Search form

2 Timoteo 1

Ri Pablo nduteq ruxunaqil ruwech ri Timoteo

1Riyin Pablo ru-apóstol ri Cristo Jesús porque jariꞌ rurayibꞌel ri Dios. Ri Dios xiruchaꞌ chin nitzijoj chi konojel ri xe jun ndikibꞌen rikꞌin ri Cristo Jesús, ndikil ri utzulej kꞌaslen+ ri ndusuj rijaꞌ. 2Nitzꞌibꞌaj e re wuj reꞌ chawa rat Timoteo, ri rat achel nukꞌajol ri tzꞌan ngatinwojoꞌ. Ri Tataꞌaj Dios y ri Qajaw Cristo Jesús kin ta xtikiyaꞌ ki-favor pa awiꞌ, xtikijoyowaj awech, y xtikiyaꞌ uxlanen pa awánima.

Ri Pablo ndukꞌuxlaꞌaj ri Timoteo pa ru-oración

3Riyin jumul ngatinkꞌuxlaꞌaj pa nu-oración. Chi chaqꞌaꞌ chi paqꞌij nimatioxij chare ri Dios, ri Dios ri niyaꞌ ruqꞌij rikꞌin chꞌajchꞌaj wánima+ achel kibꞌanun pe ri watit-numamaꞌ. 4Atoq nikꞌuxlaꞌaj chi xatoqꞌ atoq xatinyaꞌ kan, tzꞌan nirayij ngatentzꞌetaꞌ chik jumbꞌey, y keriꞌ ngikikot junan awikꞌin. 5Nimatioxij chare ri Dios porque nikꞌuxlaꞌaj chi rat qetzij kuqul akꞌuꞌx rikꞌin ri Cristo Jesús, achel xkibꞌen ri awatiꞌ Loida y ri ateꞌ+ Eunice ri xkuqeꞌ kikꞌuꞌx más nabꞌey chawech rat. Kin ndunaꞌ wánima chi rat chuqaꞌ kuqul akꞌuꞌx rikꞌin ri Cristo Jesús.

Ma kakꞌix ndayaꞌ utzulej rutzijol ri Qajaw

6Y romariꞌ nikꞌuxlaꞌaj chawa chi tatijaꞌ aqꞌij chi ma tichup qa ri loqꞌolej sipanik ruyoꞌon ri Dios chawa atoq xinyaꞌ nuqꞌaꞌ pa awiꞌ.+ Porque ja ri Dios ri xyoꞌon ri loqꞌolej sipanik riꞌ chawa. 7Porque ri espíritu ruyoꞌon ri Dios pa qánima, ma jun ta espíritu ri ndubꞌen chaqe chi ndiqaxibꞌij qiꞌ+ chi ndiqabꞌen ri samaj yoꞌon chaqe. Xa kin jun espíritu ri ndubꞌen chaqe chi ngojtiker ndiqabꞌen ri samaj riꞌ rikꞌin ruchuqꞌaꞌ+ rijaꞌ, ndubꞌen chuqaꞌ chaqe chi ngojojowan, y ndubꞌen chaqe chi ngojtiker ndiqaqꞌet qiꞌ chuwech ri itzel teq rayinik. 8Romariꞌ, ma kakꞌix ndayaꞌ utzulej rutzijol ri Qajaw, ma kakꞌix chuqaꞌ ndabꞌij chi awetaman nuwech riyin ri yin tzꞌapel pa cheꞌ roma nitzijoj ri utzulej teq tzij chin kolotajik. Pa rukꞌexel riꞌ, rikꞌin ri uchuqꞌaꞌ yoꞌon chawa roma ri Dios, takochꞌoꞌ junan wikꞌin ri kꞌayew ndipuꞌun pa qakꞌaslen roma rutzijoxik ri utzulej teq tzij chin kolotajik. 9Ri Dios xojrukal, y xojroyoj chin ndiqakꞌuaj jun chꞌajchꞌaj+ kꞌaslen. Rijaꞌ xojroyoj+ ma roma ta chi kꞌo utz qabꞌanun.+ Xa kin roma ri nimalej ru-favor rijaꞌ, y roma chuqaꞌ keriꞌ runojin pe xe pa nabꞌey atoq kꞌajani tubꞌen ri rochꞌulew. Xe jampeꞌ atoq riꞌ runojin chi nduyaꞌ ru-favor+ chaqe roj ri xe jun qabꞌanun rikꞌin ri Cristo Jesús. 10Y ri nimalej favor riꞌ xqꞌalajrisex chiqawech chupan re tiempo rojkꞌo, rikꞌin ri xuruqꞌalajrisaj riꞌ ri Qakolonel Cristo Jesús. Rijaꞌ xukꞌis ruqꞌij ri ruchuqꞌaꞌ ri kamik+ y xuyikꞌaj ri bꞌey chiqawech chin ndiqil ri kꞌaslen ma ndikꞌis ta, jun kꞌaslen ri maneq ruqꞌaꞌ ri kamik chare. Keriꞌ xubꞌen roma rutzijoxik ri utzulej teq tzij chin kolotajik.

11Y ri Dios xiruchaꞌ+ yin chin xinok apóstol, tijonel y tzijoy richin ri utzulej teq tzij riꞌ. 12Romariꞌ niqꞌasaj kꞌayew+ waweꞌ pa cheꞌ, pero ma ngikꞌix ta yinkꞌo chireꞌ, porque kin wetaman ri utzulej runoꞌoj ri achoq ikꞌin nukuqubꞌan nukꞌuꞌx y kin kuqul nukꞌuꞌx chi rijaꞌ kꞌo ruchuqꞌaꞌ chin nduchajij ri ruyoꞌon chuwa hasta kꞌa nduqaqa na ri qꞌij atoq nditzolij pe.

13Y nibꞌij kꞌa chawa rat Timoteo, chi kin achel ri utzulej teq tijonik ri nuyoꞌon chawa, kin keriꞌ rubꞌeyal ri tijonik tayaꞌ+ chake chꞌaqa chik. Y kin ta kuqul akꞌuꞌx keriꞌ ndabꞌen, y ngatojowan chuqaꞌ roma xe jun abꞌanun rikꞌin ri Cristo Jesús. 14Y rikꞌin ri toꞌonik nduyaꞌ ri Espíritu Santo ri kꞌo pa qánima, tabꞌanaꞌ cuenta ri utzulej tijonik ruyoꞌon kan ri Dios pa aqꞌaꞌ.

15Rat awetaman chi konojel ri hermanos ri ekꞌo pa teq tinamit chin ri rochꞌulew Asia yin kiyoꞌon chik kan. Chikikajal rejeꞌ ekꞌo ri Figelo y ri Hermógenes. 16Ri Ajaw kin ta xtujoyowaj kiwech ri ekꞌo pa rachoch ri hermano Onesíforo, porque rijaꞌ kꞌiy mul xuruyaꞌ ruchuqꞌaꞌ wánima waweꞌ apeꞌ yin tzꞌapel pa cheꞌ. Ma xkꞌix ta woma, maske xirutzꞌet chi yin ximon rikꞌin cadenas. 17Rijaꞌ atoq xuqaqa waweꞌ pa tinamit Roma, xutij ruqꞌij chi xirukanoj, hasta kꞌa xiril na. 18Rat awetaman chuqaꞌ chi rijaꞌ tzꞌan toꞌonik xuyaꞌ atoq xkꞌojeꞌ pa tinamit Éfeso. Ri Ajaw kin ta xtujoyowaj ruwech+ chupan ri qꞌij atoq nditzolij pe ri Cristo Jesús.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index