Search form

2 Pedro 2

Ri kiqꞌabꞌan kiꞌ chi etijonelaꞌ chin ri rutzij ri Dios

1Chikikajal ri israelitas ojer kan, xebꞌeqꞌalajin pe ri xkiqꞌabꞌaj kiꞌ chi eru-profetas ri Dios.+ Keriꞌ chuqaꞌ chiꞌikajal rix, ngebꞌeqꞌalajin pe ri ndikiqꞌabꞌaj kiꞌ chi etijonelaꞌ etaqon roma ri Dios, y ma ndinabꞌex ta atoq ndikijulaꞌ apu jalajaj teq tijonik ma eqetzij ta ri ndukꞌis kiqꞌij ri hermanos, hasta ndikibꞌij chi ri Jesucristo ri xloqꞌon kichin, ma ja ta rijaꞌ ri Ajaw pa ruwiꞌ nojel. Pero ri keriꞌ ndikibꞌen, ndikoyoj castigo chikij ri pa jumel ruwech nduyaꞌ ri Dios pa kiwiꞌ. 2Y ekꞌiy ri xketzeqlebꞌen ri seqꞌ teq noꞌoj ndikibꞌanalaꞌ rejeꞌ, y romariꞌ kin xtibꞌix itzel teq tzij chirij ri qetzij bꞌey.+ 3Y roma ngejamem chirij méra, ri itzel teq tijonelaꞌ riꞌ kin xtikikanolaꞌ rubꞌeyal jun tijonik chin ndikelesaj méra chiꞌiqꞌaꞌ.+ Pero xe jampeꞌ ojer bꞌiꞌin pe pa kiwiꞌ roma ri Dios chi ngebꞌan castigar, y maneq cheꞌel ndikikal kiꞌ chuwech ri castigo riꞌ.

4Porque ri Dios nixta ri ángeles ri xkibꞌen mak xerukuy,+ xa xerutorij qa chupan ri qꞌarachꞌaraj siwan apeꞌ etzꞌapel koyobꞌen ri qꞌij chi ndiyoꞌox castigo chake.+ 5Ri Dios chuqaꞌ ma xerukuy ta ri wineq xekꞌojeꞌ ojer kan, xa kin xuteq pe ri kamik chi jabꞌ pa kiwiꞌ konojel ri xkikꞌuaj itzel kꞌaslen. Pero xukal ri Noé, ri xtzijon rubꞌeyal ri chojmilej kꞌaslen y xerukal chuqaꞌ wuquꞌ chik wineq+ junan rikꞌin. 6Ri Dios chuqaꞌ xubꞌij chi tikꞌis kiqꞌij ri kaꞌiꞌ tinamit xkibꞌiniꞌaj Sodoma y Gomorra, romariꞌ xerukꞌatisaj hasta xechajir na.+ Keriꞌ xubꞌen, chin xukꞌut chikiwech ri wineq chi ri Dios kin ngerubꞌen castigar konojel ri kꞌo pa kánima chi ndikikꞌuaj jun kꞌaslen ri ndukꞌut chi maneq Dios pa kiwech. 7Pero xukal pe ri Lot ri kin chojmilej rukꞌaslen chikikajal ri itzel teq wineq chin ri kaꞌiꞌ tinamit riꞌ,+ jun achi ri janíma poyineq ránima roma ri itzel teq achike ngekibꞌanalaꞌ ri wineq chiriꞌ. 8Porque ri Lot ri kin chojmilej rukꞌaslen, kꞌo rachoch chikikajal ri aj Sodoma y ri aj Gomorra, y qꞌij-qꞌij santienta ndibꞌison ránima, roma ndirakꞌaxaj y ndutzꞌet chi ri aj chiriꞌ ma ndikiqꞌet ta kiꞌ chi ndikibꞌanalaꞌ ri xajan chin ndibꞌan.+

9Nojel reꞌ ndukꞌut chiqawech chi ri kikꞌuan jun utzulej kꞌaslen ri ndiqaꞌ chuwech ri Ajaw, rijaꞌ retaman ngerelesaj chuxeꞌ ri kꞌayew ndikil pa kikꞌaslen,+ pero ri kikꞌuan jun itzel kꞌaslen, chuxeꞌ castigo eruyoꞌon wi mientras nduqaqa ri qꞌij atoq ndiqꞌat tzij pa kiwiꞌ chin ndiyoꞌox ri castigo chin jumul chake. 10Y kin más castigo nduyaꞌ chake ri wineq ri ngebꞌanun ri itzel teq rayinik chin ri ki-cuerpo, rayinik ri nduchꞌabꞌaqrisaj kikꞌaslen, y ma jun achoq chuwech ndikajoꞌ ngeniman. Ma ndikixibꞌij ta kiꞌ ndikibꞌanalaꞌ itzel teq achike, y maske ndibꞌix chake chi ma utz ta ngetajin rikꞌin, ma ndikijel ta kinoꞌoj, xetal ngetajiyaj rikꞌin, nixta ndikixibꞌij kiꞌ ngechꞌaꞌa itzel chikij ri kꞌo uchuqꞌaꞌ pa kiqꞌaꞌ chikaj. 11Jakꞌa ri ángeles, ri más kꞌo kuchuqꞌaꞌ y más kꞌo ruchuqꞌaꞌ kitzij, kin ndikixibꞌij kiꞌ chi itzel ngechꞌaꞌa chikij ri kꞌo uchuqꞌaꞌ pa kiqꞌaꞌ atoq ngekisujuj chuwech ri Ajaw.

