Search form

2 Corintios 9

1Pa ruwiꞌ ri ofrenda chin kitoꞌik ri loqꞌolej teq ralkꞌuaꞌl ri Dios,+ ma ndikꞌatzin ta nitzꞌibꞌaj e más chiwa. 2Keriꞌ nibꞌij roma wetaman ri utzulej iwánima chi ndiwojoꞌ ngixtoꞌon, y kin ngikikot nibꞌij chake ri hermanos aj rochꞌulew Macedonia chi rix ri aj rochꞌulew Acaya kin xe junabꞌir+ xiwojoꞌ xixtoꞌon. Y roma ri keriꞌ xiwojoꞌ xibꞌen, santienta aj rochꞌulew Macedonia xkajoꞌ chuqaꞌ xetoꞌon. 3Pero maske wetaman chi kin utz iwánima, ngenteq e ri Tito y ri ekaꞌiꞌ chik hermanos chin ngixkitoꞌ chi ndibꞌen rukꞌojlen nojel chin ndiyaꞌ ri ofrenda riꞌ. Ma kꞌateꞌ xtibꞌanatej chi maneq xkꞌatzin wi chi xikikot iwoma+ atoq xinbꞌij chake ri aj rochꞌulew Macedonia chi ndiwojoꞌ ngixtoꞌon. 4Ma kꞌateꞌ xkebꞌa jujun aj Macedonia chuwij, y xtekilaꞌ chi kꞌajani timal ri ofrenda, y si keriꞌ, xa kꞌix ndukꞌen pe chaqe, aunque ri kꞌix riꞌ más iwichin rix. 5Romariꞌ, xinnaꞌ chi xkꞌatzin xinkꞌutuj kamelal chake ri hermanos chi nabꞌey kebꞌa apeꞌ rixkꞌo rix chin ndekikꞌisaꞌ rumolik ri ofrenda ri xe junabꞌir ibꞌiꞌin chi ndiyaꞌ. Y keriꞌ ndiqꞌalajin chi ri ma jubꞌaꞌ ta ok ofrenda ri ndiyaꞌ, pa iwánima rix xalex pe, y ma roma ta ja roj ngojkꞌutun chiwa.

Ri Dios kin nduyaꞌ rajel-rukꞌexel ri ofrenda ndikiyaꞌ ri aj Corinto

6Tikꞌuxlaꞌaj re nibꞌij chiwa: Jun tikonel ri jubꞌaꞌ ok semilla ndutik, jubꞌaꞌ ok chuqaꞌ ruwech tikoꞌ ndumal. Ri santienta semilla ndutik, santienta+ chuqaꞌ ruwech tikoꞌ ndumal. 7Chiꞌijununal tiyaꞌ ri janipeꞌ ndalex pa iwánima+ chin ndiyaꞌ. Ma kaꞌiꞌ ikꞌuꞌx tiyaꞌ, nixta xe roma ndikꞌutux chiwa tiyaꞌ. Porque ri Dios ndiqaꞌ chuwech ri ndikikot ránima nduyaꞌ ri ru-ofrenda. 8Y ri Dios kin kꞌo ruchuqꞌaꞌ chin ndubꞌen chi ndikꞌiyer+ nojel ruwech favor pa iwiꞌ, chin keriꞌ jumul ndikꞌojeꞌ iwikꞌin nojel ri ndikꞌatzin chiwa y hasta más chuwech ri ndikꞌatzin chiwa, chin ngixtiker ngeꞌitoꞌ chꞌaqa chik rikꞌin nojel ruwech favor. 9Achel ndubꞌij ri tzꞌibꞌan kan pa ruchꞌabꞌel ri Dios, pa ruwiꞌ jun ri chojmilej rukꞌaslen:

Rijaꞌ kꞌo xuyaꞌ chake ri maneq ok kichajin,

Y ri favor ndubꞌen, kin chin jumul ndikꞌojeꞌ.+

Keriꞌ tzꞌibꞌan kan.

10Ri Dios ri ndiyoꞌon ri semilla chare ri tikonel, y ri ruway chin ndiwaꞌ, kin xtubꞌen chi ndikꞌiyer ri janipeꞌ kꞌo iwikꞌin chin ngixtoꞌon y xtubꞌen chuqaꞌ chi ndikꞌiyer ri janipeꞌ utz ndukꞌen pe ri toꞌonik ndiyaꞌ.+ 11Y keriꞌ ndikꞌiyer ri kꞌo iwikꞌin, chin keriꞌ más ngixtoꞌon rikꞌin nojel iwánima. Y ri ofrenda nditeq rix ri ndiqakꞌuaj roj, ndukꞌen pe matioxinik+ chare ri Dios. 12Porque atoq ndiqakꞌuaj ri toꞌonik riꞌ, ma xe ta ngeqatoꞌ ri loqꞌolej teq ralkꞌuaꞌl ri Dios rikꞌin ri ndikꞌatzin chake, xa kin ndubꞌen chuqaꞌ chi santienta ngematioxin chare ri Dios.+ 13Y rejeꞌ kin xtikiyaꞌ ruqꞌij ri Dios,+ porque re toꞌonik reꞌ nduqꞌalajrisaj chi rix kin ndibꞌen ri ndubꞌij ri utzulej rutzij ri Cristo ri ndiyoꞌon kolotajik ri kuqul ikꞌuꞌx rikꞌin. Rejeꞌ chuqaꞌ xtikiyaꞌ ruqꞌij ri Dios roma ndikitzꞌet chi rix santienta toꞌonik ndiyaꞌ chake rejeꞌ y chake konojel. 14Y roma tzꞌan xkixkajoꞌ, kin xtikibꞌen orar pa i-cuenta, porque ndikitzꞌet chi ri Dios santienta favor ruyoꞌon pa iwiꞌ. 15¡Matiox chare ri Dios roma ri nimalej sipanik ruyoꞌon chaqe, sipanik ri ma ndiqil ta rubꞌixik rikꞌin aj rochꞌulew tzij!

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index