Search form

Hechos 11

Ri Pedro nderutzijoj ri xbꞌanatej chirachoch ri Cornelio chake ri hermanos aj Jerusalén

1Ri apóstoles y ri hermanos ri ekꞌo pa rochꞌulew Judea xkakꞌaxaj chi jajun ri ma israelitas ta xkitaqij ri rutzij ri Dios. 2Y atoq ri Pedro xbꞌa chi e pa tinamit Jerusalén, xbꞌix chare koma ri israelitas ri kitaqin ri Ajaw chi ma utz ta ri xubꞌen, 3y kereꞌ ndikibꞌilaꞌ chare: ¡Rat xabꞌen ri xajan chi ndibꞌan, porque xatok pa kachoch achiꞌaꞌ ri ma kibꞌanun ta circuncidar kiꞌ+ y xawaꞌ kikꞌin!

4Romariꞌ ri Pedro xutzꞌen rubꞌixik chi jujun chi jujun chake pa ruwiꞌ ri xbꞌanatej+ y kereꞌ xubꞌij: 5Kꞌo jun qꞌij nibꞌen orar pa tinamit Jope,+ atoq xintzꞌet pa jun achel achikꞌ chi chꞌoqorneq xulan pe jun achel nim kꞌul ximil pe chi kajiꞌ rutzaꞌ, y xuqaqa qa chinuwech. 6Y atoq xintzꞌet utz-utz, xintzꞌet chi chupan ri kꞌul, ekꞌo pe jalajaj kiwech chikap chin ri rochꞌulew. Kꞌo kajkej kaqen, kꞌo kꞌuxunel teq chikap, kꞌo kumatziꞌ teq chikap y kꞌo aj xikꞌ teq chikap. 7Y xinwakꞌaxaj jun chꞌabꞌel ri xubꞌij chuwa: Pedro, kayakatej, kaꞌakamisaj la chikap y kaꞌakꞌuxuꞌ. 8Pero riyin xinbꞌij chare: Ajaw, ma nikꞌux ta ok, matiox. Riyin ma jumbꞌey nukꞌuxun ri ma chꞌajchꞌaj ta+ y ri xajan chi ndikꞌuxeꞌ. 9Pero ri jun ri xchꞌaꞌa pe chuwa kereꞌ chik xubꞌij chuwa: Pedro, nojel ri chꞌajchꞌojrisan roma ri Dios, ma tabꞌij rat chi xajan+ chi ndikꞌuxeꞌ. 10Y oxmul keriꞌ xbꞌix chuwa, y ja atoq riꞌ ri achel kꞌul y nojel ri kꞌo chupan xukꞌuꞌex chi e chikaj. 11Y atoq keriꞌ xbꞌanatej, kꞌateꞌ ruwech ekꞌo oxiꞌ achiꞌaꞌ chuchiꞌ ri achoch ri apeꞌ wuxqanen wiꞌ. Ri achiꞌaꞌ riꞌ etaqon pe pa tinamit Cesarea chinukanoxik. 12Y ri Espíritu Santo+ xubꞌij chuwa chi ma kaꞌiꞌ nukꞌuꞌx tinbꞌen chin ngibꞌa chikij.+ Y re waqiꞌ hermanos re ekꞌo wikꞌin wokami, xinkachibꞌilaj, y xojbꞌeqaqa pa rachoch jun achi rubꞌiniꞌan Cornelio. 13Rijaꞌ xutzijoj chaqe chi xutzꞌet jun ángel xbꞌepeꞌeꞌ pa rachoch, y xubꞌij chare: Kaꞌataqaꞌ jujun achiꞌaꞌ pa tinamit Jope, chin ndekoyoj jun achi rubꞌiniꞌan Simón ri ndibꞌix Pedro chare. 14Rijaꞌ ndurutzijoj chawa ri achike ndabꞌen chin ngakolotej rat y konojel ri ekꞌo pa awachoch.+ 15Y atoq riyin xintzꞌuk xichꞌaꞌa chikiwech konojel ri ekꞌo pa rachoch ri Cornelio, ja atoq riꞌ xqaqa ri Espíritu Santo pa kiwiꞌ,+ achel xqaqa pa qawiꞌ roj pa nabꞌey. 16Ja atoq riꞌ xinkꞌuxlaꞌaj ri rubꞌiꞌin kan ri Ajaw Jesús, atoq kereꞌ xubꞌij chaqe: Kin qetzij chi ri Juan ri Bautista, xixrubꞌen bautizar+ rikꞌin yaꞌ, pero ngixbꞌan chuqaꞌ bautizar rikꞌin ri Espíritu Santo,+ xchajeꞌ. 17Y si ri Dios junajaꞌ loqꞌolej sipanik xuyaꞌ chake konojel ri ekꞌo pa rachoch ri Cornelio achel ruyoꞌon chaqe roj+ israelitas ri qataqin ri Ajaw Jesucristo, ¿achike kꞌa ok riyin chin ta niwojoꞌ niqꞌet ri samaj ndubꞌen ri Dios? xchajeꞌ ri Pedro.

