Search form

2 Pedro 3

Ri qꞌij atoq ri Ajaw Jesús nduqaqa chik jumbꞌey

1Hermanos, riyin tzꞌan ngixinwojoꞌ, y ja rukan wuj reꞌ ri nitzꞌibꞌaj e chiwa. Y chupan ri kaꞌiꞌ wuj nutijon nuqꞌij chi rix nupixabꞌan e chin nibꞌen chiwa chi pa ruchojmil ngixnojin.+ 2Chin keriꞌ ma timestaj ri kiqꞌalajrisan kan ri loqꞌolej profetas ojer,+ y ma timestaj chuqaꞌ ri mandamiento pataneq rikꞌin ri Qajaw y Qakolonel Jesucristo, ri kibꞌiꞌin kan ri i-apóstoles chiwa.

3Ri nabꞌey niwojoꞌ chi rix ndikꞌoxomaj utz-utz, jareꞌ: Chupan re rukꞌisibꞌel tiempo rojkꞌo, ngebꞌeqꞌalajin pe wineq eꞌukꞌuan roma ri itzel teq rayinik kꞌo pa kánima, y ndiketzꞌabꞌej rutzij ri Dios.+ 4Rejeꞌ ndikibꞌilaꞌ: Si bꞌiꞌin kan chi ri Jesucristo nduqaqa chik jumbꞌey, ¿achike kꞌa roma kꞌajani tuqaqa? Porque kꞌiy chik tiempo keken e ri nabꞌey teq wineq ri xetaqin, y nixta jun achike jalatajneq ruwech. Kin achel atoq xbꞌan ri rochꞌulew pa nabꞌey, kꞌa junajaꞌ rubꞌanun wokami.+ 5Ri wineq riꞌ keriꞌ ndikibꞌilaꞌ, porque kiyon ndikibꞌen qa chi ma ketaman ta chi xe ojer xel pa ruchiꞌ ri Dios ri tzij ri xbꞌanun chi xkꞌojeꞌ ri kaj, chi xel pe ri rochꞌulew pa yaꞌ, y chuqaꞌ chi pa yaꞌ tikil wi.+ 6Pero jun qꞌij, ri Dios mismo xukusaj yaꞌ chin xukꞌis ruqꞌij ri rochꞌulew,+ xuteq jun kamik chi jabꞌ, xkꞌiy pe ri yaꞌ y xeken ri wineq ri ma xkitaqij ta ri Dios. 7Rikꞌin chuqaꞌ ri rutzij ri Dios, ri kaj y ri rochꞌulew ri ngeqatzꞌet wokami qꞌaton tzij pa kiwiꞌ chi ngeporox pa qꞌaqꞌ, pero eyakel apu chin ri qꞌij atoq ri Dios nduqꞌet tzij y ndiqaqa nimalej castigo pa kiwiꞌ ri wineq maneq Dios pa kiwech.

8Pero rix hermanos ri tzꞌan ngixinwojoꞌ, ma timestaj chi chare ri Ajaw, jun qꞌij achel 1,000 junaꞌ, y 1,000 junaꞌ achel jun qꞌij keriꞌ.+ 9Keriꞌ nibꞌij chiwa, porque ri Ajaw kꞌajani tuqaqa, ma roma ta chi ndilayaj, achel ndikibꞌij jujun wineq chi ma jumbꞌey ndibꞌanatej ri rubꞌiꞌin kan.+ Rijaꞌ kꞌajani tuqaqa roma ma qꞌaxneq ta rukꞌuꞌx chi rix royobꞌen, porque ma ndirajoꞌ ta chi kꞌo jun man ta ndikolotej, xa kin ndirajoꞌ chi konojel ndikijel kinoꞌoj y ndikiyaꞌ kánima rikꞌin.+

10Pero achel jun eleqꞌon pa jumel ruwech ndok pa jun achoch,+ keriꞌ pa jumel ruwech nduqaqa ri tiempo atoq ndibꞌanatej nojel ri rubꞌiꞌin kan ri Ajaw. Chupan teq ri qꞌij riꞌ, ri kaj santienta ndiqꞌajan ndikꞌis, nojel ri ebꞌanun roma ri Dios ngekꞌis pa qꞌaqꞌ, y ri rochꞌulew y nojel ri achike ekꞌo chuwech, maneq apeꞌ ndikewaj kiꞌ, xa ndikꞌis ruqꞌij nojel.

