri xkiyaꞌ kan ri Cristo y koqan yan chik ri ndirajoꞌ ri Satanás.

16Si jun hermana ekꞌo malkaꞌ ixoqiꞌ pa ru-familia, ja rijaꞌ tilin kichin. Y keriꞌ ma ndiyoꞌox ta eqaꞌ pa kiwiꞌ ri eralkꞌuaꞌl ri Dios, chin keriꞌ ri hermanos ngetiker ngekitoꞌ ri chꞌaqa chik malkaꞌ ixoqiꞌ ri qetzij ma jun ngeꞌilin kichin.

17Ri eꞌukꞌuey bꞌey chikiwech ri hermanos ri ndikibꞌen ri samaj pa rubꞌeyal, kin rukꞌulun chi ndinimrisex kibꞌiꞌ y ndiyoꞌox ri ndikꞌatzin chake+ koma ri hermanos. Y más ndikꞌatzin ndibꞌan keriꞌ chake ri ngetzijon ri rutzij ri Dios y ndikiyaꞌ tijonik pa ruwiꞌ. 18Porque chupan ri rutzij ri Dios kereꞌ tzꞌibꞌan kan: Ma tayaꞌ ruwosal ri wakx atoq ndupetzelaꞌ ri trigo chin ndipochꞌotej, chin kꞌo cheꞌel ndukꞌux+ jubꞌaꞌ. Y ndubꞌij chuqaꞌ: Jun samajel rukꞌulun chi nditoj+ roma ri samaj ndubꞌen.

19Ma tataqij ri sujunik ndibꞌan chirij jun ukꞌuey bꞌey kichin ri hermanos, si ma ekaꞌi-oxiꞌ ta+ ri junan ndikibꞌij chirij.

20Ri ukꞌuey bꞌey kichin ri hermanos ri ma nduyaꞌ ta kan ri mak, chikiwech konojel tabꞌij chare+ chi ma utz ta ri ndajin rikꞌin, chin keriꞌ ri chꞌaqa chik ndikixibꞌij kiꞌ.+

21Y chuwech ri Dios y ri Cristo Jesús y chikiwech ri ángeles echaꞌon, nibꞌij chawa chi tabꞌanaꞌ nojel ri nubꞌiꞌin e chawa, ma nabꞌey tanojij jun achike chirij jun si ma awetaman ta chaj ri bꞌanatajneq, y junan kiwech kaꞌatzꞌetaꞌ konojel. 22Ma xetal chaꞌanin tayaꞌ aqꞌaꞌ pariꞌ jun hermano chin ndok pa rusamaj ri Dios, si ma awetaman ta achike rubꞌanun rukꞌaslen. Ma kꞌateꞌ ndajin rikꞌin mak, y jajun rat ndaweqalej ri rumak.+ Xa kin tachajij awiꞌ, chin keriꞌ jabꞌel chꞌajchꞌaj ri akꞌaslen.

23Y roma jutaqil ngayawej, ma xe raxyaꞌ tatij, xa tatijaꞌ jubꞌaꞌ vino roma ri qꞌaxon pamaj ndabꞌen.

24Ekꞌo jujun ri kin ndiqꞌalajin wi ri mak+ ngetajin rikꞌin atoq kꞌajani tinikꞌox ri kikꞌaslen chin ta ngeyoꞌox pa rusamaj ri Dios, pero ekꞌo jujun ri ma ndiqꞌalajin yan ta ri mak kibꞌanun, kꞌa atoq ndinikꞌox na utz-utz ri kikꞌaslen. 25Keriꞌ chuqaꞌ ekꞌo jujun ri kin ndiqꞌalajin ri utz ngetajin rikꞌin, y ekꞌo jujun ri ma ndiqꞌalajin yan ta ri utz ngetajin rikꞌin, kꞌa atoq ndinikꞌox na utz-utz ri kikꞌaslen. Pero maneq cheꞌel man ta xtiqꞌalajin pe.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index