Search form

Hechos 12

Ri rukamik ri Santiago y rutzꞌapixik ri Pedro pa cheꞌ

1Chupan ri tiempo riꞌ, ri rey Herodes xerutzꞌen jujun ukꞌuey bꞌey kichin ri hermanos chin ndubꞌen itzel chake. 2Xuteq chi tikamisex chi espada ri Santiago ri kichaqꞌ-kinimal kiꞌ rikꞌin ri Juan.+ 3Y atoq xutzꞌet chi ri xubꞌen chare ri Santiago xqaꞌ chikiwech ri israelitas, xuteq chuqaꞌ rutzꞌamik ri Pedro. Reꞌ xbꞌanatej chupan teq ri qꞌij chin ri nimaqꞌij atoq ri israelitas ndikikꞌux ri kaxlan teq wey maneq levadura rikꞌin.+ 4Atoq tzꞌamon chi e ri Pedro, ri Herodes xuyaꞌ pa cheꞌ y xubꞌen mandar chi tichajix koma ekajiꞌ bꞌotzaj chajinelaꞌ, y chi jujun ri bꞌotzaj riꞌ ekꞌo kajiꞌ+ chajinelaꞌ. Ri Herodes runojin chi kꞌa teqꞌax na ri nimaqꞌij Pascua,+ ndirelesaj pe ri Pedro y nduyaꞌ chikiwech ri wineq chin nduqꞌet tzij pa ruwiꞌ. 5Y keriꞌ ri Pedro chajin utz-utz pa cheꞌ, pero jukꞌan chik apeꞌ kimolon kiꞌ ri hermanos pa rubꞌiꞌ ri Ajaw,+ ndikibꞌen orar chare ri Dios roma rijaꞌ.

Jun ángel chin ri Dios ndirelesaj e ri Pedro pa cheꞌ

6Ri Herodes rubꞌanun ruwech chi atoq ndisaqer pe, ndirelesaj pe ri Pedro chikiwech ri wineq. Pero chupan ri aqꞌaꞌ riꞌ, ri Pedro ndiwer pa cheꞌ, ximil rikꞌin kaꞌiꞌ cadenas pa kinikꞌajal kaꞌiꞌ chajinelaꞌ, y ekaꞌiꞌ chik chajinelaꞌ kichajin ruchiꞌ ri jay apeꞌ tzꞌapel ri Pedro. 7Kꞌateꞌ ruwech xuqꞌalajrisaj riꞌ jun ángel chin ri Ajaw+ y xyikꞌan jun luz pa cheꞌ apeꞌ tzꞌapel ri Pedro. Ri ángel xukuyukaꞌ apu xerukꞌalkꞌaꞌx ri Pedro chin xukꞌasoj y xubꞌij chare: ¡Kayakatej paqiꞌ! xchajeꞌ. Ja atoq riꞌ ri cadenas ri achoq ikꞌin ximon ruqꞌaꞌ ri Pedro xetzaq e. 8Y ri ángel xubꞌij chare ri Pedro: Tabꞌanaꞌ akꞌojlen, takusaj la axajabꞌ, xchajeꞌ. Y atoq ri Pedro xubꞌen ri xbꞌix chare, ri ángel xubꞌij chik: Taqꞌuꞌuj e ri akꞌul y kanawoqaj, xchajeꞌ.

9Ri Pedro roqan pe ri ángel, xeꞌel pe pa cheꞌ, pero ri Pedro ma retaman ta chi qetzij ndelesex e pa cheꞌ. Pa rutzij rijaꞌ, xa ndubꞌen jun achel achikꞌ.+ 10Atoq xeꞌeqꞌax yan apeꞌ ekꞌo ri nabꞌey y ri rukan teq chajinelaꞌ, xebꞌeqaqa chunaqaj ri puerta bꞌanun rikꞌin chꞌichꞌ ri kꞌo chibꞌey. Ri puerta riꞌ ruyon xjaqatej chikiwech. Atoq xeꞌel e pa bꞌey y xebꞌiyin yan jun cuadra, ri ángel kꞌateꞌ ruwech xuyaꞌ kan ri Pedro.

11Ja atoq riꞌ ri Pedro xuyaꞌ cuenta chare chi ma ndachikꞌan ta y xubꞌij: Wokami qetzij nikꞌoxomaj chi ri Ajaw xuteq pe ri ru-ángel+ chin xirukal+ pa ruqꞌaꞌ ri Herodes y xirukal chuqaꞌ chuwech ri itzel teq achike koyobꞌen ri israelitas chuwij.

