Search form

Hechos 14

Ri rutzijoxik rutzij ri Dios pa tinamit Iconio

1Ri Pablo y ri Bernabé xebꞌeqaqa pa tinamit Iconio, y junan xeꞌok apu pa sinagoga kichin ri israelitas. Chiriꞌ xkitzijoj ri rutzij ri Dios, y riꞌ xubꞌen chi santienta israelitas y ma israelitas ta xkitaqij ri Ajaw. 2Pero ri israelitas ri ma xkajoꞌ ta xkitaqij, xkiyaꞌ tzij pa kixikin ri ma israelitas ta,+ chin xeyakatej chikij ri kitaqin ri Ajaw. 3Romariꞌ ri Pablo y ri Bernabé xekꞌojeꞌ kꞌiy qꞌij chiriꞌ, y ma ndikixibꞌij ta kiꞌ ndikitzijoj ri favor ri nduyaꞌ ri Ajaw. Y ri Ajaw ndubꞌen chikiqꞌaꞌ chi ngebꞌanatej nimalej teq retal+ ruchuqꞌaꞌ y nimalej teq achike ri nixta jumbꞌey etzꞌeton, ri ngeqꞌalajrisan chi kin qetzij wi ri ndikitzijoj. 4Y ri wineq chin ri tinamit xjachatej kiwech, porque ekꞌo ri utz xkakꞌaxaj chare ri ngekibꞌilaꞌ ri israelitas ri ma xkajoꞌ ta xkitaqij, y ekꞌo ndikitaqij ri ngekibꞌilaꞌ ri apóstoles. 5Pero ri israelitas y ri ma israelitas ta ri ma kitaqin ta ri Ajaw, junan kikꞌin ri kꞌo uchuqꞌaꞌ pa kiqꞌaꞌ pa ruwiꞌ ri kitinamit, xkibꞌen ruwech chi ndikibꞌen itzel chake ri Pablo y ri Bernabé y ngekikꞌeq chi abꞌej.+ 6Atoq ri Pablo y ri Bernabé xkinabꞌej ri ndojowex chikij, xeꞌanimej y xebꞌa pa kaꞌiꞌ tinamit kibꞌiniꞌan Listra y Derbe chin ri rochꞌulew Licaonia, y pa teq lugares ekꞌo chikinaqaj ri tinamit riꞌ. 7Y chiriꞌ ndikitzijoj ri utzulej teq tzij chin kolotajik.

Ri wineq ndikikꞌeq chi abꞌej ri Pablo pa tinamit Listra

8Atoq ekꞌo pa tinamit Listra, tzꞌuyul jun achi ri ekamineq raqen ralaxibꞌen pe, ma nditiker ta ndibꞌiyin y ma jumbꞌey bꞌiyineq ta jubꞌaꞌ.+ 9Ri achi riꞌ xrakꞌaxaj ri ndajin chubꞌixik ri Pablo, y ri Pablo xuchꞌik ruwech chirij y xutzꞌet chi ri achi kin kuqul rukꞌuꞌx chi ndikꞌachojrisex.+ 10Romariꞌ ri Pablo rikꞌin kaw ruchꞌabꞌel xubꞌij chare: ¡Kayakatej y chaj kapeꞌeꞌ!

Ja atoq riꞌ ri achi pa jun tzokꞌ xpeꞌeꞌ pe y ndibꞌiyaj.+ 11Atoq ri santienta wineq xkitzꞌet ri xubꞌen ri Pablo, ngesikꞌiyaj pa kichꞌabꞌel Licaónica y ndikibꞌij: ¡Ekaꞌiꞌ dioses+ achel teq achiꞌaꞌ ri xetuqaqa qa chiqakajal! ngechajeꞌ.

12Y ri wineq xkibꞌij dios Zeus chare ri Bernabé, y chare ri Pablo xkibꞌij dios Hermes, porque ja ri Pablo ri ndichꞌaꞌa chake. 13Y saqil e chin ri tinamit Listra kꞌo ri achoch apeꞌ yoꞌon wi ri dios Zeus, y ri sacerdote ri ngerukamisaj chikap chin ngerusuj chuwech ri dios riꞌ, xerukꞌen pe wakx eruweqon pe kikꞌin coronas bꞌanun rikꞌin kontzꞌiꞌj y xebꞌeruyaꞌ chuchiꞌ ri portón chin ri tinamit. Ri sacerdote riꞌ achibꞌilan koma ri wineq, xrajoꞌ xerukamisaj ri wakx chin ta xuyaꞌ kiqꞌij ri Pablo y ri Bernabé. 14Pero atoq ri apóstoles Bernabé y Pablo xkakꞌaxaj ri ndikajoꞌ ndikibꞌen ri wineq, axteq xkinaꞌ chare, romariꞌ xkiretzelaꞌ qa ri kitziaq kikusan, y ngesikꞌiyaj xebꞌa chikikajal ri wineq chubꞌixik: 15Rix aj Listra, ma utz ta kelaꞌ ndibꞌen. Porque roj xa roj wineq achel rix, y ndiqatzijoj ri utzulej teq tzij chin kolotajik chiwa, chin ndiyaꞌ kan ri noꞌoj ri xa ma jun reqalen y ndiyaꞌ iwánima rikꞌin ri Kꞌaslik Dios ri bꞌanayon ri kaj y ri rochꞌulew y nojel ri ekꞌo chuwech, ri mar y nojel ri ekꞌo chupan. 16Ojer kan, ri Dios xuyaꞌ qꞌij+ chake ri jalajaj teq kiwech wineq chochꞌulew chi xkibꞌanalaꞌ ri achel xqaꞌ chikiwech chi xkibꞌen. 17Pero rijaꞌ ruqꞌalajrisan pe riꞌ+ chi kin utz runoꞌoj pa kiwiꞌ konojel, porque ja rijaꞌ ndibꞌanun chi ndiqaqa pe ri qatataꞌ,+ chi ndiwachin ri tikoꞌ, chi kꞌo ndikꞌux y chi ndikikot iwánima chuqaꞌ, xechajeꞌ.

