Search form

2 Corintios 10

Ri Pablo ndutoꞌ riꞌ chikiwech ri ngechꞌaꞌa chirij

1Riyin Pablo, rikꞌin ri loqꞌ ránima y jabꞌel runoꞌoj ri Cristo,+ kꞌo nukamelal niwojoꞌ nikꞌutuj chiwa, porque ekꞌo jujun chiꞌikajal ri ndikibꞌilaꞌ chi atoq yinkꞌo apu chiꞌikajal, xa niqasaj wiꞌ, pero atoq ma yinkꞌo ta chiꞌikajal, nim ninaꞌ chare. 2Ri kamelal nikꞌutuj chiwa jareꞌ: Tibꞌanaꞌ apu ruchojmil nojel ri bꞌanatajneq chiꞌikajal, chin keriꞌ atoq ngixbꞌentzꞌetaꞌ, ma ndikꞌatzin ta chi ngenkusaj kaw teq tzij,+ achel nuyoꞌon pa wánima chi nikusaj chikij jujun chiꞌikajal ri ngebꞌiꞌin chi ri ndiqabꞌen roj xa ja ri qarayibꞌel y ma ja ta ri rurayibꞌel ri Ajaw. 3Qetzij wi chi xa roj aj rochꞌulew, pero ma ja ta ri aj rochꞌulew nojibꞌel ri ndiqakusaj chin ndiqabꞌen ri rusamaj ri Ajaw. 4Porque ri nimalej uchuqꞌaꞌ yoꞌon chaqe, ma richin ta ri rochꞌulew, xa kin rikꞌin ri Dios pataneq,+ y ja uchuqꞌaꞌ riꞌ ndiqakusaj chin ngeqakꞌis kiqꞌij nojel ri ngenojiloꞌox y ngebꞌiloꞌox chiqij. 5Ndiqakꞌis ruqꞌij nojel aj rochꞌulew nojibꞌel ri yakatajneq ri ma nduyaꞌ ta qꞌij chi ndetamex runoꞌoj ri Dios, y nojel nojibꞌel ngeqayaꞌ chuxeꞌ rutzij ri Cristo, chin tinimex rutzij rijaꞌ. 6Pero qabꞌanun ruwech chi ma ngojbꞌa yan ta apu apeꞌ rixkꞌo, chin keriꞌ nabꞌey ndiqatzꞌet jarupeꞌ chiwech rix ri qetzij ndikinimaj ri qatzꞌibꞌan e chiwa, kꞌajariꞌ ngojbꞌeqaqa iwikꞌin chin ngeqabꞌen castigar+ konojel ri ma ngeniman ta.

7Tiyaꞌ utz-utz cuenta chare ri nditzꞌet chiqij. Si kꞌo jun ndunaꞌ chi rijaꞌ chin ri Cristo, tunojij utz-utz chi roj+ chuqaꞌ roj richin ri Cristo, achel rijaꞌ. 8Porque maske ndeqꞌax jubꞌaꞌ ruwiꞌ ri nibꞌij pa ruwiꞌ ri uchuqꞌaꞌ yoꞌon pa nuqꞌaꞌ, ma jun wineq xtikꞌixbꞌisan wichin, porque ri uchuqꞌaꞌ riꞌ, ja ri Ajaw yoyon pe chuwa chin ngixintoꞌ chin ngixkꞌiy pa ikꞌaslen chiraqen rijaꞌ, y ma chin ta nikꞌis iqꞌij.+ 9Riyin ma niwojoꞌ ta chi rix ndinojij chi ri wuj ngentzꞌibꞌaj e chiwa, xa chin ngixinxibꞌij. 10Keriꞌ nibꞌij chiwa, porque ekꞌo jujun chiꞌikajal ri ndikibꞌilaꞌ chi ri wuj ngenteq e chiwa, xe chꞌolinik y kaw teq tzij enutzꞌibꞌan e chupan, pero atoq yinkꞌo chiꞌikajal xa ma jun ok wuchuqꞌaꞌ y nixta jun ndiyoꞌon pa cuenta nutzij. 11Pero ri keriꞌ ngebꞌiꞌin chuwij, ndikꞌatzin ndiketamaj chi achel ri qanoꞌoj ndiqꞌalajin chupan ri wuj qatzꞌibꞌan e chiwa atoq ma rojkꞌo ta chiꞌikajal, keriꞌ chuqaꞌ qanoꞌoj ndeqabꞌanaꞌ atoq ngojbꞌeqaqa chik jumbꞌey chiꞌikajal.

