Search form

2 Tesalonicenses 3

Ri Pablo ndukꞌutuj chi ndibꞌan orar roma rijaꞌ y ri erachibꞌil

1Hermanos, jun chik achike niwojoꞌ nibꞌij chiwa, jareꞌ: Tibꞌanaꞌ orar qoma, chin keriꞌ chaꞌanin ndibꞌa rutzijoxik ri utzulej rutzij ri Ajaw chꞌaqa chik apeꞌ, y chi ri wineq ndikiyaꞌ nim reqalen ri utzulej teq tzij riꞌ, achel ndiyaꞌ reqalen rix. 2Tikꞌutuj chuqaꞌ chare ri Dios chi ma qojqaqa pa kiqꞌaꞌ itzel teq wineq ri kin emachꞌikilik chikibꞌanik. Keriꞌ nibꞌij chiwa, porque ma konojel ta+ wineq ndikitaqij ri utzulej teq tzij ri ndichꞌaꞌa pa ruwiꞌ ri kolotajik nduyaꞌ ri Ajaw. 3Pero ri Ajaw kin ndubꞌen wi ri ndubꞌij. Rijaꞌ kin nduyaꞌ ruchuqꞌaꞌ ri iwánima y ngixrubꞌen cuenta,+ chin keriꞌ maneq ruqꞌaꞌ ri itzel chiwa. 4Y roj kuqul qakꞌuꞌx rikꞌin ri Ajaw chi rix rutoꞌon y xkixrutoꞌ más apu chiqawech chin ndibꞌen ri ndiqabꞌen mandar chiwa. 5Ja ta kꞌa ri Ajaw ndukꞌuan ri iwánima chin ngixojowan achel ndojowan+ ri Dios, y ndikachꞌ ri kꞌayew ndiqꞌasaj pa ikꞌaslen, achel ri Cristo xukachꞌ ri kꞌayew xuqꞌasaj.

Ri Pablo ndubꞌij chi kesamej ri hermanos

6Hermanos, pa rubꞌiꞌ ri Qajaw Jesucristo ndiqabꞌen mandar chiwa, chi ma keꞌiwachibꞌilaj+ ri hermanos eqꞌoroy y ma ndikinimaj ta ri tijonik yoꞌon chaqe roj ri qabꞌiꞌin kan chake. 7Porque rix iwetaman chi kin ndikꞌatzin ndikꞌuaj ri ikꞌaslen achel ri kꞌaslen qakꞌutun kan chiwech, porque atoq xojkꞌojeꞌ chiꞌikajal xojsamej y ma xojqꞌoran ta. 8Ma jumbꞌey xqakꞌutuj chi xe ta keriꞌ xsipex jun rutzaꞌ qaway, pa rukꞌexel riꞌ xa kin chi chaqꞌaꞌ chi paqꞌij xqakosisaj qiꞌ pa samaj+ chin ma xojok ta jun eqaꞌ chiwa. 9Roj kꞌo ta wi cheꞌel xqabꞌij chiwa chi xojitzuq,+ pero ma ke ta riꞌ xqabꞌen, xa kin xojsamej chin xqakꞌut chiwech chi keriꞌ chuqaꞌ tibꞌanaꞌ rix.+ 10Porque atoq kꞌa rojkꞌo chiꞌikajal, xqayaꞌ kan re mandamiento reꞌ chiwa: Si jun ma ndirajoꞌ ta ndisamej,+ ma tiwaꞌ chuqaꞌ. 11Y wokami ndiqakamuluj rubꞌixik chiwa, porque qakꞌaxan chi ekꞌo jujun chiꞌikajal ri xe ngeqꞌorayaj y ma jun samaj ndikajoꞌ ndikibꞌen, xa ndikitzeq kiꞌ xa apejeꞌ na. 12Chake rejeꞌ ndiqachilabꞌej y ndiqabꞌen mandar pa rubꞌiꞌ ri Ajaw Jesucristo, chi chaj kesamej+ chin ndikichꞌek ri kiway.

13Y chiwa rix hermanos, ndiqabꞌij chi ma kixkos ndibꞌen ri utz. 14Si kꞌo jun chiꞌikajal ri ma ndirajoꞌ ta ndubꞌen ri qatzꞌibꞌan e chupan re wuj reꞌ, tibꞌanaꞌ chi ndiqꞌalajin chikiwech konojel achike ri ndibꞌanun keriꞌ y ma tiwachibꞌilaj, chin keriꞌ tikꞌix. 15Pero rix ma titzꞌet achel ta jun yakatajneq chiwij keriꞌ, xa kin tipixabꞌaj+ achel ndipixabꞌaj xa achike na chi hermano.

Ri Pablo nduteq ruxunaqil kiwech ri hermanos

16Ri Ajaw ri nduyaꞌ uxlanen, kin ja ta kꞌa rijaꞌ ndiyoꞌon uxlanen jumul pa iwánima chupan nojel ri ndiqꞌasaj pa ikꞌaslen. Kin ta xtikꞌojeꞌ ri Ajaw chiꞌikajal rix iwonojel.

17Riyin Pablo rikꞌin nuqꞌaꞌ nitzꞌibꞌaj e+ ruxunaqil iwech. Keriꞌ nibꞌen chupan nojel wuj ri ngenteq chake ri hermanos, chin ndetamex chi ja riyin ri ngitaqon ri wuj. 18Ri favor ri nduyaꞌ ri Qajaw Jesucristo kin ta xtikꞌojeꞌ pa iwiꞌ rix iwonojel.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index