18Atoq ri israelitas ri kitaqin ri Jesucristo pa tinamit Jerusalén xkakꞌaxaj ri xubꞌij ri Pedro, ma jun chik achike xkichꞌojij chare, xa kin xkiyaꞌ ruqꞌij ri Dios rikꞌin ri kereꞌ xkibꞌij: ¡Wokami kin qetzij qetaman chi jajun chake ri ma israelitas ta,+ ri Dios ruyoꞌon qꞌij chi ndikijel kinoꞌoj y ndikiyaꞌ kánima rikꞌin, chin ndikil ri kꞌaslen ma ndikꞌis ta!

Ri utzulej teq tzij chin kolotajik ndeqaqa rutzijoxik pa tinamit Antioquía

19Achel ri xqabꞌij yan, atoq xkamisex ri Esteban, xtzꞌukutej chi ngetzeqlebꞌex ri kitaqin ri Ajaw chin ndibꞌan itzel chake.+ Chikikajal rejeꞌ, ekꞌo xebꞌa pa rochꞌulew Fenicia, ekꞌo xebꞌa pa rochꞌulew Chipre y ekꞌo xebꞌa pa tinamit Antioquía, y xaxe chake ri israelitas ndikitzijoj ri utzulej teq tzij chin kolotajik. 20Pero chikikajal ri xesututex e pa tinamit Jerusalén, ekꞌo jujun achiꞌaꞌ aj rochꞌulew Chipre y aj tinamit Cirene. Rejeꞌ atoq xebꞌeqaqa pa tinamit Antioquía, jajun chake ri ma israelitas ta xkitzijoj ri utzulej teq tzij ri ndubꞌij chi ja ri Jesús ri Ajaw. 21Ri ruchuqꞌaꞌ ri Ajaw kin kꞌo pa kiwiꞌ+ ri achiꞌaꞌ riꞌ, y kꞌiy wineq xkitaqij+ ri xkibꞌij, y xkiyaꞌ kánima rikꞌin ri Ajaw.

22Nojel re xbꞌanatej pa tinamit Antioquía, xbꞌeqaqa rutzijol pa kixikin ri ndikimal kiꞌ pa rubꞌiꞌ ri Ajaw pa tinamit Jerusalén. Romariꞌ, xkiteq ri Bernabé pa tinamit Antioquía. 23Atoq ri Bernabé xbꞌeqaqa chiriꞌ, santienta xkikot atoq xutzꞌet chi ri Dios ruyoꞌon ri ru-favor pa kiwiꞌ ri hermanos. Y xerupixabꞌaj konojel chi rikꞌin nojel kánima, jumul kekꞌojeꞌ rikꞌin ri Ajaw. 24Keriꞌ xubꞌij ri Bernabé, porque kin utz runoꞌoj, kuqul rukꞌuꞌx rikꞌin ri Dios, y nojneq ránima rikꞌin ri Espíritu Santo. Ri qꞌij riꞌ, ekꞌiy xkitaqij+ ri Ajaw.

25Y ri Bernabé xbꞌa pa tinamit Tarso chukanoxik ri Saulo. 26Atoq xril, xukꞌuaj pa tinamit Antioquía, y jun junaꞌ xekꞌojeꞌ chikikajal ri hermanos, y xekitijoj santienta wineq rikꞌin ri rutzij ri Dios. Y ja chiriꞌ pa tinamit Antioquía ri nabꞌey apeꞌ xbꞌix cristianos+ chake ri kitaqin ri Jesucristo.

27Chupan teq ri qꞌij riꞌ, ekꞌo jujun ri ngeqꞌalajrisan ri ndubꞌij pe ri Dios pa kánima+ ri xeꞌel e pa tinamit Jerusalén y xebꞌa qa pa tinamit Antioquía. 28Atoq ekꞌo chik chiriꞌ, jun chikikajal rejeꞌ rubꞌiniꞌan Agabo, xpeꞌeꞌ y chuxeꞌ ruchuqꞌaꞌ ri Espíritu Santo xubꞌij chi ja nduqaqa jun nimalej wayijal chuwech nojel ri rochꞌulew. Y ri wayijal riꞌ kin xuqaqa wi pa ru-tiempo ri rey César Claudio. 29Y romariꞌ, ri hermanos chin ri tinamit Antioquía xkibꞌen ruwech chi chikijununal ndikiyaꞌ e ri janipeꞌ ngetiker ndikiyaꞌ+ chin ndikiteq kitoꞌik ri hermanos pa rochꞌulew Judea. 30Y kin keriꞌ xkibꞌen, y ja ri Bernabé y ri Saulo xeꞌukꞌuan ri méra riꞌ, chin xbꞌekijachaꞌ chake ri eꞌukꞌuey bꞌey chikiwech ri ndikimal kiꞌ pa rubꞌiꞌ ri Dios pa rochꞌulew Judea.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index