Search form

2 Corintios 7

1Y roma keriꞌ rusujun ri Dios chi nduyaꞌ, rix hermanos aj Corinto ri tzꞌan ngixqajoꞌ, ndiqabꞌij chiwa chi tiqachꞌajchꞌojrisaj qiꞌ,+ tiqabꞌanaꞌ cuenta ri qa-cuerpo y ri qa-espíritu chuwech ri ndichꞌabꞌaqrisan kichin. Qꞌij-qꞌij más loqꞌolej tiqabꞌanaꞌ chare ri qakꞌaslen chuwech ri Dios rikꞌin ri ndiqanimaj rutzij.

Ri apóstol Pablo ndikikot koma ri aj Corinto

2¡Tijaqaꞌ ri iwánima chaqe! Ma jun chiꞌikajal rix ri achoq chare qabꞌanun ri ma pa rubꞌeyal ta, ma jun ri qataqchiꞌin chin ndubꞌen ri ma pa rubꞌeyal ta, y ma jun chuqaꞌ qachꞌakatin.+ 3Atoq keriꞌ nibꞌij chiwa, ma chin ta niwelesaj chiꞌipalej ri ibꞌanun, porque nubꞌiꞌin chik chiwa chi jumul rixkꞌo pa wánima, y nixta ri kꞌaslen nixta ri kamik xtibꞌanun chi man ta xkixkꞌojeꞌ pa wánima.+ 4Nojel ri ndunaꞌ ri wánima chiwij, ma niwewaj ta chiwech, nojel nibꞌij chiwa, y nim ninaꞌ chare iwoma rix. Chupan nojel ri kꞌayew niqꞌasaj, ri Dios nduyaꞌ ruchuqꞌaꞌ wánima+ y santienta ngikikot.

5Keriꞌ nibꞌij chiwa, porque atoq xojbꞌeqaqa pa rochꞌulew Macedonia, ma jun uxlanen xqil.+ Pa rukꞌexel riꞌ, xa xqil nojel ruwech kꞌayew roma xeyakatej oyowal chiqij y pa qánima tzꞌan xibꞌriꞌil xqanaꞌ. 6Pero ri Dios ri ndiyoꞌon kuchuqꞌaꞌ ri poyineq kánima, xuyaꞌ ruchuqꞌaꞌ qánima roj,+ roma xuqaqa ri Tito chireꞌ qikꞌin. 7Y ma xe ta roma xuqaqa ri Tito xikikot, xa kin roma chuqaꞌ kꞌo ruchuqꞌaꞌ ránima xuqaqa y reꞌ roma ri ngixtajin rikꞌin rix, y xubꞌij chuqaꞌ chaqe chi rix santienta ndiwojoꞌ nditzꞌet qawech, chi xinaꞌ bꞌis roma ri xbꞌanatej chiꞌikajal, y chi nditij iqꞌij ndibꞌen ri nubꞌiꞌin e chiwa, y roma nojel reꞌ más xikikot.

8Porque maske ri wuj ri xintzꞌibꞌaj e xukꞌen pe bꞌis+ chiwa, ma ndiqꞌaxa ta chuwa chi xintzꞌibꞌaj e. Nabꞌey xqꞌaxa wi jubꞌaꞌ chuwa porque xinwetamaj chi ri wuj riꞌ xukꞌen pe bꞌis chiwa, pero ri bꞌis riꞌ ma xlayaj ta pa iwánima. 9Wokami ngikikot, pero ma roma ta chi xixbꞌison, xa kin roma chi ri bꞌis riꞌ xubꞌen chiwa chi xijel inoꞌoj y xtzolij pe iwánima rikꞌin ri Dios. Ri bꞌis ri xinaꞌ rix, ja ri Dios xyoꞌon qꞌij chi xiqꞌasaj, y rikꞌin ri keriꞌ xbꞌanatej, kꞌo cheꞌel ndiqabꞌij chi roj ma jun itzel xqabꞌen chiwa. 10Ri bꞌis riꞌ, ndubꞌen chare jun wineq chi nduyaꞌ kan ri mak y nduyaꞌ ránima rikꞌin ri Dios+ chin ndikolotej. Y ri ndiqꞌasan ri bꞌis riꞌ, ma nditunan ta. Pero ri bꞌis ndikil ri wineq roma bꞌaneq kánima chirij ri rayinik ekꞌo chochꞌulew, xa pa kamik ngerukꞌuaj. 11¡Tiyaꞌ cuenta chare ri jarupeꞌ utz xukꞌen pe chiwa ri bꞌis ri xuyaꞌ qꞌij ri Dios chi xiqꞌasaj! Xubꞌen chi xichojmirisaj ri ma utz ta xbꞌanatej chiꞌikajal, chi xikꞌut chi ma ja ta rix ri kꞌo imak rikꞌin ri xbꞌanatej, chi ma xqaꞌ ta chiwech ri xbꞌanatej, chi xixibꞌij qa iwiꞌ. Xubꞌen chuqaꞌ chi xiwojoꞌ xinitzꞌet, chi ma xixkꞌojeꞌ ta chupan ri xbꞌanatej, y chi xiyaꞌ castigo chare ri xbꞌanun mak chin xkꞌaj ruwech. Y rikꞌin ri keriꞌ xibꞌen, xixqꞌalajin chi rix maneq imak rikꞌin ri xbꞌanatej chiꞌikajal. 12Atoq xintzꞌibꞌaj e ri wuj riꞌ, ma xe ta roma ri xbꞌanun ri mak, nixta xe roma ri xbꞌan itzel chare xintzꞌibꞌaj e. Xintzꞌibꞌaj e, chin ndiyaꞌ cuenta+ chare ri janipeꞌ ndinimaj ri uchuqꞌaꞌ ruyoꞌon ri Dios pa qaqꞌaꞌ roj.

13Y roma nditij iqꞌij chin ndichojmirisaj ri xbꞌanatej chiꞌikajal, xubꞌen chaqe chi xkꞌojeꞌ más ruchuqꞌaꞌ qánima.

Pero pa ruwiꞌ riꞌ, más xojkikot roma xqatzꞌet chi ri hermano Tito ndikikot ránima roma ri rubꞌanun ri ikꞌaslen.+ 14Riyin nubꞌiꞌin e chare ri Tito chi utz inoꞌoj,+ y rix ma xiniyaꞌ ta chi kꞌix. Pa rukꞌexel chi keriꞌ, xqꞌalajin chi qetzij nojel ri xinbꞌij e chiwij chare ri Tito, y qetzij chuqaꞌ nojel ri nubꞌiꞌin e chiwa. 15Y rijaꞌ más ngixrajoꞌ kami, atoq ndukꞌuxlaꞌaj chi xinimaj rutzij, y hasta ixibꞌin iwiꞌ y ngixbꞌarbꞌot chuwech ri Dios xikꞌen apu ruwech. 16¡Kin ngikikot, porque kuqul nukꞌuꞌx+ chi rix ndibꞌen nojel ri nibꞌij chiwa!

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index