Search form

2 Timoteo 4

1Ri Ajaw Jesucristo ri nduqaqa chik jumbꞌey, y ndiqꞌalajin chi kin Rey wi, rijaꞌ nduruqꞌataꞌ tzij pa kiwiꞌ ri wineq kꞌa ekꞌes y pa kiwiꞌ ri ekamineq chi e. Chuwech rijaꞌ y chuwech ri Dios,+ nichilabꞌej chawa rat Timoteo, 2chi ma kataneꞌ chutzijoxik ri rutzij ri Dios chake ri ndikajoꞌ ndikakꞌaxaj y chake ri ma ndikajoꞌ ta ndikakꞌaxaj. Tabꞌij chake ri wineq ri koqan jun tijonik ma qetzij ta, chi tikiyaꞌ kan. Tabꞌij chake ri kikꞌuan itzel kꞌaslen, chi tikijalaꞌ ri kikꞌaslen. Kaꞌapixabꞌaj konojel chi jumul tikibꞌanaꞌ ri utz. Rikꞌin nojel awánima kaꞌatijoj+ konojel rikꞌin rutzij ri Dios, y ma tikꞌo akꞌuꞌx. 3Porque nduqaqa tiempo atoq ri wineq ma ndikajoꞌ ta ndikakꞌaxaj ri utzulej teq tijonik+ ruyoꞌon ri Dios, xa kin ndikꞌaqet kixikin chin ndikakꞌaxaj xa apux chi tijonik, y romariꞌ ekꞌiy kitijonelaꞌ ngekꞌojeꞌ ri ngekꞌutu chikiwech chi kin utz ngekibꞌanalaꞌ ri itzel teq rayinik. 4Ri tiempo riꞌ, ri wineq xa ndikiyaꞌ kan rokacheq chuwech ri qetzij, chin ndikiyaꞌ kixikin rikꞌin tzꞌukun y nojin teq tzij+ eyoꞌon qa ruqꞌa-raqen. 5Pero rat pa awuxnaqil tabꞌanaꞌ nojel. Takochꞌoꞌ ri kꞌayew ngepuꞌun pa akꞌaslen. Tatzijoj ri utzulej teq tzij chin kolotajik chake ri wineq chin ndikitaqij ri Ajaw. Tabꞌanaꞌ nojel ri samaj ri yoꞌon pa aqꞌaꞌ roma ri Dios.

6Porque ri qꞌij chin ngibꞌa y niyaꞌ kan re rochꞌulew, xa naqaj chik kꞌo, y ninaꞌ chi ngikamisex,+ y keriꞌ nginok achel jun sipanik ri ndiqꞌijox pariꞌ ri ru-altar ri Dios chin ndisujeꞌ chuwech. 7Jumul nutijon pe nuqꞌij chi nibꞌen chi ndichꞌakon ri qetzij richin ri Dios, y xinkꞌis yan rubꞌanik nojel ri samaj ri yoꞌon chuwa chi nibꞌen.+ Jumul nubꞌanun chi ri utzulej tijonik ri nutaqin ma jalatajneq ta. 8Y wokami yakel apu jun nimalej rajel-rukꞌexel+ ri ndiyoꞌox chuwa roma nukꞌuan jun chojmilej kꞌaslen, y ja ri Ajaw ri utzulej Qꞌatoy tzij ri xtiyoꞌon chuwa chupan ri qꞌij atoq nduqꞌet tzij. Y ri rajel-rukꞌexel riꞌ ma xe ta chuwa riyin nduyaꞌ wi, xa kin ndiyoꞌox chuqaꞌ chake konojel ri bꞌaneq kánima chiroyobꞌexik chi nduqaqa chik jumbꞌey ri Ajaw.

