Search form

Hechos 3

Ri Pedro ndukꞌachojrisaj jun achi ekamineq raqen ralaxibꞌen pe

1Pa rox hora chin jun tiqaqꞌij, ri Pedro y ri Juan ebꞌaneq e pa rachoch ri Dios chin ndekibꞌanaꞌ orar, porque ja hora riꞌ ndikibꞌen orar+ ri israelitas. 2Chuchiꞌ jun puerta rubꞌiniꞌan Jabꞌel Qꞌusqꞌuj chin ri rachoch ri Dios, qꞌij-qꞌij ndeyoꞌox kan jun achi. Ri achi riꞌ ekamineq raqen ralaxibꞌen pe, y ndukꞌutuj limosna+ chake ri ngeꞌok apu chiriꞌ. 3Atoq ri achi xerutzꞌet ri Pedro y ri Juan chi ja ngeꞌok apu pa rachoch ri Dios, xukꞌutuj limosna chake. 4Ri Pedro y ri Juan xkichꞌik kiwech chirij ri achi, y ri Pedro xubꞌij chare: Qojatzꞌetaꞌ.

5Ja atoq riꞌ ri achi xerutzutzaꞌ pe, royobꞌen chi ndikiyaꞌ kan jubꞌaꞌ ru-limosna. 6Pero ri Pedro xubꞌij chare: Riyin maneq qꞌanapueq nixta saqipueq wikꞌin, pero ri yoꞌon chuwa nisipaj+ chawa. Pa rubꞌiꞌ ri Jesucristo aj Nazaret, kayakatej y kabꞌiyaj.

7Y ri Pedro xutzꞌen ri rikiqꞌaꞌ ruqꞌaꞌ ri achi y xuyek, y ja atoq riꞌ xkꞌojeꞌ pe kuchuqꞌaꞌ ri raqen y ri ruqul teq raqen ri achi. 8Y pa jun tzokꞌ xpeꞌeꞌ pe, y ja xutzꞌuk ndibꞌiyaj,+ y keriꞌ ndibꞌiyaj, ndiropiyaj,+ nduyalaꞌ ruqꞌij ri Dios, xok apu pa rachoch ri Dios chikij ri Pedro y ri Juan. 9Konojel ri wineq ri ekꞌo apu chiriꞌ xkitzꞌet ndibꞌiyaj y nduyalaꞌ ruqꞌij ri Dios. 10Y xketamaj ruwech chi ja rijaꞌ ri achi ri nditzꞌuyeꞌ chukꞌutuxik ru-limosna chuchiꞌ rachoch ri Dios chunaqaj ri puerta Jabꞌel Qꞌusqꞌuj ndibꞌix chare. Y ri wineq santienta xsach kikꞌuꞌx y kixibꞌin kiꞌ roma ri xbꞌanatej rikꞌin ri achi riꞌ.

Ri Pedro ndichꞌaꞌa chake ri wineq pa jun chijay chin rachoch ri Dios

11Ri achi ri xkꞌachojrisex ma ngerusoqꞌopij ta ri Pedro y ri Juan, y konojel ri wineq sachineq kikꞌuꞌx xbꞌekimoloꞌ kiꞌ kikꞌin pa jun chijay chin ri rachoch ri Dios, chijay ri ndibꞌix Chin Salomón+ chare. 12Y atoq ri Pedro xerutzꞌet ri wineq, kereꞌ xubꞌij chake: Achiꞌaꞌ teq israelitas, ¿achike roma ndisach ikꞌuꞌx rikꞌin re xbꞌanatej? Ma qojitzꞌet chi nim qaqꞌij, porque ma roma ta quchuqꞌaꞌ roj y ma roma ta roj utz chuwech ri Dios, ma roma ta riꞌ+ xkꞌachaj re achi reꞌ. 13Ri Dios ri xkiyaꞌ ruqꞌij ri Abraham, ri Isaac, ri Jacob, y ri ojer teq qatit-qamamaꞌ,+ jariꞌ ri xbꞌanun chi ri Loqꞌolej rusamajel Jesús xkꞌojeꞌ chik nimalej ruqꞌij.+ Ja Jesús riꞌ ri xijech rix pa ruqꞌaꞌ ri Pilato chin xkamisex. Y xibꞌij chuwech ri Pilato chi ma xiwojoꞌ ta chi ri Jesús ndubꞌen reinar pa iwiꞌ, maske ri Pilato rubꞌiꞌin chik chi ndusoqꞌopij e. 14Pero rix ma xiwojoꞌ ta chi xsoqꞌopix e ri Jun ri kin loqꞌolej+ y chojmilej rukꞌaslen. Pa rukꞌexel riꞌ, xa xikꞌutuj chi xsoqꞌopix e+ jun kamisanel achi. 15Rix xikamisaj ri Jun yoꞌon pa ruqꞌaꞌ chin nduyaꞌ ri kꞌaslen ma ndikꞌis ta, pero ri Dios xukꞌastajbꞌaꞌ pe chikikajal ri animaꞌiꞌ.+ Y roj ndiqabꞌij chi qetzij xqatzꞌet chi keriꞌ xbꞌanatej. 16Ri xbꞌanun chi re achi reꞌ xkꞌachaj y xkꞌojeꞌ pe ruchuqꞌaꞌ, ja chi qakuqubꞌan kakꞌuꞌx+ rikꞌin ri Jesús. Y roma keriꞌ, kin xkꞌachaj wi chin jumul ri raqen, achel nditzꞌet rix.

