Search form

2 Pedro 1

Ri Pedro nduteq e ruxunaqil kiwech ri hermanos

1Riyin Simón Pedro, samajel y apóstol chin ri Jesucristo, niteq e ruxunaqil iwech rix ri ikuqubꞌan ikꞌuꞌx rikꞌin rijaꞌ achel qabꞌanun roj chuqaꞌ.+ Ri qakuqubꞌan qakꞌuꞌx kin achel jun nimalej bꞌeyomal ri yoꞌon chaqe roma ri chojmilej samaj xubꞌen ri qa-Dios y Qakolonel Jesucristo. 2Kin ta xtikꞌiyer ru-favor ri Dios pa iwiꞌ y ri uxlanen nduyaꞌ pa iwánima, roma iwetaman ri utzulej runoꞌoj rijaꞌ y ri utzulej chuqaꞌ runoꞌoj ri Qajaw Jesús.

Ri rukꞌiyilen qakꞌaslen ri ndirajoꞌ ri Dios

3Ri Dios rikꞌin ri nimalej ruchuqꞌaꞌ rusipan nojel ri ndikꞌatzin chaqe chin ri qakꞌaslen chochꞌulew, y chin chuqaꞌ ndiqakꞌuaj jun loqꞌolej kꞌaslen chuwech. Rijaꞌ ruyoꞌon nojel riꞌ chaqe, roma xqetamaj ri utzulej runoꞌoj ri Cristo ri xoyon qichin chin ndiqꞌalajin pa qakꞌaslen ri nimalej ruqꞌij rijaꞌ y ri utzulej runoꞌoj.+ 4Nojel riꞌ ruyoꞌon ri Dios chaqe, retal chi ruyoꞌon ri rusujun kan ri kin jabꞌel wi y nimalej reqalen. Y ruyoꞌon nojel riꞌ chaqe, chin keriꞌ rix ri xixanimej yan pe pa ruqꞌaꞌ ri itzel teq rayinik ri ekꞌo chochꞌulew, ndubꞌen qa ri ikꞌaslen achel rukꞌaslen rijaꞌ.+ 5Y romariꞌ, rix ndikꞌatzin nditij iqꞌij chi rikꞌin ri ikuqubꞌan pe ikꞌuꞌx rikꞌin ri Jesucristo, ndikꞌuaj chuqaꞌ pa ikꞌaslen jun utzulej noꞌoj. Y pa ruwiꞌ ndikꞌuaj utzulej noꞌoj pa ikꞌaslen, ngixkꞌoxoman utz-utz. 6Y pa ruwiꞌ ngixkꞌoxoman utz-utz, ndiqꞌet chuqaꞌ iwiꞌ chuwech ri mak,+ y pa ruwiꞌ ndiqꞌet iwiꞌ chuwech ri mak, ngixkochꞌon, y pa ruwiꞌ ngixkochꞌon,+ ndikꞌuaj jun kꞌaslen achel ndirajoꞌ ri Dios, 7y pa ruwiꞌ ndikꞌuaj jun kꞌaslen achel ndirajoꞌ ri Dios, rix ri itaqin ri Jesucristo ndiwojoꞌ iwiꞌ chiwech, y pa ruwiꞌ ndiwojoꞌ iwiꞌ chiwech, kin ngixojowan achel ndojowan ri Dios.+

8Si nojel reꞌ kꞌo pa ikꞌaslen y ngekꞌiyer, ndubꞌen chiwa chi ma ngixqꞌoran ta pa rusamaj ri Dios y kin ndiwachin ri ikꞌaslen chiretamaxik ri utzulej runoꞌoj ri Qajaw Jesucristo. 9Porque ri maneq re utzulej teq noꞌoj reꞌ pa rukꞌaslen, xa achel jun soqꞌ keriꞌ, y xa achel jun ri ma nej ta nditzuꞌun ri ma nduyaꞌ chi ta cuenta chare chi xchꞌajchꞌojrisex yan chuwech ri mak xerubꞌanalaꞌ jumbꞌey kan.+ 10Romariꞌ, hermanos, roma rix oyon+ y rix chaꞌon roma ri Dios, titijaꞌ iqꞌij chi kin ta ngekꞌiyer nojel re utzulej teq noꞌoj reꞌ pa ikꞌaslen, porque si keriꞌ ndibꞌen, ma jumbꞌey ndiwil jun roma ndiyaꞌ kan ri Dios. 11Porque si ngekꞌiyer re utzulej teq noꞌoj reꞌ pa ikꞌaslen, kin jabꞌel ndikꞌan apu iwech chupan ri reino ma ndikꞌis ta chin ri Qajaw y Qakolonel Jesucristo.+

