Search form

Efesios 5

1Romariꞌ, rix ri rix ralkꞌuaꞌl chik ri Dios y tzꞌan ngixrajoꞌ, tiwoqaj ri utzulej runoꞌoj rijaꞌ. 2Tikꞌuaj jun kꞌaslen ri ndukꞌut chi ndiwojoꞌ iwiꞌ chiwech, kin achel xojrajoꞌ ri Cristo+ y xusuj riꞌ pa kamik chuwech ri Dios pa qakꞌexel, y keriꞌ xok jun ofrenda jubꞌubꞌ ruxlaꞌ ri kin xqaꞌ chuwech ri Dios.

3Pero ri mak ri ngekibꞌanalaꞌ ri wineq ri ndikikꞌamalaꞌ qa kiꞌ xa achoq na ikꞌin, o ndikichꞌabꞌaqrisaj kikꞌaslen, o ngejamem chirij méra, nojel mak achel reꞌ ma utz ta nixta ndibꞌan rutzijol chiꞌikajal rix ri loqꞌolej rutinamit ri Dios. 4Ma tibꞌilaꞌ chuqaꞌ mal teq tzij, ma tibꞌilaꞌ tzij ri ma jun rubꞌeyal y chuqaꞌ ma tibꞌilaꞌ etzꞌanin teq tzij ri ma eꞌutz ta, porque tzij achel riꞌ ma rukꞌulun ta chi ngeꞌibꞌilaꞌ. Pa rukꞌexel riꞌ, ja ri tzij ndukꞌen pe matioxinik chare ri Dios tibꞌilaꞌ. 5Porque rix iwetaman chi pa ru-reino ri Cristo y ri Dios, ma ngeꞌok ta ri ndikikꞌamalaꞌ qa kiꞌ xa achoq na ikꞌin chin ndikibꞌen mak, nixta ri ndikibꞌanalaꞌ itzel teq achike ri nduchꞌabꞌaqrisaj ri kikꞌaslen, nixta ri ngejamem chirij méra, porque ri ngajamem chirij méra xa achel ndayaꞌ kiqꞌij tiox keriꞌ.

Tiqꞌalajin chi ja ri Cristo ndiyikꞌan ri ikꞌaslen

6Ma jun tiqasan ijolon rikꞌin teq tzij ri ma jun utz ndukꞌen pe, ri ndubꞌij chi ma jun ndubꞌen maske ndabꞌen mak achel ri xinbꞌij yan pe chiwa, porque roma mak achel riꞌ, ndiqaqa royowal ri Dios pa kiwiꞌ ri ma ngeniman ta. 7Rix ma jun titzeq iwiꞌ kikꞌin ri ngebꞌanun keriꞌ.

8Jumbꞌey kan, pa qꞌequꞌ xkꞌojeꞌ ri ikꞌaslen, pero wokami roma xe jun ibꞌanun rikꞌin ri Ajaw, ri ikꞌaslen kꞌo pa luz, romariꞌ tikꞌuaj ri ikꞌaslen achel kikꞌaslen ri ekꞌo pa luz.+ 9Porque jun ri kꞌo pa luz, kin kereꞌ ndiqꞌalajin pa rukꞌaslen: Utz ndubꞌen chake chꞌaqa chik, kin rukꞌuan jun chojmilej kꞌaslen, y ja ri qetzij roqan.+ 10Titijaꞌ iqꞌij chin ndiwetamaj utz-utz achike ri ndiqaꞌ chuwech ri Ajaw chi ndibꞌen.+ 11Ma titzeq iwiꞌ chupan ri itzel teq achike ngekibꞌanalaꞌ ri wineq ri pa qꞌequꞌ kꞌo kikꞌaslen,+ porque ri ngekibꞌanalaꞌ ma jun utz ndukꞌen pe. Xa kin titijaꞌ iqꞌij chin ndiqꞌalajrisaj chikiwech chi ma utz ta ri ngetajin rikꞌin. 12Porque ri ndikibꞌen rejeꞌ chilaqꞌel, hasta kꞌixbꞌel palej ndukꞌen pe si xtatzijoj ta chake chꞌaqa. 13Pero atoq ri luz nduqꞌalajrisaj ri ndikibꞌen rejeꞌ, ndikikꞌoxomaj chi mak ri ngetajin rikꞌin. 14Y keriꞌ kꞌo cheꞌel ndikiyaꞌ kan ri mak ngekibꞌanalaꞌ chin ngeꞌok ralkꞌuaꞌl ri Dios ri kin luz wi. Romariꞌ kereꞌ ndibꞌix:

Kakꞌastej rat ri ngawer;

Kayakatej pe chikikajal ri ekamineq pa mak,

Y ri Cristo nduyikꞌaj ri akꞌaslen.

Keriꞌ ri ndibꞌix.

