Search form

Hechos 17

Ri israelitas ngeyakatej chirij ri Pablo pa tinamit Tesalónica

1Atoq ri Pablo y ri Silas kitzꞌamon bꞌey, xeꞌeqꞌax pa tinamit Anfípolis y pa tinamit Apolonia, y xebꞌeqaqa pa tinamit Tesalónica apeꞌ kꞌo jun sinagoga kichin ri israelitas. 2Ri Pablo kin achel wi jumul ndubꞌen, xbꞌa pa sinagoga,+ y oxiꞌ uxlanibꞌel teq qꞌij xtzijon kikꞌin ri israelitas pa ruwiꞌ ri rutzij ri Dios. 3Ngerutijoj y nduyaꞌ rubꞌeyal chikiwech chi ri Jun xtaq pe roma ri Dios chukolik ri rutinamit, kin xkꞌatzin wi chi xken+ y xkꞌastej pe chikikajal ri animaꞌiꞌ. Y ri Pablo kereꞌ ndubꞌilaꞌ: Ri Jun xtaq pe roma ri Dios, ja ri Jesús ri nitzijoj riyin chiwa, ndichajeꞌ.

4Y jujun teq israelitas chin ri sinagoga xkitaqij, y xekachibꞌilaj ri Pablo y ri Silas. Keriꞌ chuqaꞌ ekꞌiy wineq aj Grecia ri ngeyoꞌon ruqꞌij ri Dios, y kꞌiy nimalej kiqꞌij ixoqiꞌ xkitaqij chuqaꞌ. 5Pero ri israelitas ri ma xkitaqij ta ri xubꞌij ri Pablo, xququt kánima chikij, y xekimal lutz teq wineq itzel kinoꞌoj, y ma xe ta riꞌ xkibꞌen, xa xekimal ekꞌiy wineq chuqaꞌ, chin xekiyek ri tinamit chikij ri Pablo y ri Silas. Ri israelitas riꞌ xeꞌok pa rachoch jun achi rubꞌiniꞌan Jasón chin xebꞌekikanoj pe ri Pablo y ri Silas, porque ndikajoꞌ ngekijech pa kiqꞌaꞌ ri wineq. 6Pero roma ma xekil ta, ja ri Jasón y jujun chik hermanos ekiqiriren xekikꞌuaj chikiwech ri achiꞌaꞌ kꞌo uchuqꞌaꞌ pa kiqꞌaꞌ pa ruwiꞌ ri tinamit, y chikiwech chꞌaqa chik aj Tesalónica ri kimolon apu kiꞌ chiriꞌ. Ri wineq ri eꞌukꞌuayon apu ri Jasón ngesikꞌiyaj chubꞌixik: Re wineq re kitaqin ri Jesús, jareꞌ ri ngesacho kinoꞌoj ri wineq+ nojel teq apeꞌ chochꞌulew, y wokami xetuqaqa pa qatinamit. 7Y ja re Jasón xkꞌamo apu kiwech pa rachoch, y konojel ri eꞌachel rejeꞌ ma ndikinimaj ta ri ndubꞌij ri ley ruyoꞌon ri César, porque ndikibꞌij chi kꞌo chik jun rey+ rubꞌiniꞌan Jesús. Keriꞌ ngesikꞌiyaj chubꞌixik.

8Y roma ri tzij ndikibꞌilaꞌ apu ri wineq ri xeꞌukꞌuan apu ri Jasón, kin xekiyek ri chꞌaqa chik wineq ri kimolon apu kiꞌ chiriꞌ y xekiyek chuqaꞌ ri achiꞌaꞌ kꞌo uchuqꞌaꞌ pa kiqꞌaꞌ pa ruwiꞌ ri tinamit. 9Pero atoq ri Jasón y ri chꞌaqa chik xkiyaꞌ ri méra chin ma xetzꞌapix pa cheꞌ, ri achiꞌaꞌ kꞌo uchuqꞌaꞌ pa kiqꞌaꞌ pa ruwiꞌ ri tinamit xekisoqꞌopij e.