12Pero ri itzel teq tijonelaꞌ riꞌ, itzel ngechꞌaꞌa chirij ri nixta ketaman rubꞌeyal. Rejeꞌ xa eꞌachel chikap maneq kinoꞌoj y ndikiyaꞌ kiꞌ chin ngetzꞌan y ngekamisex. Y achel ndikikꞌulwachij ri chikap, keriꞌ chuqaꞌ ndikikꞌulwachij ri tijonelaꞌ riꞌ. 13Keriꞌ rukꞌexel ndiyoꞌox chake roma ri itzel teq achike kibꞌanun chake chꞌaqa chik.+ Ri wineq riꞌ maske paqꞌij, kin utz ndikinaꞌ chare ri ndikibꞌanalaꞌ itzel teq achike. Ndikimal kiꞌ iwikꞌin atoq ndibꞌanalaꞌ inimaqꞌij, pero xa eseqꞌ chi wineq chiꞌikajal y eyoꞌol kꞌix chiwa, y xa ngekikot roma ri itzel kꞌaslen kikꞌuan.

14Ma tikitzꞌet jun ixaq, kin ja paqiꞌ ndikirayij, ma ndikꞌo ta kikꞌuꞌx ndikibꞌen mak. Ngekibꞌochilaꞌ ri maneq ok ruchuqꞌaꞌ kánima rikꞌin ri Ajaw chin ndikibꞌen mak chuqaꞌ. Rukꞌamon chare ri kánima chi ndijamem chirij méra. Romariꞌ kin rukꞌulun chi ndiqaqa castigo pa kiwiꞌ. 15Rejeꞌ xkiyaꞌ kan ri chojmilej bꞌey chin ri Ajaw, xesach roma xkoqaj rubꞌey rukꞌaslen ri profeta Balaam,+ rukꞌajol jun achi rubꞌiniꞌan Bosor. Ri Balaam riꞌ, ri xkꞌojeꞌ ojer kan, xurayij xuchꞌek méra, maske ma utz ta xtajiyaj rikꞌin chin ta xuchꞌek. 16Ri Balaam xchꞌolix roma ri itzel ndirajoꞌ nderubꞌanaꞌ chake ri israelitas. Ri ru-burra ri ma ndichꞌaꞌa ta, xchꞌaꞌa+ chare achel ndichꞌaꞌa jun wineq, y riꞌ xubꞌen chare ri Balaam chi xujekꞌ riꞌ chuwech ri chꞌujulej teq achike runojin ndubꞌen.

17Ri itzel teq tijonelaꞌ riꞌ, xa eꞌachel alaxbꞌel teq yaꞌ ri xechaqiꞌj yan, y eꞌachel teq nubes ri maneq jabꞌ kikꞌuan, eꞌukꞌuan roma ruchuqꞌaꞌ ri kaqiqꞌ. Chake rejeꞌ bꞌanun chik rukꞌojlen jun lugar ri kin qꞌequ-qꞌequꞌ rupan. 18Atoq ngechꞌaꞌa, ngekibꞌilaꞌ tzij chin ndikinimrisalaꞌ kiꞌ, pero ri ndikibꞌilaꞌ, xa nixta jun rubꞌeyal. Rejeꞌ ngekibꞌochilaꞌ ri kꞌa jubꞌaꞌ qꞌij kekolotej pe chikikajal ri wineq ri sachineq rubꞌey ri Dios chikiwech, y ndikibꞌilaꞌ chake chi ma tikijekꞌ kiꞌ chuwech ri ndiqaꞌ chikiwech y tikibꞌanalaꞌ xa achike na ri ndurayij ri ki-cuerpo. 19Ndikibꞌij chake chi ngekelesaj pa ruqꞌaꞌ ri ma ndiyoꞌon ta qꞌij chake chi ndikibꞌen ri ndurayij ri ki-cuerpo, pero ri ngebꞌiꞌin keriꞌ ma ndikinaꞌ ta kiꞌ chi ekꞌo chuxeꞌ ruchuqꞌaꞌ ri itzel teq achike ndikirayij.+ Keriꞌ nibꞌij, porque atoq jun wineq kꞌo chuxeꞌ ruchuqꞌaꞌ jun itzel rayinik, kin pa ruqꞌaꞌ ri rayinik riꞌ kꞌo wi. 20Porque ri xekolotej yan pe chuwech ri achikejeꞌ ri ngeseqꞌan kikꞌaslen chochꞌulew, roma xketamaj runoꞌoj ri Qajaw y Qakolonel Jesucristo, si ndikiseqꞌaj chik kiꞌ jumbꞌey chupan, y ngekꞌojeꞌ chik chuxeꞌ ruchuqꞌaꞌ ri itzel kꞌaslen riꞌ, xa más itzel ndubꞌen qa ri kikꞌaslen ke chuwech ri rubꞌanun nabꞌey.+ 21Xa más ta utz, man ta xketamaj rubꞌeyal ri chojmilej kꞌaslen, ke chuwech xketamaj y ngetzolij chikij y ndikiyaꞌ kan ri loqꞌolej mandamiento xyoꞌox chake.+ 22Xa ndibꞌanatej kikꞌin rejeꞌ achel ndubꞌij ri jun tzij: Ri tzꞌiꞌ ri xxaꞌaꞌ yan e, xa nderukꞌuxuꞌ chi pe ri ruxaꞌoj,+ y ri aq ri kꞌaja xatanisex, nderukichaꞌ chi pe riꞌ pa chꞌabꞌeq.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index