15Romariꞌ, titzꞌetaꞌ utz-utz ri ndibꞌanalaꞌ pa ikꞌaslen. Ma tibꞌen achel ndikibꞌen ri wineq ri xetal ngetajiyaj rikꞌin, xa kin tikusaj ri utzulej inojibꞌal chin ndibꞌen nojel. 16Utz rukusaxik tibꞌanaꞌ ri tiempo,+ porque ri tiempo rojkꞌo wokami, santienta itzel teq achike ngebꞌanaloꞌox. 17Romariꞌ, ma tibꞌen achel ndikibꞌen wineq ri xetal ngetajiyaj, xa kin titijaꞌ iqꞌij tiwetamaj achike ndirajoꞌ ri Ajaw chi ndibꞌen.+ 18Ma tiqꞌabꞌarisaj iwiꞌ, porque riꞌ ndubꞌen chiwa chi ma ngixtiker ta ndiqꞌet iwiꞌ chuwech ri itzel teq achike.+ Pa rukꞌexel riꞌ, tiyaꞌ qꞌij chare ri Espíritu Santo chi ndunojisaj ri iwánima, 19chin keriꞌ atoq ndimal iwiꞌ pa rubꞌiꞌ ri Ajaw, ndiyalaꞌ ruchuqꞌaꞌ iwánima chiwech rikꞌin salmos, himnos y chꞌaqa chik bꞌix ri nduyaꞌ ri Espíritu Santo pa iwánima. Kixbꞌixan y tiyaꞌ ruqꞌij ri Ajaw rikꞌin nojel iwánima.+ 20Y jumul timatioxij nojel chare ri Tataꞌaj Dios pa rubꞌiꞌ ri Qajaw Jesucristo.

Ri ndikꞌatzin ndikibꞌen ri eralkꞌuaꞌl ri Dios

21Tinimaj iwiꞌ chiwech, roma kin kꞌo ruqꞌij ri Cristo pa iwech. 22Ri ixaq tunimaj rutzij ri rachijil,+ porque atoq keriꞌ ndubꞌen, ndiniman chuqaꞌ chuwech ri Ajaw. 23Porque ja ri achi ukꞌuey bꞌey richin ri rixjayil, achel ri Cristo ukꞌuey bꞌey kichin konojel ri eralkꞌuaꞌl ri Dios.+ Ja ri Cristo ri kikolonel y rejeꞌ eꞌokuneq ruwachinel ruqꞌa-raqen. 24Y achel ri eralkꞌuaꞌl ri Dios ngeniman chuwech ri Cristo, keriꞌ chuqaꞌ ri ixaq rikꞌin nojel ri ndubꞌen pa rukꞌaslen, ndikꞌatzin ndunimaj rutzij ri rachijil.

25Rat achi, tabꞌanaꞌ chare ránima ri awixjayil chi tunaꞌ chi qetzij ndawojoꞌ,+ achel ri Cristo xojrajoꞌ roj ri ralkꞌuaꞌl ri Dios y xuyaꞌ ri rukꞌaslen pa qakꞌexel. 26Y achel ndikusex ri yaꞌ chin ndibꞌan chꞌajchꞌaj chare jun achike, ri Cristo ja ri rutzij ri Dios xukusaj chin xuchꞌajchꞌojrisaj ri qakꞌaslen, chin keriꞌ xubꞌen loqꞌolej chaqe, 27chin keriꞌ roj ri roj ralkꞌuaꞌl ri Dios, kin ndiyikꞌilan ri qakꞌaslen atoq ngojurukꞌamaꞌ ri Cristo chin ndukꞌen apu qawech, y man ta tzꞌil, nixta yuchuyik rubꞌanun ri qakꞌaslen, nixta kꞌo jun achike ri ma chꞌajchꞌaj ta ndilitej chiqij. Porque rijaꞌ ndirajoꞌ chi roj loqꞌolej y chꞌajchꞌaj ngojbꞌeqaqa chuwech.+ 28Y kin achel ri Cristo tzꞌan ngojrajoꞌ, keriꞌ chuqaꞌ ndikꞌatzin ndubꞌen ri achi chare ri rixjayil. Ndikꞌatzin ndirajoꞌ y ndubꞌen cuenta ri rixjayil achel ndubꞌen cuenta ri ru-cuerpo rijaꞌ roma ndirajoꞌ riꞌ. Ri ndirajoꞌ ri rixjayil, ndirajoꞌ riꞌ rijaꞌ. 29Porque nixta jun wineq itzel ndutzꞌet ri ru-cuerpo, xa kin jabꞌel ndirilij y ndubꞌen cuenta. Keriꞌ chuqaꞌ ndubꞌen ri Cristo chaqe roj, ri roj rutinamit ri Dios. 30Porque roj qonojel ri qataqin ri Cristo, roj okuneq ruwachinel ruqꞌa-raqen rijaꞌ.+ 31Romariꞌ, ri rutzij ri Dios ndubꞌij chi ri kꞌajol nduyaꞌ kan rute-rutataꞌ chin ndikikꞌen qa kiꞌ rikꞌin ri rixjayil y chi ekaꞌiꞌ xe jun ndikibꞌen.+ 32Re jun tzij reꞌ nimalej reqalen y ma qꞌalej ta nojel rubꞌeyal ojer kan, pero ndichꞌaꞌa chuqaꞌ pa ruwiꞌ ri Cristo y pa qawiꞌ roj, ri roj ralkꞌuaꞌl ri Dios. 33Pero tikꞌoxomaj kꞌa chuqaꞌ reꞌ: Rix achiꞌaꞌ, tiwojoꞌ ri iwixjayil, achel ndiwojoꞌ iwiꞌ rix, y ri ixaq tuyaꞌ pa ránima chi ri rachijil kin kꞌo ruqꞌij chuwech.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index