Ri Pablo kꞌo nduchilabꞌej chare ri Timoteo

9Rat Timoteo, tatijaꞌ aqꞌij chi nganuꞌatzꞌetaꞌ yan. 10Porque ri Demas xbꞌa ránima chirij ri aj rochꞌulew kꞌaslen,+ romariꞌ xiruyaꞌ kan, xbꞌa pa tinamit Tesalónica. Ri hermano Crescente bꞌaneq chubꞌanik rusamaj ri Dios pa teq tinamit ri ekꞌo pa rochꞌulew Galacia. Y ri hermano Tito bꞌaneq chuqaꞌ chubꞌanik rusamaj ri Dios pa teq tinamit ri ekꞌo pa rochꞌulew Dalmacia. 11Xaxe ri hermano Lucas kꞌo kan wikꞌin. Y atoq xkapuꞌun, takꞌamaꞌ pe ri hermano Marcos,+ porque rijaꞌ ndikꞌatzin chuwa chin ngirutoꞌ pa rusamaj ri Ajaw. 12Xinteq chuqaꞌ ri hermano Tíquico+ pa tinamit Éfeso. 13Atoq xkapuꞌun, tabꞌanaꞌ kamelal chuwa, takꞌamaꞌ pe ri kꞌul niqꞌuꞌuj ri xinyaꞌ kan rikꞌin ri Carpo pa tinamit Tróade. Y kaꞌakꞌamaꞌ pe chuqaꞌ ri bꞌoton teq wuj.* Ri más ngekꞌatzin chuwa, ja ri bꞌoton teq wuj ebꞌanun chare kitzꞌumal chikap.

14Ri Alejandro ri ngerubꞌanalaꞌ jalajaj teq achike chare chꞌichꞌ, kꞌiy itzel rubꞌanun chuwa. Ja ri Ajaw ndiyoꞌon rukꞌexel+ chare roma ri erubꞌanaloꞌon. 15Tabꞌanaꞌ cuenta awiꞌ chuwech, porque rijaꞌ santienta yakatajneq chirij ri rutzij ri Dios ri ndiqatzijoj roj.

16Atoq nabꞌey mul xinukꞌuꞌex pa qꞌatbꞌel tzij, nixta jun xkꞌojeꞌ wikꞌin chin xirutoꞌ, xa konojel xinkiyaꞌ kan nuyon. Y riyin ma niwojoꞌ ta chi ri Dios xtubꞌen rukꞌexel chake+ roma ri ma xinkitoꞌ ta. 17Pero ri Ajaw ma xiruyaꞌ ta kan, xa kin xirutoꞌ y xuyaꞌ wuchuqꞌaꞌ chin keriꞌ xintzijoj ri utzulej teq tzij chin kolotajik, y keriꞌ xkakꞌaxaj konojel ri ma israelitas ta ri utzulej teq tzij riꞌ. Y ri Ajaw xirukal chuwech ri kamik.+ 18Wetaman chuqaꞌ chi xkirukal chuwech nojel itzel teq achike ri xtojowex chuwij+ y ngiruchajij chin ngirukꞌuaj pa aj chikaj ru-reino. ¡Tiyoꞌox nimalej ruqꞌij rijaꞌ chin jumul! Amén.

Ri Pablo nduteq ri rukꞌisibꞌel teq ruxunaqil kiwech ri hermanos

19Tayaꞌ ruxunaqil kiwech ri Prisca y ri Aquila,+ y konojel ri ekꞌo pa rachoch ri Onesíforo.+ 20Ri hermano Erasto+ xkanej kan pa tinamit Corinto, jakꞌa ri hermano Trófimo+ ndiyawej xinyaꞌ kan pa tinamit Mileto. 21Y rat Timoteo, tatijaꞌ aqꞌij kapuꞌun waweꞌ+ apeꞌ yinkꞌo, nabꞌey chi nditzꞌukutej pe ri tiempo chin tew. Ndikiteq ruxunaqil awech ri hermano Eubulo, keriꞌ chuqaꞌ ri Pudente, ri Lino, ri Claudia, y konojel ri hermanos waweꞌ.

22Kin ta xtikꞌojeꞌ ri Ajaw Jesucristo pa awánima. Kin ta xtikꞌojeꞌ chuqaꞌ ru-favor ri Dios iwikꞌin rix iwonojel.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index