Search form

Gálatas 1

Ri Pablo nduteq ruxunaqil kiwech ri hermanos

1Riyin Pablo jun apóstol ri ma wineq ta echaꞌayon y etaqayon wichin chin nibꞌen ri rusamaj ri Ajaw. Ri etaqayon wichin ja ri Jesucristo y ri Tataꞌaj Dios+ ri xkꞌastajbꞌan pe ri Jesucristo chikikajal ri animaꞌiꞌ.+ 2Riyin y konojel ri hermanos ri ekꞌo wikꞌin,+ ndiqateq e ruxunaqil iwech rix ri ralkꞌuaꞌl ri Dios ri ndimal iwiꞌ pa rubꞌiꞌ, ri rixkꞌo pa teq tinamit chin ri rochꞌulew Galacia. 3Ri Qatataꞌ Dios y ri Ajaw Jesucristo kin ta xtikiyaꞌ ki-favor pa iwiꞌ y xtikiyaꞌ chuqaꞌ uxlanen pa iwánima. 4Ri Ajaw Jesucristo xujech riꞌ pa kamik roma ri qamak+ chin xojrukal pa ruqꞌaꞌ ri itzel teq rayinik ekꞌo chochꞌulew wokami. Keriꞌ xubꞌen porque jariꞌ rurayibꞌel ri Qatataꞌ Dios. 5¡Kin ta xtiyoꞌox ruqꞌij rijaꞌ chin jumul! Amén.

Kin xe wi jun rubꞌeyal ri utzulej teq tzij chin kolotajik

6Riyin ndisach nukꞌuꞌx chiwij, porque ja yan paqiꞌ ndiwoqaj jun chik tijonik ri pa itzij ndukꞌen pe kolotajik chiwa y xa ndiyaꞌ kan ri Dios ri xoyon iwichin+ roma ri favor nduyaꞌ ri Cristo. 7Y maneq chik jun rubꞌeyal ri utzulej teq tzij chin kolotajik, pero ri ndajin chiꞌikajal jareꞌ: Ekꞌo jujun wineq ri ndikiyaꞌ tzij pa ixikin chin ndikiqasaj ijolon,+ chin keriꞌ nditaqij jun chik tijonik ri ma junan ta rikꞌin ri utzulej teq tzij chin kolotajik ri xukꞌen pe ri Cristo. 8Pero si riyin, o jun ta chikiwech ri hermanos ri ekꞌo wikꞌin o jun ta ángel+ chin chikaj ndiqatzijoj chiwa jun chik rubꞌeyal ri utzulej teq tzij ri ndukꞌen pe kolotajik chiwa, y ma junan ta rubꞌeyal rikꞌin ri qakꞌutun kan chiwech, kin tiqaqa pa ruwiꞌ ri castigo nduyaꞌ ri Dios. 9Roj qabꞌiꞌin chi kan chiwa y wokami nikamuluj rubꞌixik: Si kꞌo jun xtitzijon chiwa jun chik rubꞌeyal ri utzulej teq tzij ri ndukꞌen pe kolotajik,+ y ma junan ta rikꞌin ri itaqin, kin tiqaqa pa ruwiꞌ ri castigo nduyaꞌ ri Dios.

10Y atoq keriꞌ xinbꞌij chiwa, ma chin ta niwojoꞌ chi utz ngitzꞌat koma ri wineq, xa kin chin utz ngitzꞌat roma ri Dios.+ Riyin ma ja ta ri ndiqaꞌ chikiwech ri wineq ngitajin rikꞌin, porque si keriꞌ ta nubꞌanun pe, man ta yin rusamajel ri Cristo.

Ri Dios nduqꞌalajrisaj ri Jesucristo chuwech ri Pablo

11Hermanos, riyin nibꞌij chiwa chi ri utzulej teq tzij chin kolotajik ri nitzijoj riyin, ma kikꞌin ta wineq pataneq. 12Porque riyin ma jun ta wineq waweꞌ chochꞌulew xbꞌiꞌin chuwa o xirutijoj rikꞌin. Xa kin ja ri Jesucristo ri xqꞌalajrisan chinuwech.

13Porque rix iwakꞌaxan ri xenbꞌanalaꞌ atoq kꞌa yinkꞌo chupan ri ki-religión ri nuwinaqul israelitas, chi rikꞌin nojel woyowal xentzeqlebꞌej ri eralkꞌuaꞌl ri Dios chin xinbꞌen itzel+ chake, chin ta nikꞌis kiqꞌij xinwojoꞌ. 14Riyin más kꞌiy xinwetamaj+ pa ruwiꞌ ri ki-religión ri nuwinaqul ke chikiwech ekꞌiy ri junan xojkꞌiy pe kikꞌin, porque ja yin ri más xbꞌa wánima chirij nojel ri kibꞌiꞌin kan ri ojer teq qawinaqul riꞌ. 15Pero ri Dios ri yin ruchaꞌon pe xe jampeꞌ atoq kꞌajani kinalex,+ xiroyoj chin xinok ralkꞌuaꞌl roma xujoyowaj nuwech. Pero atoq xril ri tiempo ri xrajoꞌ rijaꞌ, 16xuqꞌalajrisaj ri Rukꞌajol chinuwech, chin netzijoj ri kolotajik ri nduyaꞌ rijaꞌ chake ri ma israelitas ta.+ Y atoq keriꞌ xbꞌanatej, ma jun achoq chare xinkꞌutuj razón achike ri utz chi nibꞌen, 17nixta xibꞌa e pa tinamit Jerusalén apeꞌ ekꞌo ri xeꞌok apóstoles más nabꞌey chinuwech. Pa rukꞌexel riꞌ, xinel e pa tinamit Damasco y xibꞌa pa rochꞌulew Arabia, y kꞌajariꞌ xitzolij chik pa Damasco.

Ri Pablo ndubꞌij chi xbꞌa e pa tinamit Jerusalén

18Atoq qꞌaxneq chik oxiꞌ junaꞌ, xibꞌa e pa tinamit Jerusalén chin xbꞌenwetamaj ruwech ri Cefas,* y xikꞌojeꞌ wolajuj qꞌij rikꞌin. 19Chiriꞌ ma jun apóstol más xintzꞌet ruwech, xaxe ri Santiago ri ruchaqꞌ+ ri Ajaw Jesucristo. 20Y chuwech ri Dios nibꞌij chi re nitzꞌibꞌaj e chiwa kin qetzij wi y ma ngireqꞌon ta.

21Kꞌajariꞌ xibꞌa pa rochꞌulew Siria y pa rochꞌulew Cilicia. 22Y chupan ri tiempo riꞌ, ri hermanos ri ndikimal kiꞌ pa rubꞌiꞌ ri Dios pa teq kitinamit pa rochꞌulew Judea, kꞌajani tiketamaj nuwech. 23Xaxe kakꞌaxan chuwij chi riyin ri jun tiempo kan, xentzeqlebꞌej ri kitaqin ri Cristo chin xinbꞌen itzel chake y xinwojoꞌ xinkꞌis kiqꞌij, pero xa kin xjalatej ri nukꞌaslen y wokami nitzijoj chake ri wineq ri utzulej teq tzij chin kolotajik ri ndubꞌij chi ndikꞌatzin ndikitaqij ri Cristo. 24Y ri hermanos riꞌ xkiyaꞌ ruqꞌij ri Dios, roma xjalatej ri nukꞌaslen.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index