Search form

Hechos 28

Ri Pablo pa rochꞌulew Malta

1Atoq xojkolotej yan e roj qonojel chupan ri yaꞌ, xqetamaj chi ri ulew apeꞌ rojkꞌo, jun rochꞌulew kꞌo pa mar rubꞌiniꞌan Malta.+ 2Ri aj chiriꞌ kin utz kinoꞌoj xkibꞌen chaqe, xkikꞌen apu qawech roj qonojel, xkibꞌax jun nim qꞌaqꞌ roma ndajin qatataꞌ y tzꞌan tew. 3Ja atoq riꞌ ri Pablo xbꞌerukꞌamaꞌ pe jun bꞌoraj xikꞌaꞌy y atoq ndajin chuyaꞌik qa pa qꞌaqꞌ, jun kumetz ri kꞌo chukajal ri xikꞌaꞌy roma xunaꞌ ri qꞌaqꞌ, xuchꞌik reyaj chirij ruqꞌaꞌ ri Pablo. 4Atoq ri aj chiriꞌ xkitzꞌet chi ri kumetz tzeqel chirij ruqꞌaꞌ ri Pablo, ndikibꞌilaꞌ chikiwech: Kin qetzij chi la achi laꞌ kamisanel, romariꞌ maske xukal pe riꞌ pa yaꞌ, wokami ma ndiyoꞌox ta qꞌij chare chi ndikꞌaseꞌ, porque ndikꞌatzin ndutaj ri mak erubꞌanun, ngechajeꞌ.

5Ri Pablo xutotaꞌ ri ruqꞌaꞌ chin xtzaq qa ri kumetz+ pa qꞌaqꞌ, y ma xsipaj ta pe ri ruqꞌaꞌ. 6Ri aj chiriꞌ koyobꞌen chi ri Pablo ndisipaj pe ri ruqꞌaꞌ o kꞌateꞌ ruwech ndiken qa, pero atoq layaj tikoyobꞌej y xkitzꞌet chi ri Pablo nixta jun achike xbꞌanatej rikꞌin, xsach kikꞌuꞌx, y xkijel ri ndikinojij chirij, y ndikibꞌilaꞌ chi ri Pablo jun dios.+

7Chunaqaj ri ulew apeꞌ xojbꞌeqaqa, kꞌo rulew ri achi más nim ruqꞌij chin ri rochꞌulew riꞌ. Ri achi riꞌ rubꞌiniꞌan Publio. Rijaꞌ utz rukꞌamik qawech xubꞌen y xuyaꞌ qa-posada oxiꞌ qꞌij. 8Ri rutataꞌ ri Publio, ndiyawej katzꞌal chochꞌat, y ri yabꞌil kꞌo chirij, ja ri kꞌaten y kikꞌ ndupamaj. Ri Pablo xok apu chutzꞌetik, xubꞌen orar, xuyaꞌ ruqꞌaꞌ pariꞌ ri ndiyawej y xukꞌachojrisaj. 9Atoq keriꞌ xbꞌanatej, konojel ri ngeyawej chupan ri rochꞌulew riꞌ xebꞌeqaqa rikꞌin ri Pablo y xekꞌachojrisex. 10Y jabꞌel kinoꞌoj xkibꞌen ri aj rochꞌulew Malta chaqe, xqꞌalajin chi kꞌo qeqalen chikiwech. Pa ruwiꞌ riꞌ, atoq ja ngojok e pa jun chik barco chin ngojbꞌa chik pariꞌ ri mar, xkiyaꞌ pe nojel ri ndikꞌatzin chaqe chin ri qabꞌey.

