Search form

1 Timoteo 6

1Konojel ri loqꞌon teq samajelaꞌ+ ri kitaqin ri Cristo, tikiyaꞌ pa kánima chi ri ekajaw kin nim kiqꞌij, chin ma tiyoqꞌotej rubꞌiꞌ ri Dios,+ nixta tiyoqꞌotej ri tijonik ndiqayaꞌ. 2Ri loqꞌon teq samajelaꞌ ri kitaqin ri Cristo ri ekꞌo kajaw ri kitaqin chuqaꞌ ri Cristo, ma tikinojij chi ma ndikꞌatzin ta ndikinimrisaj kiqꞌij ri kajaw roma ki-hermanos kiꞌ. Pa rukꞌexel riꞌ, más utz tikibꞌanaꞌ chare ri samaj,+ porque ri achoq chake kꞌo utz ndukꞌen pe ri kisamaj, kin kitaqin ri Cristo y eꞌojowan chuqaꞌ roma rijaꞌ. Y rat Timoteo, kaꞌatijoj y kaꞌapixabꞌaj ri hermanos rikꞌin nojel reꞌ.

Ri qetzij bꞌeyomal

3Xa achike na jun ri ndukꞌut jun chik tijonik+ ri ma junan ta rubꞌeyal rikꞌin ri utzulej tijonik chin ri Qajaw Jesucristo, y ma junan ta chuqaꞌ rubꞌeyal rikꞌin ri tijonik ri ndukꞌen pe utzulej kꞌaslen ri ndiqaꞌ chuwech ri Dios, 4xa ruyon chuwech nim ndunaꞌ y ma jun rukꞌoxoman+ pa ruwiꞌ ri ngerubꞌilaꞌ. Xa kin ndiqaꞌ chuwech ndutaqꞌ kiwech wineq pa ruwiꞌ tzij ri ma jun utz ndukꞌen pe, tzij ri xa ndukꞌen pe chi ri wineq itzel ndikinaꞌ roma utz kibꞌanun chꞌaqa chik, ndukꞌen pe chuqaꞌ oyowal, ndukꞌen pe chi ri wineq ngechꞌaꞌa itzel chirij jun chik, ndukꞌen pe chi ndinojix itzel teq achike chirij jun chik, 5y ndukꞌen pe chi jutaqil kꞌo oyowal chikikajal wineq. Ri ngekꞌutu jun chik tijonik, xa kin suqꞌurneq kinoꞌoj+ roma ri itzel ngekinojilaꞌ,+ y kiyoꞌon kan rokacheq chuwech ri qetzij, y xa ndikinojij chi rikꞌin ri tijonik ndikiyaꞌ, kin kꞌo cheꞌel ndikibꞌen méra chin ngebꞌeyomer. 6Pero ri más nim bꞌeyomal ja ri akꞌuan jun loqꞌolej kꞌaslen y ngakikot rikꞌin ri achajin.+ 7Porque atoq xojalex, ma jun achike qakꞌamon pe. Y atoq ngojken e, ma jun chuqaꞌ achike ngojtiker ndiqakꞌuaj.+ 8Pero si kꞌo achike ndiqakꞌux y kꞌo chuqaꞌ qatziaq+ chin ndiqakusaj, qojkikot rikꞌin riꞌ. 9Pero ri ndikirayij ngeꞌok bꞌeyomaꞌ,+ ngeqaqa pa ruqꞌaꞌ ri itzel teq rayinik, y jariꞌ ndiximo kichin, y chuqaꞌ ngetzaq pa ruqꞌaꞌ ri jalajaj teq achike ri nditaqchiꞌin kichin, ri ndusuqꞌ kinoꞌoj y ndukꞌen pe kꞌayew chake. Ri itzel teq rayinik riꞌ, ndubꞌen chake ri wineq chi ndikꞌis kiqꞌij y ngerukꞌuaj chupan ri kamik ri ma ndikꞌis ta. 10Porque ri ndibꞌa awánima chirij méra ndukꞌen pe nojel ruwech itzel teq achike. Y ekꞌo jujun roma ngejamem chirij méra, xeꞌel e pa rubꞌey+ ri Ajaw, y kiyon chikiwech xkiwulij santienta qꞌaxomal chikij.