12Y atoq xunojij yan ri achike ndubꞌen, xbꞌa chirachoch ri María ruteꞌ ri Juan ri ndibꞌix Marcos chare,+ apeꞌ kimolon kiꞌ ekꞌiy hermanos, ndikibꞌen orar.+ 13Ri Pedro xkꞌujkꞌut apu chi puerta ri kꞌo chibꞌey, y xel pe jun aj ikꞌ rubꞌiniꞌan Rode. 14Atoq ri aj ikꞌ xrakꞌaxaj chi ja ri Pedro ri ndichꞌaꞌa apu, tzꞌan xkikot qa, y romariꞌ ma xujeq ta ri puerta chuwech, xa juꞌanin xtzolij apu pa jay, y xbꞌerubꞌij chi ri Pedro kꞌo chi puerta. 15Pero ri kimolon kiꞌ pa jay xkibꞌij chare ri aj ikꞌ: ¡Rat xa rat chꞌuꞌj! Pero ri aj ikꞌ nduyal riꞌ chubꞌixik chi ja ri Pedro, y rejeꞌ ndikibꞌilaꞌ chare: Naq, riꞌ xa ja ri ángel ri ndichajin richin.+

16Pero ri Pedro kꞌa keriꞌ ndikꞌujkꞌut apu chi puerta, y atoq xkijeq pe, xel kánima xkitzꞌet chi ja rijaꞌ ri peꞌel apu chiriꞌ. 17Y ri Pedro xubꞌen ruqꞌaꞌ chake chin kechꞌojochiꞌ qa, y xutzijoj chake ri xubꞌen ri Ajaw chin xrelesaj pe pa cheꞌ, y xubꞌij chi tiyoꞌox rutzijol chare ri Santiago+ y chake ri chꞌaqa chik hermanos. Atoq rubꞌiꞌin chik keriꞌ, xel pe chiriꞌ y xbꞌa chik jun apeꞌ.

18Atoq xseqresan pe, ri chajinelaꞌ ma ndikil ta achike ndikibꞌen y ndikikꞌutulaꞌ razón chikiwech achike xbꞌanatej rikꞌin ri Pedro. 19Ri Herodes xuteq rukanoxik ri Pedro y roma ma xilitej ta, xukꞌat kichiꞌ ri chajinelaꞌ, y xuteq kikamisaxik. Ri Herodes xel e pa rochꞌulew Judea y xbꞌa qa pa tinamit Cesarea y chiriꞌ xbꞌekꞌojeꞌ qa.

Rukamik ri Herodes

20Chupan ri tiempo riꞌ, ri rey Herodes santienta royowal chake ri aj Tiro y ri aj Sidón, romariꞌ rejeꞌ xe jun ruwech kitzij kibꞌanun ngebꞌeqaqa chuwech, y xkiyaꞌ méra chare jun achi rubꞌiniꞌan Blasto, rusamajel ri rey Herodes, chin ndichꞌaꞌa pa ki-cuenta chare ri rey chin keriꞌ tikꞌis ri oyowal. Rejeꞌ keriꞌ ndikajoꞌ, chin ndiyoꞌox chik qꞌij chake chi ndikilaqꞌ pa rochꞌulew apeꞌ ndubꞌen reinar ri Herodes ri ndikꞌatzin chake chin ndikiqꞌasaj ri kikꞌaslen. 21Xuchaꞌ kꞌa jun qꞌij ri Herodes chin ndichꞌaꞌa chikiwech, y atoq xuqaqa ri qꞌij riꞌ, rukusan tzieq ri ndikikusaj ri reyes, xbꞌetzꞌuyeꞌ apeꞌ ndubꞌen reinar, y xchꞌaꞌa chikiwech ri wineq kimolon apu kiꞌ chiriꞌ. 22Ri wineq riꞌ ngesikꞌiyaj y ndikibꞌilaꞌ: Ri chꞌabꞌel ndiqakꞌaxaj, ma richin ta jun relik achi, xa ruchꞌabꞌel jun dios, ngechajeꞌ apu. 23Pa jumel ruwech jun ángel chin ri Ajaw xubꞌen chi xqaqa jun yabꞌil pa ruwiꞌ ri Herodes, y ri Herodes xkꞌux koma jut y jariꞌ xok chare chi xken. Jariꞌ ri castigo xyoꞌox chare, porque xrajoꞌ xujunumaj riꞌ rikꞌin ri Dios, roma utz xunaꞌ chi ri wineq xkibꞌij chi rijaꞌ jun dios.

24Pero ri rutzij ri Dios más bꞌaneq rutzijol chi nej chi naqaj, y más ekꞌiy ri ngetaqin+ richin.

25Y ri Bernabé y ri Saulo, atoq kijachon chik pa tinamit Jerusalén ri méra+ taqon e koma ri hermanos, kikꞌuan yan chik ri Juan ri ndibꞌix Marcos chare xetzolij pa tinamit Antioquía.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index