Search form

2 Corintios 11

Ri apóstol Pablo y ri ma eqetzij ta apóstoles

1Kinikochꞌoꞌ jubꞌaꞌ roma ri kaꞌi-oxiꞌ tzij nibꞌij qa chiwa, porque xa achel ma nunojin+ ta ngichꞌaꞌa. ¡Kinikochꞌoꞌ kꞌa! 2Porque ri santienta ngixinbꞌen cuenta, riꞌ rikꞌin ri Dios pataneq wi. Riyin nuyoꞌon nutzij chare ri Ajaw achel jun tataꞌatz nduyaꞌ rutzij chare jun kꞌajol chi ndikꞌuleꞌ ri rumiꞌal rikꞌin. Yin xinyaꞌ nutzij chare ri Jun ri ndok iwachijil chi ngixkꞌuleꞌ rikꞌin, y ri jun riꞌ ja ri Cristo. Niwojoꞌ chi chꞌajchꞌaj+ ngixbꞌenjachaꞌ pa ruqꞌaꞌ, achel jun qꞌopoj ri kꞌajani tikꞌojeꞌ rikꞌin achi.+ 3Pero nuxibꞌin wiꞌ chi achel ri kumetz xkaney ma xkaney xubꞌen chin xuchꞌakatij ri Eva+ ojer kan, keriꞌ chuqaꞌ xkixchꞌakatix rix chin xtiyaꞌ qꞌij chare ri itzel chi xtujel ri inojibꞌal y ma rikꞌin chi ta chꞌajchꞌaj ikꞌaslen, nixta rikꞌin nojel iwánima xtiwoqaj ri Cristo. 4Rix ndikꞌen apu ruwech jun ri nderutzijoj jun chik Jesús chiwa, y ma ja ta ri Jesús ri qatzijon kan roj chiwa, y rikꞌin nojel ikꞌuꞌx ikꞌamon apu chuqaꞌ ruwech jun chik espíritu, pero ma ja ta ri Espíritu Santo ri kꞌo chik pa iwánima, y ikꞌulun apu chuqaꞌ jun chik tijonik+ ri achel ta utzulej teq tzij chin kolotajik keriꞌ, pero ma ja ta ri qatzijon kan roj chiwa. 5Pa nuwech yin, ma wíta ta weqalen ke chikiwech ri ndikibꞌij chi enimalej teq apóstoles.+ 6Maske pa kiwech jujun, riyin ma ngitiker ta ngichꞌaꞌa utz-utz chikiwech wineq, pero kin jabꞌel nukꞌoxoman ri achoq pa ruwiꞌ ngichꞌaꞌa. Y rikꞌin nojel ri xqabꞌij+ y xqabꞌen atoq xojkꞌojeꞌ chiꞌikajal, kin xqꞌalajin chiwech chi nukꞌoxoman.

7Atoq xintzijoj ri utzulej teq tzij chin kolotajik chiwa, ¿mak kami xinbꞌen chi ma jun wajel xinkꞌutuj, y xa xinqasaj wiꞌ chin kꞌo iqꞌij rix? 8Riyin chin xinbꞌen rusamaj ri Dios chiꞌikajal, xinwelesaj ri wajel chikiqꞌaꞌ chꞌaqa chik bꞌotzaj ralkꞌuaꞌl ri Dios chin chꞌaqa chik tinamit. 9Y atoq xikꞌojeꞌ chiꞌikajal y maneq nikusaj, nixta jun chiꞌikajal rix ri xinyaꞌ ta ri eqaꞌ chirij, porque ri hermanos aj rochꞌulew Macedonia xinkitoꞌ rikꞌin ri xkꞌatzin chuwa atoq xebꞌeqaqa chiriꞌ. Riyin xintij nuqꞌij chi nixta jun eqaꞌ+ xinyaꞌ chiwij, y kꞌa keriꞌ na xtinbꞌen ri más chiqawech apu. 10Rikꞌin ri qetzij chin ri Cristo kꞌo pa wánima, nibꞌij chi nixta jun hermano aj irochꞌulew Acaya xtubꞌen chuwa chi man ta nim ninaꞌ chare chi nixta jun nutoꞌik nukꞌutun chiwa. 11Y, ¿achike roma nibꞌij keriꞌ chiwa? ¿Roma kami ma ngixinwojoꞌ ta? ¡Dios retaman chi kin ngixinwojoꞌ!+