Ri Pablo ndupixabꞌaj ri Timoteo

11Pero rat Timoteo, rat jun achi rusamajel ri Dios. Katanimej chuwech nojel ri ngetajin rikꞌin rejeꞌ. Takꞌuaj jun chojmilej kꞌaslen, tabꞌanaꞌ ri ndiqaꞌ chuwech ri Dios, takuqubꞌaꞌ más akꞌuꞌx rikꞌin rijaꞌ, katojowan, kakochꞌon y loqꞌ awánima tabꞌanaꞌ chake konojel. 12Rikꞌin ri kuqubꞌel kꞌuxlaj kꞌo pa awánima, tatijaꞌ aqꞌij chi jumul+ ndabꞌen pa akꞌaslen ri ndubꞌij ri rutzij ri Dios. Kin tiqꞌalajin utz-utz chi kꞌo chik awikꞌin+ ri kꞌaslen ma ndikꞌis ta, porque chin riꞌ xatoyox roma ri Dios. Y kin chikiwech ekꞌiy testigos xabꞌij chi akuqubꞌan akꞌuꞌx rikꞌin ri Ajaw. 13Y chuwech ri Dios ri ndiyoꞌon rukꞌaslen nojel y chuwech ri Cristo Jesús+ ri xubꞌij chi rukuqubꞌan rukꞌuꞌx rikꞌin ri Dios atoq kꞌo chuwech ri Poncio Pilato, nibꞌij chawa: 14Tabꞌanaꞌ nojel ri ndubꞌij ri Dios rikꞌin jun chꞌajchꞌaj kꞌaslen, ma ndayaꞌ jun roma chi ndibꞌix itzel achike chawij.+ Keriꞌ tabꞌanaꞌ jumul hasta kꞌa nduruqꞌalajrisaj chi na riꞌ ri Qajaw Jesucristo. 15Rijaꞌ nduqꞌalajrisaj riꞌ atoq nduqaqa ri qꞌij rubꞌanun ruwech ri Dios, ri Dios ri kin jabꞌel roruqꞌij y kin xe wi rijaꞌ kꞌo pa ruwiꞌ nojel. Ja rijaꞌ ri nimalej Rey pa kiwiꞌ konojel teq reyes. Y ja rijaꞌ ri nimalej Ajaw pa kiwiꞌ konojel teq ajaw. 16Y ja rijaꞌ ri jumul kꞌo rukꞌaslen, y kꞌo pa jun lugar apeꞌ nojel ndiyikꞌan, apeꞌ nixta jun wineq nditiker ndeqaqa, y chuqaꞌ nixta jun wineq tzꞌeteyon richin+ y nixta xtitzꞌetetej. ¡Ja rijaꞌ ri tinimrisex rubꞌiꞌ y pa ruqꞌaꞌ rijaꞌ tikꞌojeꞌ jumul nojel uchuqꞌaꞌ! Amén.

17Tachilabꞌej chake ri kꞌo kibꞌeyomal wokami chochꞌulew chi ma tikinimrisaj kiꞌ, nixta tikikuqubꞌaꞌ kikꞌuꞌx rikꞌin ri bꞌeyomal kichajin, porque ri bꞌeyomal riꞌ xa ndikꞌis. Tabꞌij chake chi tikikuqubꞌaꞌ kikꞌuꞌx rikꞌin ri Dios ri nduyaꞌ nojel ruwech achike chaqe chin ndikikot ri qánima. 18Tabꞌij chake chi tikibꞌanaꞌ ri utz, chi tikikusaj ri kibꞌeyomal chin ngekitoꞌ chꞌaqa chik, ma tikikꞌekꞌej ndikiyaꞌ ri kichajin, y ma tikichꞌiquj kiꞌ chin ngetoꞌon. 19Porque si keriꞌ ndikibꞌen, ndikinabꞌeyirisaj apu utzulej bꞌeyomal chikaj, y ndikibꞌen kichin chare ri qetzij kꞌaslen nduyaꞌ ri Dios.

Ndikꞌatzin ndibꞌan cuenta ri utzulej tijonik

20Y rat Timoteo, tatijaꞌ aqꞌij ndabꞌen cuenta ri utzulej tijonik ri chilabꞌen chawa chi ndayaꞌ. Ma tatzeq awiꞌ chupan teq tzij ri ma jun rubꞌeyal. Y ma kaꞌawakꞌaxaj tzij ri ndibꞌix nimalej nojibꞌel chake, pero xa ma ke ta riꞌ,+ tzij ri eyakatajneq chirij ri tijonik ndayaꞌ. 21Porque ekꞌo jujun xkitaqij ri tzij riꞌ, y romariꞌ xesach y ma koqan chi ta ri qetzij ri qataqin.

Ri Dios kin ta xtuyaꞌ ri ru-favor pa iwiꞌ.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index