17Nuwinaqul israelitas, riyin wetaman chi rix y ri eꞌukꞌuey bꞌey chin ri qatinamit xikꞌutuj rukamik ri Jesús,+ pero keriꞌ xibꞌen roma ma iwetaman ta chi ja rijaꞌ ri xtaq pe roma ri Dios chukolik ri rutinamit. 18Pero rikꞌin ri xuqꞌasaj ri Jesús pa rukꞌaslen, ri Dios xubꞌen ri ruqꞌalajrisan kan pa kichiꞌ konojel ri profetas ojer, ri kibꞌiꞌin kan chi ri Jun nditaq pe chukolik ri rutinamit ri Dios kin xtuqꞌasaj wi kꞌayew.+ 19Romariꞌ, tiyaꞌ chiwij chi ma utz ta ri xibꞌen, titzolij pe iwánima rikꞌin ri Dios y titaqij+ ri Jesús, chin ndikuyutej ri imak. 20Chin keriꞌ ri Ajaw nduteq pe pa iwiꞌ jabꞌel teq qꞌij chin ndikꞌases ri iwánima, y nduteq chi pe jumbꞌey ri Jesús+ ri ruchaꞌon chukolik ri rutinamit. 21Pero ndikꞌatzin chi ri Jesús ndikꞌojeꞌ chikaj,+ kꞌa tuqaqa na ri tiempo atoq ndibꞌan kꞌakꞌakꞌ chare nojel, achel xuqꞌalajrisaj ri Dios ojer kan chake ri loqꞌolej teq profetas chin xkibꞌij. 22Porque ri Moisés kereꞌ xubꞌij kan chake ri ojer teq qatit-qamamaꞌ: Ri Iwajaw Dios nduyek pe jun profeta chiꞌikajal achel xiruyek yin.+ Y rix ndikꞌatzin chi ndinimaj nojel ri xtubꞌij chiwa. 23Y achike na jun ri ma xtunimaj ta rutzij ri profeta riꞌ, kin ndelesex e chikikajal ri rutinamit ri Dios y ndikamisex.+ Keriꞌ rubꞌiꞌin kan ri Moisés.

24Keriꞌ chuqaꞌ konojel ri profetas ri kiqꞌalajrisan pe ri rutzij ri Dios xe jampeꞌ pa ru-tiempo ri Samuel hasta re tiempo rojkꞌo, echꞌoyineq pe pa kiwiꞌ teq re qꞌij reꞌ. 25Kin iwichin rix ri rusujun kan ri Dios chupan ri rutzij ri kitzꞌibꞌan kan ri profetas ojer, y chuqaꞌ iwichin rix ri pacto* ri ruyoꞌon kan ri Dios chake ri ojer teq qatit-qamamaꞌ atoq kereꞌ xubꞌij chare ri Abraham: Roma jun awiy-amam ri ndekꞌojeꞌ más chawech apu, ndiqaqa ri favor+ niyaꞌ riyin pa kiwiꞌ konojel kiwech wineq chochꞌulew. Keriꞌ xubꞌij ri Dios. 26Y atoq ri Dios xukꞌastajbꞌaꞌ pe ri Rukꞌajol chikikajal ri animaꞌiꞌ, nabꞌey xuteq pe iwikꞌin rix chin xuyaꞌ ru-favor pa iwiꞌ, chin ngixrutoꞌ chin ndiyaꞌ kan ri itzel teq achike ri ngixtajin rikꞌin.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index