Search form

2 Corintios 4

Ri ru-luz ri Dios ndiyikꞌan pa qánima

1Romariꞌ, roj roma rujoyowan qawech ri Dios, ma ndiqamalij ta qa qakꞌuꞌx chupan ri samaj ruyoꞌon rijaꞌ chiqaqꞌaꞌ. 2Pa rukꞌexel chi ndiqamalij qa qakꞌuꞌx, kin qayoꞌon pa qánima chi ma jumbꞌey ndiqabꞌen jun achike chilaqꞌel ri ndukꞌen pe kꞌix chaqe, ma ngojchꞌakatin ta y ma ndiqajel ta+ rubꞌeyal ri rutzij ri Dios ri ndiqatzijoj. Ri Dios retaman chi ri ndiqabꞌen, ja ri ndiqaqꞌalajrisaj ri qetzij chake konojel kiwech wineq, achike na chi nojibꞌel kichajin. Keriꞌ ndiqabꞌen roma ndiqajoꞌ chi konojel ndikinaꞌ pa kánima chi ja ri qetzij ngojtajin chubꞌixik. 3Pero si ri utzulej teq tzij chin kolotajik ri ndiqatzijoj ma ndikꞌoxomex ta,+ ri ma ngekꞌoxoman ta richin, ja ri ebꞌaneq chupan ri bꞌey chin ma ngekolotej ta. 4Porque ja ri itzel ri rajawal+ ri rochꞌulew, tzꞌapiyon kinoꞌoj, chin ma tikitzꞌet+ ri luz nduyaꞌ ri utzulej teq tzij chin kolotajik, utzulej teq tzij ri ngekꞌutu ri nimalej ruqꞌij ri Cristo, ri achoq ikꞌin nditzꞌetetej achike qitz runoꞌoj ri Dios. 5Porque atoq ngeqatijoj ri wineq, ma ja ta ri qakꞌaslen roj ndiqatzijoj. Ri ndiqatzijoj, ja ri Jesucristo ri Ajaw pa ruwiꞌ nojel. Roj xa roj ok samajelaꞌ iwichin rix,+ roma ndiqabꞌen rusamaj ri Jesús chiꞌikajal. 6Porque ri Dios ri kereꞌ xubꞌij: Tiyikꞌiyoꞌ pe luz+ pa qꞌequꞌ, xubꞌen chuqaꞌ chi xyikꞌiyoꞌ pe luz pa qánima,+ chin keriꞌ roj rikꞌin ri luz riꞌ, ndiqayikꞌaj kánima chꞌaqa chik, chin ndiketamaj ri nimalej ruqꞌij ri Dios ri ndiyikꞌan chupalej ri Jesucristo.

Rikꞌin ri Cristo tiqakuqubꞌaꞌ qakꞌuꞌx chupan ri kꞌayew ngeqaqꞌasaj

7Y re samaj yoꞌon pa qaqꞌaꞌ chin ndiqabꞌen, kin achel jun bꞌeyomal, jakꞌa ri qa-cuerpo achoq ikꞌin ndiqabꞌen re samaj reꞌ, xa achel ok jun bꞌambꞌel bꞌanun rikꞌin chꞌabꞌeq,+ chin keriꞌ nditzꞌetetej chi ri nimalej uchuqꞌaꞌ ndiqasamajij, ja ri Dios yoyon pe+ y ma qichin ta roj. 8Romariꞌ, maske ndumal pe riꞌ kꞌayew chiqij,+ pero xa ngojel chuwech. Janteq ma ndiqil ta achike ndiqabꞌen roma ri kꞌayew ndiqaqꞌasaj, pero ma ndiqamalij ta qa qakꞌuꞌx. 9Roj tzeqlebꞌen chin ndibꞌan itzel chaqe,+ pero ri Dios ma roj ruyoꞌon ta kan qayon, y maske ndiqanaꞌ achel roj torin pa ulew, pero ri Dios ma ruyoꞌon ta qꞌij chi kꞌisneq jumul qaqꞌij. 10Xa apejeꞌ na ngojbꞌa wi, roj royobꞌen ri kamik achel xukꞌulwachij ri Jesús, chin keriꞌ ri rukꞌaslen ri Jesús ndiqꞌalajin chuqaꞌ pa qa-cuerpo. 11Porque ri qakꞌaslen, qꞌij-qꞌij ndiyoꞌox pa ruqꞌaꞌ ri kamik+ roma qataqin ri Jesús, chin keriꞌ rukꞌaslen ri Jesús ndiqꞌalajin chuqaꞌ pa qa-cuerpo ri xa ndiken wi e. 12Qꞌij-qꞌij pa qabꞌey kꞌo ri kamik, pero ri ndiqatzijoj chiwa ndukꞌen pe kꞌaslen ri ma ndikꞌis ta.

13Y roma kuqul qakꞌuꞌx rikꞌin ri Dios, ndiqatzijoj ri qataqin pa qánima. Kin achel ndubꞌij ri tzꞌibꞌan kan chupan ri rutzij ri Dios: Xinkuqubꞌaꞌ nukꞌuꞌx rikꞌin ri Ajaw y romariꞌ xichꞌaꞌa.+ Keriꞌ tzꞌibꞌan kan. 14Y qetaman chuqaꞌ chi ri xkꞌastajbꞌan e ri Ajaw Jesús chikikajal ri animaꞌiꞌ, más apu chiqawech ngojrukꞌastajbꞌaꞌ chuqaꞌ roj, achel xubꞌen chare ri Jesús, y junan iwikꞌin ngojrukꞌuaj apeꞌ kꞌo rijaꞌ. 15Y nojel ri ndiqaqꞌasaj pa qakꞌaslen, ndiqaqꞌasaj chin kꞌo utz ndukꞌen pe chiwa,+ chin keriꞌ qꞌij-qꞌij más santienta wineq ndikil ri ru-favor ri Dios y más kꞌiy matioxinik ndukꞌen pe pa kánima y keriꞌ ndikiyaꞌ ruqꞌij ri Dios.

16Romariꞌ, roj ma ndiqamalij ta qa qakꞌuꞌx. Pa rukꞌexel riꞌ, maske ri qa-cuerpo qꞌij-qꞌij ndijar qa, ri qánima qꞌij-qꞌij más utz rubꞌanun pe. 17Porque ri jubꞌaꞌ kꞌayew ndiqaqꞌasaj wokami, ndubꞌen chaqe chi nim qaqꞌij ndeqilaꞌ rikꞌin ri Dios, nim qaqꞌij ri ma jumbꞌey xtikꞌis. Y atoq ndiqakꞌoxomaj reꞌ, ndiqanaꞌ chi xa jubꞌaꞌ ok+ ri kꞌayew ngeqaqꞌasaj y xa chaꞌanin ngeꞌeqꞌax. 18Porque roj ma chirij ta ri ngetzꞌetetej bꞌaneq qánima, xa kin chirij ri ma ngetzꞌetetej ta,+ porque ri ngetzꞌetetej wokami, kꞌo jun qꞌij ngebꞌekꞌis, pero ri ma ngetzꞌetetej ta, riꞌ jumul ngekꞌojeꞌ.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index