11Y roma iwetaman chi nojel reꞌ kin xtikꞌis ruqꞌij, ndikꞌatzin chi ndikꞌuaj jun loqꞌolej kꞌaslen ri ndiqaꞌ chuwech ri Dios.+ 12Tiwoyobꞌej y nojel iwánima tirayij chi nduqaqa yan ri tiempo atoq ndibꞌanatej nojel ri rubꞌiꞌin kan ri Dios. Ri tiempo riꞌ ndukꞌen pe chi ri kaj nditzijtej qꞌaqꞌ chirij y ndikꞌis ruqꞌij, y nojel ri ekusan chin xbꞌan nojel ri kꞌo, ngeyiꞌer pa qꞌaqꞌ.+ 13Pero roj ri qataqin ri Ajaw, qoyobꞌen ri kꞌakꞌakꞌ kaj y ri kꞌakꞌakꞌ rochꞌulew ri rusujun kan ri Dios chaqe, ri apeꞌ ndibꞌanatej nojel pa ruchojmil.+

14Roma kꞌa riꞌ, rix hermanos ri tzꞌan ngixinwojoꞌ, nibꞌij chiwa chi rikꞌin ri iwoyobꞌen chi ndibꞌanatej nojel reꞌ, titijaꞌ iqꞌij chi atoq nduqaqa ri qꞌij riꞌ, kin ta kꞌo uxlanen pa iwánima rikꞌin ri Dios, chꞌajchꞌaj ta ri ikꞌaslen y nixta jun itzel achike ndilitej chiwij.+ 15Tiwetamaj chi ri Ajaw kꞌajani tuqaqa, porque ndirajoꞌ chi konojel wineq ngekolotej.+ Y ri qa-hermano Pablo ri tzꞌan ndiqajoꞌ, kꞌo chuqaꞌ rutzꞌibꞌan chiwa pa ruwiꞌ reꞌ, rikꞌin ri nojibꞌel ruyoꞌon ri Dios chare. 16Chupan nojel ri wuj erutzꞌibꞌan, rijaꞌ ndichꞌaꞌa pa ruwiꞌ reꞌ, pero ekꞌo jujun teq achike erutzꞌibꞌan ri cuesta ndikꞌoxomex. Y ri wineq ri ma kꞌiy ta ketaman pa ruwiꞌ ri rutzij ri Dios, y xa kakaꞌ kikꞌuꞌx rikꞌin ri Ajaw, xa ndikijel rubꞌeyal, achel ndikibꞌen rikꞌin ri chꞌaqa chik rutzij ri Dios tzꞌibꞌan kan, y xa kiyon ndikikꞌis kiqꞌij rikꞌin ri keriꞌ ndikibꞌen.

Ri rukꞌisibꞌel teq achike nduchilabꞌej e ri Pedro

17Roma kꞌa riꞌ, rix hermanos ri tzꞌan ngixinwojoꞌ, nibꞌij chiwa chi roma iwetaman chik nojel reꞌ, tichajij utz-utz ri ikꞌaslen, ma kꞌateꞌ kixukꞌuꞌex chupan ri itzel teq noꞌoj apeꞌ esachineq ri kikꞌuan itzel kꞌaslen, y keriꞌ ngixel e chupan ri nimalej ru-favor ri Ajaw.+ 18Pa rukꞌexel ri keriꞌ ndibꞌen, titijaꞌ iqꞌij chin ngixkꞌiy chupan ru-favor ri Qajaw y Qakolonel Jesucristo y tiwetamaj más runoꞌoj.+ ¡Kin ta xtiyoꞌox nimalej ruqꞌij rijaꞌ wokami y chin jumul! Amén.+

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index