Ri Pedro xutzꞌet ri nimalej ruqꞌij ri Ajaw

12Romariꞌ hermanos, re nutzꞌibꞌan chiwa chupan re wuj reꞌ, kin kꞌo pa wánima chi jumul nikꞌuxlaꞌaj chiwa, maske rix iwetaman chik rubꞌeyal y kin kuqul ikꞌuꞌx rikꞌin ri qetzij kꞌutun kan chiwech.+ 13Porque riyin nunaꞌon pa wánima chi pa ruchojmil nibꞌen chi nikꞌasoj ijolon pa ruwiꞌ nojel reꞌ, mientras kꞌa yin kꞌes. 14Porque xa ma layaj chi ta ngikꞌaseꞌ chochꞌulew, achel ruqꞌalajrisan chik ri Qajaw Jesucristo chinuwech.+ 15Y chuqaꞌ nitij nuqꞌij nibꞌen ri ndikꞌatzin chin kꞌo cheꞌel ndikꞌuxlaꞌaj jumul re nibꞌij chiwa atoq yin kamineq chik.

16Nojel re nibꞌij chiwa kin qetzij, porque roj apóstoles ma qakusan ta tzꞌukun y nojin teq tzij eyoꞌon qa ruqꞌa-raqen chin qabꞌiꞌin chiwa ri uchuqꞌaꞌ kꞌo pa ruqꞌaꞌ ri Qajaw Jesucristo y chi rijaꞌ nduqaqa chik jumbꞌey. Xa kin rikꞌin qawech xqatzꞌet ri nimalej ruqꞌij.+ 17Xqatzꞌet atoq xnimrisex rubꞌiꞌ y xyoꞌox ruqꞌij roma ri Tataꞌaj Dios, y xqakꞌaxaj ri loqꞌolej ruchꞌabꞌel ri nimalej ruqꞌij Dios ri kereꞌ xubꞌij pe chikaj: Jareꞌ ri Nukꞌajol, y tzꞌan niwojoꞌ, santienta ngikikot roma rijaꞌ,+ xchajeꞌ. 18Roj xqakꞌaxaj ri jun chꞌabꞌel riꞌ, ri pataneq chikaj, roma rojkꞌo rikꞌin ri Cristo pa ruwiꞌ ri loqꞌolej juyuꞌ atoq riꞌ.+

19Y rikꞌin ri xqatzꞌet y xqakꞌaxaj, ndiqꞌalajin chi qetzij ri kitzꞌibꞌan kan ri profetas ojer, y rix utz ndibꞌen si ndiyaꞌ pa cuenta utz-utz ri kitzꞌibꞌan kan. Porque ri kitzꞌibꞌan kan rejeꞌ, kin achel jun lámpara ri ndiyikꞌan pa qꞌequꞌ, y nduyaꞌ luz hasta ke ndiseqresan na pe, y nduqaqa na ri Cristo ri nduyikꞌaj ri iwánima achel ndiyikꞌan ri jun chꞌumil chin kumaj saqer.+ 20Pero pa ruwiꞌ nojel reꞌ, ndikꞌatzin ndiwetamaj chi ri kiqꞌalajrisan kan ri profetas chupan ri rutzij ri Dios, ma kiyon ta rejeꞌ xkinojij qa ri xkitzꞌibꞌaj. 21Porque ri xkiqꞌalajrisaj ri profetas ojer, ma kiyon ta chikiwech xkitzꞌuk qa. Xa kin ja ri Espíritu Santo ukꞌuayon kichin chubꞌixik ri ruyoꞌon ri Dios pa kánima.+

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index