Ri Pablo ndeqaqa pa tinamit Roma

11Atoq xeqꞌax yan oxiꞌ ikꞌ qojkꞌojeꞌ pa rochꞌulew Malta, xojok e chupan jun barco chin ri tinamit Alejandría+ ri xuqꞌasaj ri tiempo chin kaqiqꞌ chiriꞌ, y xojbꞌa. Pa rutzaꞌ e ri barco kꞌo kachibꞌel kaꞌiꞌ ki-dioses ri aj Grecia. Ri dioses riꞌ, kibꞌiniꞌan Cástor y Pólux.* 12Y xojbꞌeqaqa pa jun tinamit rubꞌiniꞌan Siracusa, ri kꞌo chuchiꞌ mar, y chiriꞌ xojkꞌojeꞌ oxiꞌ qꞌij. 13Xojok chi e chupan ri barco y chunaqaj ulew roj bꞌaneq xojbꞌeqaqa pa tinamit Regio. Chukan qꞌij, pa sur pataneq jun kaqiqꞌ ri ndibꞌix xokomil chare ri xubꞌen chaqe chi pa kaꞌiꞌ qꞌij xojbꞌeqaqa pa tinamit Pozzuoli, apeꞌ xqayaꞌ kan ri barco. 14Chiriꞌ pa tinamit xeqil jujun hermanos ri xkibꞌij chaqe chi qojkꞌojeꞌ wuquꞌ qꞌij kikꞌin,+ y chiriꞌ xojkꞌojeꞌ, y kꞌateriꞌ xqatzꞌen bꞌey xojbꞌa pa tinamit Roma. 15Atoq ri hermanos aj Roma xkakꞌaxaj chi roj bꞌaneq apu pa bꞌey, xojukikꞌuluꞌ pa jun tinamit rubꞌiniꞌan Foro de Apio, y chꞌaqa hermanos xojukikꞌuluꞌ pa jun lugar rubꞌiniꞌan Oxiꞌ Tabernas. Atoq ri Pablo xerutzꞌet ri hermanos, xmatioxin chare ri Dios, y xkꞌojeꞌ pe ruchuqꞌaꞌ ránima. 16Atoq xojbꞌeqaqa pa tinamit Roma, xyoꞌox qꞌij chare ri Pablo chi tikꞌojeꞌ pa jun achoch ruyon, y xe jun soldado ndichajin richin.+

Ri Pablo ndichꞌaꞌa chake ri ruwinaqul israelitas pa tinamit Roma

17Ja oxiꞌ qꞌij tikꞌojeꞌ ri Pablo pa tinamit Roma, atoq xuteq koyoxik ri nimalej teq kiqꞌij achiꞌaꞌ israelitas ri ekꞌo chiriꞌ, y atoq kimolon kiꞌ, xubꞌij chake: Achiꞌaꞌ teq nuwinaqul, riyin ma jun itzel achike nubꞌanun chake ri qawinaqul israelitas, nixta jun achike nubꞌiꞌin chirij ri kikꞌutun kan ri ojer teq qatit-qamamaꞌ, pero pa tinamit Jerusalén, xijach pe pa kiqꞌaꞌ ri aj Roma. 18Rejeꞌ atoq xkikꞌat nuchiꞌ pa ruwiꞌ ri sujunik yoꞌon chuwij, ma jun mak xkil chuwij+ chin ta ngikamisex, y xkajoꞌ xinkisoqꞌopij. 19Pero roma ri israelitas ma xkajoꞌ ta chi xisoqꞌopix, riyin tinwojoꞌ mani, xinkꞌutuj chi ja ri rey César+ tiqꞌato tzij pa nuwiꞌ. Pero tiwetamaj kꞌa, chi riyin ma chin ta ngensujuj ri nuwinaqul keriꞌ xinkꞌutuj. 20Romariꞌ xixinwoyoj, chin ngixintzꞌet y ngichꞌaꞌa chiwa. Porque niwojoꞌ chi rix ndiwetamaj chi roma nutaqin chi kin ndibꞌanatej wi ri rusujun kan ri Dios chaqe roj israelitas, yin ximon rikꞌin cadenas, xchajeꞌ ri Pablo.