Ri Pablo ndutzolij ruwech kitzij ri ngebꞌiꞌin chi ndunimrisaj riꞌ

12Qetzij wi kꞌa, chi roj ma jubꞌaꞌ ndubꞌij qánima chi ndiqajunumaj qiꞌ kikꞌin ri kiyon ndikiyalaꞌ qa kiqꞌij, chin ta ndiqatzꞌet si más roj utz o naq ke chikiwech rejeꞌ. Xa chikiwech qa rejeꞌ ndikijunumalaꞌ kiꞌ chin ndikitzꞌet achike ri más utz chikikajal. Pero atoq keriꞌ ndikibꞌen, qꞌalej chi xa ma pa ruchojmil ta ngenojin. 13Jakꞌa roj ma ndeqꞌax ta ruwiꞌ ri nim ndiqanaꞌ+ roma ri samaj qabꞌanun, porque xe apeꞌ ndirajoꞌ ri Dios chi ndiqabꞌen ri rusamaj, xe chiriꞌ qatijon qaqꞌij ndiqabꞌen ri rusamaj, y jun apeꞌ ri rojowan rijaꞌ chi ngojsamej, ja ri pa itinamit rix aj Corinto. 14Porque si man ta xojbꞌesamej hasta chiꞌikajal rix, kꞌo ta cheꞌel ndibꞌix chiqij chi qayon chiqawech ndiqayaꞌ qa qaqꞌij roma jun samaj ri ma qabꞌanun ta. Pero ma ke ta riꞌ, porque ja roj ri nabꞌey xojtzijon chiwa ri utzulej teq tzij chin ri kolotajik ri nduyaꞌ ri Cristo. 15Y ma ndiqaqꞌabꞌaj ta qiꞌ chirij ri samaj kibꞌanun chꞌaqa chik+ chin ndiqayaꞌ qaqꞌij, porque xa ta keriꞌ ndiqabꞌen, roj eleneq ta e chupan ri rubꞌiꞌin ri Cristo chaqe chi ndiqabꞌen. Ri ndiqarayij, ja ri ndikꞌojeꞌ más ruchuqꞌaꞌ iwánima rikꞌin ri Dios, y rikꞌin riꞌ iwoma rix ndinimer ri apeꞌ nduyaꞌ qꞌij ri Dios chin ngojsamej, y keriꞌ ndibꞌanatej jun nimalej samaj. 16Porque ndiqajoꞌ ndiqatzijoj ri utzulej teq tzij chin kolotajik kꞌa más nej apu chuwech ri itinamit rix, pero ma apeꞌ ta ekꞌo chꞌaqa chik ri ngesamej pa rubꞌiꞌ ri Ajaw, chin keriꞌ ma roma ta ri samaj kibꞌanun rejeꞌ ndiqayaꞌ qa qaqꞌij roj.

17Achel ndubꞌij ri rutzij ri Dios tzꞌibꞌan kan: Ri ndirajoꞌ nim ndunaꞌ chare, nim kꞌa tunaꞌ chare roma ri rubꞌanun ri Ajaw pa rukꞌaslen.+ Keriꞌ tzꞌibꞌan kan. 18Porque ma ja ta ri ruyon chuwech ndubꞌij qa chi utz ndubꞌen chare ri samaj, ja ta riꞌ ri utz,+ xa kin xe wi ri achoq chirij ndubꞌij ri Ajaw chi utz rubꞌanun chare ri samaj, jariꞌ ri utz ndubꞌen chare ri samaj.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index