12Y achel ri nubꞌanun pe chi ma niyaꞌ ta eqaꞌ chiwij,+ keriꞌ xtinbꞌen ri más chiqawech apu, chin keriꞌ ma niyaꞌ ta jun roma chake ri ndikajoꞌ ndikijunumaj kiꞌ qikꞌin, chin ta ndikibꞌij chi junan ndiqabꞌen kikꞌin, roma pa kitzij rejeꞌ qonojel ndiqakꞌutuj méra chiwa. 13Porque ri wineq riꞌ ma eqetzij ta chi apóstoles, xa echꞌakatinelaꞌ+ teq samajelaꞌ, ri kiqꞌabꞌan kiꞌ chi eru-apóstoles ri Cristo. 14Pero rix ma tisach ikꞌuꞌx chirij ri ndikibꞌanalaꞌ rejeꞌ, porque iwetaman chi hasta ri Satanás+ nduqꞌabꞌaj riꞌ chi achel ta rijaꞌ jun ángel+ ri taqon pe roma ri Dios. 15Romariꞌ, ma ndisach ta chuqaꞌ qakꞌuꞌx chi ri chꞌakatinelaꞌ teq samajelaꞌ riꞌ, ndikibꞌen chi achel ta eꞌutzulej teq rusamajelaꞌ ri chojmilej Dios. ¡Pero rejeꞌ kin xtiyoꞌox rukꞌexel chake achel rukꞌulun chi ndiyoꞌox roma ri itzel ngetajin+ rikꞌin!

Ri achike roma ri Pablo nduyaꞌ jubꞌaꞌ ruqꞌij

16Nikamuluj rubꞌixik chiwa: Nixta jun tinojin chuwij chi ma ngennojij ta ri ngenbꞌilaꞌ, pero si ekꞌo keriꞌ ndikinojij chuwij, tikiyaꞌ qꞌij chuwa chi ngichꞌaꞌa kaꞌi-oxiꞌ tzij achel xa ta yin jun ri ma ndinojin ta, chin keriꞌ niyaꞌ jubꞌaꞌ nuqꞌij yin achel ndikibꞌen chꞌaqa chik. 17Y ri niyaꞌ jubꞌaꞌ nuqꞌij xa achel ma nunojin ta ri tzij ngenbꞌilaꞌ keriꞌ, porque reꞌ ma ja ta ri Ajaw ndibꞌiꞌin pe chuwa chi keriꞌ nibꞌen.+ 18Y roma ekꞌiy ndikiyalaꞌ kiqꞌij roma ri ketaman o kichajin, riyin chuqaꞌ niyaꞌ jubꞌaꞌ nuqꞌij. 19Porque rix maske ndinaꞌ chi kꞌiy iwetaman, xa kin kiꞌ chiwa ngeꞌiwakꞌaxaj ri ngebꞌiꞌin tzij ri ma kinojin ta rubꞌixik. 20Y ngeꞌikachꞌ chuqaꞌ ri ngixkiyaꞌ chuxeꞌ kitzij, ri ngewaꞌ chiwij, ri ngixkichꞌakatij, ri nixta jun iweqalen ndikibꞌen y ri ndikitzꞌajilaꞌ iwech. 21Riyin niyaꞌ chuwij chi kꞌo razón ichajin atoq ndibꞌij chi ma qakowirisan ta qiꞌ chin ndiqabꞌen achel kibꞌanun ri wineq riꞌ chiwa. ¿Kꞌix kami ndukꞌen pe chaqe roma ma xqakowirisaj ta qiꞌ chin ta xqabꞌen keriꞌ chiwa?

