Search form

Efesios 4

Ri Cristo ndirajoꞌ chi ri kitaqin rijaꞌ, xe jun kánima ndikibꞌen

1Riyin Pablo, yin tzꞌapel pa cheꞌ roma nibꞌen rusamaj ri Ajaw. Ngixinpixabꞌaj chi tikꞌuaj jun chojmilej kꞌaslen achel rukꞌulun chi ndikꞌuaj chuwech ri xoyon iwichin. 2Tiqasaj iwiꞌ, utz inoꞌoj tibꞌanaꞌ chake ri wineq, ma tikꞌo ikꞌuꞌx chupan ri ndiqꞌasaj, rikꞌin ajowabꞌel tikochꞌoꞌ iwiꞌ chiwech,+ 3titijaꞌ iqꞌij chi jumul xe jun iwánima ndibꞌen chiwech roma rix ukꞌuan roma ri Espíritu Santo, porque riꞌ ndubꞌen chiwa chi ndikꞌojeꞌ uxlanen chiꞌikajal. 4Roj ri qataqin ri Cristo xe jun cuerpo roj okuneq rikꞌin,+ y xe jun Espíritu kꞌo pa qánima. Y qonojel ri roj oyon roma ri Dios, kin junan ruwech favor qoyobꞌen chi nduyaꞌ chaqe. 5Xe jun ri Qajaw, xe jun rubꞌeyal ri utzulej teq tzij qataqin, y xe jun ri bautismo. 6Xe jun Dios kꞌo y ja rijaꞌ ri Qatataꞌ roj qonojel ri qataqin rijaꞌ, kꞌo pa qawiꞌ roj qonojel, ngojrukusaj qonojel chin ndiqabꞌen ri rusamaj y kꞌo chuqaꞌ pa qánima.

7Pero chiqajununal ri Cristo xuyaꞌ ri ru-favor pa qawiꞌ, achel xrajoꞌ xuyaꞌ rijaꞌ chin ndiqabꞌen ri rusamaj rikꞌin ri loqꞌolej teq sipanik ruyoꞌon chaqe. 8Romariꞌ, chupan ri rutzij ri Dios tzꞌibꞌan kan, kereꞌ ndubꞌij:

Xeruyaꞌ chuxeꞌ rutzij ri xerelesaj chuxeꞌ rutzij ri itzel, y xerukꞌuaj atoq xtzolij e chikaj,

Y xuyaꞌ loqꞌolej teq sipanik chake ri erutinamit.+

Keriꞌ tzꞌibꞌan kan.

9Y atoq ndubꞌij ri rutzij ri Dios chi ri Cristo xtzolij e chikaj, riꞌ ndubꞌij tzij chi nabꞌey xuqaqa chochꞌulew y xqaqa qa chupan ri lugares más nej qa chin ri rochꞌulew.+ 10Y ri Jun ri xqaqa qa, jariꞌ ri xtzolij e chin xbꞌekꞌojeꞌ pa kiwiꞌ nojel teq ri kaj, y keriꞌ nojel apeꞌ kꞌo wi. 11Y ja rijaꞌ xyoꞌon loqꞌolej teq sipanik chake ri rutinamit. Chake jujun xuyaꞌ chi xeꞌok apóstoles, chake jujun chik xuyaꞌ chi ndikiqꞌalajrisaj ri ndubꞌij pe ri Dios pa kánima, chake jujun chik xuyaꞌ chi ndikitzijoj ri utzulej teq tzij chin kolotajik, y chake chꞌaqa chik xuyaꞌ chi xeꞌok ukꞌuey kibꞌey y chuqaꞌ kitijonelaꞌ ri hermanos. 12Rijaꞌ xeruyaꞌ re samajelaꞌ reꞌ chin ngekitijoj ri loqꞌolej rutinamit ri Dios, chin keriꞌ ri tinamit riꞌ ndikibꞌen chuqaꞌ ri rusamaj, y keriꞌ ngekꞌiy ebꞌaneq pa kikꞌaslen chuwech ri Dios konojel ri ruwachinel ruqꞌa-raqen ri Cristo. 13Y ja samaj riꞌ jumul ndikibꞌen ri rusamajelaꞌ ri Dios hasta kꞌa xe na jun qánima ndeqabꞌanaꞌ roj qonojel roma kuqul qakꞌuꞌx rikꞌin ri Rukꞌajol ri Dios, y utz-utz ndiqetamaj runoꞌoj, y keriꞌ ri qakꞌaslen ndok achel rukꞌaslen ri Cristo ri kin tzꞌaqet wi.+ 14Chin keriꞌ, ma roj chi ta achel ri ma ekꞌiyineq ta pa kikꞌaslen chiraqen ri Dios. Porque rejeꞌ xa achike na ndikitaqij, y ngeꞌukꞌuꞌex roma jalajaj teq tijonik ri ma eqetzij ta ri ngekiyaꞌ achiꞌaꞌ ri kin ketaman ndikikanoj rubꞌeyal chin ngechꞌakatin. 15Pa rukꞌexel riꞌ, ndikꞌatzin ndiqoqaj ri qetzij y ndiqajoꞌ qiꞌ chiqawech, y keriꞌ ngojkꞌiy pa qakꞌaslen chin ndubꞌen qa qanoꞌoj achel runoꞌoj ri Cristo, ri okuneq ukꞌuey qabꞌey. 16Ja rijaꞌ ndibꞌanun chi qonojel ri roj ruwachinel ruqꞌa-raqen ndiqatoꞌ qiꞌ chin ndiqil qakꞌiyilen roj qonojel. Achel ndibꞌanatej pa ru-cuerpo jun wineq, nojel rubꞌochꞌil kiyuqen kiꞌ ndikitoꞌ kiꞌ. Keriꞌ chuqaꞌ ndibꞌanatej qikꞌin roj. Atoq ndiqajoꞌ qiꞌ, ndiqabꞌen ri samaj yoꞌon chaqe chupan ri ru-cuerpo ri Cristo, y qayuqen qiꞌ ngojkꞌiy y ndikꞌojeꞌ pe quchuqꞌaꞌ.