Ri rutzijoxik rutzij ri Dios pa tinamit Berea

10Ri hermanos chupan ri jun tokoqꞌaꞌ riꞌ, xekiteq ri Pablo y ri Silas pa tinamit Berea. Atoq ekꞌo chik chiriꞌ, ri Pablo y ri Silas xeꞌok apu pa ki-sinagoga ri israelitas. 11Ri israelitas ri ekꞌo chiriꞌ, más yalan kinoꞌoj ke chikiwech ri israelitas ekꞌo pa tinamit Tesalónica, porque utz-utz xkikꞌen qa pa kánima ri tijonik nduyaꞌ ri Pablo, y qꞌij-qꞌij ndikitzꞌet rubꞌeyal ri rutzij ri Dios, chin ndiketamaj si qetzij ri ndubꞌij ri Pablo. 12Y roma keriꞌ ndikibꞌen, ekꞌiy chikikajal rejeꞌ xkitaqij ri Ajaw, y keriꞌ chuqaꞌ chikikajal ri ma israelitas ta ekꞌo nimalej kiqꞌij ixoqiꞌ y ekꞌiy achiꞌaꞌ xkitaqij ri Ajaw. 13Atoq ri israelitas chin ri tinamit Tesalónica xkakꞌaxaj chi pa tinamit Berea ri Pablo ndutzijoj ri rutzij ri Dios, xebꞌeqaqa pa tinamit Berea y xkiyaꞌ tzij pa kixikin santienta wineq chin xeyakatej+ chirij ri Pablo. 14Pero ri hermanos aj Berea ja paqiꞌ xkiteq ri Pablo chuchiꞌ ri mar, y ri Silas y ri Timoteo xekanej kan pa tinamit. 15Ri hermanos aj Berea ri kachibꞌilan e ri Pablo, hasta pa tinamit Atenas xkikꞌuaj wi. Y atoq ja ngetzolij pa kitinamit, ri Pablo xubꞌij e chake chi tikibꞌij chake ri Silas y ri Timoteo chi tekilaꞌ yan paqiꞌ, porque pa tinamit Atenas ngeroyobꞌej.

Ri Pablo ndichꞌaꞌa pa ruwiꞌ ri qetzij Dios pa tinamit Atenas

16Atoq ri Pablo eroyobꞌen ri Silas y ri Timoteo pa tinamit Atenas, tzꞌan ndibꞌison, porque ndutzꞌet chi ri tinamit nojneq kikꞌin tiox. 17Romariꞌ, ri Pablo ndok apu pa sinagoga y nditzijon pa ruwiꞌ ri rutzij ri Dios kikꞌin ri israelitas y kikꞌin ri ma israelitas ta ri ngeyoꞌon ruqꞌij ri Dios+ ri ndikimal kiꞌ chiriꞌ. Keriꞌ chuqaꞌ ndubꞌen qꞌij-qꞌij kikꞌin ri wineq ri ngebꞌeqaqa chi kꞌayibꞌel. 18Chiriꞌ pa tinamit Atenas ekꞌo kaꞌiꞌ bꞌotzaj wineq ndikikusaj aj rochꞌulew noꞌoj chin ngenojin, jun bꞌotzaj ndibꞌix epicúreos chake y ri jun chik bꞌotzaj ndibꞌix estoicos* chake. Rejeꞌ ngetzijon rikꞌin ri Pablo, y jujun chikikajal ndikibꞌij chirij: ¿Achike ndirajoꞌ ndubꞌij re jun achi reꞌ, ri xetal ndiwalal? ngechajeꞌ. Y jujun chik ndikibꞌilaꞌ: Achel xa jun yoꞌol kitzijol chꞌaqa chik dioses ri ma qetaman ta kiwech roj, ngechajeꞌ. Keriꞌ ndikibꞌij, porque ri Pablo ndutzijoj ri utzulej teq tzij chin kolotajik ri nduyaꞌ ri Jesús, y ndutzijoj chuqaꞌ chi ri animaꞌiꞌ ngekꞌastajbꞌex pe.+

19Y xkikꞌuaj ri Pablo pa Areópago,* y kereꞌ xkibꞌij chare: Roj ndiqajoꞌ ndiqetamaj más pa ruwiꞌ ri kꞌakꞌakꞌ teq tijonik+ ndayaꞌ. 20Porque ndiqakꞌaxaj jujun teq achike ndabꞌij ri ndisach qakꞌuꞌx chirij, y roj ndiqajoꞌ ndiqetamaj achike ndubꞌij tzij, xechajeꞌ.

21Keriꞌ xkibꞌij chare ri Pablo, porque konojel ri aj Atenas, y ri ma aj chiriꞌ ta ri kibꞌanun kachoch chiriꞌ, kin xe chirij ndikitzijoj o ndikakꞌaxaj jun kꞌakꞌakꞌ tijonik bꞌaneq kánima.

