Search form

2 Juan 1

Ri Juan nduteq ruxunaqil kiwech ri hermanos

1Riyin Juan jun ukꞌuey bꞌey chikiwech ri hermanos, nitzꞌibꞌaj e re wuj reꞌ chiwa rix ri ralkꞌuaꞌl teq ri Dios ri ndimal iwiꞌ pa rubꞌiꞌ,* ri rix chaꞌon roma rijaꞌ. Riyin qetzij ngixinwojoꞌ,+ y ma xe ta riyin, xa kin ngixkajoꞌ chuqaꞌ konojel ri kikꞌoxoman chik ri qetzij.+ 2Y ngixqajoꞌ, porque pa qánima kꞌo ri qetzij ri ruqꞌalajrisan kan ri Dios y ri qetzij riꞌ chin jumul ndikꞌojeꞌ pa qánima. 3Ri Tataꞌaj Dios y ri Jesucristo ri Rukꞌajol ri Tataꞌaj Dios, kin ta xtikiyaꞌ ki-favor pa qawiꞌ, kin ta xtikijoyowaj qawech, y kin ta xtikiyaꞌ uxlanen pa qánima roj ri qakꞌuan qakꞌaslen chupan ri qetzij y ngojojowan.

Ri mandamiento ruyoꞌon kan ri Dios ja ri tiqajoꞌ qiꞌ

4Riyin tzꞌan xikikot chi xenwil jujun hermanos eꞌiwinaq rix chi kikꞌuan kikꞌaslen chupan ri qetzij,+ achel rubꞌanun kan mandar ri Tataꞌaj Dios chaqe. 5Wokami kꞌa hermanos, nikꞌutuj kamelal chiwa chi tiqajoꞌ qiꞌ chiqawech, achel ndubꞌij ri mandamiento ruyoꞌon kan ri Dios pa nabꞌey atoq xqataqij ri Ajaw, y re mandamiento re nitzꞌibꞌaj e chiwa ma kꞌakꞌakꞌ ta.+ 6Y ri rubꞌeyal ri ajowabꞌel ja ri ndiqakꞌuaj ri qakꞌaslen achel ndubꞌij ri mandamientos eruyoꞌon kan ri Dios.+ Y ri mandamiento ri iwakꞌaxan pe pa nabꞌey atoq xitaqij ri Jesucristo, ja ri tiwojoꞌ iwiꞌ chiwech.+

Tiqabꞌanaꞌ cuenta qiꞌ chikiwech ri chꞌakatinelaꞌ

7Porque wokami ekꞌiy ebꞌaneq chochꞌulew, ri ngebꞌiꞌin chi ri Jesucristo atoq xuqaqa chochꞌulew, ma xkꞌojeꞌ ta ru-cuerpo achel qa-cuerpo roj wineq.+ Ri keriꞌ ngebꞌiꞌin, xa echꞌakatinelaꞌ, y xa ejunan rikꞌin ri jun ri yakatajneq chirij ri Cristo.+ 8Rix tibꞌanaꞌ cuenta iwiꞌ chuwech ri tijonik riꞌ, chin keriꞌ, ma xe keriꞌ tikꞌis ri rusamaj ri Dios qabꞌanun kan chiꞌikajal. Pa rukꞌexel chi keriꞌ, kin ta xtiwil nojel ri rajel-rukꞌexel rusujun kan ri Dios.+

9Xa achike na jun ri nduyaꞌ qa más ruwiꞌ ri tijonik chin ri Cristo, ma kꞌo ta ri Dios pa ránima. Jakꞌa ri jun ri jumul kꞌo chupan ri tijonik chin ri Cristo, kꞌo ri Tataꞌaj Dios y ri Rukꞌajol ri Dios pa ránima. 10Si kꞌo jun xteqaqa apeꞌ rixkꞌo ri rukꞌuan apu jun chik tijonik, ma tikꞌen apu ruwech pa iwachoch, nixta tiyaꞌ ruxunaqil ruwech.+ 11Porque ri ndiyoꞌon ruxunaqil ruwech, jajun rijaꞌ ndireqalej ri itzel ndajin rikꞌin ri jun riꞌ.

Ri rukꞌisibꞌel ruxunaqil kiwech ri hermanos

12Riyin kꞌa kꞌiy achike niwojoꞌ nibꞌij chiwa, pero ma niwojoꞌ ta chi xe chuwech wuj nitzꞌibꞌaj e. Niwojoꞌ ngixbꞌentzꞌetaꞌ, chin nebꞌij chiwa ri kꞌo pa wánima, y keriꞌ jabꞌel ndikikot ri qánima iwikꞌin, roma ndiqatzꞌet qawech.+

13Ri eralkꞌuaꞌl ri Dios ri ndikimal kiꞌ waweꞌ, ri echaꞌon roma rijaꞌ, ndikiteq e ruxunaqil iwech.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index