21Ja atoq riꞌ ri israelitas ri kimolon kiꞌ chiriꞌ kereꞌ xkibꞌij chare ri Pablo: Ma jun wuj taqon pe chaqe ri pataneq pa rochꞌulew Judea, ri ndichꞌaꞌa chawij y nixta jun qawinaqul rat rusujun waweꞌ, o rubꞌiꞌin chi kꞌo ta jun itzel achike abꞌanun. 22Pero ndiqajoꞌ ndiqakꞌaxaj ri ndanojij pa ruwiꞌ ri tijonik koqan ri ngeyoꞌon ruqꞌij ri Jesús, porque roj qetaman chi nojel apeꞌ ri wineq ngechꞌaꞌa itzel teq achike chirij ri tijonik riꞌ, xechajeꞌ chare ri Pablo.

23Y xkibꞌen ruwech achike qꞌij ndikimal kiꞌ, y atoq xuqaqa ri qꞌij riꞌ, ekꞌiy xebꞌeqaqa apeꞌ chajin ri Pablo, y xe kumaj y hasta xqaqꞌij na qa, ri Pablo ndichꞌaꞌa pa ruwiꞌ ri ru-reino ri Dios chikiwech, y ndutij ruqꞌij chin ndikikꞌoxomaj ri ndubꞌij ri rutzij ri Dios pa ruwiꞌ ri Jesús,+ ri tzꞌibꞌan kan chupan ri ley xyoꞌox chare ri Moisés y chupan ri kitzꞌibꞌan kan ri profetas ojer. 24Ekꞌo kꞌa ri xkitaqij ri xubꞌij ri Pablo, y ekꞌo ri ma xkitaqij ta.+ 25Y roma ma junan ta kitzij xkibꞌen pa ruwiꞌ ri ndubꞌij ri Pablo, xa ja ngeꞌel e chin ngebꞌa, pero nabꞌey ri Pablo xubꞌij e chake: Kin qetzij ri tzij xuyaꞌ ri Espíritu Santo chare ri profeta Isaías, chin xubꞌij chake ri ojer teq iwatit-imamaꞌ. Rijaꞌ xubꞌij:

26Kabꞌiyin, taꞌabꞌij kereꞌ chake re tinamit reꞌ:

Rix maske ndiwakꞌaxaj+ ri ndibꞌix, ma ndikꞌoxomaj ta.

Y maske nditzꞌet ri ndajin chiwech, ma ndeqꞌax ta rubꞌeyal chiwech ri nditzꞌet.

27Keriꞌ taꞌabꞌij, porque ri kánima re tinamit reꞌ abꞌej rubꞌanun.

Ma ndok ta pa kixikin ri ndibꞌix chake,

Kiyupun kiwech chin ma ngetzuꞌun ta,

Keriꞌ rubꞌanun kánima chin ma ndeqꞌax ta rubꞌeyal chikiwech ri ndikitzꞌet, nixta ndikikꞌoxomaj ri ndikakꞌaxaj,

Chin keriꞌ ma ngetaqin ta pa kánima,

Ma kꞌateꞌ xtikiyaꞌ kan ri mak y xtitzolij pe kánima wikꞌin,

Y riyin xtinchojmirisaj ri kikꞌaslen,+

ndichajeꞌ ri Espíritu Santo.

28Y roma ikowirisan iwánima achel xkikowirisaj kánima ri qatit-qamamaꞌ ojer, wokami chake ri ma israelitas ta+ ndiyoꞌox rutzijol ri utzulej teq tzij chin kolotajik ri ndusuj ri Dios, y rejeꞌ kin xtikitaqij y xtikinimaj.

29Y atoq xubꞌij ri Pablo keriꞌ, ri israelitas xebꞌa, y santienta ndikichuquchaꞌ kiꞌ chi tzij chikiwech.*

30Ri Pablo kaꞌiꞌ junaꞌ xkꞌojeꞌ chupan ri achoch ruqajon, y chiriꞌ ndukꞌen apu kiwech konojel ri ngebꞌeqaqa rikꞌin. 31Y rijaꞌ ndutzijoj chake ri achike rubꞌeyal chin ngeꞌok ri wineq pa ru-reino ri Dios,+ y ngerutijoj pa ruwiꞌ ri Ajaw Jesús ri taqon pe roma ri Dios chukolik ri rutinamit. Y nixta jun ndiqꞌato richin ri Pablo chi keriꞌ ndubꞌen.+

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index