22Y ri Pablo xpeꞌeꞌ pa kinikꞌajal ri kimolon kiꞌ chiriꞌ pa Areópago, y xubꞌij: Nimalej iqꞌij achiꞌaꞌ aj Atenas, pa ruwiꞌ nojel ri nutzꞌeton pe pa itinamit, nuyoꞌon cuenta chare chi ndiqaꞌ chiwech ndiyaꞌ kiqꞌij nojel kiwech dioses. 23Porque atoq xineqꞌax y xintzꞌet apeꞌ ndiyaꞌ kiqꞌij ri i-dioses, xintzꞌet jun altar apeꞌ kereꞌ tzꞌibꞌan: Re altar reꞌ chin ri Dios ri ma qetaman ta ruwech. Keriꞌ ri xintzꞌet. Ri Dios riꞌ ri ndiyaꞌ ruqꞌij rix, maske ma iwetaman ta ruwech,+ jariꞌ ri niyaꞌ rutzijol chiwa wokami.

24Ja Dios riꞌ ri bꞌanayon ri rochꞌulew y nojel ri kꞌo chuwech, y roma ja rijaꞌ ri Rajaw ri kaj y ri rochꞌulew,+ ma ndubꞌen ta rachoch chare ri achoch ebꞌanun koma wineq+ chin ta ndikꞌojeꞌ chupan. 25Rijaꞌ ma ndikꞌatzin ta chi nditoꞌox koma wineq, porque rijaꞌ nditiker ndubꞌen nojel. Ja rijaꞌ ri ndiyoꞌon qakꞌaslen+ roj qonojel, ri kaqiqꞌ chin ngojuxlaꞌ, y nojel ri achike ndikꞌatzin chaqe.

26Rijaꞌ xubꞌen chi rikꞌin ri nabꞌey achi xtzꞌukutej pe ri jalajaj teq kiwech wineq, chin ngekꞌojeꞌ chuwech nojel ri rochꞌulew. Ja rijaꞌ jachayon chake ri janipeꞌ ulew kꞌo pa kiqꞌaꞌ,+ y ja rijaꞌ bꞌiyon janipeꞌ junaꞌ ngekꞌojeꞌ chuwech ri rochꞌulew. 27Keriꞌ xubꞌen ri Dios chake chin keriꞌ ndikikanoj rijaꞌ, y maske achel ngemaqeq pa qꞌequꞌ, kolopeꞌ ndikil. Porque ri Dios ma nej ta kꞌo qikꞌin chiqajununal.+ 28Porque ja ri Dios yoyon ri qakꞌaslen, ja rijaꞌ yoyon quchuqꞌaꞌ chin ngojtiker ngojselon, y roma rijaꞌ rojkꞌo chochꞌulew, achel kibꞌiꞌin jujun poetas chiꞌikajal rix atoq xkibꞌij: ¡Roj kin roj ralkꞌuaꞌl wi ri Dios! echayineq kan. 29Y si roj ralkꞌuaꞌl ri Dios, ma utz ta ndiqabꞌij Dios chare jun achike ri xa wineq ebꞌanayon,+ maske bꞌanun chare qꞌanapueq, saqipueq o abꞌej, y santienta nojibꞌel kusan chin xebꞌan. 30Ojer kan ri wineq xekiyalaꞌ kiqꞌij dioses, roma ma ketaman ta achike ri utz chin ndikiyaꞌ ruqꞌij, y ri Dios xukachꞌ kiwech. Pero wokami ndubꞌij chake konojel wineq nojel teq apeꞌ chi tikiyaꞌ kan ri mak y tikiyaꞌ kánima rikꞌin rijaꞌ. 31Porque rijaꞌ ruchaꞌon jun qꞌij chin nduqꞌet tzij pa kiwiꞌ ri wineq,+ chin nduyaꞌ rajel-rukꞌexel achel rukꞌulun ndiyoꞌox chake. Rijaꞌ ruchaꞌon ri Jesús chin ndubꞌen ri samaj riꞌ, y chin ndiqꞌalajin chiqawech chi qetzij ruchaꞌon, xukꞌastajbꞌaꞌ pe chikikajal ri animaꞌiꞌ,+ xchajeꞌ ri Pablo.

32Pero ri wineq atoq xkakꞌaxaj chi ri animaꞌiꞌ ngekꞌastajbꞌex pe, jujun xetzeꞌen qa chirij ri Pablo, y jujun chik ndikibꞌilaꞌ chare: Jun chik qꞌij ngatiqakꞌaxaj+ pa ruwiꞌ ri ngatajin chubꞌixik, xechajeꞌ chare.

33Y keriꞌ ri Pablo xel pe chikikajal. 34Pero ekꞌo jujun achiꞌaꞌ xkoqaj ri Pablo y xkitaqij ri Ajaw Jesús. Chikikajal ri xetaqin, kꞌo jun achi rubꞌiniꞌan Dionisio ri kꞌo chikikajal ri ngeqꞌaton tzij chiriꞌ pa Areópago, y jun ixaq rubꞌiniꞌan Dámaris y chꞌaqa chik.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index