Search form

2 Corintios 6

1Romariꞌ, roj ri junan ngojsamej+ pa rusamaj ri Dios, ngixqapixabꞌaj: Ma tibꞌen chare ri ru-favor ri Dios ri rusipan chiwa achel maneq ta reqalen keriꞌ. 2Porque ri Dios chupan ri rutzij tzꞌibꞌan kan kereꞌ ndubꞌij:

Atoq xuqaqa ruqꞌijul chin nijoyowaj kiwech ri wineq, xatinwakꞌaxaj,

Y atoq xuqaqa ruqꞌijul chin ri kolotajik, xatinkal.+

Keriꞌ ndubꞌij.

Y wokami xuqaqa ruqꞌijul chin ndijoyowex kiwech ri wineq roma ri Dios. ¡Ja qꞌij reꞌ chin ri kolotajik nduyaꞌ rijaꞌ!

Ri kꞌayew ngeruqꞌasaj ri Pablo roma rusamaj ri Dios

3Roj ndiqatij qaqꞌij chi ndiqabꞌen nojel pa ruchojmil, chin keriꞌ ma romak ta jun ma utz ta xtiqabꞌen, ekꞌo wineq xtikiyaꞌ kan ri Ajaw, y romariꞌ xtiyoqꞌotej ri samaj ndiqabꞌen pa rubꞌiꞌ. 4Pa rukꞌexel riꞌ, ndiqatij qaqꞌij chi nditzꞌetetej pa qakꞌaslen chi qetzij roj rusamajelaꞌ+ ri Dios rikꞌin nojel ri ndiqabꞌen. Qakochꞌon ri qꞌaxomal ndiqaqꞌasaj pa kiqꞌaꞌ ri wineq, qakochꞌon atoq maneq ndutzꞌen qaqꞌaꞌ, qakochꞌon ri kꞌayew qaqꞌasan pe, 5qakochꞌon qaroqik,+ qakochꞌon atoq xojyoꞌox pa cheꞌ, qakochꞌon atoq santienta wineq xeyakatej chiqij, qakosisan qiꞌ pa samaj y qakochꞌon, qakochꞌon chi ma roj warneq ta, y qakochꞌon wayijal. 6Qatijon chuqaꞌ qaqꞌij chi titzꞌetetej chi roj rusamajelaꞌ ri Dios rikꞌin chꞌajchꞌaj chi kꞌaslen qakꞌuan, rikꞌin qetaman rubꞌeyal ri qetzij, rikꞌin qakochꞌon ri kibꞌanun ri wineq chaqe, rikꞌin rupoqonaxik kiwech ri wineq ngeqabꞌen, rikꞌin chuqaꞌ chi ukꞌuan qakꞌaslen roma ri Espíritu Santo, rikꞌin ri ngojojowan, 7rikꞌin ndiqatzijoj ri qetzij y rikꞌin ndiqꞌalajin ruchuqꞌaꞌ ri Dios qikꞌin.+ Ndiqakusaj ri chojmilej qakꞌaslen ruyoꞌon ri Dios chin ndiqakowij qiꞌ chubꞌanik ri rusamaj, y chin chuqaꞌ ndiqatoꞌ qiꞌ chikiwech ri ngeyakatej chiqij. 8Janteq ndibꞌiloꞌox tzij chiqapalej y janteq ndinimrisex qabꞌiꞌ, y kꞌo chuqaꞌ utz y ma utz ta qatzijol ndibꞌan, y maske jumul ndiqabꞌij ri qetzij, ndibꞌix chiqij chi roj chꞌakatinelaꞌ. 9Ndibꞌan chaqe chi ma etaman ta qawech, xu xa etaman wi. Achel ja ta ngojken keriꞌ, pero kꞌa roj kꞌes. Roj bꞌanun castigar, pero ma roj kamineq ta pa ruqꞌaꞌ ri castigo.+ 10Roj yoꞌon chi bꞌis, pero jumul ngojkikot,+ maneq ok qachajin, pero qabꞌanun chake ekꞌiy chi xbꞌeyomer kikꞌaslen rikꞌin ri rutzij ri Dios,+ y achel maneq ndutzꞌen qaqꞌaꞌ, pero nojel qichin roj.

11Hermanos aj Corinto, roj nixta jun achike qewan ta chiwech, ri man ta qabꞌiꞌin chiwa, xa kin qajaqon ri qánima chiwech. 12¡Rix aj Corinto! Kin rix tikil pa qánima,+ pero roj ma rojkꞌo ta pa iwánima rix. 13Romariꞌ, riyin ri yin achel tataꞌatz pa iwiꞌ,+ nikꞌutuj chiwa chi tijaqaꞌ ri iwánima chuwa, achel nubꞌanun riyin chiwa rix.

Ma tixim iwiꞌ kikꞌin ri ma kitaqin ta ri Dios

14Rix ri itaqin chik ri Ajaw, ma tixim iwiꞌ+ kikꞌin ri ma kitaqin ta. Porque ri chojmilej kꞌaslen, ma chaj ta ndukꞌuaj riꞌ rikꞌin ri ma chojmilej ta kꞌaslen. Keriꞌ chuqaꞌ ri yikꞌan kikꞌaslen roma ri Dios, ma chaj ta ndikikꞌuaj kiꞌ kikꞌin ri kꞌa ekꞌo pa qꞌequꞌ. 15Keriꞌ chuqaꞌ ma ndikikꞌuaj ta kiꞌ ri Cristo rikꞌin ri itzel ri rubꞌiniꞌan chuqaꞌ Belial,* y ma junan ta ránima jun ri rutaqin ri Ajaw rikꞌin jun ri ma rutaqin ta. 16Keriꞌ chuqaꞌ roj ri ndiqayaꞌ ruqꞌij ri Dios, roj rachoch ri Kꞌaslik Dios, y romariꞌ ma utz ta chi ndiqakꞌuaj qiꞌ kikꞌin ri ndikiyaꞌ kiqꞌij tiox, achel xubꞌij ri Dios chupan ri rutzij tzꞌibꞌan kan:

Ri yin kitaqin, nibꞌen wachoch chare ri kánima y ngikꞌojeꞌ chikikajal,

Riyin nginok ki-Dios,+

Y rejeꞌ ngeꞌok nutinamit.

17Romariꞌ, ri Ajaw ndubꞌij chuqaꞌ:

Kixel pe chikikajal ri ma enutinamit ta y tijachaꞌ e iwiꞌ kikꞌin,+

Ma titzꞌen jun achike ri ndichꞌabꞌaqrisan ri ikꞌaslen,

Y riyin nikꞌen apu iwech,

18Y kin xkinok Tataꞌaj pa iwiꞌ,

Y rix ngixok nukꞌajol y numiꞌal.+

Keriꞌ ndubꞌij ri Ajaw ri kꞌo nojel uchuqꞌaꞌ pa ruqꞌaꞌ.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index