Pero roma rejeꞌ ndikiyaꞌ kiqꞌij, riyin chuqaꞌ keriꞌ nibꞌen, maske rikꞌin ri keriꞌ nibꞌen xkitzꞌetetej achel jun ri ma ndunojij ta ri achike ngerubꞌilaꞌ. 22Rejeꞌ nim ndikinaꞌ chare roma e-hebreos, riyin chuqaꞌ yin jun hebreo. Rejeꞌ nim ndikinaꞌ chare roma e-israelitas, ri rutinamit ri Dios, riyin chuqaꞌ yin israelita.+ Rejeꞌ nim ndikinaꞌ chare roma eriy-rumam kan ri Abraham, riyin chuqaꞌ yin riy-rumam kan ri Abraham. 23Rejeꞌ nim ndikinaꞌ chare roma ndikibꞌij chi erusamajelaꞌ ri Cristo. Pero riyin kꞌo cheꞌel más nim ninaꞌ chare porque kꞌo más samaj chin ri Cristo nubꞌanun ke chikiwech rejeꞌ,+ maske atoq keriꞌ nibꞌij, xa yin achel jun wineq ri ngerubꞌilaꞌ tzij ri ma erunojin ta. Riyin más nutijon nuqꞌij nibꞌen rusamaj ri Cristo, más kꞌiy mul yin tzꞌapin pa cheꞌ, más kꞌiy mul yin roqon y kꞌiy mul jubꞌama yin kamisan.+ 24Ri nuwinaqul israelitas 39 roq+ kiyoꞌon chuwa chare koloꞌ, y woꞌoꞌ mul keriꞌ nukꞌulwachin pa kiqꞌaꞌ. 25Oxmul yin jichꞌan chare xikꞌaꞌy+ y jumbꞌey yin kꞌaqon chare abꞌej.+ Oxmul yin bꞌaneq pariꞌ mar y ri barcos xebꞌa qa chuxeꞌ yaꞌ,+ jun qꞌij y junaqꞌaꞌ xikꞌojeꞌ nej apu chupan ri mar, y jubꞌama xijiqꞌ pa yaꞌ. 26Santienta bꞌey nubꞌanun chubꞌanik rusamaj ri Ajaw, jutzꞌima xirukꞌuaj yaꞌ atoq xinqꞌasaj nimalej teq raqen yaꞌ, jutzꞌima xiqaqa pa kiqꞌaꞌ eleqꞌomaꞌ, jutzꞌima xinkikamisaj ri nuwinaqul israelitas+ y jutzꞌima xinkikamisaj ri ma e-israelitas ta.+ Nuqꞌasan kꞌayew pa teq tinamit, pa chaqiꞌj y tzꞌiran ulew, pariꞌ teq mar y pa kiqꞌaꞌ ma eqetzij ta hermanos. 27Nuqꞌasan kosik roma ri samaj enubꞌanun, kꞌiy mul ma yin warneq ta, nuqꞌasan wayijal, nuqꞌasan chaqiꞌj chiꞌ. Kiy mul ma yin wayineq ta roma ri samaj, kiy mul nusikiken pe tew y kꞌisneq qa nutziaq chuwij.+

28Pa ruwiꞌ nojel ri kꞌayew niqꞌasaj pa nukꞌaslen, qꞌij-qꞌij kꞌo ralal ri samaj chuwij, ri achike ndikꞌatzin nibꞌen chin ngenbꞌen cuenta konojel ri bꞌotzaj teq ralkꞌuaꞌl ri Dios ri ndikimal kiꞌ pa rubꞌiꞌ. 29Porque atoq jun chikikajal ri ralkꞌuaꞌl ri Dios maneq ruchuqꞌaꞌ ndunaꞌ pa rukꞌaslen, riyin chuqaꞌ ninaꞌ pa wánima ri nduqꞌasaj,+ y si kꞌo jun ndibꞌan chare chi ndiril jun roma nduyaꞌ kan ri Dios, riyin ndiyakatej woyowal roma keriꞌ ndibꞌanatej. 30Si ndikꞌatzin chi riyin niyaꞌ jubꞌaꞌ nuqꞌij, kin nitzijoj ri nuqꞌasan pa nukꞌaslen ri ngekꞌutu chi xa yin relik wineq y maneq ok wuchuqꞌaꞌ.+ 31Ri ru-Dios y Rutataꞌ ri Ajaw Jesús ri kin rukꞌulun wi chi jumul ndiyoꞌox ruqꞌij,+ retaman chi kin qetzij re nibꞌij chiwa. 32Atoq xikꞌojeꞌ pa tinamit Damasco, ri gobernador ri kꞌo chuxeꞌ rutzij ri rey Aretas xeruyaꞌ soldados chuchiꞌ ri puertas chin ri tinamit chin ta xirutzꞌen+ y xirutzꞌapij pa cheꞌ. 33Pero ekꞌo xetoꞌon wichin, xinkelesaj pa jun ventana ri kꞌo chuwech ri xan ri rutzꞌapin rij ri tinamit y pa jun mama chakech xinkiqasaj pe pa ulew, y keriꞌ xinanimej pa ruqꞌaꞌ.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index