Tiqakꞌuaj jun kꞌakꞌakꞌ kꞌaslen roma xe jun qabꞌanun rikꞌin ri Cristo

17Wokami pa rubꞌiꞌ ri Ajaw nichilabꞌej chiwa chi ma tikꞌuaj chik jun kꞌaslen achel kikꞌaslen ri wineq ma ngeniman ta chuwech ri Dios, porque ri wineq riꞌ, kikꞌuan jun kꞌaslen ri pa kiwech rejeꞌ kin utz, pero xa esachineq rikꞌin ri keriꞌ ndikinojij. 18Ri wineq riꞌ xqꞌeqꞌumer qa kinojibꞌal, maneq kiqꞌaꞌ chare ri kꞌaslen nduyaꞌ ri Dios, porque ma ndikajoꞌ ta ndiketamaj ri qetzij, roma kikowirisan ri kánima. 19Rejeꞌ ma jun chik kꞌix ndikinaꞌ rikꞌin ri itzel ngetajiyaj rikꞌin, xa kijachon kiꞌ pa ruqꞌaꞌ ri itzel teq rayinik, ma ndikiqꞌet ta kiꞌ ngekibꞌanalaꞌ nojel ruwech mak ri ndukꞌen pe kꞌix. 20Pero ri itzel kꞌaslen riꞌ ma junan ta rikꞌin ri tijonik xkꞌut kan chiwech pa ruwiꞌ ri chojmilej rukꞌaslen ri Cristo. 21Porque rix kin xiwakꞌaxaj ri tijonik pa ruwiꞌ ri Jesús, y xiwetamaj achike ruchojmil ri kꞌaslen ndirajoꞌ rijaꞌ chi ndikꞌuaj,+ kꞌaslen ri kin rukꞌuan riꞌ rikꞌin ri qetzij rukꞌutun kan, 22romariꞌ ndikꞌatzin ndiyaꞌ kan rukꞌuaxik ri kꞌaslen xikꞌuaj pa nabꞌey,+ kꞌaslen ri ndikꞌis ruqꞌij bꞌaneq, porque ukꞌuan roma ri itzel teq rayinik ri ngixruchꞌakatij. 23Rix xixtijox chuqaꞌ chi ndikꞌatzin ndiyaꞌ qꞌij chare ri Espíritu Santo chin nduyaꞌ jun kꞌakꞌakꞌ nojibꞌel chiwa chin ndijalatej ri ikꞌaslen,+ y keriꞌ pa ruchojmil ngixnojin pa ruwiꞌ nojel. 24Y xixtijox chi ndikꞌatzin ndiweq iwiꞌ rikꞌin ri kꞌakꞌakꞌ kꞌaslen nduyaꞌ ri Dios,+ kꞌaslen ri kin loqꞌolej y chojmilej achel ri rukꞌaslen rijaꞌ, porque ukꞌuan roma ri qetzij.

Tichajij iwiꞌ chin ma kixtzaq chupan jun itzel kꞌaslen

25Romariꞌ, ma kixreqꞌon chik, xa kin ja ri qetzij tibꞌilaꞌ chiwech,+ porque roj ri qataqin ri Cristo, roj ruwachinel ruqꞌa-raqen rijaꞌ.

26Atoq kꞌo jun roma ndiyakatej iwoyowal, ma tiyaꞌ qꞌij chi ngixtzaq pa mak,+ y ma tiyaꞌ qꞌij chi ri oyowal ndikꞌojeꞌ jun qꞌij entéra pa iwánima. 27Ma tiyaꞌ qꞌij chare ri itzel chin ngixrutaqchiꞌij chin ngixqaqa pa ruqꞌaꞌ.+

28Si kꞌo jun xeleqꞌan jumbꞌey kan, ma teleqꞌ chik, más utz tisamej rikꞌin ruqꞌaꞌ chuchꞌakik ruméra, chin keriꞌ kꞌo achike ruchajin chin ngerutoꞌ ri ndikꞌatzin kitoꞌik.+

29Ma tibꞌij itzel teq tzij, xa kin xe utzulej teq tzij ri ndukꞌen pe kꞌiyilen chake chꞌaqa chik.+ Tibꞌij tzij ri kin rukꞌulun chi ndibꞌij ri ndukꞌen pe ru-favor ri Dios pa kikꞌaslen ri ngeꞌakꞌaxan iwichin. 30Y ma tibꞌen chare ri Espíritu Santo chin ri Dios chi ndibꞌison qa, porque ja ri Espíritu riꞌ, ri etal ruyoꞌon ri Dios pa iwánima chi atoq nduqaqa chik ri Cristo, kin xkixkolotej wi e.+

31Tiwelesaj e nojel kꞌayilej teq noꞌoj pa iwánima, nojel oyowal, ri ndikꞌuxkꞌut iwánima, ri ndireq ichiꞌ roma iwoyowal, ri chaponik, y nojel itzel teq achike ri ndalex pe pa iwánima chikij chꞌaqa chik. 32Pa rukꞌexel riꞌ, utz inoꞌoj tibꞌanaꞌ chiwech, kixpoqonan y tikuyuꞌ imak chiwech, achel ri Dios rix rukuyun roma xe jun ibꞌanun rikꞌin ri Cristo.+

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index