18Pero maske ri Pablo y ri Bernabé keriꞌ xkibꞌij, kꞌarunaj xekiqꞌil ri wineq chin ma xekikamisaj ta ri wakx ri achoq ikꞌin xkajoꞌ xkiyaꞌ kiqꞌij.

19Pero jujun israelitas chin ri kaꞌiꞌ tinamit Antioquía y Iconio xebꞌeqaqa pa tinamit Listra y xkiyaꞌ tzij pa kixikin ri aj chiriꞌ chin xeyakatej chirij ri Pablo. Romariꞌ ri aj Listra xkikꞌeq chi abꞌej, y xkijororej e saqil chin ri tinamit, porque pa kitzij kamineq chik. 20Pero atoq ri kitaqin ri Ajaw xbꞌekimoloꞌ kiꞌ chirij ri Pablo, rijaꞌ xyakatej pe, xok chi apu pa tinamit, y chukan qꞌij xutzꞌen bꞌey junan rikꞌin ri Bernabé chin xebꞌa pa tinamit Derbe.

21Atoq xkitzijoj yan ri utzulej teq tzij chin kolotajik chiriꞌ, y atoq ekꞌiy chik kitaqin ri Cristo chin ndikinimaj, ri Pablo y ri Bernabé xetzolij pa tinamit Listra. Chiriꞌ xkitzꞌen chik bꞌey, xetzolij pa tinamit Iconio y kꞌateriꞌ xetzolij pa tinamit Antioquía ri kꞌo pa rochꞌulew Pisidia. 22Y pa kibꞌey, ngekipixabꞌaj ri kitaqin ri Ajaw, chi tikikuqubꞌaꞌ más kikꞌuꞌx rikꞌin, y ndikibꞌilaꞌ kan chuqaꞌ chi roj ri qataqin ri Jesucristo ndikꞌatzin chi rikꞌin ndiqaqꞌasaj jalajaj teq kꞌayew+ ngojok pa ru-reino ri Dios. 23Y nojel teq apeꞌ ri ekꞌo ri ndikimal kiꞌ pa rubꞌiꞌ ri Ajaw, ri Pablo y ri Bernabé ngekichaꞌ kan ri ngeꞌok ukꞌuey bꞌey+ chikiwech ri hermanos, y atoq kibꞌanun chik orar pa kiwiꞌ ri ukꞌuey bꞌey riꞌ y kibꞌanun chik ayunar, ngekijech kan pa ruqꞌaꞌ ri Ajaw ri kitaqin.

Ri Pablo y ri Bernabé ngetzolij pa tinamit Antioquía ri kꞌo pa rochꞌulew Siria

24Ri Pablo y ri Bernabé xeꞌeqꞌax pa rochꞌulew Pisidia y xebꞌeqaqa pa rochꞌulew Panfilia. 25Y atoq xkitzijoj yan ri utzulej teq tzij chin kolotajik pa tinamit Perge, xebꞌa qa pa tinamit Atalía. 26Chiriꞌ rejeꞌ, roma kikꞌison chik kan ri samaj ri xetaq chubꞌanik, xeꞌok e pa jun barco chin ngetzolij pa tinamit Antioquía, apeꞌ xejach e pa ruqꞌaꞌ ri Dios chi ja ta ri ru-favor xtukꞌuan kichin chubꞌanik ri samaj+ riꞌ. 27Atoq xebꞌeqaqa, xekimal ri hermanos ekꞌo chiriꞌ, y xkitzijoj ri samaj xubꞌen ri Dios chikiqꞌaꞌ, y xkitzijoj chuqaꞌ chi jajun chake ri ma israelitas ta, ri Dios ruyoꞌon qꞌij chi ngekolotej roma ndikitaqij rijaꞌ. 28Y ri Pablo y ri Bernabé kꞌiy qꞌij xekꞌojeꞌ pa tinamit Antioquía kikꞌin ri kitaqin ri Ajaw.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index